Eksodas 19 - Nobonob Baibel

Israel ag Qauko Sinaippa tena daappig

^1-2 Israel ag Repidimnu ahan, oin oin gona, Sinainu atu taɗakppa tena, Sinai qauko diigppa, ag haen tutu dayaknu aab kalan daappig. Ag Isip uun, kalam aɗit oin, kalam ewam, deɗ digmakppa ag qauko Sinai diigppa teppig.

³ Aria, Moses nug ⌊Kayak ele aa nai mattiglahnu⌋ qaukoppa ta, ⌊nug Yawe gumitta te,⌋ Yawe Nug qaukoppanu Moses onigppa ewa, nug amegppa aum. “Nai laala na Israel danab ah amelagppa appe dooglagnu am inam. Ao, na Jakop buɗub, na ag amelagppa nai appe dooglagnu am inam.

⁴ ‘Da Isip appa keeke oh ehanatte hei, ag anidppig. Amu ai igel anig nug nakkud yuɗ, nug haugppa mawadtte, amubia da ag mawatte omalatte, aben imuppa, dahilppa uɗimi amu, ag amu oh ele aakku anidppig

⁵ amunu, gemu ag dahil nug tituana nai qakkak ɠagattag aɗan, dahil nai tutukku dim lamidkkulag dayeb amu, ag geha dahiladnab danab ah daaglag. Aɗinu? Wan ohppan danab ah ag ele am dahilad daatteb, ⌊amunu da aun otikkul hein amu, da otikkul⌋.

⁶ Ag anam hekkulag dayeb amu, ag geha dahilnu danab ah tituanak oppiaawak ele daanna, dahil mana mettak danab ele daan, ag dahilnu daaglag.’ Na Israel danab ah amelagppa anam appe dooglag.” Yawe Nug nai amu Moses amegppa aum.

⁷ Yawe Nug anam a, aria Moses qaukoppanu na ukka, Israel dilag ikki danab diia qagmaatta, amelagppa keeke oh, Yawe Nug ag amelagppa madikkununab amegppa aum amu, nug amelagppa mattiom.

⁸ Mattie ⌊ag doon, danab ah amelagppa mattieg,⌋ danab ah oh ag appig. “Ig geha keeke oh Yawe Nug aum amu, ig hekkunig,” aon appig. Aria, danab ah ag anam appig amunu, Moses nug nai ag appig, nug nai amu awa ukka, Yawe toppa teum.

⁹ ⌊Nug ta, ahilag nai amu ii mattie,⌋ amu Yawe Nug Moses amegppa inam aum. “Danab ah ag nai da na amenppa attem dooglagnu, ag hanhan na nai akkut amu, ag oolagppa genab dooglagnu, da geha lombig teppu okkai eleppa nein dayeye, na gumitte neppi, da na ele nai mattignih,” awa aum. ⌊Amu haen⌋ Yawe Nug anam a, Moses nug danab ah nai appig amu, nug nai amu Yawe amegppa mattiom.

¹⁰ Mattia male, Yawe Nug Moses amegppa inam aum. “Na gona heppe, gemu butti ele danab ah imu ag hena, ag dahilnu tituana mettak dayeg! Amu na appe, ag lamen ahilag ihadna,

¹¹ ag laatu buttua, ag da noolppa elele daaglagnu babaittak dayeg! Aɗinu? Deɗ amuppa da Yawe, da geha nein, Sinai qaukoppa daappi, danab ah ag da aniɗkkulag.

¹² Na danab ah ag qauko temananu, na qauko diigppa tom bappaidna, danab ah amelagppa inam appe doyeg! ‘Geha ag tom letan, ooppa nona, qauko iinab temana. Ao, ag qauko diigppa, tom ooppa baelag meppeg ii wama. Laa nug tom amu ooppa qauko aɗeb amu, ag nug genab qeppeg mauhaɗ!

