Eksodas 10 - Nobonob Baibel

Yawe he, tap-lokus uɗieg, Isip wan ambeum

¹ Dimppa Yawe Nug Moses amegppa inam aum. “Na gona, Paro antte! Aɗinu? Da Paro, nuhikkud ehanittak anuqak danab ele ag da Yawe, da dahilnu dabmettaknu kobol danab haknu elele iitta, da kobol dahil amu ag oolagppa hekkulnu, ⌊ag anidna, ag da genabnab genab daattem dooglagnu,⌋ da hei, nuhig dabmak, nuhikkud ikki danab dilag dabmak ele ɠagattag eppom.

² Da amu heminu diig laa am, geha ag Israel danab ah, ag da dahilnu dabmettaknu kobol danab haknu elele iitta Isip danab ah ahilagppa hemi, da Isip danab ah ɠagattag hattami ele amu, ag Israel ag kaya amu, ag bekkalkad, alalkad ele amelagppa madippeg dooglagnu hemi. Laa ele amu, ag Israel, ag dahil hak amuppa, geha ag oh da am Yawe dooglagnu hemi,” awa aum.

³ Yawe Nug anam a, Moses, Aron ele aa Paro gumidya goya, aa nug amegppa inam apiɗ. “Yawe, Nug ig Hibru, ihinig Kayak, Nug atte. ‘Na nai dahil tappae neene, da waalppa ele ii daanna, anam henan daattem; amu na haen gane laa ele ukkeb, na kobol amu uukkut? Da attem! Na danab ah dahilad amu paɗadppe, ag gona, da noolppa dup nona binal meig!’ ” awa aum.

⁴ Yawe Nug anam awowa, nug nai baula tuɗitta aum. “⌊Ag amu hekkulagnu na paɗadppe ukkeg!⌋ Aɗinu? Na anam ii hekkut dayeb, butti da heppi, tap-lokus ag uɗin, nahip wanppa ambena daaglag.

⁵ Geha ag Isip wan oh tonappeg, na wan beɗu ii anidmana. Amu keeke oh ais doɗo ii aqom amu, tap-lokus ag geha lappeg iitta mekku. Amuam eeib iitta. Iitta. Ag ad oh, uɗulkad bau betteb, am ele lakkulag.

⁶ Geha ag na lautppa tena nona ambena, nahipad ehanittak anuqak danab laulkadppa nona, amu danab ah nahipad laulkadppa ele nona, ambekkulag. Ag mamelkadnab, amu ag mamelkad aɗi laa ele, ag uɗin, wan imuppa daaeg uɗiom gemu batak, ag tap-lokus kuɗum anam laa Isip wanppa beeg ii anidppig. Keeke amu naunab; ena iitta!” awa aum. Moses nug Paro amegppa anam awowa, nug eɗua uuitta, dimittim ukkom.

⁷ Ukke amu, Paronu ehanittak anuqak danab ag Paro amegppa inam appig. “Danab imu nug nuhig uhui me, ig amuppa nota daattem; amu haen gane laa ele ukkeb, ig amubia ii daamta. Na danab imu paɗadppe gona, Yawe, ahilag Kayak, ag Nug noobppa dup nona binag meig! Na Isip nauhom daatte, na gemu ele amu iite anidttem?” aon appig.

⁸ Ag anam aeg, Paro nug he, aria ag Moses, Aron ele eɗun Paro toppa omalatna ukkaeg, Paro nug aa amelahppa aum. “Ag gona, Yawe, ahilag Kayak, ag Nug noobppa dup nona binag meig! Ag gokkulag, amge da imu dookkulnu ool daatte; aun aɗi ag gokkulag?” awa aum.

⁹ A amu, Moses nug oɗeppa awa aum. “Ig oh gokkunig. Ig danab ah bau, danab ah kaino, ihinkad nid, nid ahin oh ele, amu doɗ sipsip oh, doɗ meeme oh, amu makau oh ele, ig amu oh diit gokkunig. Aɗinu? Ig Yawe dabmettata, qagmak gamag ahak ele hekkunig,” awa aum.

¹⁰ Moses nug anam aum, amge Paro nug aum. “Da ag, ahilkad ah, ahilkad nid ele oh paɗadppi golob, am genab, Yawe Nugib ehanatteb, da anam helom, amge anam iitta. Ag nau hekkulagnu oitteb amunu, da ag oh paɗadppi, iinab gomana.

¹¹ Iitta! ⌊Da ah, nid ele oh paɗadppi ii gomana.⌋ Ag danabib ag gona, Yawe noobppa dup nona binag mekkulagnu aegeg uɗie, gemu ele anamib hekkulagnu atteb amunu, danab agib gona, Yawe noobppa dup nona binag meig!” awa aum. Paro nug nai mattia mala he, ag Moses, Aron ele lamateg, dimittim gopiɗ.

¹² Ag anam heeg, Yawe Nug Moses amegppa inam awa aum. “Na eppen attan humana, Isip wan epponppe, geha tap-lokus ag uɗin, keeke oh ais doɗo naɗi na, ii aqom ele, ag amu lakkulag,” awa aum.

