Eksodas 20 - Nobonob Baibel

Yawe Nug Israel ɗo 10 mattom

¹ Amu Kayak Nug nai imu oh aum.

² “Da am Yawe, ahilag Kayak. Da ag Isip, ag appa begbeg maɗi nid daaegeg, da appanu diie, omalatti uɗippig.

³ Na da noolppa dup nona binal menana, aib kayak laa ele noobppa dup nona binag meme; daib na da noolppa dup nona, da binal mekkut.

⁴ Na habppan keeke laa, o wanppan keeke laa, o le ooppan keeke laa anidna, na amu dottog laa da abenalppa mekkutnu aib hoime.

⁵ Na dottog hattak laa, na amu noolagppa aib dup nona binag meme. Aɗinu? Da am Yawe, nahip Kayak; da dahilad dilagnu dahil doya laa aomanu doyak aɗe daattem. Da danab ag dahilnu nau ninig ele doon, hipunin hetteb ele amu, da ag bu aqai ukke, ag buɗulkad menuattak huu laippu bia ewam, o waɗele batak, bu qak amunu uug ag ele aqadtte,

⁶ amge danab ah ag oolag da meɗan, dahilnu oolag mauhtte, dahil ɗo ele dim lamidtteb amu, da ahilagnu oo mauhaknab doyeye, da ag buɗulkad menuattak huu laippu bia 1,000 dimppa bekkulag amu, dahil oo mauhak amu, ahilagppa ele daakku.

⁷ Da am Yawe, nahip Kayak. Na da onil hamu aib diime. Aɗinu? Da danab o ah aun nug da onil hamu diitte ele, da nug bu medakkul.

⁸ Na Sabat deɗnu amu, na deɗ hamu iitta, am deɗ da, Yawe, dahilnu tituanak daatte, na amu dabmettanna, ɗo da deɗ amunu mattami dim lamidnana oiye!

⁹ Mettid ohppa na deɗ eblaih laippu ele uɗat henana, na nahip uɗat oh hekkut,

¹⁰ amge deɗ ebqak eblaih aɗit ele, amuam Sabat deɗ, deɗ amunu amu, da Yawe, ahilag Kayak, da ag hik aoglagnu deɗ amu mattami. Deɗ amuam Sabat, na deɗ amuppa uɗat aib heme. Ge, na, nahipad nid, nahipad maɗi nid maɗi ah ele, doɗ nahipad, wan laihnu danab nug uɗia, ag oolagppa daatte amu, ag oh deɗ amuppa uɗat ii hemana.

¹¹ Aɗinu? Da Yawe, da deɗ eblaih laippu ele uɗat hei ukke, hab, wan, yu ele, amu keeke oh amuppa daatteb ele hattami, amge da deɗ ebqak eblaih aɗitppa, da hik aomi. Da keeke amu oh deɗ amuppa hein maloya, da deɗ eblaih aɗitppa hik aomi amunu, da deɗ ebqak eblaih aɗit ele, amuam Sabat aakku, da deɗ amu itittak ena mettoya, dahil daakkunu tituanmi.

¹² Na mamen, anin ele binalah mate! Ge! Na paha ii mauhmananu, na wan laappa, da Yawe, nahip Kayak, da na medakkulnu hettem amu, na appa haen elab daakkutnu, na anam hekkut.

¹³ Na danab aib qeppe mauhom.

¹⁴ Na ewau aib pakkuna gappai heme.

¹⁵ Na yabhok aib heme.

¹⁶ Na hettoɗiakppa, aben laa oh eleppa, na layapnu nai hambuppuak aib mattime.

¹⁷ Na layap laugnu aib amen qeeb aolomnab dabmak eheɗ aome. Laa amu, na layap wau, o nuhig maɗi nid, o nuhig maɗi ah, o nuhig makau okkai ebehi ele, o nuhig donki, o nuhig keeke laala oh ele amu, na aib amen qeeb aolomnab dabmak eheɗ aome.” Yawe Nug nai amu oh Israel danab ah amelagppa aum.

¹⁸ Amu haen danab ah ag hakkaɗ qeeqe, trampet ele heehe doonna, ag amemɗi awa ukka uɗieye, qaukoppa kahug naɗi ahe dayom ele anidna amu, ag eheɗ baɗan, beɗulag hahaɗeɗe, ag eɗun bittumttum gona, nakok uma daanna,

¹⁹ ag Moses amegppa appig. “Kayak Nug na amenppa aɗi nai ab amu, na nakka nai amu ig amenigppa madippe, ig doognig, amge ig mauhmatanu na appe, Kayak Nug ig amenigppa nai baula ii mattima,” aon appig.

²⁰ Ag anam appig, amge Moses nug ag amelagppa aum. “Iitta! Ag aib baɗappig. Aɗinu? Kayak Nug ag nuhig nai tabappeg nemanu hette. Ag nuhig ɠagattag okkai huanak ele anidna, ag nuhignu ebehilag oh bodoetta le meeb, ag hipunin ii hemananu, nug nuhig ɠagattag okkai huanak ele ippunadtte,” awa aum.

²¹ Moses nug anam a, danab ah ag anamib piɗe hippaidna daaegeg, Moses nukka bud hinqak ele, Kayak aguppa dayom amu, Moses nug nukka amuppa gukkuitta teum.

Israel ag kayak hambuppuak dottog ii hemana, ag qaɗab attem hekkulagnu ele, amu dilah nai

²² Moses nug anam te, Yawe Nug Moses amegppa aum. “Na appe, Israel danab ah ag nai dahil imu doyeg! ‘Da hab aabppanu ag amelagppa nai mattimi amu, ag amu doon malappig.

²³ Ag kayak hambuppuak dottolkad aib hoiyadna, ag da noolppa dup nona, da binal menana, kayak amu ele noolagppa dup nona, aib binalag meppig; ag daib noolppa dup nona, da binal mekkulag. Ag kayak hambuppuak noolagppa dup nona binalag mekkulagnu, ag dottolkad golppa, o silwappa ele aib heppig,’ ” awa aum.

²⁴ Yawe Nug anam anana amu, Nug Moses amegppa nug Israel amelagppa ab dooglagnu nai tuɗitta aum. “Ag doɗ main meɗaglagnu amu, ag wan akkan, qaɗab hena, ag qaɗab amuppa main meɗaglag! Ag ahilag manaknu ofa, amu laippu dayaknu ofa ahilag ele, ag amu hekkulagnu ag doɗ sipsip, meeme, amu makau ele ahilag qaɗab amuppaib main meɗaglag. Da aben ohppa da onil mekkul ele amu, da amuppa ahilagppa uɗien, da ag itittak ena madakkul.

²⁵ Ag qaɗab laa menppa qena amu, ag men otaɗa babaittak ele aib aon heppig. Aɗinu? Ag aen maha aon, men amuppa otaɗkkulag dayeb, amuppa ag heppeg, men amuam dahil neekkakppa dubuttid tak ele daakku.

²⁶ Am laa amu, ag qaɗab attan hakppa tekkulagnu adqaɗppa teppeg, danab ah laa ag qanilag anidmananu, ag qaɗab attan aib heppig,” awa aum.