Eksodas 29 - Nobonob Baibel

Moses nug Aron, bekkod ele dilagppa, ag mana mettak danab daaglagnu attem attem hekkunu nai

¹ Yawe Nug nai amu anana, Nug nai tuɗitta aum. “Aron, nug bekkod ele, ag dahil mana mettak danab bena, dahil uɗat amu hekkulagnu amu, da gemu, da na Aron, bekkod ele dilagppa aɗi aɗi laa heppe, ag dahilnu tituana mettak daaglag amu, da amunu na amenppa appi dookkut. Am na inam hekkut. Na makau gaiɗ laippu aon, sipsip dawai aɗit beɗulah enaib ele anatna diiate!

² Na amu diin, na wit plaua enanag ele aon, na plaua laih laappa bret yis iitta hena, amu na plaua amu laih laappa na bret batappatak, yis iitta, goɗen ele kaboliak hena, amu na plaua amu laih laappa na bisket teppu iitta, yis iitta hena, goɗenppa laitte!

³ Na amu oh hena malona, aria na bret digdig amu kaleg laappa inan, na bret amu, makau gaiɗ, amu sipsip dawai aɗit ele diin, da gumiɗna uɗin meɗe!

⁴ Amu dimppa na Aron bekkod ele omaladna gona, dahil mettid haknu peh lag danab ah appa qagmetteb ele, na ag lag amu odppa maadna heppe, ag le layeg!

⁵ Ag le laappeg, na mana mettak danab dilag lamen ag hadappig ele amu, na amu akkan, na lamen amu oh, amuam lamen nakok elab, lamen elab lamen enanag-epod waappa daatte, lamen enanag-epod, momo tonaknu lamen, na lamen amu oh aon, aɗuidppe, Aron beɗuppa noppeg, na lamen imuagppa matagiɗ bia qakkaknu ele aon, lamen enanag-epod qagakkunu nug imuagppa qakke!

⁶ Na amu hewona, na igippa lamen iton, na tappiɗ otala nag golppa hak nai yaak ele, dahilnu tituanak daatte amu, na amu ele aon, na igippanu lamen, na amuppa qakke!

⁷ Na qakkona, na laittaknu goɗen aon, na goɗen gokkaɗakppa tituanidnana, nug mana mettak danab daakkunu goɗen igippa gokkaɗkkut.

⁸ Na Aron anam goɗen gokkaɗakppa tituanona, na nug bekkod omaladna dona, lamen nakok elab, na lamen amu ag beɗulagppa aɗualadppe noppeg,

⁹ ikkilagppan lamen ele ikkilagppa itan, imualagppan lamen ele qakkalatte! Aron, nug bekkod ele ag mana mettak danab daanna, aria danab amu ag, amu ag bekkalkad, alalkad, buɗulkad uma ukkak, nid danab geha mana mettak uɗat amu agib hanhan hekkulag; ɗo anam daatte. Na Aron, nug bekkod ele ib amuppa baɗ madakkut.

¹⁰ Na amu oh hena, na makau gaiɗ main, da meɗakkutnu daatte amu, na makau amu aon, dahil mettid haknu peh lag danab ah appa qagmetteb ele, ag lag amu odppa doppeg, Aron, nug bekkod ele ag eppelag makau igippa meig!

¹¹ Ag eppelag igippa meppeg, na da, Yawe, da noolppa dahil mettid haknu peh lag danab ah appa qagmetteb ele, na lag amu odppa makau amu baag otaɗppe mauhaɗ!

¹² Na qeppe mauheb, na eppen doɗo makau gaiɗ amunu tiigppa meppe noob aon, qaɗabnu qeqeɗi waɗele, na amuppa maattona, tiig laa oh amu laih qaɗab diigppa gokkaɗppe ukkaɗ!

¹³ Na anam hena, dimppa na ittag ooppan keeke aɗak daatte oh aon, gamagnu maha nakok ele aon, aɗitta doɗo aɗit, ittalah ele, na amu ele aon, na keeke amu oh qaɗabppa main da meɗakkut!

¹⁴ Amge makau teppu, gaɗa, biig, biig ooppan biilag amu, na amu oh haen tutu dayaknu aab kalak dimittim aab aɗuppa manappe ewaɗ! Makau amuam ib etta hipunin haknu ofa.

¹⁵ Amu dimppa amu, na sipsip dawai tatamnu aoppe, Aron, nug bekkod ele ag eppelag igippa meppeg,

¹⁶ na sipsip amu baag otaɗppe mauheb, tiig amu na aon, qaɗab gigin waɗele ohppa tauɗppe ukkaɗ!

¹⁷ Na amu hewona, na sipsip amu tuqappe, huppu huppu neeb, baeg, amu ooppan keeke ele leppa ihan, ikki, beɗu maha laa ele oh qagmena,

¹⁸ na sipsip dawai amu oh qaɗabppa main, da meɗe! Amuam da, Yawe, da meɗaknu manaknu ofa. Ao, amuam da, Yawe, da meɗaknu aab aɗunu ofa. Mana mettak amunu muttuɗignu da, Yawe, da oolppa ena doottem.

