Eksodas 21 - Nobonob Baibel

Ɗo laala maɗi nid maɗi ah ele ehanadkkunu

¹ Yawe Nug anam anana amu, Nug nai tuɗitta aum. “Na ɗo imu Israel danab ah matte!

² Amu ag Israel, ag oolagppanu danab laa nug ahilag huu ooppanu, nug maɗi nid laa nug waappa daakkunu daden mekku dayeb amu, geha maɗi nid amu nug maɗ eblaih laippu ele, nug laa amu, nug nuhig uɗat hekku. Nug anam hekku, amge maɗ eblaih aɗitppa amu, nug okkai nuhig waappa baula ii daama. Iitta. Nug uhuqak daakku. Amu nug tatam men doɗo metta, uhuqak ii aoma. Iitta. Nug uhuqak amu hamu aokku.

³ Okkai nuhig nug daden meeme, nug ah iitta dayom dayeb amu, nug nukka uhuqak aokku. Amge okkai nug daden meeme, nug ah ele awa uɗiom dayeb amu, aa oh aakku uhuqak aoglah.

⁴ Aria, Israel danab nug Israel ted laa anam daden meeb, maɗi nid amu nug okkai nuhig uɗat heebeb, okkai nug nid amu ah metteb, aa oiyya, nid menuglah dayeb amu, maɗ eblaih aɗitppa ah amu, nid menuattom ele, ag am tuɗidna okkainu daaglag. Danab nukka am uhuqak aokku.

⁵ Amge maɗi nid nug, ‘Da naɗi dahilnu ool huan mauhe, da ah dahil, nid naunau dahilad dilagnu ele ool huan mauhe, da ag uuatten, uhuqak aokkulnu ool ii daatte,’ awa ab,

⁶ aria, gumak danab nuhig nug danab amu awa, Kayaknu mettid lagppa, nug amuppa ukka heeb, nid nug od ukku, ad amuppa hibaitta dayebeb, gumak danab nuhig nug tutuippa nug daug bami otuleb, amu geha nid amu nug danab amu, nuhig maɗi nidib dayeb ukkeb, nuhig mauhak batakku.

⁷ Am danab laa nug aɗeg nug danab laan wau amge waunab iitta daakkunu meeb, laa daden meeb, nug anam dayebeb, maɗ eblaih aɗit uueb amu, nuhig okkai nug nid danab maɗi nid daatteb bia uhuqak ii mettama.

⁸ Danab nug ah amuam nug wau amge waunab iitta ele daakkunu daden ma, dimppa nug ah amunu dabmak eɗueb, nuhignu ena iitta dookku dayeb amu, nug ab, ah mameg, o Israel oolagppa auntai laa nug ah amu nug begbeg maɗi ahnu qagaiettakppanu eɗua uhuqak mettaɗ! Danab tatam daden meum ele amu, nug heum am kobol tutukku ii dim lamitta hette amunu, nug heeb, wan laihnu danab, ag ah amu iinab daden memana.

⁹ Am danab nug ah amu nug bekkanu ah daakkunu dabmak awa aotte dayeb amu, aria nug ah amunu nug aɗeg atognotte, amubia nuhigppa hekku.

¹⁰ Am danab nug ah laa, nug wau amge waunab iitta ele daakkunu daden meeb, oipeɗ ukkeb, ah bau laa wau daakkunu aokku dayeb amu, aria nug wau amge waunab iitta, nug ah amu ee medakkunu, lamen medakkunu, nug ele niikkunu am ii uuma. Iitta. Nug amu oh tuɗitta haɗ!

¹¹ Danab amu nug keeke ewam amu ah amu ii medakku dayeb, aria nug ah amu uhuqak hamu medakku. Ah nug danab amu men doɗo metteb gokku am iitta. Hamu gokku,” awa aum.

Laa nug laa makkuɗeb, guittak awa, nob maknu ɗo

¹² Amu Kayak Nug aum. “Danab laa nug danab laa doyaya makkuɗeb, danab amu mauheb amu, danab nug danab laa makkuɗe mauhom ele amu, ag nug genab qeppeg mauhaɗ!

