Eksodas 14 - Nobonob Baibel

¹ Amu Yawe Nug Moses amegppa inam aum.

² “Na Israel amelagppa appe, ag eɗun gona, yu ihippa Pihahirot guguittak, appa ag haen tutu dayaknu aab kaleg! Aab amuam Mikdol, Le Kokoɗ ele gamalahppa, Balsepon guguittak, appa daatte.

³ Ag anam hekkulag, aria Paro nug geha amu doya, nug geha inam akku. ‘Israel ag atu taɗak eɗidna, laih gokkulagnu ib laa ii anidtteb amunu, ag wan imuppa hamu talilin oitteb.’ Nug anam dabmekku.

⁴ Nug anam ab, geha da heppi Paronu dabmak aakku ɠagattag eppeb, nug geha eɗua, ag diikkunu dim lamadkku. Amge geha da nug, nuhikkud daup ele eɗatten, geha da amuppa, da binag amahlak oppiaawak ele aokkul. Da amu heppi, Isip ag geha dooglag; da dakkaib, da am Yawe,” awa aum. Aria, Israel ag Yawe aum, ag amu dim lamidna, ag eɗun goppig.

⁵ Aria, Israel ag ukkaegeg, laa ag Isip dilag king Paro amegppa, “Israel ag oolna goppig,” aeg doyom, diig amunu nug, nuhikkud ehanittak anuqak danab ele, ag dabmak ahilag eɗue, ag appig. “Aɗinu ig heut, Israel ag ahan goppig? Ig anam hemut amunu, geha ag ihinig uɗat laa ii hemana. Ig kobol kaboliaknab hemut,” aon appig.

⁶ Ag anam mattiona amu, Paro nug aha he, ag nuhig bannu karis babaitteg he, nuhikkud ban daup ele ag oh goppig.

⁷ Nug laa ele oh goppig oolagppan laa am, nuhikkud ban daup ikki ag bannu karis enanag 600 gumappig, amu ban daup ikki laa ag Isipnu bannu karis laa oh gumappig amu, ag oh, bannu karis ahilkadppa daaegeg, Paro ele goppig.

⁸ Yawe Nug he, Isip dilag king Paronu dabmak ɠagattag eppe, Israel ag baɗak iitta ele ukkaegeg, Paro nug nuhikkud daup ele ag dim lamadna goppig.

⁹ Ge! Isipnu ban daup am oh, laa baelagppa oin, ban heppig, laa ag bannu karis attan daan, ban heppig, laa ag hos attan daan, ban heppig amu, ag oh ahan, Israel dim lamadna goppig. Ag gona, Israel ag Le Kokoɗ ihippa, Pihahirot, Balsepon ele guguittak daaegeg amu, Isip ag gona gukkuadna, appa haen tutu dayaknu aab kalappig.

¹⁰ Amu Paro, nuhikkud ban hak daup ele ag uɗin gukkuattegeg, Israel ag amelag human, Isip dilag daup amu anadna, ag eheɗ nau baɗan, ag Yawe ehanadkkunu onigppa eppig.

¹¹ Ag enana amu, ag Moses amegppa inam appig. “Aɗinu na ig hamu omaigna uɗie, ig atu taɗakppa inam daattem? Boumak aben Isip wanppa elele iite daatte amunu, ig aben imuppa mauhkkunignu omaigna uɗimete? Ig Isip daatta mauhlom am ena.

¹² Ig Isip daatta, ig keeke imu geha inam bemanu, ig na amenppa inam iite amut? ‘Ihinignu aib heme! Uuppe, ig Isip dilag maɗi nid maɗi ah ele daatu!’ Ig na amenppa anam iite amut? Aɗinu? Ig anam maɗi nid maɗi ah eleib daalom am ena, ge ig atu taɗak imuppa mauhkkunig, amuam ena iitta,” aon appig.

¹³ Aria, Moses nug danab ah ag anam aeg doya, nug inam ag amelagppa aum. “Ag aib baɗappig. Ag ɠagattag daanna, gemu ag geha Yawe Nug ag ehanadkkunu ɠagattag heeb anidkkulag. Aɗinu? Ag gemu Isip anadtteb umu, ag geha dimppa baula ii anadmana.

¹⁴ Doyeg! Kobol amu bekkunu amu, ag keeke laa ii hemana. Iitta! Ag toettan daappeg, Yawe Nug ag ehanatta, ban hekku.” Moses nug anam aum.

¹⁵ Aria, Yawe Nug Moses amegppa aum. “Na diig aɗinu da onilppa ettem? Appe, Israel ag ahan ukkeg!

¹⁶ Israel ag geha nona, ena gona, wan qaɗaiettakppa laih tekkulagnu amu, na dudqak hokkat nahip human, yu epponppe, geha yu nug oppata, aɗit laih laih ukka, ɠagattag gilil bia daakku.

