Eksodas 31 - Nobonob Baibel

Danab onilah Besalel, Oholiap ele dilah nai

¹ Yawe Nug anam awowa, Nug Moses amegppa inam ele aum.

² “Antte! Da Israel dilag huu okkai Juda ted Besalel, nug Uri bekka, Hur alag amu, da nug uɗat imu hekkunu tituanmi.

³ Da nug tituanen, da nug uɗat kobol ele, nug uɗat amu, laa oh ele hekkunu amu, da dahil Ouɗi, ehah, dabmak ena, doyak ena ele mettami.

⁴ Da nug keeke kobol kobol enanagnab dabma, golppa, o silwappa, o brasppa keeke, nug keeke amu hekkunu elele daakkunu,

⁵ nug men daden nob okkainab ele hoiya, bala golppa, o silwappa maknu hekkunu, nug adppa ele keeke hoikkunu, amu uɗat laa oh haknu doyak okkai ele anam mettami.

⁶ Da Besalel nug amu haknu tituanen, da Israel dilag huu okkai Dannu danab laa, am Ahisamak bekka Oholiap, da nug Besalel ehanidkkunu tituanmi. Da aɗit amu anam tituanaten, da danab uɗat laala haknu doyak okkai ele oh ele, ag uɗat imu, da ag hekkulagnunab ami amu, da ag ele, ag uɗat imu hekkulagnu elele daaglagnu, da ag oh ele doyak mattami.

^7-9 Keeke ag hekkulagnu ami am, dahil mettid haknu peh lag danab ah appa qagmetteb ele, Tituanak Nainu Kunup kontrak inak ele, amunu ameg ele, ameg amuam eheɗ haknu nob nau tiigppa iitta me elele medatte ippunadtte amu, aria keeke laa am dahil peh lakkanu uɗat haknu keeke digdig. Keeke amuam balal ⌊epeɗiaknab⌋, nuhig keeke ele, lam maattaknu balal, gol ena dubuttid iitta eleppa hak, amu nuhig keeke ele, kalu muttuɗig enanag ileb baknu qaɗab, manaknu ofa haknu qaɗab, nuhig keeke ele, amu le layaknu tappiɗ, nug baeg ele.

^10-11 Aria, laa ag hekkulagnu ami am Aron, nug bekkod ele, ahilag lamen akkak, amuam mana mettak danab Aronnu lamen, da noolppa uɗat hekkunu dahilnu tituanak daatte, amu nug bekkod, ag mana mettak uɗat hekkulagnu lamen ele, aria laittaknu goɗen, amu kalu muttuɗig enanag, ag amu lag Oo Gun Eleppa mekkulag. Amuam keeke digdig da ag hekkulagnunab ami amu, ag da amibianab heig!” awa aum.

Sabatnu ɗo

¹² Yawe Nug Moses amegppa anam awowa, Nug nai tuɗitta aum.

¹³ “Na Israel danab ah amelagppa inam a! ‘Ag dahil Sabat ohnu amu, ag deɗ amu dabmenana, da ɗo deɗ amunu mattami amu, ag amu dim lamitteg! Aɗinu? Da am Yawe, da hei, ag dahilnu tituanak daatteb, amu Sabat deɗ, deɗ amuam da ag ele gamagppa amunu at hanhan, buɗub buɗub doobob, anamib daakku.

¹⁴ Sabat deɗ am deɗ dahilnu tituanak daatte amunu, ag amu dabmenan, deɗ amunu ɗo da ag mattami, ag amu dim lamitteg! Danab aun laa nug heeb, deɗ amuam dahil neekkakppa dubuttid tak daakku dayeb, ag nug qeppeg mauhaɗ! Amu danab aun nug deɗ amuppa uɗat hekku amu, nug Israel oolagppanu geɗittak daakkuoitte!

¹⁵ Mettid oh ag deɗ eblaih laippu ele uɗat hekkulag, amge deɗ ebqak eblaih aɗit ele amu, amuam Sabat deɗ, am hik awaknu deɗ. Sabat deɗnu amu, da, Yawe da deɗ amunu, dahilnu tituanak daatte anidttem. Danab aun nug Sabat deɗppa uɗat hekku amu, ag nug qeppeg mauhaɗ!

¹⁶ Da ag Israel, da hei, da ag ele ig nug tituanta nai qakkamut amu, ag nug tituana nai qakkak amu dabmenan oippeg, dabmak amu hanhan, buɗub buɗub doobob, haen oh daakkunu at am Sabat amunu, ag Sabatnu dabmenana, ɗo oh da deɗ amunu mattami amu, ag amu oh dim lamitteg!

¹⁷ Ao, Sabat deɗ amu, da hei, da ag Israel ele nug tituanta nai qakkamut amu, Sabat deɗ am tituanak amunu at hanhannu daakku. Aɗinu? Da, Yawe, da deɗ eblaih laippu ele uɗat hei ukke, hab, wan ele hewoya, am deɗ eblaih aɗitppa uɗat oh malak daye, da hik aomi,’ ” awa aum.

¹⁸ Yawe Nug Sinai qaukoppa Moses amegppa nai amu oh mattia malowa, Nug men maha aɗit ɗo nai yaak niitte, amuppa Nug eppeg doɗoppa nai amu yom amu, Nug Moses men aɗit amu mettom.