Eksodas 3 - Nobonob Baibel

Yawe Nug Moses uɗat laa hekkunu onigppa eum

¹ Haen amu Moses nug tana Jetro, Midian dilag mana mettak danab amu, nug nuhig sipsip, meeme ele gumadttom. Am haen laa Moses nug sipsip, meeme ele amu diia, atu taɗak obata ⌊qinonob oiya oiya⌋ ukka ukka, nug qauko Horep teum. Qauko amuam Kayaknu.

² Amu Moses nug appa oiyeye, Yawenu engel nug tula, Moses toppa beum, amge Nug miag ii beum. Iitta. Nug aab ewak bia, ad nakok laa eppeg ooppa dayeye, Moses nug ad amuppa aab ewewe anttom, amge nug aab dittia, ad ewa ii malele ele anttom.

³ Antta, aakku Moses ⌊nug dabmak kuɗum awawa,⌋ nug nukka nukka mattia nug aum. “Keeke umu am aɗi keekenab? Da gukkuitten wain, aɗinu aab diditte, amge ad nakok umu ewa ii malatte amu, da anidkkul,” awa aum.

⁴ Amu Yawe Nug Moses ad nakok amu anidkkunu gukkuitta ugekke antta, Kayak Nug baag aab ewak amu ooppanu, “Moses, Moses,” awa aum. A amu, Moses nug aum. “Da iikku daattem,” awa aum.

⁵ Awa a amu, Kayak Nug aum. “Na tuɗidna, aib gukkuiɗna dome,” awa aum. Nug anam anana, Nug nai tuɗitta aum. “Wan na hippaidna daattemppa, amuam dahilnu tituanak daatte amunu, na baen gaɗa meme ele amu, na uɗe!” awa aum.

⁶ Kayak Nug anam anana, Nug nai tuɗitta aum. “Da am na mamenad aɗi anukkanu dilag Kayak. Da Abrahamnu Kayak, da Aisaknu Kayak, amu da Jakopnu Kayak ele,” awa aum. Moses nug amu doya, nug iɗu happutom. Aɗinu? Nug Kayak iɗuppa neekka, mauhmanu baɗom.

⁷ Aria Moses nug anam dayeye amu Yawe Nug Moses amegppa aum. “Danab ah dahilad Isip daatteb amu, Isip danab ag eheɗ hattegeg, da anidmi, gemu ele anidttem. Danab ah dahilad ag Isipnu uɗat gumak danab nau oo doyak iitta ele eppelagppa daaeg, guittak mattaeg gaan, da ehanadkkulnu da onilppa eegeg, da ahilag ewak amu, da doottem. Ag guittak nau, uugnab maoegeg, da dabmettem amunu,

⁸ da dahilad danab ah ehanatten, ag Isip danab eppelagppa qagaiettak daamnanu, da omalatten goppi, wan okkai laappa gona, aon daaglagnu nemi. Wan amuam enanag, wan ittag ele, amuppa ee meu huan otte. Wan amuppa amu, gemu Kanan danab, Hit danab, Amo danab, Peres danab, Hiwi danab, amu Jebus danab ele daatteb.

⁹ Antte! Da Israel danab dilag gayak doyen, Isip danab ag layag ɠagattag iitta ele eheɗ hettak kobol dim lamidnana, Israel dilagppa kobol eheɗ hetteb ele anidmi,

¹⁰ amunu ahe! Gemu da na Paro gumidna gona, amegppa appe, nug dahilad danab ah, Israel, nug ag uuatteb, na omaladppe, Isip uun, ⌊wan laa, da ag madakkul, ag amuppa⌋ gokkulagnu, na meitti gottem!” awa aum.

¹¹ Yawe Nug Moses amegppa anam aum, amge Moses nug Kayak amegppa eɗua aum. “Da danab okkaite, da Paro gumitte ukke, nug amegppa awoya, Israel omaladppi, Isip uun gokkulag?” awa aum.

¹² Amu Kayak Nug inam aum. “Da na ele daagnih. Amu geha na da, da na Israel ehanadkkutnu meitti gome ootppa genab dookkutnu at am, haen na Israel danab ah omaladppe, ag Isip uuglag, haen amuppa ag oh uɗin, ag qauko imuppa da noolppa dup nona binal mekkulag,” awa aum.

¹³ Kayak Nug anam a amu, Moses nug Kayak amegppa inam awa aum. “Haen da ukken, Israel gumatte tein, ‘Ig mamenkad aɗi dilag Kayak Nug da meiɗe, ag gumatte uɗimi,’ appi, ag da, ‘Nug onig aun?’ oɗ meɗaglag amu, da nai aɗi am, ag amelagppa appi dooglag?” awa aum.

