Eksodas 30 - Nobonob Baibel

Kalu muttuɗig enanag ileb baknu qaɗabnu nai

¹ Yawe Nug anam anana, Nug baula ele inam aum. “Ag ad akasia aon, qaɗab laa, amuam kalu muttuɗig ena ele manaknu qaɗab, ag amu ele heig!

² Qaɗab amu, elab nuhig am 45 sentimita, emaitak nuhig am 45 sentimita, amu attan nuhig amu 90 sentimita. Elab nuhig, emaitak nuhig ele am laippu anam dayaɗ! Amu keeke makau qeqeɗi bia ⌊waɗele qaɗab agappa, daug waɗeleppa,⌋ amu oh qaɗab ele laippuib daaglagnu ele hoyeg!

³ Ag amu hena, ag qaɗab amu qaɗeppa, daug daug ele, amu makau qeqeɗi waɗele amuppa ele gol ena dubuttid iitta ele aon tonan, gol laa ele aon, bala qaɗab taliliak daakkunu hena, qaɗabppa qataqena, talilidppeg ukkaɗ!

⁴ Ag amu hena, ag qaɗab tuqaippa mawaknu gol ring aɗit hena, tuqai aɗit ring oɗeppa yaalatppeg goya daapeɗ, mawaknu amu, ag ring laa laihppa gol bala qataqak ele waappa qakkon, laa amu ag laihppa gol bala waappa qakkaglag.

⁵ Ag maoglagnu tuqai hekkulagnu amu, ag akasia ad maha aɗit aon hoina, qaɗeppa gol aon tonateg!

⁶ Amu ag amu oh hena malona, ag qaɗab amu dahil mettid haknu peh lag ooppa, Oo Gun Ele, Oo Gunnab Ele makkulaknu lamen guguittak Oo Gun Eleppa meig! Tituanak Nainu Kunup kontrak inak ele, kunup amu ameg, kunup qaɗeppa daatte, ameg amuam eheɗ haknu nob nau tiigppa iitta me elele medatte ippunadtte, da ag ele appa qagmekkunig amu, keeke amu oh am Oo Gun Ele, Oo Gunnab Ele makkulaknu lamen dimugppa Oo Gunnab Eleppa daatteb; amu ag qaɗab lamen amu guguittak, Tituanak Nainu kunup daatte, amu eleleppa, Oo Gun Eleppa meig!

⁷ Ag anam meppeg, aria deɗ oh buttua, Aron nug geha ukka, lam bappalatta, haen amuppa nug kalu danab ile muttuɗig enanag bette ele qaɗabppa maneb, kahug muttuɗig ena taɗ!

⁸ Nug buttua anam hewowa, nug tuebnab lam amotkkunu uɗia, amu haen amu ele nug kalu danab ile muttuɗig enanag bette ele manakku. Am buɗub buɗub doobob, hanhan maɗ ohppa daakkunu, nug buttua da, Yawe, da noolppa kalu danab ile muttuɗig enanag bette ele manom, anamib aakku tueb ele hekku. Ao, dimppa haen oh anamib dayaɗ!

⁹ Amu ag kalu danab ile, muttuɗig enanag bette laa, o doɗ teppu laa, o ee aegnu ofa, o keeke laa, qaɗab amuppa main ii meɗamna; wain gokkaɗaknu ofa ele da meɗaglagnu ii gokkaɗmana. Iitta! Da iikku amibia aakkuib maneg!

¹⁰ Laa amu, maɗ ohppa, haen laippu Aron nug, ⌊amu nug buɗub ele geha ag inam ele hekkulag amu,⌋ nug heeb, qaɗab amu dahil neekkakppa oppiaawak daakkunu, nug ib etta hipunin haknu ofa amu haaha, nug doɗ amunu tiig laih awa, qaɗabppa keeke makau qeqeɗi bia, amuppa maadkku. Ag buɗub buɗub doobob, maɗ ohppa amu, ag anam hekkulagoitte. Da, Yawe, da qaɗab amunu, dahilnu tituanaknab daatte anidttem,” awa aum.

