Eksodas 16 - Nobonob Baibel

Israel ag ai, ee laa onig maana ele aoppig

¹ Amu Israel ag Isip uun gona, ag Elim tena daaegeg ukke, ahan gonana, kalam ag Isip uun goppig, kalam amu mauhe, dimppa kalam laa amunu, deɗ ebqak 15ppa Israel danab ah oh ag atu taɗak onig Sen, ag amuppa teppig. Aben amuam Elim, Sinai ele gamalahppa daatte.

² Ag atu taɗak amuppa tena oinna amu, Israel oh ag Moses, Aron ele dilah naittuɗ nau mena,

³ ag aa amelahppa inam appig. “Ig Isip daapput, Yawe heeb mauhlom am ena. Aɗinu? Aa ig awigya, omaigya atu taɗak ee iitta ele imuppa enug iqeeb, ig ohnab mauhkkunignu uɗipiɗ. Isip appa amu, ig daatta, ig doɗ teppu, ee iɗu iɗu laa ele elelenab lakkunignu amu, ig aot lamut,” aon appig.

⁴ Ag anam aeg, aria Yawe Nug Moses amegppa inam aum. “Da geha heppi, ee habppanu na qeeb, ag aoglag. Deɗ laib laib anen anen danab ah ag gona, deɗ amunu ee aakkuib ag aoglag. Da geha ag ee madakkul, kobol amuppa da ag ma anttak madappi, ag nai dahil dim lamidkkulag, o iitta am, da dookkul.

⁵ Ag deɗ oh anam hekkulag, amge deɗ ebqak eblaih laippuppa amu, ag inam hekkulag. Ag ee deɗ aɗitnu aon bappaidna, meppeg dayebeb, deɗ laippunu ee deɗ ebqak eblaih laippuppa lawona, laih deɗ laanu, am deɗ eblaih aɗitppa laig!” awa aum.

^6-7 Yawe Nug anam aum amunu, Moses, Aron ele aa Israel danab ah amelagppa inam apiɗ. “I am danabib amunu, aɗinu ag ihinihnu naittuɗ metteb? Ag i ihinihnu naittuɗ meppig, amge ag amuppa genabnab genab ihinihnu naittuɗ mena ii appig. Iitta! Ag nai amuppa Yawenu naittuɗ mena appig. Ag anam heeg, Yawe Nug doyom amunu, tueb Nug heeb, ag geha Yawe Nug nukka ag Isipnu diia, omalatte uɗippig amu, ag amu tutukku dooglag. Butti buttua geha Nug heeb, ag binag amahlak oppiaawak ele nuhig anidkkulag,” aoya apiɗ.

⁸ Aa anam awoya amu, Moses nug nai tuɗitta aum. “Yawe Nug ag nuhignu nai heegeg doyom amunu, Nug tueb ag teppu matteb lakkulag; buttua Nug ee laa matteb, ag labeppeg, ag oolag elele aokku. Yawe Nug ee anam matteb, ag Nug Isipnu omalatta, ippa uɗiom dooglag. Amge ag i amenihppa nai hena atteb amu attemu? I am keeke hamunab. Ag naittuɗ maknu nai maditteb amu, ag nai amuppa aakku Yawe yaatteb. Ag ihinihppa ii hetteb,” awa aum.

⁹ Amu Moses nug Israel danab ah amelagppa anam awowa, nug Aron amegppa inam aum. “Yawe Nug Israel danab ah oh dilag naittuɗ mak doyom amunu, na ag oh amelagppa appe, ag uɗin, ag Nug noobppa dayeg!” awa aum.

¹⁰ Moses nug Aron amegppa anam a, aakku Aron nug Israel oh amelagppa nai mattieye, haen amuppa ag neekkeg, atu taɗakppa ugekke, ag Yawenu binag amahlak oppiaawak ele lombigppa be anidppig.

¹¹ Am Yawe Nug Moses amegppa aum.

