Eksodas 28 - Nobonob Baibel

Mana mettak danab dilag lamen haknu nai

¹ Aria, Yawe Nug nai amu tuɗitta inam aum. “⌊Dimppa na eɗun gona,⌋ na Israel oolagppanu na awan Aron, nug bekkod nid danab, ag am Nadap, Abihu, Eleasar am Itamar ele amu, ag dahil mana mettak danab daaglagnu otiadkkutnu, na ag onilagppa eppe, na gumidna uɗieg!

² Amu danab ag Aron anidna, ag nug am dagom danab, binag ele dooglagnu, ag Aronnu mana mettak lamen amu koitna, Aron metteg! Lamen amuam Yawenu tituanak daaglag.

³ Am danab da ag lamen koitkkulagnu doyak digdig mattami amu, na ag onilagppa ena, amelagppa appe, ag Aronnu lamen, nug mana mettak danab daakkunu otiak daatte, danab ah ippunadkku amu, ag amu heig!

⁴ Ag amu hekkulagnu amu, na ag amelagppa appe, ag momo tonaknu lamen, ag lamen enanag-epod, ag lamen elab, aria lamen nakok elab, ag igippan lamen, amu ag lamen imuagppa matagiɗ bia qagakkunu ele koitatteg! Ag mana mettak lamen Aronnu amu hewona, amu nug bekkod nid danab dilag ele geha hadappeg, ag Aron ele dahil mana mettak uɗat hekkulag. Lamen amu oh am hamu hamu maknu lamen iitta. Iitta. Ag dahilnu tituanak daatteb, Aron bekkod ele ag dahil uɗat hekkulagnu henana, ag takkaglag.

⁵ Am uɗat hak danab ag linen muɗi hakkab, linen muɗi kaala iɗu iɗu, am ed, perpel, kokoɗnab ele, amu, am muɗi golppa hak ele, ag muɗi amu oh aon, aria ag lamen ena amu amuppa heig!

Lamen enanag-epod haknu nai

⁶ Amu lamen haknu danab ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, am muɗi golppa hak ele, ag muɗi amu aona, ag lamen enanag-epod heig! Lamen akkaknu amu, danab ag amu haknu doyak okkainab ele, ag amu hekkulag.

⁷ Lamen amunu amu, ⌊ag momo, gome ele tonaknu qatti aɗit haatona,⌋ ag honap qakkaglagnu ag gukka laih laih tonaknu qatti aɗit ele haatona, amu aria, ag amu lamen laippu daakkunu, ag lamen qatti aɗit laa daug daugppa ele anam koitateg!

⁸ Ag amu hena amu, nuhig lamen nakok elab enanag, imuagppa matagiɗ bia qakkaknu, lamen amuam lamen enanag-epod ele laippu henana, ag laa heppig bia hekkulag. Ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, am muɗi golppa hak ele, ag muɗi amu oh aon, imuagppa qakkaknu lamen heig!

⁹ Aria, ag men oniks aɗit diiatna, ag Israel bekkod 12 onilag amuppa otaɗppeg dayaɗ!

¹⁰ Ag nid tatamnu onig yaan otaɗona, nug dimugppan onig yaan otaɗona, nid 12 oh anamib onilag yaan otaɗadkkulag. Ag nid eblaih laippu ele onilag men laappa yaan otaɗona, amu nid eblaih laippu ele laa am men laappa yaan otaɗeg!

¹¹ Na danab laa nug men daden nob okkainab eleppa nai otaɗak haknu doyak okkainab ele, ag nug uɗat amu medappeg, nug Israel bekkod onilag men aɗit amuppa otaɗeb, aria ag gol aon, aɗalataknu bala enanag nakok aɗit laa hena, ag men aɗit amu maatppeg dayeɗ!

¹² Ag amu hewona amu, ag men aɗit amu lamen enanag-epodnu qatti aɗit gukka laih laih tonat-ttep amu, ag amuppa qakkalatppeg, am geha Israel dilag huu okkai 12 dilag at daaglah. Anam daaglah amunu, am geha Aron nug gugappa ag onilag mawebeb, da Yawe, da anttena, da dahilad danab ah doyeye, deɗ oh dabmekkul.

¹³ Ag men aɗit aɗalataknu keeke bala enanag, kobol kobol ele golppa hatona,

¹⁴ am ag sen aɗit gol ena dubuttid iitta eleppa ele heig! Ag gol amu aon, muɗi akkak bia hena, ag sen aɗit amuppa bala aɗit amu qagateg!

