Eksodas 1 - Nobonob Baibel

Isip danab ag Israel danab, ahilagppa eheɗ heppig

^1-4 ⌊Aria Israel, onig laa Jakop, nug bekkod ele ag Isip gona daappig, ag, amu ag buɗulkad ele dilag kaya am inam⌋. Jakop bekkod ag Jakop ele oh Isip goppig amu, ag onilag am inam. Ruben, Simeon, Lewi, Juda, Isakar, Seblon, Benyamin, Dan, Naptali, Gad, amu Aser ele. Jakop nug bekkod baelkadppa ele oh Isip goppig.

⁵ Amu Josep nug tatam Isip ukka dayom amunu nug, Jakop, amu nug baekkudppa ele oh Isip goppig ele, danab ah amu oh, ahilag ebqak am 70.

⁶ Dimppa Josep, nug awakkud amag ele, ag ahilkad menuattak huu laippu bia ele amu, ag oh mauhppig,

⁷ amge Israel danab ah ag buɗub buɗub doodo, nid huana menuadna, appatna, kuɗumnab daappig! Genab, ag appatna, huu ɠagattagnab bena, wan ag daappig ele oh tonappig.

⁸ Israel ag anam appatna daaeg, haen elab ukke, dimppa king laa ba, nug Isip gumom. King amu nug Josepnu kaya nakok laa ii doyom.

⁹ Amu king amu nug nuhikkud danab ah amelagppa inam aum. “Antte! Israel ag danab ah kuɗum; ɠagattag ahilag amu ihinig ɠagattag eɗidtte.

¹⁰ Ahappeg, ig pehettak dabmetu! Israel danab ah imu ag tuɗidna appatnana, kuɗumnab daappeppeg, haen laa ihinig kekeɗ banenig uɗiglag dayeb, haen amuppa Israel ag ihinig kekeɗ ele ouqeppeg, ig ele ban heppeg, ag wan imu uun, oolna gomananu, ig dabmak ena aot, ⌊ib enanag epeɗidta, oolaknu ib ahilag amu oo netu⌋!” awa aum.

¹¹ Isip dilag king nug anam aum amunu, ag Isip danab laa, ag uɗat gumak danab nau oo doyak iitta ele amu, ag danab amu laala epeɗiatteg, ag gumak danab daanna, Israel danab uɗat hekkulagnu huana duttunattegeg, uɗat nau ɠagattag hamu heppig. Ag heeg, Israel danab ag aab okkai aɗit Paronu heppig. Laa amu Pitom, amu laa am Rameses. Aab okkai aɗit amu, aa keeke maatte dayaknu aab daapiɗ.

¹² Isip danab ag Israel danab eheɗ naunab anam hadappig, amge Israel danab ag ahilag appata kuɗum baknu am ii iitta meum. Iitta! Ag huan appategeg, Isip wanppa kuɗum huanaknab daappig amunu, Isip danab ag Israel dilagnu baɗak okkai dooppig.

¹³ Isip danab ag anam baɗan, ag Israel danab dilagnu oo doyak ii doon nau hena, uɗat eheɗ, uug elenab mattaeg heegeg,

¹⁴ dayak ahilag aakku nauhom. Isip danab ag heeg, Israel danab ag ⌊doɗ gumattak uɗatab ag tiilagppa daatte amu, ag amu ii heppig. Iitta, ag⌋ lag haknu brik wanppa hak, ag amu hena, Isip dilag lag henana, Isip dilag dad uɗat ele heppig. Isip danab ag Israel danab dilagnu oo doyak ii doon nau hena, uɗat amu hekkulagnu heppig.

¹⁵ Anam daye amu, Isip dilag king nug ah aɗit, Siprah, Puah ele, aa Israel ah nid menuadkkulagnu heegeg ehanadpiɗ amu, nug aa amelahppa aum.

¹⁶ “Haen aa Hibru ah nid menuglagnu ehanadttep amu, Hibru ah laa nid menuebeb, aa pehettak neegkkulah. Ah amu nug nid danab menueb anidya, aa nid amu qepeɗ mauhkku. Amge ah nug nid ah menueb amu, aa aib qepiɗ! Aa uupeɗ daakku” awa aum.

¹⁷ Isip dilag king nug anam aum, amge ah aɗit amu, aa hanhan Kayaknu ebehilti oh bodoetta le mettom amunu, aa Isip dilag king aum bia ii heya, aa nid danab ii aqadpiɗ. Iitta. Aa uuatteh, bau daappig.

¹⁸ Aa anam heeheh, Isip dilag king nug ah aɗit amu onilahppa e uɗieh, nug inam oɗ matom. “Aɗinunab aa anam hettep? Aɗinunab aa nid danab amu uuatteh daatteb?” awa oɗ mata aum.

¹⁹ Nug anam a, aria ah aɗit aa Paro aum, aa amunu amegppa inam apiɗ. “Amunu diig am iikku. Hibru ah, ag am Isip ah ele diilag laippu iitta. Hibru ah ag ah ɠagattag; ag nid menuglagnu ii bahi qetteb, paha menutteb. Ag anam hetteb amunu, i geha ukkauɗuɗ, ag nid menutteb,” aoya apiɗ.

^20-21 Ah aɗit amu aa Kayaknu ebehilti oh bodoetta le meum amunu, Kayak ena haata, ehanate, aa danab aoya, nid menuya, anam daapiɗ. Amu Israel ag kuɗum appateg, danab ah kuɗum benana, ag ɠagattag ele beppig.

²² Aria dimppa, Paro nug Isip danab ah amelagppa inam aum. “Hibru ah ag nid danab bau menuadppeg anidna, ag aɗadna, Nil leppa agappeg noig; amge nid ah menuadppeg amu, ag uuadppeg dayeg!” awa aum.