Eksodas 18 - Nobonob Baibel

Jetro nug Moses anidkkunu ukkom

¹ Amu Jetro, Midian dilag mana mettak danab, Moses tana amu, Nug keeke oh Yawe Nug Moses Israel ele ehanattatta he, ag Isip uun uɗiegeg, amu Kayak ehanittak laala ele ag mattom amu, Jetro nug amu ohnu nai doyom.

^2-4 Amu Moses nug Midian uuom dimppa amu nug he, nug wau Sipora bekoɗ ele ag eɗun, Sipora mameg Jetro, nug laugppa ukkaeg, Jetro nug, “Ena,” a, ag aguppa daappig. Moses bekoɗ onilah am Gersom, Elieser ele. Amu anukka Gersom nuhig menuak haenppa nug do, Moses nug, “Da am wan laihnu danab, amu da wan laa imuppa daattem,” aum amunu, nug nid amu onig Gersom ataɗom. Aria, Elieser nuhig menuak haenppa nug do, Moses nug, “Mamanu Kayak Nug da ehaniɗe, Paro nug da ii iwe mauhmi,” aum amunu, nug nid amu onig Elieser ataɗom.

⁵ Aria, Jetro nug Kayak, Israel dilagppa ehanittak digdig heum doya, nug he, Moses wau, bekoɗ nid danab aɗit ele ag ahaeg, ag oh atu taɗakppa, Kayaknu qauko guguittak, Moses aɗi ag haen tutu dayaknu aab kalappigppa teppig.

⁶ Amu ag gona tenana, nug nai me, Moses dookkunu ukkom. Nug aum. “Da na tanap Jetro, da na anidkkulnu uɗittem. Da ah nahip, amu nid danab aɗit nahipaɗ ele omalatti, ig oh uɗimut,” awa aum.

⁷ Nug nai anam me ukke, Moses nug ag uɗittebnu nai doya, nug aha ukka, ibppa Jetro uɗa tekkunu ukkom. Nug ukka, Jetro aɗi uɗalag ta, Moses nug tana noobppa gomela, dimppa nug ootuqitte, aa oh attem daapiɗnu mattioya, dimppa amu, aa oh Moses he, sel lag ooppa nopiɗ.

⁸ Noya, Moses nug Yawe, Israel danab ah dilagnu dabmak anuqak awawa he, uug digdig Paro, nuhigppa, Isip danab ah oh ele dilagppa beppig amu, Moses nug amu ohnu nug tana Jetro amegppa mattiom. Nug amunu mattie doye, nug Israel danab ah dilagppa, uug digdig ibppa be, Yawe Nug ag ehanatte, ag ena daappignu ele mattie doyom.

⁹ Jetro nug Yawe Israel danab ah Isip eppelagppanu eɗua diiomnu nai amu oh doya, nug enanagnab doyom.

¹⁰ Jetro Nug nai amu doya, nug aum. “Ig Yawe onig attan humatu! Nug ag ehanatte, ag Paro eppegppa, amu Isip danab ah eppelagppa ele qagaiettak ii daatteb. Ge, Nug nuhikkud danab ah ⌊ag begbeg maɗi nid begbeg maɗi ah ele tuɗidna daamnanu,⌋ Nug ag ehanatte, ag Isip danab eppelagppa qagaiettak ii daatteb.

¹¹ Gemu da doottem, Yawe Nug kayak laa oh eɗattak. Aɗinu? Haen Isip ag beɗuppa tak kobol nau dim lamidnana, ag Israel eheɗ nau hattegeg, Nug Israel ena ehanatta, Isip danab eppelagppanu eɗua diiom,” awa aum.

¹² Am Jetro nug manaknu ofa, Kayak medakkunu awa uɗia, doɗ laala ele mana, Kayak medakkunu awa uɗiom. Nug awa uɗia mana, Kayak mette, Aron nug, amu Israel dilag ikki danab oh ele ag uɗieg, ag Moses tana ele, Kayak noobppa ee lappig.

Moses nug epeɗiak danab laala epeɗiattom

¹³ Aria, ag ee anam lawona, wagɗe deɗ amuppa amu, Moses nug dayaya, Israel danab ah ag uɗin, ahilag uug nug amegppa appeg, nug ahilag nai epeɗikkunu dayom. Danab ah kuɗum buttuanu digmena, Moses gumidna uɗiegeg ukka, tueb meum.

