Eklisiastis 9 - Nobonob Baibel

Gemuib dabmettak

¹ Da amu oh anidmi amunu, da dabmei ukke ukke, da genab tutukku hak danab, danab doyak dabmak ena ele oh, ahilag hak oh ele Kayak eppegppa daatte anidmi, amge laa nug bau dayak nuhigppa danab ah ag nuhignu oo mauhak dooglag, o iitta ag nuhignu nau ninig ele dooglag amu, nug ii dootte.

² Anam amu, danab oh ag daaeg ukke ukke, ag oh ib laippuppa oitteb. Amuam genab tutukku hak danab, nau hak danab ele; danab ena, danab nau ele; danab Kayak ele ouqa dayaknu elele, danab Kayak ele ouqa dayaknu elele iitta ele; danab ag doɗ manadna, Kayak medatteb, danab ag amu ii hetteb. Ag oh ib laippu amuppa oitteb. Danab ena, nuhigppa bette; amubiaib hipunin danab, nuhigppa bette. Danab nug nuhig nai ɠagattag qetta atte, nuhigppa bette; amubiaib laa amu hekkunu baɗatte, nuhigppa bette.

³ Amuam aam waappan eheɗ aakku. Danab oh ag ib laippuppa gotteb. Keeke laa am, danab ag bau daatteb amu, eheɗ hak kobol ahilagppa ambak daye, Kayak dab-ii-maama hak okkai kobol ele ahilagppa daatte. Ag anam oinna, ag mauhna, mauhak abenppa ukkaeg, mauhppig ele daatteb.

⁴ Qai bau daatte, nug laion mauha niitte eɗidtte; diig amunu, amubia danab nug danab bau daan oiyegeg oolagppa oitte ele amu, nug am ena bekkunu dabmak aɗa oikkunu elele.

⁵ Aɗinu? Danab ag bau daatteb ele, ag mauhkkulag am dootteb; amge danab mauhppig amu, ag keeke laa ii dootteb. Wanppan danab ah ag ahilagnu daulag atiom amunu, ag ⌊wanppa⌋ nob ena baula aoglagnu elele iitta.

⁶ Mauhak dimppa amu, ag wanppa daan, oo mauhak doyak, laa dilagnu, nau ninig ele doyak, ag dahil doya laa aomanu doyak aɗa dayaknu ele dooppig amu, keeke amu oh aakku iitta meum; baula ii daama. Ge, danab ah mauhppig ele ag baula keeke laa aam waappa ba gotte ele, ag amu ooppa daan, amuppa keeke laa hekkulagnu elele iitta.

⁷ Am gemu amu, Kayak Nug na gamag ahak doon, ee, wain ele nahip lakkutnu oo hette amunu, na gona, oo gamag ahak ele nahip ee, wain ele la!

⁸ Na hanhan lamen ena takkan, goɗen ele ikkin uɗug laaitte!

⁹ Wan imuppan dayakppa am dayak gaɗappa, unuqagppa ele anttak laippu iitta, amu Kayak Nug wan imuppa na haen gane bau daan oikkutnu tituanom amu, haen amu oh na ah nahip, na nuhignu oot mauhtte amu, na gamag ahak ele nug ele daayya oiyeɗ! Aɗinu? Kayak Nug na amu hekkutnu metta, aam waappa na uɗat heɗiag ele henan daakkutnu ele mettom.

¹⁰ Na gemu bau daattem amu, na haen imuppa aɗi uɗat hekkutnu anidkkut, na nahip ɠagattag ohppa he! Aɗinu? Na moɗppa gokkutnu oittem amu, appa danab laa nug uɗat laa ii hette, nug keeke laa hekkunu maittak ii aotte, appa doyak laa ii daatte, doyak dabmak ena ele laa ii daatte.

¹¹ Da keeke laa aam waappa bette anidmi. Amuam danab nug huana qaiedatte ele amu, nug hanhan resis haenppa laa oh ii eɗadtte; ele amu, danab nug ɠagattag ele, nug haen oh ban ii eɗidtte. Laa amu, danab nug doyak dabmak ena ele, nug hanhan ee elele ele ii daatte; ele amu, danab nug pahanab dabmak aokkunu elele amu, nug hanhan enub ele ii daatte; laa ele amu, danab nug sul okkai heum ele, nug laa oh dilag neekkakppa hanhan ena ii daatte. Amunu diig am, kobol digdig danab oh dilagppa deɗ laala laippun bette, ahilagppa ele bette.

¹² Anam amunu, danab laippu laa nug uug atten nuhigppa bekkunu daatte haen ii dootte. Danab nug uhui kakai guittak madatte ele me, kakai appa notteb. Ao, danab nug uhui aihe, ai appa notteb, amubia haen eheɗppa uug danab dilagppa betteb; ag dabmeegeg ii betteb. Iitta. Uug nug mauhnoak, nuhig haenppa laippun bette.

Danab nug doyak dabmak ena ele, nuhignu am ena, danab Kayak dab-ii-maama ii dim lamidtte ele, nuhignu am gadon

¹³ Amu deɗ laa danab aam waappa daya, nug doyak dabmak ena ele, nug nuhig doyak dabmak ena ele amuppa keeke okkai heum antten, da ittag okkainab iwom.

¹⁴ Kaya amuam inam. Haen laa aab nakok okkai laa dayom. Danab ah kuɗum aab amuppa ii daappig. Ag kuɗum ii daaegeg, atu laihppan king ɠagattag ele nug nuhikkud daup ele ag banelag uɗin, aab amu oo mattan aqaknu maadna daan, ag aab amu aoglagnu babaittak uɗat naɗinab heppig.

¹⁵ Amu aab nakok okkai amuppa daɗek danab laa dayom, nug doyak dabmak ena okkai ele amu, nug aab amuppan danab doyak dabmak okkai ele nuhigppanu ib ippuanatte, kekeɗ ag aab amu ii eɗadppig, amge amu dimppa aab amuppan danab ag daɗek danab ag ehanattom ele, ag nug daulag atiom. Nug aɗi keeke ena laa ii medappig.

¹⁶ Anam amunu, da ami. “Doyak dabmak ena ele am ɠagattag eɗidtte.” Amge danab laa oh ag daɗek danab nug doyak dabmak ena ele, ag haen elab iitta doyak dabmak ena nuhignu ena iinab doon, nuhig nai ele dab-ii-metteb.

¹⁷ Danab ag doyak dabmak ena ele ag qinonob nai madippeg, danab ah ag nai amu dooglag, am enanag; me okkai danab, ag Kayak dab-ii-menan ii dim lamidtteb ele, ag baalag okkaippa madippeg, danab ah dooglag, amuam ena iitta.

¹⁸ Doyak dabmak ena ele am ban haknu keeke digdig eɗidtte; amge hipunin danab laippu nug he, ena hak kuɗum nauhtte.