¹² “Da Israel dilag naittuɗ mak doyen malami amunu, na ag amelagppa inam a! ‘Tuebnab ag geha teppu lakkulag; aria, buttua amu, geha ag bret lappeg, ag oolag didikku. Ag ee amu lanana, geha ag da am Yawe, ahilag Kayak, ag amu dooglag,’ ” awa aum.

¹³ Yawe anam a, deɗ amu tueb me, ai naunau onig kwel, ag kuɗum uɗin nena, Israel haen tutu dayaknu aab kalan daappigppa, aben amu ambeppig. Aria, buttua amu, aab amu gigin aiɗak gikkiɗahppa baito na dayeye ukke,

¹⁴ le baito amu qaɗaiette, Israel ag keeke naunau kuɗum, ais teppu iittanab bia, wanppa dayeye anidppig.

¹⁵ Haen Israel ag keeke amu anidna amu, ag amu ii dooppig amunu, ag akka akka inam nug oɗ medappig, “Keeke imuam aɗi keeke?” aon appig. Ag anam aegeg, Moses nug ag amelagppa aum. “Yawe Nug ag ee laa madakkunu aum amu; imuam ee amu, Yawe Nug ag lakkulagnu mattom,” awa aum.

¹⁶ Moses nug anam anana, nug nai tuɗitta aum. “Amu Yawe Nug ag inam hekkulagnunab aum. ‘Ag anen anen, ag, amu ag baelkadppa dilagnu ele ee, ahilag lanaknu elele, amuam danab, ah, nid naunau anen anennu lita aɗit, ag anen anennu ee amu aweg!’ Yawe Nug ɗo anam ma aum,” awa aum.

¹⁷ Moses nug Israel amelagppa Yawe oɗe awa, anam mattiom amu, aria Israel ag anam heppig. Laala ag ⌊ahilag ebqak melemelppa⌋ kuɗum aoeg, laala ag ⌊ahilag ebqak melemelppa⌋ nakokib aoppig.

¹⁸ Ag melemel mena amu, danab nug maana kuɗum awom amu, nug kuɗumnab, laa hamu daakkunu iitta. Aria, danab nug nakokib awom amu, nug qakub ii meum. Iitta. Ag oh anen anen ag ahilag melemelppa eleleib aoppig.

¹⁹ Aria, Moses nug ag amelagppa aum. “Ag ee imu butti buttuanu laa aib aon meppeg dayom,” awa aum.

²⁰ Amge danab ah laala ag Mosesnu nai doon ii dim lamidna, ag ee big buttinu aon, meeg dayom. Ag anam heppig, amge wagɗe buttua amu, ee amu gawat qa, uɗig nau oum. Anam heeg amu, Moses nug ahilagnu oo nauhom.

²¹ Anam beum amunu, deɗ oh buttua Israel ag ee aoppig amu, ag lakkulagnu elele aakkuib aoppig. Aria, ag deɗ oh anam heegeg ukke, aam naɗi me amu, ee amu ag ii aoppig, wanppa anam dayeye, aam qe, ee amu eɗua le ma, iitta mettom.

²² Amu Israel danab ah ag deɗ eblaih laippuppa, deɗ aɗitnu ee elele aonna, ag danab anen anennu kilogram waɗele aoppig. Israel ag anam heeg, ahilkad ikki danab ag uɗin, danab ah ag ee anam, Yawe hekkulagnu aumbia aoppig, ag Moses amegppa amunu appig.

²³ Ag amunu aeg, Moses nug ag amelagppa aum. “Yawe Nug buttinu, am inam haknunab aum. Butti am Sabat laa, Sabat amuam Yawenu tituanak daatte; am Yawe binag awaknu. Aria, gemu ag ee otiak laa aabppa maiglagnu oolag dayeb, aria ag maneg! Am otiak laa ag waappa uhiglag dayeb, am waappa uhippeg ewaɗ! Aria, laih ag ii lappeg dayeb amu, ag buttinu meppeg dayaɗ!” awa aum.