¹⁴ Moses nug danab ah ehanadkkunu uɗat anam he, Jetro antta, amunu elele ii doya, Moses amegppa aum. “Ehe, na danab ah imu dilagnu uɗat huan hettem. Na nakka uɗat anam hettem am aɗinu? Antte! Danab ah oh ag na ele nai mattiglagnu buttua uɗin daaegeg ukke, uudoum. Na anam aɗinu hettem?” awa aum.

¹⁵ Jetro nug anam a, Moses nug amegppa aum. “Danab ah ag Kayaknu dabmak awak attem daatte appi dooglagnu, da gumiɗna uɗitteb amunu, diig amunu, da imu hettem.

¹⁶ Am haen danab aɗit laa aa keeke laanu nug aidya, diig amunu aa da gumiɗya uɗieh amu, da ahilah nai amu oh elele epeɗiatten, nai atten am tutukku, da ai dooeh, da aa Kayaknu ɗo iɗu iɗu ele ai doottep,” awa aum.

¹⁷ Moses anam a, aria Jetro, Moses tana, nug Moses amegppa aum. “Na uɗat hettem amu, na uɗat amu haknu ib ena ii dim lamidttem.

¹⁸ Uɗat amuam uɗat okkainab, na eɗidtte amunu, na nakka hekkutnu am elele iitta. Na nakka anam hettem amu, geha na bahin yeeb, danab oh ele ag bahilag yaakku.

¹⁹ Gemu da na uɗat nahip hekkutnu ulum nai laala appi, na doye! Da appi, na Kayak oɗe bia dookkut dayeb amu, na da attem bia hekkut. Na inam helom. Na Kayak noobppa danab ah dilag anuqak danab daanna, na ahilag uug amu aon, Nug amegppa akkut.

²⁰ Na Kayaknu ɗo iɗu iɗu ag ippunadnana, na Kayak ippu ele tutukku ag ippunadnana, na ag Kayak noobppa aɗi aɗi hekkulagnu daatteb amu, na amu ele ippunadkkut.

²¹ Na anam hekkut, amge na inam ele hekkut. Na danab ah oolagppanu danab ag keeke haknu elelenab daatteb laala, ag Kayaknu ebehilag oh bodoetta le mette, laa ag danab amunu genab elele dooglagnu elele, danab amu ag men doɗo awaknu nai hambuppuak ii mattimna ele amu, na danab amubia otiadna heppe, ag laala danab ah 1,000 gumadna, ahilag okkai daappeppeg, laala 100, laala 50, am laala 10 anam gumadnana, ahilkad ehanittak anuqak danab daaglag.

²² Am geha danab anam amu ag danab dilag epeɗiak danab daanna, danab ah dilag uug nakok digdig ag haen oh bappaidkkulag. Ag akka uug nakok amu hettoɗiakppa bappaidppeg, elele daakku, amge uug okkainu amu, ag na gumidna uɗippeg, na amu bappaidkkut. Ag anam hena amu, geha ag na ehanidppeg, uɗat amunu uug amu, ag oh maonna, geha na nakka, na uug okkainab ii doomna.

²³ Am keeke oh da na hekkutnu amenppa ami amu, Kayak Nug na anam hekkutnunab oo dayeb, na amenppa ab, na da nai ami amu dim lamidkkut amu, aria geha uɗat amuppa na beɗun bahi iinab yaama. Amu na amu doyak danab laala ele, ag danab ah ele dilag eheɗ hak, amu nai ele anam elele bappaidppeg, danab ah ag oolag maɗoɗ ele daanna, ag eɗun lakka ukkadkkulag.” Jetro nug Moses amegppa anam awa aum.

²⁴ Aria Jetro, Moses tana, nug anam Moses amegppa a, Moses nug Jetro nai aum amu doya, nug Jetro aum amubia heum.

²⁵ Nug Israel oolagppa danab keeke haknu elelenab daaeg epeɗiatta, danab ah ameg laala 1,000, ameg laala 100, ameg laala 50, am ameg laala 10 dilag ehanittak anuqak danab daaglagnu otiattom.

²⁶ Nug otiatte, ag hanhan epeɗiak uɗat amu gumappig. Eheɗ hak, am nai nakok amu ele agib bappaidppig, amge eheɗ hak okkai amu, ag danab ah amu omaladna, Moses gumidna ukkaeg, nug babaittom.

²⁷ Anam dimppa amu, Moses tana nug eɗua, laugppa gokkunu he, Moses nug, “Am ena, am nai iitta,” a, Jetro nug eɗua, nuhig wanppa, nug laugppa ukkom.