Eksodas 13 - Nobonob Baibel

Israel ag nid danab tatamnu Yawe mettaglagnu ɗo

¹ Amu Yawe Nug Moses amegppa inam aum.

² “Ag Israel amu, ag ahilkad nid danab tatamnu oh amu, ag dahil daaglagnu tituanna meɗeg! Ahilkad nid danab tatamnu, amu ahilkad doɗ manan oh nalkad dawai tatamnu ele, amu oh am dahil,” awa aum.

³ Yawe Nug anam a amu, Moses nug Israel danab ah amelagppa inam aum. “Ag Isip daanna, appa begbeg maɗi nid daaegeg, haen amuppa Yawe Nug nuhig ɠagattag amuppa ag Isipnu diia, omalatte uɗippig amunu, haen oh Yawe Nug deɗ imuppa ahilagnu keeke okkainab amu heum, keeke amu ag daulagppa doaɗ! Ag amu daulagppa doobob, ag bret yis ele hak amu, ag aib lappig.

⁴ Gemu am kalam onig Abib, amu ag gemu Isip uutteb amunu,

⁵ Yawe Nug Kanan wan, wan amuppa Kanan danab, Hit danab, Amo danab, Hiwi danab, amu Jebus danab ag daatteb, Yawe Nug ag Israel ag wan amu madakkunu, ag mamelkad aɗi amelagppa nai ɠagattag qetta aum ele, wan amuam wan enanag, wan ittag ele, amuppa ee meu huana otte amu, Nug wan amuppa omalatteb tekkulag amunu, ag maɗ ohppa kalam imu doobob, ag deɗ imu dabmekkulagoitte.

⁶ Ag amu hekkulagnu amu, ag deɗ eblaih aɗit ele daanna, ag deɗ amu ohppa bret yis iitta lakkulag. Aria, deɗ eblaih aɗitppa amu, deɗ amuppa ag Yawe dabmenana, ag qagmak gamag ahak ele heig!

⁷ Deɗ eblaih aɗit ele amuppa amu, ag bret yis iitta aakkuib lakkulag! Ag yis, aria bret yis ele amu, ag amu aib uuppeg, ahilag aabppa, o wanppa dayom.

⁸ Am deɗ naɗi amu haen beeb, ag bekkalkad amelagppa inam akkulag! ‘Yawe Nug keeke oh ha, ig Isip wanppanu aikka omaikka uɗiom amunu, kobol ig hettem imu amu, ig Yawe keeke naɗi heum, ig amu dabmekkunignu hettem.’

⁹ Aria, Bret Yis Iitta Lanaknu Hobul Nakok, amuam geha danab nug aɗi keeke dabmekkunu oo hette ele, nug amu dabmekkunu nug eppeg gomeppa nai ye daatte, o nug uɗappa keeke laa aiha daatte amu, hobul amuam, ag Yawe Nug ahilagnu uɗat naɗi heum dabmekkulagnu, nuhig ɗo nai ele dabmena mattiglagnu at amubia daakku. Aɗinu ag Yawenu ɗo dabmena, amunu mattiglag? Yawe Nug uɗat naɗinab ha, Isipnu diia omalatte uɗippig.

¹⁰ Anam amunu, hanhan maɗ ohppa ag hobul imu, ag nuhig haenppa anam hekkulagoitte!

¹¹ Aria, Yawe Nug Kanan wan ag madakkunu, ag, amu ag mamelkad aɗi ele amelagppa nai ɠagattag qetta aum. Anam amu, Nug geha ag diia omalatteb, ag Kanan danab, ag ahilag wanppa goppeg, Nug wan amu ag madakku amunu,

¹² ag ah oolkadppanu nid danab tatamnu oh, ag Yawe mettaglagoitte! Amu doɗ nalkad dawai tatamnu oh ele, ag Yawenu daaglag.

¹³ Ag donki ⌊gaiɗ⌋ tatamnu qagaiettakppanu eɗua uhuqak hekkulagnu, ag sipsip nag laa aon main, Kayak mettaglag, amge ag amu hekkulagnu uuglag dayeb amu, ag donki ⌊gaiɗ⌋ amu duug qiippeg mauhkku. Anam amge, ahilkad nid danab tatamnu amu, ag tituanakppanu eɗua uhuqak hekkulagoitte,” awa aum.

