Eksodas 15 - Nobonob Baibel

Mosesnu Ahi

¹ Haen amuppa Moses nug Israel danab ah ele ag Yawenu ahi laa inam edappig. “Da Yawenu ahi edakkul. Aɗinu? Nug ban naɗinab imu eɗittom. Ao, Nug hos, danab hosppa daappig ele akke, yu ooppa noppig.

² Yawe Nug nukka da ɠagattag iukkunu dootte; Nugib da ehaniɗtte amunu, da gamag ahak doye, ahi edattem. Nugib da ehaniɗe, da padal ii mettem. Nug am dahil Kayak, da Nug onig humakkul. Nug am da mamelnu Kayak, da Nug binag okkai humakkul.

³ Yawe Nug am ban daup ɠagattagnab; Nug onig am Yawe.

⁴ Nug Isip ban daup eɗatta, buɗiatte, ag bannu karis oh ele yuppa noppig. Ge! Le Kokoɗppa, appa ban daup ikki anuqak ag ele le lana mauhppig.

⁵ Le naɗi ag tonatta malom. Ao, ag am men bia nona, unuqagnab nona, diig batakppanab noppig.

⁶ O Yawe, na eppen naɗiap am ɠagattag okkai huanaknab, amuppa na kobol okkai heme. Yo, O Yawe, na eppen naɗiap-ppa, na kekeɗ aqadna, oɗoɗadna autna aome.

⁷ Na dagom onin ɠagattag okkai naɗi ele daattem, amu na amuppa, na nahip kekeɗ tabatte noppig. Ao na hee, nahip oo nauhak huanak, aab aɗu bia, amu ag ewatte, ag gikkiɗah bunaɗak aab eotte, ag amubia daappig.

⁸ Na hee, ulah ɠagattag iwale, le nug qagma ta, anam ɠagattag dayom. Ao, genab, ulah nahip le duttuna he, oppate, ib le gamagppa dayom. Ge, ulah nahip he, le nug laih laih gilil bia ɠagattag eppa dayom.

⁹ Kekeɗ ag akka ag onilag human, ag ihinignu appig. ‘Geha ig ag baelag mattat gota aɗualadta, geha ig ahilag keeke ena ena amu aot, ig ihinig huuppa panignig. Aria, keeke oh ig aognignu oonig daatte ele amu, geha ig aognig. Geha ig ag ele qep elabppa heta, ihinig ɠagattagppaib ig ag hepput nauhkkulag.’

¹⁰ Ag anam appig, amge Yawe, na haen laippuib ouɗi iwale, yu nug Isip tonom. Ao, ag am yu naɗi ooppa unuqagnab men bia noppig.

¹¹ O Yawe, kayak laa, na bia, nug adeppa daatte? Am laa iitta! Na oppiaawak daanna, na dagom onin ɠagattag ele daattem. Nahip binag amahlak oppiaawak ele am okkainab, danab ah ag amu anidna, ag amunu ebehilag oh bodoetta le mette Na am keeke danab haknu elele iitta iɗu iɗu kuɗum hettem!

¹² Na eppen naɗiap bahin hee, kekeɗ ag yu ooppa nona, mauhak abenppa goppig.

¹³ Na nahip oo mauhaknab kobol dim lamidnana, na ig Israel, ig Isip dilag begbeg maɗi nidnu qagaiettakppanu eɗua uhuqak hen mekkana, na ig eleleib omaigkkut. Ao, na nahip ɠagattag, na amuppa na ig omaigppe, ig aben nahip, aben amu nahipnu tituanak daatte, ig amuppa gokkunig.

¹⁴ Wanppan wan ohppa danab daatteb amu, ag keeke imunu nai doona, ag huan baɗan, ottaikkulag. Ao, Pilistia ag eheɗ nau baɗaglag.

¹⁵ Edomnu ikki danab ag eheɗ nau baɗaglag. Ao, Moap danab ɠagattag ele amu, ag ebehilag huanaknab hahaɗadkku. Kanan danab ah dilag ɠagattag am eɗua, le mekku.