Momo tonaknu lamen haknu nai

¹⁵ Ag amu hena, ag momo tonaknu lamen ele heig! Danab ag lamen akkaknu doyak okkainab ele, ag amu hekkulag. Ag hekkulagnu amu, ag linen muɗi hakkab, linen muɗi kaala iɗu iɗu, am ed, perpel, kokoɗnab ele amu, am muɗi golppa hak ele aon, lamen amu, ag lamen enanag-epod heppig bianab, ag lamen imu ele anamib hekkulag. Lamen imuam mana mettak danab mette ele amu, nug lamen imuppa, keeke laa, keeke amuppa nug Yawenu dabmak doya, ib ena dim lamittaknu doyak aokku amu, nug keeke amu lamen imuppa ina, amuppa Kayaknu dabmak doya mala, danab ah ippunadkku.

¹⁶ Ag lamen imu henana amu, ag elab nuhig amu 44 sentimita hena, emaitak nuhig am 22 sentimita hena, ag lamen amu tutukku gamagppa qeppeg, teppu ele, lamen aɗitnu teppu, teppu anam dayaɗ! Laih laih oh am 22 sentimita daakku.

^17-20 Ag amu hewona amu, ag men daden nob okkainab ele, huu waɗeleppa lamen amuppa qakkalatteg! Huu anuqakppa men rubi, men topas, men ganet ele daaglag. Aria, huu aɗitppa men emeral, men sapaia, men daimon ele daaglag. Huu ewamppa men tekois, men aget, men ametis ele daaglag. Am huu waɗeleppa amu, men beril, men oniks, am men jaspa ele daaglag. Amu ag men amu laib laib bala gol enanag kobol kobol ele amuppa qakkalattona, dimppa ag amuppa men lamenppa qakkalatteg!

²¹ Aria, men 12 amu laib laib ohppa ag Israel bekkod onilag, laa onig am men laappa, laa onig am men laappa, ag anam otaɗadppeg ukkeb, ag Jakop bekkod nid danab 12, ag amu onilag otaɗadna malappeg, ag anen anen Israel dilag huu okkai 12 dilag at dayeg!

²² Aria, ag gol ena dubuttid iitta ele aona, sen aɗit muɗi agatteb bia momo tonaknu lamennu ele haateg!

²³ Ag sen amu hena, ag gol ring aɗit ele hewona, ag ring aɗit amu momo tonaknu lamen amu attan qaɗeppa, daug laih laihppa qakkalateg!

²⁴ Ag amuppa qakkalatona, aria ag gol sen aɗit amu, ag ring aɗit amuppa momo tonaknu lamen daug daugppa qakkalateg!

²⁵ Ag amu hewona, ag gol sen noob aɗit laih laih amuppa amu, gol bala aɗit lamen enanag-epodnu qatti aɗit gukka laih laih tonat-ttep amu, ag bala gukka laih laih amuppa qakkalatona, sen aɗit amu aa aakku momoppa daaglah. Gomeppa am aib daapiɗ.

²⁶ Amu ag gol ring aɗit baula hena, ag momo tonaknu lamen daug laih honap nak daatte, amu waappa daug laih laih lamen enanag-epod qaɗeppa, amge momo tonaknu lamenppa qakkalateg!

²⁷ Aria, ag gol ring aɗit baula ele hena, ag lamen enanag-epodnu qatti aɗit gukka laih laih tonat-ttep amu, ag amunu danab ooppa, gomeppa iitta, daug koitak ele laih laih honap nak daattep, nuhig lamen nakok elab imuagppa matagiɗ bia qakkaknu, amu guguittak, appa qakkalateg!

²⁸ Ag amu hewona amu ag muɗi ed ele aon, ring aɗit momo tonaknu lamenppa qakkatak daattep, amu ring aɗit lamen enanag-epod, amuppa qakkak daattep ele, ag muɗi amu aon, ag ring aɗit aɗit amu, ag muɗi amuppa aɗit aɗit qakkaladkkulag. Aria, ag amu anam qakkaladppeg amu, geha momo tonaknu lamen am ɠagattag, lamen enanag-epod qaɗeppa qataqak, lamen nakok elab imuagppa matagiɗ bia qakkaknu, amu qaɗeppa dayaya, ilul ii ema.

²⁹ Ag keeke amu oh anam heppeg amu, haen Aron nug Oo Gun Ele, nug oo amuppa gokkunu haaha, nug momo tonaknu lamen, amuam Yawenu dabmak doya, dabmak awaknu lamen amu, nug lamen amu uttu taub nuhig guguittak aakku takka, Israel bekkod onilag menppa daatteb amunu, Yawe Nug ag dabmadakkunu, nug ag onilag aakku awa, Yawe daatte abenppa gokku.