¹³ Amge danab laa nug danab laa makkuɗeb mauhkku, amge nug doyaya ii heum, iitta, da Kayak, da amu bekkunu ib amu oo ii nemi amu, danab layag qe mauhom amu, nug oola ukka, aben da tituane ataɗkkul, nug amuppa wana daakku.

¹⁴ Amuam danab nug layag ii doyaya qe mauhttenu ɗo, amge danab laa nug hekkunu lokkumakppa dabmaama, maittak eheɗ awa, danab laa qeeb mauhkku dayeb amu, ag danab amu qeppeg mauhaɗ! Genab! Nug ena daakkunu qaiqaɗ ukka, dahil qaɗabppa ta aɗakku dayeb am keeke hamu. Ag amu aib dabmeppig. Ag nug amuppanu aon gona, qeppeg mauhaɗ!

¹⁵ Am danab laa nug mameg, o anig makkuɗeb, anig o mameg nug mauhkku, o iitai mauhkku, aria ag danab nug anam heum amu, ag qeppeg mauhaɗ!

¹⁶ Am danab laa nug danab laa lokkumakppa aɗa, nug begbeg maɗi nid daakkunu meeb, laa nug nuhig begbeg maɗi nid daakkunu daden mekku anidna amu, aria ag danab nug laa aɗom ele, ag nug qeppeg mauhaɗ! O nug danab amu lokkumakppa aɗa, laa nug nuhig begbeg maɗi nid daakkunu daden mekkunu dabmette, amge nug amu ii ha malom, nug danab amu aakku aɗa daatte dayeb anidna amu, ag nug layag aɗom ele qeppeg mauhaɗ!

¹⁷ Am danab ⌊nug mamegnu, o anignu oo nauheb,⌋ nug anig, o mameg eheɗ laa aokkunu anak waappa daakkunu akku dayeb amu, aria ag nug qeppeg mauhaɗ!

^18-19 Am danab aɗit laa aa nug aidya, danab laa nug eppeg bitakka, danab laa amu makkuɗtte, o menppa makkuɗtte, amge danab makkuɗom ele nug ii mauhkku dayeb, nug niiak abenppaib dayaya, dimppa nug aha, dudqak hokkat ele dimittim oikku dayeb amu, aria ag danab makkuɗom ele, ag nug aib qeppeg mauhom. Iitta. Amge laa layag makkuɗom, nug layag deɗ gane nuhig uɗat haen okkula, hamu dayom doya, nug amunu men doɗo metta, layag genabnab genab eɗua ena daakkunu keeke oh ele nug mettaɗ!

²⁰ Am danab laa nug nuhig begbeg maɗi nid, o begbeg maɗi ah makkuɗeb, haen amuppa nid amu mauheb, aria, ag gumak danab eheɗ heumnu, ag nug qeppeg mauhaɗ!

²¹ Amge nug begbeg maɗi nid o begbeg maɗi ah amu anam makkuɗeb, deɗ laippu, o aɗit uueb, nug eɗua ena daakku dayeb amu, ag begbeg maɗi nidnu okkai, nug makkuɗom ele, ag nug aib qeppeg mauhom. Aɗinu? Nug nuhig men doɗoppa bappaidkku.

²² Am danab laala ag nug qenana, danab laa nug ah oo ele laa makkuɗeb, am menuak haen iitta, me nug makkuɗkku, diig amunu nid amu dokku dayeb, amge nid, anig ele aa oh ena daaglah dayeb, aria danab ah makkuɗkku ele, nug nuhig eheɗ hak bappaidkkunu, nug nob men doɗo ah gamu amegppa ab, medakku. Amge tatam hettoɗiak danab ag men doɗo ebqak gane amunu doon, ‘Ena, elele,’ appeg, aria dimppa ah gamu nug men doɗo amu aokku.

²³ Amge danab nug ah amu makkuɗeb, uug laa ⌊ahppa o nidppa⌋ daakku dayeb amu, ag nob elele mekkulagnuib inam heig! Laa mauhkku dayeb amu, ag danab nug laa heeb mauhkku ele qeppeg mauhaɗ!

