Eklisiastis 7 - Nobonob Baibel

Wanppa bau dayaya oiyaknu ippu laa oh eɗittak

¹ Danab nug onig ena ele daatte, amuam enub okkai aɗak eɗidtte; danab anam amu, mauhaknu deɗ nuhig am nuhig menuak deɗ eɗidtte.

² Danab nug lag laappa, appa ag laa mauhomnu mahiak hetteb, amuppa gokku am ena; nug lag laappa, appa ag hobul henan daatteb, nug amuppa gokku am nakok enatai, amge enanag iitta. Aɗinu? Ig danab oh ig mauhkkunig; amu danab nug bau dayaya, nug amu dabmaɗ!

³ Mahiak am imak eɗidtte; amunu diig am danab nug mahiakppa butti aɗinu keeke dabmaama, oiyak nuhig hettoɗitte.

⁴ Danab nug doyak dabmak ena ele nug lag mahiak hettebppa daakkunu dabmette; amge danab nug Kayak dab-ii-maama ii dim lamidtte ele, nug lag laa, oo hak anuqak doyak kobol amuppa anuqak daatteppa daakkunu dabmette.

⁵ Danab doyak dabmak ena ele nug na daut bateb, na dabmekkut am ena; amge na danab nug Kayak dab-ii-maama ii dim lamidtte ele, nug ahi ettebeb, na daanna dookkut, am ena iitta.

⁶ Aɗinu? Danab nug keeke laa bunaɗa qaɗaietta auta autanab awom ele, nug keeke amu waa waappa amote, ewa huana ewawa, oqotti otte, amu; danab nug Kayak dab-ii-maama ii dim lamidtte ele, nuhig imak am anam bia. Amu ele am gaɗappa, unuqagppa ele anttak laippu iitta.

⁷ Danab nug doyak dabmak ena ele, amge nug kobol nauppa danab laa eppelagppan en aokku dayeb, nug aakku eɗua, danab nug Kayak dab-ii-maama ii dim lamidtte ele daatte; laa amu, lokkumakppa eheɗ haknu ehanittak mettak am he, laa aotte ele nug oo kaliak daatte.

⁸ Keeke laanu digmak am nakok ena. Keeke amunu gogppa tak am enanag; amubia oo bodoettak kobol am dada hak kobol eɗidtte.

⁹ Danab ag Kayak dab-ii-menan ii dim lamidtteb ele, ag ahilag kobol am ag paha paha oolag nauhtte; amunu na amubia aib heme! Na paha paha oot nauhmanu dabme!

¹⁰ Na, “Aɗinu ⌊Kayak he,⌋ anukkan haen am haen ena, me gemu am ena iitta?” aib oɗ mettame. Aɗinu? Oɗmak amuam doyak dabmak ena eleppa ii bette.

¹¹ Danab nug mameg eppegppanu aug keeke aotte amu, nug keeke ena aotte. Doyak dabmak ena am ele aug bia; danab aun aɗi ag bau daan, doyak dabmak ena ele aotteb amu, ag amuppa ehanittak aotteb.

¹² Aɗinu? Men doɗo danab ehanidtte, amubia doyak dabmak ena ele am ele danab ehanidtte; anam amge men doɗo danab ehanitteb, bau daakkunu elele iitta. Danab nug doyak dabmak ena ele, doyak dabmak ena ele amuam danab amu ehanitteb, bau daya oikkunu elele.

¹³ Kayak aɗi aɗi heum amu, ag dabmetteg! Aɗinu? Nug aɗi keeke he, kaliak daatte amu, aun laa nug heeb, tutukku daakkunu elele?

¹⁴ Nahip oiyakppa, haen ena daatte dayeb, na gamag ahak doye! Nahip oiyakppa haen nau daatte dayeb, na imunu dabmak awe! Kayak Nug he, kobol aɗit amu oh bettep; amunu danab nug Kayaknu naittuɗ mekkunu elele iitta.

Bau dayaya oiyaknu oɗmak laala

¹⁵ Amu da bau wanppa daye, da gaɗappa, unuqagppa ele anttak laippu iittanu oiyak dahil imuppa oiyeye, da keeke aɗit anidmi. Laa am genab tutukku hak danab nug genab tutukku hak kobol haaha oitte, amge nug paha mauhtte; laa am nau hak danab nug nau hak haaha oitte, amge nug paha ii mauhtte. Iitta. Nug haen elab bau dayaya, wanppa oitte.