³⁰ Amu na Urim, Tumim ele, Aron nug amuppa nug da, Yawe, nug dahil dabmak attem daatte, nug amu dootte ele amu, na keeke aɗit amu ele ahilah abenppa, momo tonaknu lamenppa daattep amu, na aguppa inatppe dayeɗ! Na anam hekkut amu, haen oh Aron nug da, Yawe, nug da gukkuiɗa uɗiebeb, men aɗit amu, aa nug momoppa, uttu taub nuhig guguittak, nug da, Yawe, dahil dabmak doya, dabmedakkunu aakku daaglah amunu, nug Israel dilagnu aɗi dabmak aokkunu daakku dayeb amu, nug aakku aokku.

Lamen laa haknu nai

³¹ Ag amu hena amu, ag lamen elab, lamen enanag-epod waappa mette ele amu, ag lamen amu, lamen ed, otala ele, ag amuppa lamen amu oh heig!

³² Amu ag oɗe ikki nokkunu gamagppanab hewona, ag muɗi laa aon, oɗe amu daugib koitppeg, oɗe daug amu pattiɗmanu, nug teppu ele dayaɗ!

^33-34 Ag hena amu, ag koitaknu muɗi ed, perpel, kokoɗnab ele aon, ag keeke ad pomigranet meu bia akkaladna, ag gol do naunau ele hattana, ag Aronnu lamen elab honap daugppa pomigranet laa qakkan malona, ag gol do qakkaglag. Ag anamib talilidna qagappeg ukkaɗ!

³⁵ Keeke amu anam daappeg amu, haen Aron nug da noolppa dahil ɗo maɗoɗnu uɗat haaha, nug lamen amu takkaɗ! Nug lamen amu takkeb, nuhigppa dayebeb, nug Oo Gun Eleppa da Yawe, da gukkuiɗa, da daattemppa ugakka, aria haen nug eɗua dimittim ele uɗiebeb, geha do naunau amu oqotti okkulag. Nug anam haaha, nug ii mauhma.

³⁶ Laa amu, ag gol ena dubuttid iitta ele, ag gol amu maha laa aon, ag tappiɗ otala nag bia hena, amuppa ag ‘Yawe Nug imunu, nuhignu tituanak daatte anidtte,’ otaɗeg!

³⁷ Ag amu hewona, ag muɗi ed aon, tappiɗ otala nag amu igippan lamen, amuppa qagappeg, geha mana mettak danab, nug uɗappa daakku.

³⁸ Tappiɗ otala nag anam dayeb amu, deɗ oh Aron nug lamen, tappiɗ otala nag amu ele igippa ma, tappiɗ otala nag am nug uɗappa dayebeb, nug mana mettak uɗat nuhig hekku. Aron nug tappiɗ otala nag amu hanhan nug uɗappa meeb dayebeb, Israel ag aɗi ofa dahilnu tituanna meɗatteb, ofa amuam dahilnu tituanak daatte, ag kobol tutukkunab iitta ele ii doonna heppig dayeb amu, da tappiɗ otala nag amu antten, da Yawe, da mana mettak amunu hamu ii doopa. Iitta. Da aokkul.

³⁹ Aria, lamen laa, am lamen nakok elab amu, ag lamen amu, amu igippan lamen ele muɗi linen hakkab aon akkona, ag imuagppanu lamen hewona, ag koitaknu doya autanab awak danab medappeg, nug amuppa kobol kobol koitattaɗ!

⁴⁰ Am laa amu, danab ah ag Aron bekkod ele dilagnu, ag am dagom danab, binalag ele dooglagnu amu, ag amu dilag lamen nakok elab, imuagppan lamen, amu igippan lamen ele akkeg!

⁴¹ Amu Moses na lamen amu na awan Aron, amu nug bekkod ele, na ag bala amu aɗuadppe noppeg, na ag mana mettak danab daaglagnu goɗen gokkaɗakppa tituanadna, baɗ mattan, ag dahil mana mettak danab daan, uɗat hekkulagnu, na ag dahilnu tituanna meɗe!

⁴² Am laa amu, ag ahilag trosis tutu, imuagppanu ukka gategppa batak amu, ag lamen amu linenppa hak koitna madappeg,

⁴³ geha haen Aron nug bekkod ele ag dahil mettid haknu peh lag danab ah appa qagmetteb ele, ag amu ooppa nokkulag, o ag dahil qaɗab gukkuidna, lag Oo Gun Eleppa dahil ɗo maɗoɗnu uɗat hekkulagnu gokkulag amu, ag beɗulagppa aab iitta daaglagnu, da heppi mauhmananu amu, ag trosis ahilag, amu lamen laa oh waappa meig! Ɗo amuam hanhan anam dayebeb, Aron buɗub ele ag anamib heig!” awa aum.