¹³ Amuam ag danab laa tom letakku dayeb, ag qeppeg mauhkkunu amu, ag eppelagppa nug aɗan, ii qemana. Ag nug menppa qeppeg mauhkku, o latppa qeppeg mauhkku. Danab laate, o doɗ laate tom leta, qauko nakoknab tappeb amu, aria ag keeke anamppa nug genab qeppeg mauhkku.’ Ag qauko diigppa tom guguittak wakkulagnu amu, ag trampet gayebeb doonna, haen amuppaib ag tom guguittak gokkulag,” awa aum.

¹⁴ Aria, Moses nug qaukoppanu eɗua, danab ah daappigppa nowowa, nug he, danab ah ag Yawenu tituana mettak daaglagnu hena, ag lamen ahilag ele ihadppig.

¹⁵ Moses nug inam amelagppa aum. “Ag laatu babaittaknab daaglagnu, ag amu henan dayeg! Ag beɗuppa wanak ele aib heppig,” awa aum.

¹⁶ Moses nug anam mattie ukke, deɗ ebqak ewam amuppa, buttua hakkaɗ qeeqe, amemɗi awewe, buttuɗai teppu ele qauko igippa daye, trampet iwalak huanak ele dayom. Anam daye, danab ah oh aabppa daappig amu, ag eheɗnab baɗana, beɗulag hahaɗom.

¹⁷ Anam daye amu, Moses nug danab ah oh ag Kayak ele qagmekkulagnu omalatte, aab dimittim gona, ag qauko diigppa hippaidna daappig.

¹⁸ Amu Yawe Nug aab ewak ooppa na, Sinai qaukoppa dayom amunu, aab kahug naɗi qauko amu oh tonom. Aab kahug attan teum, amuam aab okkainab ewa kahug tette, amubia teum. Kahug anam teete, qauko nug eheɗ hahaɗeɗe,

¹⁹ trampet baag nug okkai me ukke ukke, okkainab meum. Anam heehe amu, Moses nug Kayak amegppa mattie, Kayak Nug baag okkainab, hakkaɗ qak bia, amuppa nob meum.

²⁰ Amu kobol amuppa Yawe Nug Sinai qauko igippa na dayaya, Moses tekkunu onigppa e, aria Moses nug teum.

²¹ Nug te amu, Yawe Nug amegppa aum. “Danab ah ag tom letana, da aniɗkkulagnu bekkulag dayeb amu, kuɗum ag mauhkkulag amunu, ag tom letamnanu na nona, ag amu ii hemananu, na ag nau aomnanu dabmettak nai danab ah oh amelagppa appe doyeg!

²² Genab! Mana mettak danab ag maɗi ahilag hekkulagnu, ag da gumiɗna uɗiglagnu daatteb, amge ag ele tatam dahilnu tituana mettak daaglagnu ag hena, ag gemu dahilppa uɗiglag. Iitta dayeb amu, da eheɗ nau madakkul,” awa aum.

²³ Yawe Nug anam a amu, Moses nug Nug amegppa inam aum. “Na nakka, na ig qauko diigppa tom mekkunignu anana, na danab ah ag qauko imunu, ‘Yawe Nug qauko imu nuhig daakkunu tituanom,’ dooglagnu, amu nau aomnanu dabmettak nai akkunignu ame, am ig hemut. Tom ele aakku daatte amunu, danab ah ag ippa uɗiglagnu elele iitta,” awa aum.

²⁴ Moses nug anam a amu, Yawe Nug eɗua nob ma inam aum. “⌊Iitta!⌋ Na nona appe dooppeg, amu na Aron aoppe, aa oh ippa bekkulah, amge mana mettak danab, am danab ah ele, ag tom iinab letamna. Ag anam hekkulag amu, geha da ag eheɗ nau madakkul,” awa aum.

²⁵ Yawe nug nai amu a, Moses doya, nug danab ah gumatta noa, Yawe nai amegppa aum amu, nug nai amu oh ag amelagppa aum.