Eksodas 22 - Nobonob Baibel

Danab laanu keeke gumattaknu ɗo

¹ “Am laa amu, danab laa nug danab laanu makau okkai ebehi ele, o sipsip yab awa, qeeb mauhkku dayeb, o nug heeb, danab laa daden mekku dayeb amu, aria ag heppeg, nug doɗ amu mameg nug makau okkai ebehi ele yab awomnu nob am makau tanig ele metta, o nug sipsip yab awomnu nob amu, nug sipsip waɗele doɗ mameg mettaɗ!

^2-4 Nug amu nob tutukku medakku, amge nug makau okkai ebehi ele, o donki, o sipsip nob mekkunu laa ii daatte dayeb amu, ag nug meppeg, danab laa nug nuhig maɗi nid daakkunu daden meeb, ag men doɗo amu aon, ag danab, laa nug nuhig doɗ yab awom ele amu, ag nug men doɗo amu, nuhignu nob daakkunu metteg! Aria, danab yab heum ele amu, nug makau okkai ebehi ele, o donki, o sipsip yab awom, amge nuhigppa daatte, nug me, laa daden ii meum, o nug ii qeum dayeb amu, nug doɗ yab awom, aria doɗ amubia laa ele oh diiata, nug eheɗ heum am elele medakkunu, nug doɗ yab awom mameg mettaɗ! Aria, yab danab laa nug tuqan lag gilil loppaɗebeb, danab laa nug danab amu aɗa qeeb mauhkku dayeb amu, danab yab danab qe mauhom ele amu, nug am beɗuppa aab iitta. Amge nug amunppa qeeb mauhkku dayeb amu, nug beɗuppa danab nug danab laa qe mauhomnu aab aakku daatte.

⁵ Amu danab nug doɗ nuhikkud heeb gona, nuhig wan maha nakok laappa oinna, o grep dadppa ee lanana, ag tom tippalna, danab laa, nuhig dadppa nona, ee lappeg amu, makau mameg nug nuhig dadppanu ee enanag, o muɗi grep nuhig meu enanag laa awa, nuhig makau ag danab laanu keeke heeg nauhe, ee lappig amu, keeke amunu nob daakkunu keeke amu mettaɗ!

⁶ Danab nug nuhig atuppa aben laa ad naunau qaun ele, nug amu amoteb ewa, naɗi ewa, nuhig tom tippala ukka, danab laanu wit, bali keeke eokku dayeb, o nug wit, bali keeke okkula, qagme dayeye ewom dayeb amu, danab aab amote, ewa ee ewom ele amu, nug ee amu oh nob eɗua, mameg mettaɗ!

⁷ Danab laa nug men doɗo nug layag gumakkun metteb gumebeb, aria yab danab laa nug men doɗo amu yab aweb, dimppa ag yab danab amu mattin anidppeg, yab danab nug men doɗo amu oh nob mekkunu, nug keeke awom bia, nug aɗit amubia mettaɗ!

⁸ Amge ag yab danab amu mattin ii anidna amu, ag danab keeke gumom ele, nug keeke amu yab awomte, o iittate, ag amu dooglagnu, ag nug aon, mettid lakka da noolppa goppeg, da nuhignu ippunadppi dooglag.

⁹ Haen oh nai keekenu, amuam makau okkai ebehi elenu, o donkinu, o sipsipnu o lamennu keeke, haen nai keeke amunu beebe, danab laa nug, ‘Amuam dahil,’ awa atte, amge laa nug ele keeke amunu, ‘Iitta. Am dahil,’ awa atte amu, haen amu oh, diig amunu ag aa omalatna, mettid lakka da noolppa goppeg, da danab aun nug hambuppua, ‘Am dahil,’ atte ele amu, da nug miag atippi, am danab amu nug keeke amu aɗit nug layag eɗua mettaɗ!

¹⁰ Aria, danab laa nug donki, o makau okkai ebehi ele, o sipsip, o doɗ laa, doɗ amu nug ii qettoɗmananu mudippan layag metteb gumebeb, danab laa dayaya ii anttebeb, doɗ amu nug mauhkku dayeb, o nug guittak aokku dayeb, o laa nug yab aokku dayeb amu,

¹¹ aria, aa oh mettid lakka gopeɗ, laa doɗ gumom ele amu, nug da, Yawe, da noolppa, ‘Da Yawe onigppa dahil nai ɠagattag qein attem. Da doɗ amu hei ii nauhom,’ akku, o iitta nug, ‘Da Yawe onigppa dahil nai ɠagattag qein attem. Da doɗ amu yab ii aomi,’ akku. Nug anam awa ab, amu doɗ amu mameg nug oo ena dayebeb, mudippan layag nug doɗ qettoɗppig amu nob aib eɗua mettom.

¹² Amge danab amu nug mudippan layagnu doɗ gumaama, ⌊pehettak ii hekku dayeb,⌋ laa yab aokku dayeb amu, aria nug keeke amu nob tutukku doɗ mameg mettaɗ!

¹³ Amu doɗ dakkuɗ laa doɗ amu qa lab, laa doɗ amu gumom ele nug makau, o sipsip, o doɗ atten amu, nug doɗ amunu huppu laala awa ukka, mudippan layag ippunidkku. Nug anam hekku, am nug makau keeke, doɗ dakkuɗ qeum amu, nug nob layag aib mettom.