¹⁹ Amu na amu hewona, na sipsip dawai laa ele aoppe, Aron, nug bekkod ele ag eppelag igippa meppeg,

²⁰ na sipsip amu baag otaɗppe mauheb, tiig laa aon, Aron, nug bekkod ele daulag naɗiap bamippa mewona, eppelag naɗiap doɗo tanig amuppa mewona, amu ag baelag naɗiap doɗo tanig, amuppa ele me! Aria, tiig laa oh daatte amu, na aon, qaɗab gigin waɗele ohppa tauɗppe ukkaɗ!

²¹ Na amu hena malona, dimppa na tiig laa qaɗabppanu aon, laittaknu goɗen ele aon kabolin, na Aron tauɗ qettona, nuhig lamen ele tauɗ qettan, na nug bekkod ele tauɗ aqona, ahilkad lamen ele tauɗ qe! Na anam heppe, Aron, nug bekkod, amu ahilag lamen oh ele am dahilnu tituana mettak daaglag.

²² Aria, na sipsip dawai amunu amu, na nug teppunu ittag aon, nug boob ittag ele aon, na ittag ooppan keeke aɗak daatte oh, na amu ele aon, na gamagnu maha nakok aon, aria aɗitta doɗo aɗit, ittalah ele, na amu oh ele aon, na tuɗi naɗiap ele aokkut. Aɗinu? Doɗ imuam Aron bekkod ele ag mana mettak danab daaglagnu baɗ awaknu doɗ.

²³ Amu na doɗ amunu maha amu oh awona, na kaleg bret yis iitta inak, da, Yawe, da noolppa daatte amu, na amuppanu bret kunum laippu, bret batappatak, yis iitta, goɗen ele kaboliak laippu, amu na bisket teppu iitta, yis iitta, goɗen laittak ele laippu ele aona,

²⁴ na amu oh Aron, nug bekkod ele eppelagppa meppe, geha ag da, Yawe, ag dahilnu huma epponitta mettaknu ofa heig!

²⁵ Ag amu hena malappeg, na keeke amu oh ag eppelagppanu aon, doɗ laa, manaknu ofa dayeye, na qaɗabppa main meɗame ele amu, na keeke ag eppelagppanu aome ele, na amu ele qaɗabppa mane! Amuam da Yawe, da meɗaknu aab aɗunu ofa. Mana mettak amunu muttuɗignu da Yawe, da oolppa ena doottem.

²⁶ Na amu hewona, na sipsip dawai Aron bekkod ele ag mana mettak danab daaglagnu baɗ awaknu doɗ amu, na sipsip amunu momo aon, da, Yawe, da noolppa na huma epponitta mettaknu ofa he! Na amu hena malappe amu, doɗ teppu amuam nahip, na lakkutnu daakku.

^27-28 Amu dimppa, haen oh Israel ag laippu dayaknu ofa hekkulag amu, ag haen oh doɗ amunu teppu maha aɗit, amuam sipsip momo, baeg naɗiapnu tuɗi ele, ag Aron, nug bekkod ele mattaglagnu, na teppu amu dahil daakkunu tituanna meɗe! Aɗinu? Na ag mana mettak danab daaglagnu baɗ awaknu sipsip dawai manan, da meɗame amu, na sipsip amunu momo, baeg naɗiapnu tuɗi ele human meɗame, amubia Israel ag momo, baeg naɗiapnu tuɗi ele aon, ag da meɗaglagnu amu, ag Aron, bekkod ele, teppu amu madappeg, teppu amuam Aron, bekkod ele, dilag dayaɗ! Hanhan anamib daakku.

²⁹ Haen Aron nug mauheb, ag mana mettak lamen nuhig amu buɗub anen anen mana mettak dilag ikki bekkulagnu benana, ag goɗen gokkaɗakppa tituanak daaglagnu, ag mana mettak danab daaglagnu baɗ ele aoglagnu, ag lamen amu madappeg, ag amu takkeg! Lamen amuam dahilnu tituanak daatteb.

³⁰ Ao, haen oh laa nug Aron abenppa mana mettak ikki danab daakkunu aben aokku, nug dahil mettid haknu peh lag danab ah appa qagmetteb ele, nug appa ukka, dahil ɗo maɗoɗnu uɗat Oo Gun Eleppa hekkunu uɗitte amu, nug lamen amu takka, nug deɗ eblaih aɗit ele nug lamen amuib mekku.

³¹ ⌊Amuam butti aɗi lamennu aɗi aɗi hekkulagnu ɗo, amge⌋ gemu haen na Aron, nug bekkod ele ag mana mettak danab digmena daaglagnu baɗ aoglagnu na sipsip dawai main, da meɗakkut ele amu, na sipsip dawai amu teppu aon, na ee hak waa amuppa inan, aɗ mettid haknu peh lag dahil talilidtte, aben amuam dahilnu tituanak daatte amu, na aɗ amu ooppa uhie!

