Eklisiastis 8 - Nobonob Baibel

¹ Aun nug danab doyak dabmak ena ele bia daatte? Ge, aun nug keeke ohnu diig ab doognignu elele? Danab nug doyak dabmak ena ele, nug iɗuppa amahlak bia daatte. Ao, doyak dabmak ena ele he, danab iɗu am danab ɠagattag neegtte bia ii daatte.

Danab ag okkai oɗe dim lamidkkulagnu nai

² Na king oɗe dim lamidkkutnu Kayak noobppa daanna, na nahip nai ɠagattag qettan mattime amunu, na kingnu haknunab anak dim lamitte!

³ Na kingnu uɗat aɗi hekkutnu daattem amu, na uɗat amu he! Na aib uume. King nug aɗi hekkunu oo daatte amu, nug hekkunu elele amunu, na laa eheɗ hekkulagnu hetteb ele, na ahilag maittak aib ɠagattag qettame.

⁴ King nug aɗi ab, nuhikkud danab ah ag aakku hekkulagoitte. Laa nug king amegppa, “Na aɗin hettem,?” akkun elele iitta.

⁵ Aun nug kingnu haknunab anak dim lamidtte amu, nug guittak laa ii aoma; amu danab nug doyak dabmak ena ele, nug aɗi keeke hekkunu, nug amu haknu haen, amu haknu ippu ena ele dootte.

⁶ Keeke oh haknu am haen ele, ippu ena ele; diig amunu danab ag aɗi keeke hekkulagnu daatte, ag haenppa, ippu ena eleppa hekkulagnu oinna, uug maotteb.

⁷ Danab laa nug butti aɗi, kobol aɗi bekkunu daatte ii dootte; diig amunu auntai laa nug keeke attem gokku anidkkunu elele iitta.

⁸ Danab laa nug ulah attem attem hekkunu ɗo medakkunu elele iitta; amubia danab laa nug mauhkkunu deɗ nuhig ii gumatte. Ban haenppa danab okkai nug laa amegppa, “Na oot heeb, na eɗun lakka gona, hamu daakkut,” ii atte; amubia danab nug hak naunu ena doya, doyaya tuɗidib heebeb, hak nau amuam danab amu ii paɗama.

⁹ Amu da keeke oh aam waappa daatte dabmeinne, da imu anidmi. Haen laala danab okkai nug ⌊hipunin haaha,⌋ laa nug waappa daatteb, ahilagppa eheɗ hattette, uug okkai nuhigppa bette.

¹⁰ Ele amu, da nau hak danab, ag aab okkai ag hipunin heppigppa daan, ag Kayaknu mettid lag, lag amuam Kayaknu tituanak daatte, ag amuppa gonana, eɗun uɗiegeg, danab ah binag meppig amu, da ag mauheg boumadppig anadmi. Amu ele am gaɗappa, unuqagppa ele anttak laippu iitta.

¹¹ Danab eheɗ hena, ag paha bu ii aotteb dayeb, danab oh ag hibguitta henana, kobol eheɗ digdig hekkulagnu dabmetteb.

¹² Anam, amge nau hak danab nug ɗo huanak tippala, haen elab bau daakkutai, me da doottem, butti aɗi danab ag Kayaknu ebehilag oh bodoetta le mette, ag Kayak noobppa anam daatteb ele amu, ahilagnu am ena. Laa nau hetteb, ag am iitta.

¹³ Nau hak danab ag Kayaknu ebehilag oh bodoetta le ii mette amunu, ag ena ii daamna. Ag haen elabnab bau ii daamna.

¹⁴ Keeke laa ele gaɗappa, unuqagppa ele anttak laippu iitta ele; keeke amu ele wanppa daatte. Amuam genab tutukku hak danab ag deɗ laala nau hak danab nob aolob bia ag aotteb; amu deɗ laala nau hak danab ag genab tutukku hak danab nob ena aolob bia aotteb. Kobol amu ele am gaɗappa, unuqagppa ele anttak laippu iitta.

¹⁵ Amunu amu, da danab nug aam waappa dayaya, gamag ahak dookkunu attem. Aɗinu? Nug ee, le ele lakku, gamag ahak ele aokku am enanag; keeke laa amu ii eɗidtte. Nug amu hekku dayeb amu, Kayak nug haen gane wan imuppa daya, uɗat hekkunu mettom amu, nug haen amuppa nuhig uɗat haknu gamag ahebeb daakku.

¹⁶ Amu haen da doyak dabmak ena elenu diig dookkulnu, da danab ah wanppa aɗi aɗi uɗat ii niinna henan daatteb ele anidkkulnu heinne amu,

¹⁷ haen amuppa da keeke oh Kayak heum anidmi. Aam waappa keeke oh ba gotte amu, danab laa nug amu oh dookkunu elele iitta. Danab nug wagainab ma, diig dookkunu hekku, amge nug diig oh tutukku dookkunu elele iitta. Danab nug doyak dabmak ena ele nug, “Da amu oh doottem,” akkutai, amge nug genab diig oh tutukku dookkunu elele iitta.