Eksodas 12 - Nobonob Baibel

Yawe Nug lag tiig laittak ele tippaladkkunu nai

¹ Moses, Aron ele Isip daaeheh, Yawe Nug aa amelahppa inam aum.

² “Kalam imu amu, geha maɗ anen anenppa ahilag kalendappa kalam anuqak daakku.

³ Amu aa Israel danab ah oh amelagppa keeke imunu apeɗ doyeg! Kalam imunu deɗ 10 amuppa, danab oh ag baelkadppa ele daatteb amu, ag anen anen ag sipsip nag, o meeme nag laa tituankkulag. Lag laippuppan oh ag doɗ laippu tituankkulag.

⁴ Am danab laa nug baekkudppa kuɗum ii daatteb dayeb, ag sipsip nag laippu lae nekkulagnu elele iitta amu, aria mamelag nug danab laa, nug baekkudppa ele nug guguittak miag daatteb amu, nug ag oɗ matteb doppeg, aa baeltippa ele oh ag doɗ amu otin laig! Amu ag doɗ amu oh lae nekkulagnu, ag danab gane daaglagnu elele, danab gane, ah gane, nid naunau ele gane amu, ag amu doona, ag daaglagnu daatteb ele amu, ag anen anen doɗ teppu attem latteb am doona, amu ag eleleppaib daanna lakkulag.

⁵ Amu ag anen anen doɗ sipsip gaiɗ laa, o meeme dawai laa, maɗ laippu awak ele, ag amu laa tituaneg! Ag doɗ sipsip, o meeme nug beɗu enaib daatte tituaneg! Laa nug beɗu ihi mettak ele, o nug eppeg baeg keeke kaliak ele, o beɗuppa uug aɗi laa daatte ele amu, ag doɗ amubia aib aoppig.

⁶ Ag doɗ amu deɗ 10ppa tituanadna, ag ena atognoadppeppeg, kalam amunu deɗ 14ppa tuebnab amu, ag Israel oh baelkadppa anen anen, ag doɗ ahilkad baalag otaɗkkulag.

⁷ Ag aqadna amu, aria ag anen anen, ag doɗ tiig amu aon, lag ag daanna, doɗ lakkulagnu hetteb ele amu, ag lag amunu odnu ad ukku aɗit laih laih daattep, aria ukku attan emaitak daatte, amuppa ele ag doɗ tiig amu aon laaidkkulag.

⁸ Tuqan amuppa amu, ag sipsip teppu, o meeme teppu amu, ag aab aɗuppa managlag. Manona amu, ag teppu amu, bret yis iitta ele, amu ele lanana, keh mua ele lakkulag.

⁹ Ag doɗ teppu ii ewom aib lappig; amu ag waappa ele aib battin lappig. Ag amu ii hemana. Iitta. Ag aab aɗuppaib manon laig! Ag ikki, eppeg, baeg, ooppan keeke ele aab aɗuppa maippeg eweb laig!

¹⁰ Ag doɗ teppu laih laa uuppeg dayeb, wagɗeb lakkulagnu aib heppig. Am doɗ teppu huppu laa dayeb, wagkkaɗeb amu, ag aab aɗuppa maippeg ewa iitta maɗ!

¹¹ Haen ag doɗ amu lakkulagnu henana, ag inam hekkulag. Ag lamen imualgppa qakkan, baelag gaɗa mena, dudqak hokkat aon aɗaglag. Ag ee amu paha lakkulag. Ee amuam da Yawe, da ag tippalatte gomi, deɗ amu ippunadkkunu daatte.

¹² Tuqan amuppa amu, da geha Isip wanppa oiyeye, Isip danab ah dilag nid ⌊danab⌋ tatamnu oh, amu doɗ nalkad ⌊dawai⌋ tatamnu oh ele aqakkul. Amuppa amu, da kayak hambuppuak oh Isip dilag amu, da ag bu okkai madakkul. Da am Yawe.

¹³ Ag laulag od uguppa doɗ tiig laittak amu, tiig amuam ag Israel laa, ag lag amuppa daattebnu at daakku. Haen da tiig amu anttena amu, geha da ag tippaladkkul amunu, haen da Isip dilag nid ⌊danab⌋ tatamnu, doɗ ⌊dawai⌋ tatamnu ele aqadkkul amu, ahilagppa am eheɗ laa ii bema,” awa aum.