¹⁷ Amu da Isip ag dim lamadna, le gamagppa gokkulagnu, da ag dabib madette dahil uɗat heppi geha Isip ag ahilag dabmak ɠagattag eppeb, ag nai tappe nak naunab hena, ag Israel dim lamadna wabeppeg, am geha da Paro, aria nuhikkud daup ag baelagppa oinna, ban hetteb, daup ag bannu karis attan daan, ban hetteb, daup ag hos attan daan, ban hetteb ele, da ag oh eɗattoya, am geha da keeke hettem amuppa, da binag amahlak oppiaawak ele aokkul.

¹⁸ Haen da geha Paro, aria nuhikkud daup ele ag bannu karis attan daan, ban hetteb, nuhikkud daup ag hos attan daan, ban hetteb ele eɗatten, amuppa da binag amahlak oppiaawak ele aokkul amu, Isip danab ag da dakka am Yawe dooglag,” awa aum.

¹⁹ Kayak Nug anam a amu, engel nuhig nug Israel daup noolagppa anuqa ukkom ele, nug eɗua uɗia, dimulagppa dayom. Am lombig attan tak, am ele noolagppa anuqa dayom amu, amu ele eɗua ukka, dimulagppa dayom.

²⁰ Amu lombig amu tuqan amuppa Isip, Israel ele gamalahppa dayom. Lombig anam dayaya he, laih Isip daappigppa gatatu dayom, amge laih Israel daappigppa, lombig he, ag amahlakppa daappig. Anam aakku dayom amunu, tuqan amuppa Isip, Israel ele ag nug gumidna wakkulagnu elele iitta.

²¹ Anam daye, Moses nug eppeg attan huma, yu epponitte, tuqan amuppa Yawe Nug he, laih aam bedeppanu ulah ɠagattag uɗia, ulah nug heehe ukke, wagɗom. Ulah amu yu duttune, yu gamagppa oppata, aɗit laih laih ɠagattag gilil bia dayeye, wanppa ib qaɗaiettak dayom.

²² Aria, gamagppa wan qaɗaiettak ena dayeye, Israel ag ena gona, yu amu mataɗna, laih teppig; yu nug oppata, laih laih ɠagattag gilil bia dayeye, ag gamagppa goppig.

²³ Amu Israel ag yu mataɗna waeg, Isip dilag ban daup ag Israel dim lamadna nona gona, ag ele yu mataɗna gona gamagppa goppig; daup ag bannu karis attan ban heppig, amu daup ag hos attan daan, ban heppig ele, ag oh goppig.

²⁴ Ag anam ukkaegeg, Yawe Nug lombig teppu ele attan tak amuppa, aab ewak okkai attan tak eleppa dayeye, wakkaɗkkun miag dayeye, Nug neekke, Isip ban danab dilagppa no, Nug he, dabmak ahilag kabolie, ag eheɗnab baɗappig.

²⁵ Yawe Nug he, bannu karis baelag nauhom amunu, bannu karis ag huan gokkulagnu elele iitta daye, aakku Isip ag appig. “Doyeg! Yawe Nug Israel ehanatta, ig iqakkunu hette amunu, ig pahanab oolta gotu! Ig ag paha uuadkkunig,” aon appig.

²⁶ Ag anam aeg, aria Yawe Nug Moses amegppa inam aum. “Yu eɗua uɗia, Isip dilag daup baelagppa oin, ban hetteb, daup ag bannu karis attan daan, ban hetteb, amu daup ag hos attan daan, ban hetteb ele tonadkkunu amu, na eppen taiettan, yu eppone!” awa aum.

²⁷ Yawe anam a, aria Moses nug eppeg huma, yu eppone, wagkkaɗeɗe, yu pana eɗua uɗia, dayom bia dayom. Isip ag anidna, oolna gokkulagnu ib madippig, amge ag elele iitta. Yawe Nug he, ag oh yuppa mauhadppig.

²⁸ Yawe Nug anam he, yu eɗua pana na, Paronu ban daup ag bannu karis attan daan, ban heppig, daup ag hos attan daan, ban heppig ele, daup oh ag Israel dim lamadna yu gamagppa nona ukkaegeg tonattom. Laippu laa ii dayom; oh mauhppig!

²⁹ Amge Israel amu, ag wan qaɗaiettakppa ena goppig. Yu nug laih laih ɠagattag gilil bia dayeye, ag gona, laih mataɗna teppig.

³⁰ Amu Yawe Nug deɗ amuppa Israel, Isip eppelagppanu eɗua diie, Israel ag Isip danab mauhadppig amu, langppa niiegeg anadppig.

³¹ Aria, Israel ag Yawe Nug Isip eɗatta, uɗat naɗi heum, ag amu anidna, ag nuhignu ebehilkad oh bodoetta le me, ag nuhignu, nuhig maɗi nid Mosesnu ele oolagppa genab dooppig.