Eksodas 24 - Nobonob Baibel

Nug tituana nai qakkak ɠagattag qaknu nai

¹ Yawe Nug amu oh Moses amegppa mattia mala, dimppa Nug amegppa inam aum. “Na, Aron, Nadap, Abihu, amu Israel dilag ikki danab 70, ag ele, geha ag oh qaukoppa da gumiɗna bena, nakok gukkuiɗna dona, ag nakok piɗe hippaidna daanna, ag dup nona, da binal mekkulag.

² Amu Moses na nakkaib am da gumiɗna dokkut. Ikki danab laala ag da gumiɗna ii domana, amu danab ah ag na ele qaukoppa ii bemana,” awa aum.

³ ⌊Amge Yawe Nug nai amu Moses amegppa ii aum haenppa amu, haen amuppa⌋ Moses nug noa, nug danab ah nai oh Yawe mattiom, amu ɗo oh ele mattom, nug amu oh ele ag amelagppa aum. Nug anam a amu, danab ah oh ag nai amu doon, ag oh oɗelag ooho, ag appig, “Ig geha Yawe Nug keeke oh hekkunignu aumbia amu, ig anamib hekkunig,” aon appig.

⁴ Am Moses nug Yawenu nai amu oh yom. Nug amu he, deɗ amu uue, nug buttuanab aha, qauko amu diigppa qaɗab laa qewowa, qaɗab amu guguitta, nug men 12, Israel dilag huu okkai 12 amu oulag daaglagnu, nug anam diia qappalattom.

⁵ Dimppa nug he, Israel dilag nid danab bau laala ag gona, ag makau gaiɗ, manaknu ofa, laippu dayaknu ofa ele daaglagnu manadna, Yawe medappig.

⁶ Ag mana mettak amu heegeg, Moses nug doɗ amu tiilag awa, tappiɗ laala diia, tiig laih tappiɗ amuppa gokkaɗe no, laih laa, gokkaɗe noum bia, nug laih amu qaɗabppa tauɗe teum.

⁷ Nug anam ha mala, nug nug tituana nai qakkak nainu buk awa, nug danab ah dooglagnu ebqeum. Nug ebqe doona, ag appig. “Ig Yawe aum amu, ig nai amu oh tutukku dim lamidkkunig. Genab, ig Nug oɗe doomut, dim lamidkkunig,” appig.

⁸ Ag anam aeg amu, Moses nug tiig tappiɗ laalappa dayom amu diia, danab ah qaɗelagppa tauɗe ugekke, nug aum. “Yawe Nug nai amu oh matta, amu geha Nug ag ele nai amu atte bia, Nug ag ele nug tituanna nai qagatteb. Aria, tiig imu amu, am nug tituana nai qakkak nai amu ɠagattag qedatte,” awa aum.

⁹ Moses nug amu oh ha male, dimppa nug, Aron, Nadap, Abihu amu Israel dilag ikki danab 70 ele, ag qaukoppa teppig.

¹⁰ Ag tena amu, ag ⌊nakok uma daanna, neekkeg ukke,⌋ Israel dilag Kayak anidppig. Yawe baeg waappa amu, keeke laa dayom, am keeke otala wan tonak laa ele. Keeke amunu amu, neekkak nuhig am men sapaia, amubia; am hab oppiaawaknab, amubia daye anidppig.

¹¹ Israel dilag ikki amu ag Kayak anam anidppig, amge Kayak Nug he, ag ii padal meppig. Aria, dimppa ag aben amuppa ag ee, le ele lappig.

Moses qauko Sinai ta dayom

¹² Amu dimppa, Yawe Nug Moses amegppa aum. “Na qaukoppa bena, da gumuiɗna uɗin daappe, da ɗo men maha aɗit laappa yaami, ɗo amuam danab ah ulum madatte amu, geha da na men maha aɗit amu medakkul,” awa aum.

¹³ Yawe Nug Moses amegppa anam a, aria Moses nug nuhig maɗi nid Josua ele aa ahaya, Moses nug Kayaknu qauko igippa tekkunu teum.

¹⁴ Amge tatam Moses nug Israel dilag ikki danab amelagppa inam aum. “Ag ig daattemppa daanna, i amenih mebeppeg, i eɗuɗ nekkunih. Aron, Hur ele aa ag ele daatteb. Am danab laala, ag danab laa dilagnu oolagppa nai dayeb amu, ag danab aɗit amu gumatna goppeg, aa geha elele mettaglah,” awa aum.

¹⁵ Moses nug nai mattia malowa, nug Sinai qaukoppa te, lombig tatam dayom amu, lombig amu qauko tona dayom.

^16-17 Amu Yawenu binag amahlak oppiaawak ele qauko Sinaippa ne, Israel ag Yawenu binag amahlak oppiaawak ele amu aab ewak okkainab, keeke ewe iitta mette bia anidppig. Am lombig nug deɗ eblaih laippu ele anam qauko amu tona daye, aria deɗ eblaih aɗitppa, Yawe Nug lombig ooppa dayaya, Nug Moses ⌊nuhigppa tekkunu⌋ onigppa eum.

¹⁸ Nug anam e, aakku Moses nug qaukoppa taata, nug lombig ooppa noa, nug qauko igippa ta, nug appa amun 40, tuqan 40 ele dayom.