¹⁴ Danab laa nug layag nug nuhig makaunu oɗ metteb, nug, ‘Yo’ ab, laa nug awa, nug makau amuppa uɗat heebeb, haen makau mameg nug ii dayebeb, keeke laa makau beɗu heeb nauhkku, o mauhkku dayeb amu, aria mudippan layag nug makau amu daden maɗ!

¹⁵ Amge makau mameg nug layag ele oh daapeɗ, makau amu nauheb amu, mudippan layag nug aib daden meum. Aria, mudippan layag nug tatam men doɗo laa makau uɗatnu makau amu mameg metteb, makau amu nauheb, am aib daden meum. Aɗinu? Men doɗo tatam mettom am doɗ amunu nob.

Tutukku oiyaknu ɗo

¹⁶ Danab laa nug ah, o nid ahin bau nug danab laa ele laa ii niipiɗ, nug danab laa aokkunu baeg ii aɗappig ele amu, nug ah amu nai enappa eeɗeb niipeɗ amu, aria danab amu nug danab ah aoglagnu henana, ahnu en ah mameg medatteb, amubia nug enub anam ah mameg mettaɗ! Metteb amu, ah amu nug wau aakku daakku.

¹⁷ Amge ah mameg nug danab amu nug aɗeg aokkunu uuak dookku dayeb, nug danab amunu, ‘Nug iinab ii aoma,’ ab amu, danab nug ah amu, nuhigppa eheɗ heum amu, nug ah amu mameg nug aokku bia ahnu en mettaɗ! Danab ag ah, o nid ahin bau, danab ele ii niipiɗ ele daden metteb, nug melemel amuppa nug enub medakku, amge ah amu nug nug wau ii daama.

¹⁸ Ah nug eman kobol hette ele, ag nug qeppeg mauhaɗ!

¹⁹ Danab o ah aun nug doɗ ele beɗuppa wanak hettep amu, ag nug qeppeg mauhaɗ!

²⁰ Da am Yawe, amu ag doɗ main, daib meɗeg! Danab laa nug doɗ laa mana, kayak hambuppuak laa medakku dayeb, ag heppeg, danab amu nug dahilnuib, dahil pelemppa dayaɗ!

²¹ Amu ag laa nug wan laihnu danab, ag nug uug aib medappig. Aɗinu? Anukka ag Israel, ag ele anam aakku nug daatte bia, ag Isip appa wan laihnu danab daappig.

²² Ag ah qab, o nid laa anilkad mamelkad mauhppig amu, ag laa amubia, ag ahilagppa aib eheɗ heppig.

²³ Ag laa amubia, ag ahilagppa eheɗ heppeg, ag da amelppa amunu gaappeg amu, da ahilag ewak genabnab genab dookkul.

²⁴ Ag anam heppeg, da doyen, da ool nauheb heppi, kekeɗ ag uɗin, ag eheɗ amu hetteb ele, ag ag aqappeg mauhppeg, ah ahilkad ag am danab iitta hamu daappeg, nid naunau ahilkad amu, ag mamelkad iitta daaglag.

²⁵ Danab o ah dahil laa ag oolagppan nug keekenu tutu mak dayaya, ahilagppanu lon aweb amu, ag danab nug bisnis uɗat ha, lonnu intres aotte amu, ag nug hette bia aib heppig. Iitta. Ag intres laa aib aoppig.

²⁶ Amu danab nug ahilagppanu lon awawa, nug lon amunu onig awak keeke daakkunu nug ulahnu lamen nuhig matteb, aria ag lamen amu deɗ amuppaib, aam nokkunu heebeb, ag eɗun metteg!

²⁷ Aɗinu? Nug ulahnu lamen laippu aakkuib. Nug tuqan beɗu ulah qemanu amuib laidtte amunu, ag eɗun ii mettanna, ag aɗaglag dayeb amu, geha nug tuqan aɗi beɗu laitta niikku? Dahil oo bodoetta le mak kobol danab ah oh dilagppa daatte amunu, haen nug da ehanidkkulnu unuqiɗkku amu, da geha nuhig unuqittak amu doyen ehanidkkul.

²⁸ Da am Kayak, ag dahilnu dabittak nai aib appig. Amu ag ahilag huuppan ikki danabnu, nug eheɗ laa awaknu anak waappa daakkunu aib appig.

²⁹ Ag keeke ebappeg, da heppi, meu okku amu, ag keeke ebappignu meu, wain, olip goɗen ele amu, ag amunu maha ofa daakkunu da meɗaglagnu aib uuppig. Ag uug doon, oolag uug ele da nakok nakokib meɗaglagnu am aib. Ag oo gamag ahak ele, elele meɗaglagnu meɗeg! ⌊Pasowa ebqak 1 haenppa da ag amelagppa amibia amu,⌋ buɗub buɗub doobob, ag ahilkad nid danab tatamnu da meɗeg!

³⁰ Ag makau dawai, amu sipsip dawai tatamnu ele anamib meɗeg! Makau nag dawai, o sipsip nag dawai nug anig ele deɗ eblaih aɗit ele daapeɗ, aria deɗ eblaih ewamppa amu, ag aon qena, main meɗeg!

³¹ Ag danab ah dahilad ag, ag dahilnu, oppiaawak ele daaglagnu daatteb. Ag huu laa bia iitta amunu, ag doɗ laa, doɗ dakkuɗ laa aha qe mauhom, ag doɗ amu aib lappig. Ag aon, qai madappeg laig!