³² Uhippe amu, Aron, nug bekkod ele ag teppu amu, bret kalegppa daatte ele aon, ag dahil mettid haknu peh lag danab ah appa qagmetteb ele, ag lag amu odppa lakkulag.

³³ Amu na Aron, nug bekkod ele mana mettak danab daaglagnu baɗ aoglagnu, ag dahil daaglagnu tituanna meɗakkutnu amu, na haen amuppa doɗ laa main, da meɗakkut, amu na doɗ amu main, da Yawe, da meɗan, amuppa na heppe, eheɗ haknu nob nau doɗ amu tiigppa iitta meeb elele medakkunu heppe, elele medakku. Anam amunu, Aron bekkod ele ag akka ag doɗ teppu amu lakkulag. Danab laa oh am aib lappig. Aɗinu? Ee amuam dahilnu tituanak daatte, ee hamu iitta.

³⁴ Am amunu teppu, bret ele laala dayebeb ukkeb, wagɗeb buttua daakku dayeb amu, ag ee amu ii lamana. Iitta. Ag maippeg ewaɗ! Aɗinu? Ee amuam dahilnu tituanak daatte; am ee hamu iitta.

³⁵ Na Aron, nug bekkod ele ag mana mettak danab bekkulagnu baɗ aoglagnu, na uɗat amu hekkutnu amu, da haknunab amibianab, na deɗ eblaih aɗit amu ohppa amu he!

³⁶ Amu deɗ eblaih aɗit amuppa amu, na deɗ amu ohppa na Aron bekkod ele dilag eheɗ haknu nob nau doɗ tiigppa iitta meeb elele medakkunu, na makau gaiɗ laippu laa, ib etta hipunin haknu ofa daakkunu main meɗe! Na ofa amunu tiigppa heppe, qaɗab oppiak dayebeb, dahil neekkakppa oppiaawak dayaɗ! Na anam hewona, na qaɗab amu dahilnu tituana meɗak daakkunu, na goɗen gokkaɗakppa tituankkut.

³⁷ Na deɗ eblaih aɗit ele ohppa na ib etta hipunin haknu ofa anen anennu tiigppa qaɗab dahil neekkakppa oppiaawak daakkunu babaitte! Na anam heppe, qaɗab amuam dahilnu tituanaknab daakku, amu auntai o aɗitai laa aɗakku amu, amuam dahilnu tituanak daakku.

Deɗ anen anen doɗ keeke, o aɗi aɗi main Yawe mettaglagnu nai

³⁸ Am laa amu, ag deɗ anen anen oh ag sipsip gaiɗ maɗ laippu awak ele aɗit diiatna, qaɗabppa main, da meɗeg!

³⁹ Sipsip laa amu, ag buttua main, da meɗona, laa am tuebnab ag main, da meɗaglag.

⁴⁰ Amu sipsip laa ag buttua main meɗanna, amu ag 1 kilogram plaua enanag aon, 1 lita olip goɗen ena ele aon, plaua ele kabolin, ag sipsip amu ele main meɗaglag. Ag amu hena, ag 1 lita wain ele aon, wain gokkaɗaknu ofa daakkunu qaɗabppa gokkaɗppeg noaɗ!

⁴¹ Aria, tuebnab ag sipsip laa main meɗaglag, amu ag haen amuppa ee aegnu ofa, wain gokkaɗaknu ofa ele buttua heppig bia heig! Mana mettak amuam da, Yawe, da meɗaknu aab aɗunu ofa. Mana mettak amunu muttuɗignu amu, da, Yawe, da oolppa ena doottem.

⁴² Mana mettak amu, amuam manaknu ofa, amu buɗub buɗub doobob, ag amu hanhan maɗ ohppa anamib haknu daakku. Ag hanhan da Yawe, da noolppa, dahil mettid haknu peh lag danab ah appa qagmetteb ele, peh lag amu odppa ag anam hekkulag. Aben amuppa amu, da na ele qagmeɗa, da na ele nai mattignih amu,

⁴³ da aben amuppa, da Israel danab ele qagmekkunig. Binag amahlak oppiaawak ele dahil aguppa daakku amunu, aben amuam dahilnu tituana mettak anam daakku. Am aben hamu iitta.

⁴⁴ Kobol amu ohppa amu, da dahil mettid haknu peh lag danab ah appa qagmetteb ele, da mettid haknu peh lag amu, qaɗab, Aron, amu nug bekkod ele, amu oh dahilnu tituana mettak daaglagnu aakku da heppi, ag anam daaglag. Aron, bekkod ele ag anam daanna, ag dahil mana mettak danab daaglag.

⁴⁵ Am geha da ag Israel oolagppa, ahilag Kayak daakkul.

⁴⁶ Da aben amuppa anam daappi, geha ag da am Yawe, ahilag Kayak, ag anam dooglag. Da dakkaib, da ag oolagppa daakkulnu, da aakku ag Isipnu diien, omalatti uɗippig. Daib am Yawe, ahilag Kayak,” awa aum.