²⁴ Moses nug anam mattiom amu, nug haknunab aumbia Israel danab ah ag nug oɗe dim lamidna, ag ee laala heppig amu, ag ee hena, biig uueg dayom amu, ag ee amu deɗ laanu meeg dayom. Aria, deɗ amu uue, deɗ laa uɗie, ee big daye, deɗ laanu meeg dayom amu, ee amu ii nauhom; gawat ele ii qeum.

²⁵ Ee amu ii nauhe, Moses nug Israel amelagppa aum. “Gemu am Sabat; am Yawe binag awaknu amunu, ag tumainu ee ii nauhom ele amu, ag ee amu aon laig! Ag gemu ee laa wanppa ii anidmana.

²⁶ Mettid ohnu deɗ ebqak laippu ukka, eblaih laippu ele batak amu, ag ee aoglag. Aria, deɗ ebqak eblaih aɗit ele, amuam Sabat, amu geha deɗ amuppa ee wanppa ii daama,” awa aum.

²⁷ ⌊Moses nug ee deɗ ebqak eblaih aɗitppa ii daamanu aum,⌋ amge danab ah laala ag ee aoglagnu goppig. Ag goppig, amge ag gona hamu madippig; ee amu laa ii dayom.

²⁸ Ag anam heeg amu, Yawe Nug Moses amegppa aum. “Ag dahil nai, dahil haknunab anak ele dim ii lamidtteb; amu haen gane laa ele ukkeb, ag kobol amu uuglag?” awa aum.

²⁹ Yawe Nug anam a amu, Moses nug danab ah amelagppa aum. “Ag imu doon autna aweg! Aɗinu? Yawe Nug ag deɗ imu, am Sabat, Nug ag mattom amunu, deɗ ebqak eblaih laippuppa amu, geha Nug ag ee deɗ aɗitnu elele madatte. Aria, deɗ ebqak eblaih aɗitppa amu, danab ah oh ag daattebppaib daaglag. Danab o ah laa nug ee wanppanu awaknu dimittim ii goma,” awa aum.

³⁰ Nug anam a amu, danab ah ag deɗ ebqak eblaih aɗitppa hik aoppig.

³¹ Am Israel danab ah ag ee amunu, “maana,” aon appig. Maana am keeke hakkab, ad laa onig koriander, nuhig meu bia. Am nug lanaknu ubuhi am bisket teppu iitta, uppuh leppu ele kabolin hetteb bia anam.

³² Aria, Moses nug Israel amelagppa inam aum. “Yawe Nug haknunab inam aum. ‘Da Isipnu diiatten, omalatti uɗippig, haen amuppa da ag ee imu atu taɗak imuppa mattami amu, buɗub buɗub doobob, ag alalkad, buɗulkad aɗi ele amu, ag dabmattanna, ag buɗulkad aɗi ag amu anidkkulagnu, ag waa hanak nag laippu laa aon, ag maana kilogram aɗit, aguppa inan meppeg dayaɗ!’ awa aum.” Yawe Nug ɗo anam me, Moses nug Israel danab ah amelagppa anam aum.

³³ Moses nug anam Israel danab ah amelagppa awowa, nug Aron amegppa aum. “Na waa hanak laa aon, maana inam, kilogram aɗit waa amuppa inana, na Yawe noobppa meppe dayebeb, geha buɗub buɗub doobob, ag alalkad, buɗulkad aɗi amu dimppa bekkulag ag anidkkulag,” awa aum.

³⁴ Moses nug anam a, aria Aron nug Yawe haknunab nai Moses amegppa aum, Aron nug amubia maana waappa ina, nug waa amu Tituanak Nainu Kunup kontrak inak ele, aguppa daakkunu, amu noobppa meum.

³⁵ Am Israel ag maɗ 40 maana laeg ukke, ag haen amuppa gona, Kanan wanppa, danab ah appa daappig amu, ag daaegeg, ag gona appa tena, ag maana baula ii lappig.

³⁶ Haen amuppa amu, ag melemel diig aɗit ele. Laa onig oma, am kilogram aɗit. Aria, laa onig Epa amu, nug am 20 kilogram.