¹⁴ Yawe Nug anam anana amu, Nug nai tuɗitta aum. “Gemu kobol ahilagppa bekku ele amu, ag amu dabmekkulagnu ag kalam imunu deɗ imu tituankkulag. Am ag buɗub buɗub doobob, ag buɗulkad, ag ele amu dabmekkulagnu, da gemu ag aɗi hekkulagnu attem amu, ag ele deɗ imuppa anamib hekkulag. Ag oh hanhan maɗ anen anenppa deɗ imuppa da, Yawe, ag kobol da hekkul imu daulagppa dokkunu, ag deɗ imu da dabmeɗanna qagmak gamag ahak ele henan daaglagnu dabmekkulag. Am ɗo laa ag dim lamidkkulagnu laa aakku.

¹⁵ Da ag hekkulagnu attem, amuam inam. Ag deɗ eblaih aɗit ele amu, ag bret yis iitta lakkulag. Danab auntai laa nug deɗ eblaih aɗit ele amuppa keeke laa yis eleppa hak lakku amu, nug Israel oolagppanu geɗittak daakkuoitte amunu, hobul amunu digmakppanu deɗ, ag deɗ amuppa yis oh, ag laulkadppa daatte ele amu, ag agappeg ukkaɗ!

¹⁶ Deɗ digmak amuppa amu, deɗ eblaih aɗitppa ele, ag da noolppa qagmena, dup nona binal meig! Deɗ aɗit amuppa amu, ag aib uɗat laala heppig. Ag ee lakkulagnu amu, ag ee amu aakkuib bappaidkkulagnu elele; ag uɗat laa ii hemana.

¹⁷ Da gemu, deɗ imuppanab ag omaladppi, ag wan imu uun gokkulag amunu, ag amu dabmekkulagnu ag Bret Yis Iitta Lanaknu Hobul Nakok imu gamag ahak ele hekkulag. Ag haen oh, buɗub buɗub doobob, maɗ anen anenppa hekkulag; ag aib tippalppig!

¹⁸ Ag hobul imu hekkulagnu amu, ag inam heig! Ag kalam digmakppa, kalam amunu deɗ 14ppa, ag tueb amu digmena, bret yis iitta lakkulag. Lappeg ukkeb, kalam anuqak amunu deɗ 21ppa, tueb meeb bataglag.

¹⁹ Hobul amunu deɗ eblaih aɗit ele amu, deɗ amu ohppa yis ag laulagppa aib dayom! Aɗinu? ⌊Hobul amunu deɗ amu ohppa,⌋ mudippan danab lailag laatai, o wan laihnu danab laatai, nug bret yis ele lab amu, aria nug Israel oolagppanu geɗittak daakkuoitte.

²⁰ Doyeg! Ag mettid amuppa bret yis ele iinab lamana. Iitta! Ag adeppa adeppa daanna amu, ag bret yis iitta laig!” awa aum.

²¹ Aria, Yawe Nug anam a, Moses nug doya, nug Israel dilag ikki danab oh onilagppa e uɗieg, nug ⌊ag gona, Israel danab ah ag aɗi aɗi hekkulag ag amelagppa akkulagnu,⌋ nug ag amelagppa inam aum. “Ag anen anen ag gona, Pasowanu sipsip nag, o meeme nag, ag, amu ag baelkadppa ele, ag oh ahilagnu tituanadna baalag otaɗeg!

²² Ag aqadna heppeg, tiilkad tappiɗppa nob, ag ad naunau onig hisop, amu eppeg nakok laa aon, tiigppa meppeg nob aona, od ukku aɗit daug laih laih, amu od ukku emaitak attan, amuppa ele tiig amu laaidkkulag! Ag laulkad anen anen ag oh anam hekkulag; amu keeke amu hewon, dimppa amu, laa nug lag daatteppa, nug aha, dimittim aib ukkom; lag ooppaib daappeg ukkeb, wagkkaɗkku.

²³ Ag amu heppeg, haen Yawe Nug ukka, laih Isip dilagppa ahilkad nid danab matunu amu oh aqakkunu oiyaya amu, Nug ag Israel, ag laulkad anen anennu od ukku tiig laittak antta, Nug od amu tippala, nug engel, danab aqatte ele amu, Nug nug amegppa aib ab, nug ahilkad nid aqakkunu, ag laulkad anen anenppa ii noma.

