Eksodas 2 - Nobonob Baibel

Mosesnu menuaknu kaya

¹ Amu danab laa, ah laa ele, aa oh am Lewi buɗubppanu, aa ewau matulak aoya daapiɗ.

² Aa ewau beya daapiɗ, dimppa ah amu nug oo ele daya, nug nid danab laa menuom. Menua, nug nid yuɗ amuam nid ena antta, nug kalam ewam lokkume dayom.

³ Amge kalam ewam uue, haen nug nid amu lokkumeb daakkunu am elele iitta antta amu, nug kaleg laa papairusppa akkak, nug amu laa awa, nug gau hinqak ɠagattag diig aɗit awa, laittom. Laittowa, nug nid awa, kaleg ooppa ina, nug awa noa, Nil le daugppa qao ooppa me dayom.

⁴ Nug mewowa ⌊he⌋, nid amu apag, nug piɗe hibaitta dayaya, keeke laa attem beeb anidkkunu dabmetta dayom.

⁵ Nid amu appinag nug anam hibaitta dayeye amu, Paro aɗeg le laakkunu, nug nuhig maɗi ah ele, ag leppa noppig. Aria, maɗi ah ag le ihippa oiyegeg, Paro aɗeg ⌊nug le layom. Le layaya amu⌋ nug qao ooppa kaleg antta, nug he, begbeg maɗi ah laa ukka, awa doum.

⁶ Awa do, Paro aɗeg nug kaleg awa, ameg matula, nug nid yuɗ, nug am nid danab amu, nug nid amu kaleg ooppa niieye anttom. Nug kaleg ameg matule, nid amu gayeye antta, Paro aɗeg nug oo doye, nug aum. “O gadon! Imuam Hibrunu nid laa,” awa aum.

⁷ Paro aɗeg nug anam awa a, amu nid yuɗ apag amu doa, Paro aɗeg inam oɗ mettom. “Da ukke, Hibru ah laa amegppa appi uɗia, nid huh medatta gumakkunu oɗ medakkulte?” awa aum.

⁸ Nug anam a amu, Paro aɗeg nug aum. “Amu elele, na anam he!” Nug anam aum amunu, nid appinag nug ukka, nid anig omala uɗiom.

⁹ Nid anig uɗie amu, Paro aɗeg amegppa inam aum. “Na nid imu aon, huh mettan, atognona meɗappe amu, da geha na daden medakkul,” awa aum. Nug anam aum amunu, ah amu nug nid awa ukka, huh medatta atognoum.

¹⁰ Huh metta atognoono, nid amu nakok ena me, anig huh aɗitta, nug awa ukka, Paro aɗeg mettom. Mette amu, Paro aɗeg nug nid danab amu awe, nuhig nid dayom. Nuhig nid daakkunu awa, nug inam aum. “Da nid leppanu awe bemi amunu, da nid onig Moses ataɗttem,” awa aum.

Moses oola, Midian wanppa ukkom

¹¹ Dimppa Moses nug danab okkai ma, nug ukka, Hibru danab anattom; ag nug ele amu, ag tiilag laippu. Nug ag Paronu uɗat ɠagattag, uug ele heegeg anattom. Nug anam anattette amu, Isip danab laa aha, Hibru danab makkuɗeɗe anatom. Danab guittak awom amu, nug Moses ele aa tiilah laippu; aa oh am Hibru danab.

¹² Moses nug anam antta, nug amimi eɗua, appa danab laa ii anttom amunu, nug pahanab Isip danab amu makkuɗe mauhe, nug ihi haɗa, lokkuma tonom.

¹³ Aria, wagɗe deɗ amuppa Moses eɗua ukka, laikkud uɗat heegeg anattatta oiyeye, nug laikuɗ aɗit laa, aa oh Hibru danab amu, aa nug qeeheh anata, nug danab eheɗ heum ele amegppa aum. “Aɗinu na layap anam makkuɗttem?” awa aum.

¹⁴ Awa a, danab amu nug Moses amegppa aum. “Aun na ig gumignana, ihinig uug bappaidkkutnu meittom? Na Isip ted makkuɗe mauhom bia da oiɗppe mauhkkulnu hettemte?” Moses nug amu a doya, nug dabmak inam awom. “Danab ag keeke hemi genab doon malappig doottem.” Nug dabmak anam awa, nug oo baɗom.

