Eksodas 17 - Nobonob Baibel

Yawe he, le menppanu neum

¹ Israel danab ah oh ag atu taɗak onig Sen uun ukkaegeg, Yawe Nug haknunab a, aria Israel ag ahan, aben laappa gona daaegeg, Yawe Nug haknunab a, ag ahan gona, aben laappa daappig. Anamib aakku henan gona, dimppa ag gona, Repidim tena, appa haen tutu dayaknu aab kalappig, amge aben amuppa le lanaknu laa ii dayeye,

² danab ah ag Moses ele aeg ona aeg do, ag appig. “Le mekke! Ig le lakkunig,” aon appig. Aria, Moses nug eɗua amelagppa aum. “Aɗinu ag da ele nai aut ona aut dotte? Aɗinu ag Yawe ma anttak medatteb?” awa aum.

³ Amge danab ah ag le baalag diie, ag tuɗidna, Mosesnu naittuɗ mena, mattina, ag inam appig. “Aɗinu na ig, nid naunau ihinkad, amu ihinkad doɗ ele ig oh geha le baanig diieb mauhkkunignu Isipnu aigna, omaigna uɗime?” aon appig.

⁴ Aakku Moses nug Yawe amegppa ɠagattag inam unuqittom. “Danab ah imu ag men ena, da oiɗppeg mauhkkulnu hetteb. Ag anam hekkulagnu hetteb amunu, da geha ahilagnu aɗi hekkul?” awa aum.

⁵ Moses nug anam a, aria Yawe Nug Moses amegppa aum. “Na Israel dilag ikki danab laala diippe, ag danab ah noolagppa anuqna gonana, na dudqak hokkat, na anukka Nil le dudqak hokkat amuppa ome amu, na dudqak hokkat amu ele aon ukke!

⁶ Na gobeppe, da geha men laa Horep guguittak daatte amu, da men amu attan daappi, na da gukkuiɗna doppe, da na noomppa daappi, na dudqak hokkat amuppa men amu oppe, geha men amuppanu le beeb, danab ah ag lakkulag,” awa aum. Aria, Israel dilag ikki danab ag Moses anam he, menppanu le be anidppig.

⁷ Israel ag Yawe ma anttak mettan, “Yawe ig ele daattemte?” appig amunu, Moses nug aben amu onig laa, Masa ataɗom. Aria, Israel ag Moses ele nug mehqeppig amunu, Moses nug aben amu onig laa Meriba ele ataɗom.

Israel ag Amalek eɗadppig

⁸ Aria, dimppa amu Repidim appa Amalek ag banelag uɗin, Israel aqaglagnu heeg,

⁹ amu Moses nug danab laa onig Josua amegppa aum. “Na ihinig danab laala otiadppe, ag oh gona, Amalek aqeg! Butti ag anam hebeppeg, da am geha qauko nakok umu igippa hibaittette, da dudqak hokkat, Kayak Nug da maokkulnu aum amu, da amu aɗen daakkul,” awa aum.

¹⁰ Moses nug anam haknunab aum amu, aria amubia Josua nug danab laala diie, ag Amalek aqaglagnu heppig. Amu Moses, Aron, amu Hur ele, ag qauko nakok igippa teppig.

¹¹ Ag tena daanna, haen Moses nug eppeg attan hume ta dayeye, Israel ban daup ag ban hena, Amalek eɗadppig, amge haen nug eppeg paɗe, honap neum amu, aria Amalek ag banppa Israel eɗadppig.

¹² Anam daye, Moses nug eppeg attan hume te daye ukke, nug eppeg dagta mauhe, Moses nug anam eppeg humak ele baula daakkunu elele iitta, amu Aron, Hur ele aa men laa aoya, wanppa meeh, Moses nug men amuppa heɗep na dayeye, aa Moses heqo laih laih hippaidya daayya, aa nug eppeg laplap, amu oh aɗaya, attan humapiɗ. Aa eppeg anam aɗaya daaeheh ukke, aam noum.

¹³ Ag anam heppig amunu, Josua, Israel ele ag banppa Amalek eɗadna aqappig.

¹⁴ Moses, Israel ele ag anam heeg, dimppa Yawe Nug Moses amegppa inam aum. “Dabmak imu iitta memanu amu, na nai imu buk itoɗiakppa yaan, na heppe, Josua nug doyaɗ! Aɗinu? Da geha heppi, Amalek ag iitta mena autna aoppeg, hab waappa amu, danab laa nug Amalek dilagnu baula dab-ii-mema.” Yawe Nug anam aum.

¹⁵ Yawe Nug nai ana male, amu Moses nug qaɗab laa qa, nug qaɗab amu onig, Yawe Nissi, ataɗom.

¹⁶ Moses nug anam ha, nug aum. “Amalek ag Yawe tabappeg nekkunu heppig amunu, Yawe Nug hanhan Amalek ele ban hekku,” awa aum.