¹⁴ Moses nug anam ana, Nug tuɗitta aum. “Dimppa ag bekkalkad ag, ‘Kobol imuam diig aɗi?’ aon oɗ mattaglag amunu, ag inam amelagppa akkulag! ‘Ig Isip wanppa begbeg maɗi nid daautut, Yawe Nug uɗat ɠagattagnab ha, ig Isipnu awikka, omaikka uɗiom.

¹⁵ Paro nug tatam nuhig dabmak ɠagattag eppe, dabmak amu dim lamitta he, ig paɗaikkeb uɗignignu oo ii dayom amunu, Yawe Nug Isip dilag nid ⌊danab⌋ tatamnu, doɗ nalkad ⌊dawai⌋ tatamnu oh ele, Nug ag aqe mauhppig amunu, ig doɗ ⌊lanaknu epeɗiak daatteb⌋ nalkad dawai tatamnu, ig amu oh mait, Yawe medattem. Amge nid danab tatamnu oh amu, ig ag tituanakppanu eɗua uhuqak dayaknu hettem.

¹⁶ Aria, kobol amuam geha danab nug aɗi keeke dabmekkunu oo hette ele amu, nug amu dabmekkunu nug eppeg gomeppa nai ye daatte, o nug uɗappa keeke laa aiha daatte amu, kobol imuam amubia, Yawe Nug uɗat naɗi ihinignu he, ig Isip uut uɗimutnu at daatte. Aɗinu? Yawe Nug nuhig ɠagattag naɗippa ig awikka omaikke, ig Isip uut uɗimut.’ ” Moses nug danab ah amelagppa anam mattiom.

Israel ag Le Kokoɗ mataɗppig

¹⁷ Aria, Paro nug Israel danab ah paɗatte ukkaegeg amu, Kayak Nug omalatta, ib tutuppa ugakka, Pilistia wan oppata, lang dim lamitta ii ukkom. Aɗinu? Kayaknu dabmak inam dayom. “Israel ag ib tutu amuppa goppeg, danab ameg laa ag anadna, ahan aqaglagnu hena, ban heppeg, geha Israel dilag dabmak eɗueb, ag eɗun Isip dokkulagtai,” anam dabmeum.

¹⁸ Amunu Kayak Nug Israel omalatte, ag talilin, atu taɗakppa ukkaknu ibppa gona, Le Kokoɗppa noppig. Ag Isip uun gonana, ag ban haknu keeke ele maon oippig.

¹⁹ Ag gonana, ag Josep ebehi ele maon goppig. Aɗinu? Anukka Josep nug Israel bekkod laa amelagppa aum. “Geha dimppa Kayak Nug ag Israel, ag Isipnu eɗua diia gokku amunu, haen amuppa ag da ebehil ippanu aon ele ukkeg!” awa aum. Josep anam awa ana, nug he, ag amu hekkulagnu nai mattin, ɠagattag qedappig. Ag anam appig amunu, Moses he, ag Josep ebehi ele maon goppig.

²⁰ Aria, Israel ag Isip appa daappigppanu ahan, aab okkai Sukot appa gowona, ag appanu ahan gona, Etam aabppa teppig. Etam nug atu taɗak guguittak appa dayom, amu ag appa Etam guguittak haen tutuib dayaknu aab kalappig.

²¹ Ag ukkaegeg, Yawe Nug amunppa lombig attan tak ooppa dayaya, ib ippunadkkunu anuqa ugakka, tuqan amu, Nug aab ewak attan tak ooppa dayaya, amahlak madakkunu anuqa ugekke goppig. Nug anam heum amunu, ag amun, tuqan ele gokkulagnu elele.

²² Amun amu, hanhan lombig attan tak danab ah noolagppa anuqa ukkom; aria, tuqan amu, aab ewak attan tak anuqa ukkom. Keeke aɗit amu aa ii iitta mepiɗ.