²⁴ Ag, amu ag bekkalkadppa ele ag hanhan, maɗ oh ag ɗo Yawe mekkom imu amu, ag hekkulag.

²⁵ Am inam bekku. Haen ag Yawe Nug wan ag madakkunu aum, ag amuppa gona, appa daanna amu, aria Yawe Nug hobul imu hekkulagnu aum bia amu, ag hekkulag.

²⁶ Laa amu, ag amu hebeppeg, aria dimppa haen ag bekkalkad ag ahan, ‘Hobul imunu, diig nuhig amu aɗi?’ oɗ mattaglag

²⁷ amu, aria ag inam akkulag! ‘Anukka, haen Yawe Nug Isip danab ah dilag nid ⌊danab⌋ tatamnu aqe mauhppig amu, gemu ig Israel, ig hettem imu am, alai aɗi bekkalkad tatamnu mauhmananu ag sipsip, o meeme aqaeg, doɗ amu tiilag ag lag ahilkad od uguppa laitteg, Yawe Nug tiig amu antta, laulkad amu tippalatta he, engel nug ag ii aqom amu, ig hettem imu am, keeke amu daunigppa dokkunu daatte. Doɗ imu ig aqaut mauhtteb ele amu, doɗ amuam alai aɗi doɗ aqaeg mauhna, ag bekkalkad tatamnu abenlag aoeg, ii mauhppig, amubia daanna, ippunigtteb.’ ” Moses nug ag amelagppa anam aum. Moses nug anam a amu, danab ah ag nai amu doona, ag Yawe noobppa dup nona Nug binag meppig.

²⁸ Aria, Moses, Aron ele aa anam aeh, Israel danab ag doyona, ahan gona, kobol ag anam hekkulagnu, Yawe Nug Moses, Aron ele oɗelahppa haknunab aum, ag Nug aumbianab aakku heppig.

²⁹ Ag kobol amu heppig, aria tuqan tugmag Yawe Nug Isip dilag nid ⌊danab⌋ tatamnu aqe mauhppig. Nug Isip nid ⌊danab⌋ tatamnu oh, Isip dilag king Paronu, danab okkai dilag, danab hamu dilag, amu danab maniguittak nau gatatu ele daappigppa ele, Nug ahilkad nid ⌊danab⌋ tatamnu oh aqe mauhppig. Nug doɗ, makau, sipsip, meeme keeke, Nug amu nalkad ⌊dawai⌋ tatamnu ele aqe mauhppig.

³⁰ Aria, tuqan amuppaib Paro, nuhikkud ehanittak anuqak danab, amu Isip laa oh ele ag tuqan ahan, ag ahilkad nid ⌊danab⌋ tatamnu mauhatteg anadna, laih Isip ohppa amu, danab ah ag qanak huanak naɗi heppig. Aɗinu? Lag anen anen ohnu nid ⌊danab⌋ tatamnu mauhadppig.

Israel ag Isip uun goppig

³¹ Aria, tuqan amuppaib Paro nug Moses, Aron ele onilahppa e ukkaeh, nug aum. “Aa aheɗ! Ahaya, ahilti danab ah ele diiadpeɗ, ag oh dahilad danab ah uuadna ukkeg! Ag gona, Yawe noobppa dup nona binag mekkulagnu, da oɗ meɗappig bia, ag gona anam heig!

³² Ag sipsip, meeme, amu makau ele oh diin gokkulagnu apiɗ bia amu, ag amu oh akkan ukkeg! Am aa da ele itiɗeɗ!” awa aum.

³³ Am Isip danab ag Israel Isip uun, pahanab gokkulagnu tappaɗadppig. Ag tappaɗadnana, ag inam appig. “Aɗinu ig ag paha gokkulag oonig daatte? Ag paha ig uuigna, ii gokkulag dayeb amu, geha ig oh mauhkkunig!” aon appig

³⁴ Ag anam appig amunu, Israel ag plaua, keeke laala ele ⌊matu tueb⌋ kabolippig, amge ag yis laa ii mena, ag bret itoɗia qaknu, ag tappiɗ amuppa hamu meeg dayeye amu, ag keeke amu oh aona, ag lamenppa qakkona, tappiɗ gukkalagppa mena, mawadna goppig.