Israel danab oh ag eheɗ haknu nob nau iitta mekkunu men doɗo Yawe mettaglagnu nai

¹¹ Yawe Nug anam anana, Nug nai tuɗitta, Moses amegppa inam aum.

¹² “Na Israel danab onilag aon, uɗugppa yaabppe, danab laib laib oh ag mauhmananu, ag qagaiettak amuppa daamnanu uhuqak aoglagnu, ag men doɗo laa, da meɗaglag amunu, haen ag anam heppeg amu, geha oɗe nau danab kuɗum aqe mauhtteb ele beeb, ag padal ii memana.

¹³ Na danab oh ag onilag yaabppe, ag anen anen 6 gram silwa ofa daakkunu da meɗeg! Silwa amunu uug am, mana mettak lagnu melemel bia dayaɗ! Sekel laippu, aria gera 20 ele, aa oh ahilah uug am laippu

¹⁴ Ao, danab oh maɗ 20, amu maɗ 20 eɗitta tak ele ag goppeg, ag onilag aokkut, aria ag oh men doɗo amu ofa daakkunu da, Yawe, ag da meɗeg!

¹⁵ Ag anam mauhmananu, danab enub ele nug 6 gram silwa eɗittak, okkai ii mema; aria, daɗek danab nug 6 gram silwa, nug amu eɗua honap nak, nug nakok amubia ele ii mema. Iitta. Ag oh melemel laippu, 6 gram silwa, ag amuib ofa daakkunu da Yawe, ag da meɗeg! Amuppa amu, ag qagaiettak amuppa daamnanu uhuqak aoglagnu hekkulag.

¹⁶ Na Israel danab ag qagaiettak amuppa daamnanu uhuqak aoglagnu men doɗo amu da meɗaglag amu, na men doɗo amu ahilagnu aoppe, men doɗo amuam dahil mettid haknu peh lag danab ah appa qagmetteb ele, am lag dahil amu dabmettaknu daakku. Am geha haen oh amuam da Yawe, da hei, Israel danab ag ii mauhppig amu, am amunu at daakku,” awa aum.

Tappiɗ brasppa haknu nai

¹⁷ Amu Yawe Nug anana, Nug Moses amegppa inam ele aum.

¹⁸ “Ag bras aon, le layaknu tappiɗ okkai laa baeg ele hena, ag tappiɗ amu dahil mettid haknu peh lag danab ah appa qagmetteb ele, lag amu, qaɗab ele gamalahppa wanppa meppeg dayaɗ! Tappiɗ okkai amuppa amu, ag le gokkaɗppeg noaɗ!

¹⁹ Aron nug bekkod nid danab ele ag le amuppa eppelag, baelag ele ihaglag.

^20-21 Ag dahil mettid haknu peh lag danab ah appa qagmetteb ele, ag amu ooppa nokkulagnu henana, ag ii mauhmananu ag eppelag, baelag ele ihaglag. O iitta, haen ag Yawenu ɗo maɗoɗnu uɗat hekkulagnu mana mettak laa hekkulagnu qaɗab gumidna wana, Yawe mettaknu aab aɗunu ofa managlagnu henana, ag ii mauhmananu ag eppelag, baelag ele ihaglag. Anam amunu ag, amu buɗub buɗub doobob, ag buɗulkad nid danab ele amu, ag haen oh ɗo amu dim lamitteg!” awa aum.

Laittak goɗen haknu nai

²² Yawe Nug anam awowa, Nug nai tuɗitta, Moses amegppa inam aum.

²³ “Am laa amu, na spais digdig; amuam 6 kilogram mir, 3 kilogram sinamon kalu muttuɗig enanag ele, 3 kilogram keeke qaittobttob bia diig laa muttuɗig ena ele,

²⁴ amu 6 kilogram kalu ag ad kasia gaɗappa heppig, na amu oh awona, aria 4 lita olip goɗen ele aona, na keeke amu oh aon, meppe dayeg! Amu keeke amu ohnu uug am, mana mettak lagnu melemel bia dayaɗ!