^24-25 Amu laa nug laanu ameg heeb nauhkku dayeb, ag nug ameg heppeg nauhaɗ! O nug laanu aeg heeb qiikku amu, ag nug aeg heppeg qiiaɗ! O nug laanu eppeg heeb nauhkku dayeb amu, ag nug eppeg heppeg nauhaɗ! O nug laanu baeg heeb nauhkku dayeb amu, ag nug baeg heppeg nauhaɗ! O nug laanu gaɗa kuhakku dayeb amu, ag nug gaɗa kuheg! O nug laanu gaɗa otaɗkku dayeb amu, ag nug gaɗa otaɗeg! O nug laa beɗu laih adekkuppa heeb, hin qekku dayeb amu, ag heppeg, nug gaɗa anamib hin qaɗ!

²⁶ Am danab laa nug maɗi nid, o maɗi ah nuhig ameg ob, ameg nauheb amu, laa ameg nauhom ele amu, nug danab amunu maɗi nid, o maɗi ah baula ii daama. Iitta! Okkai nug he, nug ameg nauhom, amu nob amunu am, danab okkai nug uhuqak medakku.

²⁷ Laa amu, danab laa nug maɗi nid, o maɗi ah nuhig aeg ob, aeg qiieb amu, laa aeg qiiom ele amu nug danab amunu maɗi nid, o maɗi ah baula ii daama. Iitta! Danab okkai nug he, nug aeg qiiom, amu nob amunu am okkai nug uhuqak medakku.

²⁸ Am makau dawai laa qeqeɗippa danab o ah laa yeeb mauheb, aria ag makau amu menppa qeppeg mauhaɗ! Teppu amu ag aib lappig. Amu ⌊makau amu nug deɗ laala anam ii heum dayeb amu,⌋ ag makau mameg nob nau laa ii mettamna.

²⁹ Amge makau dawai amu nug danab ah hanhan yaaladkkunu haaha dayom ele amu, danab ag makau mameg amegppa amunu appig, amge nug aɗ ita, makau aɗppa ii meum dayeb, makau nug danab o ah laa qeqeɗippa yeeb mauhkku dayeb amu, ag makau amu menppa qeppeg mauheb, mameg ele qeppeg mauhaɗ!

³⁰ Ɗo anam daatte, amge mauhom laikkud ag, ‘Yo,’ appeg, makau mameg nug nukka, nug ii mauhmanu, nug laa mauhom ele laikkud ag men doɗo gane mekkunu appeg, nug mauhaknu qagaiettakppanu eɗua uhuqak aokkunu men doɗo amu ag matteb, ag aib qeppeg mauhom.

³¹ Amu makau dawai nug danab laa bekka, o danab laa aɗeg yeeb mauhkku dayeb amu, ag ɗo laippu anamib dim lamidna heig!

³² Amu makau dawai nug begbeg maɗi nid, o begbeg maɗi ah yeeb mauhkku dayeb amu, aria makau mameg nug 300 gram silwa begbeg maɗi nidnu okkai metteb, aria ag makau am menppa qeppeg mauhaɗ!

³³ Aria, danab laa nug moɗ laa oɗe menppa tonak, nug men amu kolakku, o nug moɗ laa awa, nug ii toneb, hamu dayebeb, diig amunu makau okkai ebehi ele laa, o donki laa oɗe amuppa na qa ⌊mauheb⌋,

³⁴ aria, danab nug moɗ oɗe hamu, tonak iitta daakkunu heum ele, nug doɗ amu mameg daden mettowa, doɗ mauhom ele amu, nug doɗ amu awaɗ!

³⁵ Aria, danab laanu makau dawai laa ⌊nug deɗ laippuib aha,⌋ makau dawai danab laanu qeeb mauhkku amu, aa makau amu uupeɗ dayebeb, mepeɗ, danab laa nug makau amu daden meeb, aria men doɗo amu aoya, aa makau mauhom teppu aa tuqaya paniya, elele elele aoya, aa men doɗo amu ele otiya aweɗ!

³⁶ Amge makau dawai amu nug hanhan ban haaha, doɗ laala yaalattom dayeb, nug mameg ele aɗ pehetta ha, aɗppa ii inom dayeb, makau dawai amu nug aha, makau dawai laa yeeb mauhkku dayeb amu, aria makau mameg nug makau mauhom mameg men doɗo makau amunu elele metta, aria makau mauhom amu, nug awaɗ!”