¹⁶ Kayak Nug danab attem attem haaha, tutukku daakkunu aum amunu, na nuhig nai amu aon, keeke baubau kuɗum laa ele tuɗidkkutnu aib heme! Na doyak dabmak ena ele aonna, keeke laa oh ii dabmemana, amuib dabmekkutnu aib heme! Ib aɗit amu ohppa na nakka, na nauhkkutnu hettem amunu, na anam aib heme.

¹⁷ Danab laa ag nau hak huanaknab hetteb. Na amubia aib heme; ele amu, danab laa ag Kayak dab-ii-menan ii dim lamidtteb ele amu, na ag hetteb bia aib heme! Ib aɗit amu ohppa na nakka, na henan paha, nahip mauhak haen iidappa mauhkkutnu hettem amunu, na anam aib heme.

¹⁸ Na Kayak ippunikkomnuib dabmena, ib gamagppa oikkut am ena; amunu diig am, danab nug Kayaknu ebehi oh bodoetta le mette amu, nug aɗi keeke haknu, nug nuhig dabmak buɗieb ukkeb, hakib hekkunu kobol am uukku.

¹⁹ Danab laippu nug doyak dabmak ena ele daatte dayeb amu, nuhig ɠagattag am aab okkainu gumak danab eblaih laih ele dilag ɠagattag eɗidtte.

²⁰ Wan imuppa genab tutukku hak danab daatteb, amge ag oolagppa laippu laa nug tutukkuib haaha, deɗ laa hipunin iinab hette laal ii daatte.

²¹ Na danab ah dilag nai ohnu aib daut human dabmettame! Na anam hekkut dayeb amu, na nahip maɗi nid nug na eheɗ laa awaknu anak waappa daakkutnu aabob dookkuttai.

²² Aɗinu? Na oot unuqagppa na doottem; na deɗ laala haen kuɗum danab laa ag eheɗ laa awaknu anak waappa daaglagnu ame.

²³ Da doyak dabmak ena ele dahil dabmakppa dayom amu; da amuppa keeke amu oh ma anttak memi. Da doyak dabmak ena ele daakkulnu ool dayom; amge amu da eɗilom. Da elele iitta daami.

²⁴ Wan imuppa keeke oh ib attenppa ba gotte amu; ba ukkak amunu diig oh da dookkulnu elele iitta. Danab laa amu ohnu diig dookkunu elele iitta.

²⁵ Anam, amge da doyak dabmak ena ele aokkulnu wagai mein daami; Da diig aɗinu wan imuppan keeke oh ippu godeppa, anam ba gotte amu, da amu ele dookkulnu wagai memi. Laa amu, da nau hak kobol am kaaka, da amunu diig dookkulnu hein; da Kayak dab-ii-maama hak kobol ele am kaaka, da amunu diig ele dookkulnu hemi.

²⁶ Da amu heinne, da imu anidmi. Ah laa nug uhui bia daatte amu, ooppa nug doɗ dilag pelem bia daatte. Ao, nug eppeg am danab qagakkunu sen bia daattep. Da nug danab ninig nau medatte anidmi; mauhak am ninig ele, amge ah amunu ninig mettak am mauhaknu ninig eɗidtte. Danab nug Kayak dim lamidtte amu, nug ah amu eppegppa ii daama; amge laa hipunin dim lamitta hette amu, nug ah amu eppegppa daakku.

²⁷ Amu da, da ippunittak danab amu, da imu attem. “Antte! Da imu anidmi. Danab nug tatam keeke laippu laa wagai ma dookku. Amu dimppa keeke laa dookku. Nug anamib heebeb ukkeb, nug doyak laa, am doyak laa ele tuɗittebeb, nug keeke kunum ele, amunu diig ele anidkkunu elele. Da keeke attemun ba gotte dookkulnu anam hemi.

²⁸ Amu da keeke anidkkulnu mattien heinne amu, keeke oh doyen ii malen, da imu antten doomi. Da danab oh oolagppa genab tutukku hak danab laib laibib daaegeg anadmi. Danab ag laib laibib, amge ah ag ebqak amunu honap, laib laibib qainqain bia, aakkuib daatteb.

²⁹ Imuib da mattie antten malami. Kayak Nug danab he, ag genab tutukku hak danab daappig; amge danab ag dabmak nau kuɗum dim lamidna, gemu ag eheɗ oitteb,” awe attem.