²⁵ Na amu oh akkan malan, na laittaknu goɗen dahilnu tituanak daakkunu kabolin autna aoppe, am goɗen amuam muttuɗig enanag, doyak danab hette bia aakku ba daakku. Amuam goɗen dahilnu tituanak dayaya, laittaknu goɗen daakku.

²⁶ Na goɗen amu hewona, na laih aon, dahil mettid haknu peh lag danab ah appa qagmetteb ele, na lag amu Tituanak Nainu Kunup kontrak inak ele, aria

²⁷ balal ⌊epeɗiaknab⌋, keeke balal ⌊epeɗiaknabppa⌋ daatteb ele, amu lam maattaknu balal, nuhig keeke ele, am kalu muttuɗig enanag ileb baknu qaɗab,

²⁸ manaknu ofa haknu qaɗab, nuhig keeke oh ele, am le layaknu tappiɗ okkai, nug baeg ele, na keeke amu oh goɗen gokkaɗakppa tituanatte!

²⁹ Na keeke amu oh dahilnu tituana mettak daaglagnu, na ag dahil daaglagnu tituanna meɗakkut. Meɗappe amu, danab laa, o keeke laa aɗeb amu, danab amu, o keeke amuam ele dahilnu tituanak daakku.

³⁰ Na amu hewona amu, na goɗen amu laih ele aon, Aron, nug bekkod ele, ag mana mettak danab bena, dahil uɗat hekkulagnu goɗen gokkaɗakppa tituanadna, dahilnu tituanna meɗe!

³¹ Na amu hewona, na ⌊da oɗel aona⌋ Israel danab ah amelagppa inam appe doyeg! ‘Gemu, buɗub buɗub doobob, haen amu ele laittaknu goɗen imuam dahil dayaya, dahilnu tituanak daakku; hanhan anamib daakku.’

³² Ag danab hamu qaɗelagppa aib gokkaɗppig, goɗen laa imu hak bianab laa ele aib heppig. Goɗen ib imuppa hak am dahilnu tituanak daatte, amu ag amunu dabmenan oiglag. Ag goɗen imuam dahilnu tituanak daatte dabmenana, dabmak laa aib aoppig.

³³ Danab aun laa nug goɗen imubianab laa hekku, o danab aun nug danab hamu laa, nug mana mettak danab iitta, aun nug danab amu igippa goɗen imu gokkaɗkku amu, ag heppeg, danab amu nug Israel oolagppanu geɗittak daakkuoitte,” awa aum.

Kalu muttuɗig ena ele babaittaknu nai

³⁴ Yawe Nug anam awowa, Nug baula Moses amegppa inam aum. “Na keeke digdig laa muttuɗig enanagnab ele, amuam stakte, onika, galbanum, amu prankinsens dubuttid iitta ele, na keeke amu oh elele eleleib aona,

³⁵ kalu danab ile, muttuɗig enanag bette hekkutnu na keeke amu oh kabolie! Na amu haknu doyak danab hette bia he! Na hewona amu, na yu kalu ele kabolie! Kalu danab ile muttuɗig enanag bette amuam dahilnu tituanak daya, dubuttid iitta ele daya, yu kaboliak ele dayaɗ!

³⁶ Na amu hena, na amunu laa aon, batappe, kalu neeb, na kalu amu dahil mettid haknu peh lag danab ah appa qagmetteb ele, lag amu ooppa aon gona, da noolppa Tituanak Nainu Kunup kontrak inak ele guguittak, aben da na ele qagmekkunih amu, na aguppa me! Na keeke amunu am dahilnu tituanaknab daatte, na amu doye!

³⁷ Ag kalu amubianab laa, ag akka ahilagnu amu aib heppig. Kalu amunu amu, ag, ‘Yawe Nug keeke imunu, am dahilnu tituanak daatte anidtte,’ ag anam doon oiyeg!.

³⁸ Am danab aun laa nug keeke kalu amubianab laa nuhignu, nug muttuɗig enanag amu doya, ena dookkunu heeb amu, geha ag heppeg, nug Israel oolagppanu geɗittak daakkuoitte,” awa aum.