¹⁴ Moses nug anam a amu, Kayak Nug oɗeppa awa aum. “Laa hanhan daatte, am daib. Da anam daattem amunu, na Israel danab ah amelagppa, ‘Laa Nug, “Da Daattem,” atte amu, Nug da meiɗe, ag gumatte uɗimi.’ Na anam aon a!” awa aum.

¹⁵ Kayak Nug anam anana amu, Nug nai tuɗitta, Moses amegppa nai imu ele aum. “Na nai amu ag amelagppa awona, na Israel danab ah amelagppa inam ele appe doyeg! ‘Yawe, Nug ag mamelkad aɗi dilag Kayak, amuam Nug Abrahamnu Kayak, Nug Aisaknu Kayak, amu Nug Jakopnu Kayak ele amu, Nug he, da ag gumatte uɗimi.’ Da onil am anam aakku, amu da onil amuam hanhan anamib daakku. Amu Israel danab ag gemu daatteb, ag buɗulkad, alalkad aɗi, dimppa ag bekkulag ele amu, ag oh am da onil am anam ag dabmakppa aɗaglagoitte,” awa aum.

¹⁶ Kayak Nug anam awowa, Nug nai tuɗitta aum. “Amu na gona, Israel dilag ikki danab qagmaadna, na dahilnu ag amelagppa inam appe doyeg! ‘Yawe, Nug ag mamelkad aɗi dilag Kayak, Nug Abrahamnu, Aisaknu, amu Jakop elenu Kayak amu, Nug da gumiɗa na, Nug ahilagnu inam aum. “Da ag anattette, da kobol nau oh Isip ag ahilagppa hetteb amu da amu ele anidmi.

¹⁷ Da kobol nau ag ahilagppa hetteb amu, da amu anidttem amunu, da imu genab hekkulnu nai ain qagattem. Da geha ag Israel, da ag Isip eppelagppanu diiatten, da ag omaladppi, ag gona, Kanan wan aon, ag appa daaglag. Gemu amu danab laala, ag am Kanan, Hit, Amo, Peres, Hiwi, amu Jebus danab ele amu, ag wan amuppa daatteb. Wan amuam enanag, wan ittag ele, amuppa ee meu huana otte,” ’ ” awa aum.

¹⁸ Kayak Nug Moses amegppa, nug Israel dilag ikki danab amelagppa anam akkunu awowa, amu Nug nai baula tuɗitta, Moses amegppa aum. “Na ag amelagppa anam appe amu, geha ag doon, na oɗen dim lamidkkulag. Aria, na Israel dilag ikki danab amu diippe, ag Isip dilag king toppa gona, inam amegppa akkulag. ‘Yawe, Nug am ig Hibru, ihinig Kayak, Nug ig atu taɗakppa gota, doɗ mait, Nug mettata, Nug noobppa dup nota, Nug binag mekkunignu ig gumikka uɗia, ig amenigppa aum amunu, na ig paɗaigppe, ig atu taɗak ooppa deɗ ewam gota teta, appa ig doɗ mait, Yawe mettagnignu oɗ medattem. Nug am ihinig Kayak.’ Ag anam aon aig!

¹⁹ Ag anam akkulag, amge da doottem, laa ɠagattag, okkai ele nug Isip dilag king uug eheɗ nau ii metteb, nug ag paɗualatteb ii gomana

²⁰ amunu, geha, da kobol digdig, danab haknu elele iitta Isip wanppa dahil ɠagattagppa geha heppi, kobol amu Isip danab ah eheɗ oɗoɗadkku. Aria, anam dayeb amu, dimppa Paro nug ag paɗatteb gokkulag.

²¹ Amu da geha heppi, Isip danab ah ag, ag Israel ahilagnu ag ii helob bia me, ag ehanadkkulag amunu, haen ag Isip uun gokkulag, ag hamu iinab gomana.

²² Iitta. Ah ahilkad ag oh gona, Isip ah miag daatteb, amu Isip ah laala ele ag, ag laulkadppa daatteb amu, ag Israel ag Isip ah amu dilagnu lamennu, am bala iɗu iɗu, gol, silwa eleppa haknu oɗ madappeg, amu ag geha keeke amu ag mattaglag. Ag madappeg, ag geha keeke amu aon, ahilkad nid beɗulagppa mekkulag. Ag kobol amu hekkulag, amuppa amu, ag geha Isip dilag keeke huanak aoglag.” Kayak Nug anam aum.