¹⁵ Moses nug danab qe mauhom dimppa, Paro nug Moses keeke heum amu nai oiye doya, makkuɗeb mauhkkunu dabmeum, amge Moses nug amu doya, ⌊nug Paro baɗitta,⌋ nug oola, Midian wanppa ukkom. Nug ukka ta, le moɗ laa giginppa dayom.

¹⁶ Midian wan amuppa amu, mana mettak danab laa dayom, ⌊nug onig Jetro⌋. Nug am aɗekkud eblaih aɗit ele. Ah amu ag ⌊hanhan⌋ uɗin, ag mamelagnu sipsip, meeme ele le lakkulagnu ⌊le moɗ amuppanu⌋ le itan, doɗ dilag le lanak tappiɗppa gokkaɗeg noum.

¹⁷ Ag amu heegeg, doɗ sipsip huu laappan gumak danab ag tuɗid ele uɗin, ⌊nid ahin, sipsip, meeme ahilkad ele⌋ mautadna lamadppig, amge gemu Moses ⌊le moɗ amu daugppa dayaya,⌋ nug aha, ah amu ehanatta, danab amu lamattom. Lamattowa, nug ah amu dilag doɗ sipsip, meeme ele le mattom.

¹⁸ Aria dimppa ag eɗun, mamelag Reuel, ⌊Jetro ele atteb,⌋ amu, ag nug toppa ukkaeg, nug inam awa oɗ mattom. “Aɗinu ag gemu pahanab eɗun uɗippig?” oɗ mattom.

¹⁹ Anam oɗ matte, ag appig. “Isip danab laa nug ig ehanikke, doɗ sipsip gumak danab ag ig ii lamigppig. Amu ele, nug le ita, ihinig doɗ sipsip, meeme ele amu, nug le mattom,” aon appig.

²⁰ Aeg amu danab amu nug aɗekkud inam awa oɗ mattom. “Nug adeppa daatte? Aɗinu ag nug appa uuidppig? Ag gona, nug appeg uɗieb, nug ig ele ee latu!” awa aum. ⌊Aria ag gona, Moses omalna uɗippig.⌋

²¹ Ag anam heeg ⌊ukke, dimppa amu Jetro nug Moses nug ele oh daaglahnu oo dayom amu,⌋ Moses nug ele appa daaglahnu oo daye, “Ena,” awa a, aakku Jetro nug aɗeg laa Sipora awa, Moses mette, aa ewau matulak aopiɗ.

²² Aa ewau matulak aoya oiya, dimppa Sipora nug oo ele daye, nug nid danab laa menuom. Nug nid amu menue, Moses nug nai anana, nug, “Da wan laihnu danab; da dahil wanppa ii daattem,” awa aum amunu, nug nid amu onig Gersom ataɗom.

²³ Aria, maɗ laala ukke, dimppa Isip dilag king ⌊Moses qeeb mauhkkunu dabmeum amu,⌋ nug mauhom, ⌊amge laa nug king abenab awom, nug Israel ii ehanatta, nug king laa heum bia tuɗitte,⌋ Isip ag Israel danab uɗat ɠagattag, uug elenab mattaegeg, Israel ag Isip dilag begbeg maɗi nid maɗi ah daanna, uɗat amu heppig. Amuppa amu, Israel ag uug nau doon gaanna, Kayak ehanadkkunu unuqittegeg, Kayak Nug ag uug nau doon gaappig amu, Nug ahilag gayak amu doyom.

²⁴ Israel ag anam heeg, Kayak Nug ahilag gayak amu doya, Nug hei, Nug Abraham, Aisak, Jakop ele nug tituanna nai qagappig ele amu, Nug tituana nai qakkak nuhig amu dabmeum.

²⁵ Kayak Nug amu dabmaama, Israel neekkatta, ⌊ag naunab daaegeg antta,⌋ Nug ahilagnu oo doye, ⌊Nug ag ehanadkkunu dabmeum⌋.