¹³ Yawe anam aum amunu, Moses nug dudqak hokkat attan huma, Isip wan eppone, Yawe he, ulah laih kaɗag uɗitteppanu deɗ laippu, amun tuqan ele uɗiaya dayom. Daya, buttua amu tap-lokus ele diie uɗippig.

¹⁴ Uɗippig ele am, tap-lokus ameg okkai okkai agogaɗnana uɗin, Isip wan laih ohppa amu ag ambena, Isip wan oh tonappig. Anukka Isip wanppa tap-lokus huanaknab anam ii neppig; dimppa ele ag anam ii nemana.

¹⁵ Tap-lokus ag am-nab-bena, ag Isip wan amu oh tonaeg, wan amu gatatu manak dayom. Anam dayeye, tap-lokus ag gikkiɗah, ad uɗug keeke, lae nena, ag ad meu ais doɗo ii aqom ele, ag amu oh ele lae neppig. Am ad uɗug, o gikkiɗah, o aɗi keeke bau dayom amu, keeke amu ohnab laih Isip dilag wanppa amu, laa ii dayom; ohnab lae neppig.

¹⁶ Tap-lokus ag anam heeg, Paro nug paha Moses, Aron ele gumidya uɗiglahnu nai me ukkom. Me ukke, aa uɗieh amu, nug aa amelahppa inam aum. “Da Yawe, ahilag Kayak, da nuhigppa hipunin heinne, ahilahppa ele hipunin hemi.

¹⁷ Da amu hemi amunu, aa hipunin dahil gemu haen laippu laa ele uhuqya meɗaglahnu, da ool daatte. Aria, aa Yawe, ahilag Kayak, aa Nug unuqidya oɗ medapeɗ, keeke naunab imu Nug heeb, iitta mekkunu oɗ matattem. Keeke nau imuppa amu, da nauhttem,” awa aum.

¹⁸ Paro nug anam a, aria aa Paro uuidya goya, Moses nug ukka, Yawe unuqittom.

¹⁹ Moses unuqitte, Yawe he, ulah baolia, heqo laih qaban uɗitteppanu huana uɗia, aakku tap-lokus amu oh iwalatta diia, Le Kokoɗppa gona mauhppig. Amu tap-lokus laa Isip appa laa ii dayom.

²⁰ Amu Yawe Nug he, Paronu dabmak ɠagattag eppa dayom, amu Paro Nug Israel ii paɗatte goppig.

Yawe he, gatatu Isip wanppa, na dayom

²¹ Paro nug anam he, dimppa amu Yawe Nug Moses amegppa inam aum. “Gatatu teppu naunab ele Isip tonakkunu amu, na eppen humappe, attan taɗ! Gatatu amuam diig laa; gatatu teppu ele amuam, keeke laa danab nug eppegppa aɗatte, amubia,” awa aum.

²² Yawe Nug anam a, Moses nug eppeg hume, attan te, gatatu teppu naunab ele na, laih Isip dilagppa deɗ ewam oh tonattom.

²³ Gatatu ɠagattag na dayeye, Isip danab ah ag akka akka nug iɗu ii anidna, danab ah oh haen amuppa ag lakkaib daappig. Ag dimittim gokkulagnu elele iitta. Anam daappig, amge laih Israel daappigppa amu, appa am gatatu iitta.

²⁴ Anam daye amu, Paro nug Moses onigppa e uɗie, amegppa aum. “Ag gona, Yawe noobppa dup nona binag meig! Ah, nid naunau ele, ag ele oh gokkulag, amge doɗ makau, sipsip ele amu, ag Isip daaglag,” awa aum.

²⁵ Nug anam aum, amge Moses nug eɗua amegppa aum. “Iitta. Ig gota, manaknu ofa, amu mana mettak laala ele hekkunig. Anam amunu, ig doɗ amu manadta, Yawe, ihinig Kayak, ig Nug mettagnignu, na uuigppe, ig ihinkad doɗ ele diit gokkunigoitte.

²⁶ Ig diit gokkunig. Ihinig doɗ laippu laa nug ippa ii daama! Aɗinu? Ig geha doɗ laala mait, Yawe mettagnig, amge tatam ig gota, Yawe noobppa dup nota binag mak abenppa teta amu, ig haen amuppa aɗi doɗ mait, Yawe, ihinig Kayak, ig Nug mettagnig am doognig. Gemu ig doɗ atten mait mettagnig amu, ig ii doottem,” awa aum.

²⁷ Anam aum, amge Yawe Nug he, Paronu dabmak ɠagattag eppa dayom amunu, Paro he, ag ii goppig.

²⁸ Paro nug anam heehe, oo aeg be, nug Moses amegppa aum. “Na da noolppanu ahan ukke! Na baula da aib aniɗme! Aɗinu? Na baula uɗin, da aniɗkkut dayeb amu, da na paha nidappi mauhkkut,” awa aum.

²⁹ Anam awa a, Moses doya, nug aum. “Na attem am genab, da na baula iinab anidpa!” awa aum.