¹⁶ Ao, baɗak eheɗ nau okkainab ag tonatta daakku. O Yawe, ag nahip ɠagattag anidna, ag toettan daaglag. Ge, ag keeke laa hekkulagnu elele iitta. Ag anam daappeg, nahipad danab ah ig, ig ag qe-eɗadta gokkunignu gottemppa gokkunig. Ao, ag anam daappeg, ig danab ah na Isipnu eɗun awigme amu, ag anam daabppeg, ig qe-eɗadta gokkunig.

¹⁷ Aria, geha na ig omaigna gona heppe, ig ɠagattag daagnig. Ao, ig qauko na aut daatteb, ig amuppa ena daagnig. O Yawe, na nahip dayaknu aben aguppa daakkunu tituanme. Ao, Naɗi, na nahip mettid lag aguppa daakkunu tituanme.

¹⁸ Yawe, na king hanhan daakkut; laa tuqa iinab aoma!” Moses Israel aɗi ele, ag anam ahi edappig.

Miriamnu ahi

¹⁹ Yawe Nug he, Le Kokoɗ gamagppa ib laa qaɗaiettak daye, Israel ag gona, laih teppig, amge Paronu daup ag bannu karis attan daan, ban heppig, daup ag hos attan daan, ban heppig ele, ag Israel dim lamadppig amu, ag ukkaegeg, yu eɗua doa, ag oh tonattom amunu,

²⁰ amu dimppa, propet ah Miriam, Aron appinag, nug ahi ettaknu keeke onig tambarin, nug amu awa uɗalele, ah laala oh ahan, Miriam dim lamidna ukkaeg, Miriam ag ele oh tambarin uɗalnan, ahi ettanna goɗappig.

²¹ Ag amu henena, Miriam nug ag amelagppa ahi inam ettom. “Yawe Nug ban naɗi eɗitta, Nug hos, amu danab hos attan daappig ele, Nug amu oh akke, yu ooppa noppig amunu, ag nuhignu ahi etteg!” awa ahi ettom.

Le aɗit onilah Mara, Elim ele, appa Israel ag naittuɗ meppig

²² Ag amu oh heeg ukke, dimppa Moses nug Israel omalatte, Le Kokoɗ uuna, ag Surnu atu taɗak amu aon gona goppig. Ag am atu taɗak amuppa deɗ ewam oippig, amge ag le laa ii anidppig.

²³ Ag anam oiyona, ag gona, le laa onig Mara teppig, amge le amu lanaknu am nau, oɗelag ninig qeum amunu, ag lakkulagnu elele iitta. Diig amunu le amu onig am Mara.

²⁴ Ag le amu lakkulagnu elele iitta amunu, danab ah ag Mosesnu naittuɗ menan, nug oɗ medappig. “Ig le baanig diitte. Ig aɗi lakkunig?” aon appig.

²⁵ Ag anam heeg, Moses nug Yawe ɠagattag unuqitte, amu Yawe ad laa ippunittom. Ippunitte, Moses nug ad amu awa, leppa mawe no, le amu aakku lanaknu baag elele ba, ena dayom. Amu aben amuppa Yawe Nug Israel aɗi ag ma anttak madatta, Nug ɗo laa ele ag mattom.

²⁶ Nug ag amelagppa aum. “Ag da Yawe, ahilag Kayak, ag dahil nai oh tutukku ena doonna, dim lamidkkulag dayeb, ag dahil haknunab anak, ɗo dahil oh ele dabmenana, amu oh dim lamidkkulag dayeb, da oɗe nau digdig Isip danab ah matte, eheɗ nau hattami bia ii hepa. Aɗinu? Da dakka am Yawe, ahilag Kayak; daib aakku ahilag oɗe amu hei, ag eɗun ena daatteb,” awa aum.

²⁷ Yawe Nug anam a, dimppa Israel ag gona, Elim teppig. Elim appa amu, le qeppuɗia baknu moɗ 12, det pam 70 ele daappig. Appa Israel ag haen tutu dayaknu aab ahilag le moɗ amu gukkuidna kalappig.