³⁵ Am Israel ag Moses aum bia, ag matu Isip danab ah gol balanu, silwa balanu, amu lamennu ele oɗ madappig.

³⁶ Am Yawe Nug he, Isip danab ag Israel dilagnu ena anadppig, amu Isip ag Israel aɗi keeke aoglagnu oolag daye appig amu, ag madappig. Israel ag kobol anam heppig amunu, amuppa ag Isip danab ah dilag keeke amu ohbia aɗadppig.

³⁷ Israel ag aab okkai Rameses uun ahan, ag aab okkai Sukot goppig. Am danab 600,000 keeke anam ahan goppig, amge ag ah, nid naunau ele amu, ii ebaqappig.

³⁸ Am danab ah laa kuɗum, ag am Israel danab iitta amu, ag ele goppig. Am Israel ag makau, sipsip, meeme ele, ag doɗ amu kuɗumnab ele akkan goppig.

³⁹ Israel ag ⌊Isip wanppa daappigppa⌋ plaua keeke ele kabolippig, amge ag yis ii mena, ahan goppig amunu, ag gonana, ag amuppa bret batappatak yis iitta maippig. Isip danab ag Israel gokkulagnu tappaɗadppig, Israel ag nakok laa ele daan, keeke bappaidkkulagnu elele iitta amunu, ag plaua kaboliak amuppa yis ii meppig; ag diig amunu ele, ee ahilag laa bappaidkkulagnu elele iitta.

⁴⁰ Israel ag maɗ 430 Isip daappig.

⁴¹ Ag maɗ 430 Isip daaegeg, deɗ maɗ 430 amu iitta meum, deɗ amuppanab amu, Yawenu danab ah, Israel, ag Isip uuppig.

⁴² Deɗ amu tuqan amu, Yawe Nug Israel Isipnu diia, omalatta gokkunu dabmatta auta awom amunu, buɗub buɗub doobob, maɗ ohppa hanhan Israel oh ag deɗ amu do, tuqan am, ag Yawe heumnu dabmena autna aoglagnu daatte.

Pasowanu ɗo

⁴³ Yawe Nug Moses, Aron ele amelahppa inam aum. “Pasowanu ɗo imu aa doyatteɗ! Wan laihnu danab nug ee amu ii lama!

⁴⁴ Begbeg maɗi nid ahilkad, laa maatteg ag daden matteg, ahilag uɗat hetteb ele amu, ag ag gaɗalag otaɗppeg, aria ag am ee amu lakkulagnu elele,

⁴⁵ amge wan laihnu danab laa haen tutuib ag ele daatteb, o laa ag uɗat nid ahilkad daatteb, ag ee amu ii lamana.

⁴⁶ Am danab ah ag doɗ teppu lakkulagnu amu, lag anen anen ee amu bappaidtteb ele, ag lag amuppaib lakkulag. Teppu amu ag huppu nakok laa akkan, dimittim ii gomana. Am laa ele, ag doɗ amu ebehi laa ii qiimna.

⁴⁷ Israel danab ah oh, ag Pasowanu Hobul gamag ahak ele amu heig!

⁴⁸ Amu danab laa, nug wan laihnu danab nug uɗia, ag oolagppa dayaya, nug da Yawe, dahil Pasowanu Hobul gamag ahak ele hekkunu dabmekku amunu, aria nug heeb, laa nug, nug bekkod, amu danab laa nug laugppa daatteb ele amu, nug ag gaɗalag otaɗeb, nug aakku Israel ted bia dayaya, lakku. Danab laa nug gaɗa otaɗak iitta amu, nug hobul amunu ee ii lama.

⁴⁹ Amu ɗo am laippu; Israel danab, amu wan laihnu danab nug uɗia, ag oolagppa daatte ele, am ag oh, ahilag ɗo,” awa aum.

⁵⁰ Aria, Israel ag Yawe Nug Moses, Aron ele amelahppa haknunab aum, ag Nug aumbianab aakku heppig.

⁵¹ Deɗ amuppaib Yawe Nug Israel buɗub huu anen anen oh diia omalatte, ag Isip uun goppig.