Eklisiastis 5 - Nobonob Baibel

Na Kayak noobppa dup nona binag mekkutnu amu, na dabmenan hekkut

¹ Haen na Kayaknu mettid lag amuppa gonana, na dabmenan ukke! Na appa gona, Kayak baag dookkutnu dabmenan gokkut; na gona, doɗ keeke hamu hamu, danab nug Kayak dab-ii-maama ii dim lamidtte ele hette bia manadna, Kayak aib mettame. Aɗinu? Danab amu ag eheɗ aakku hetteb ii dootteb.

² Na paha paha digmen, aib nai mattime; na ootppa paha Kayak noobppa keeke laa madikkutnu aib heme. Aɗinu? Kayak Nug hab aabppa daatte; na wanppa daattem amunu, na nai huana aib mattime.

³ Amunu diig am, na ootppa uug kuɗum aɗattem dayeb amu, na amunu tul niikkut; amubia danab nug Kayak dab-ii-maama ii dim lamidtte ele, nug nai kuɗum maditteppa, nug nai mauhnoak kuɗum ele maditte.

⁴ Kayak Nug danab nug Kayak dab-ii-maama ii dim lamidtte elenu ena ii dootte amunu, na Kayak amegppa keeke laa hekkutnu genabnab hekkutnu nai anan qagakkut dayeb, na anamib paha he! Na dimppa, haen adekkuppa aib heme!

⁵ Na keeke laa hekkutnu genabnab hekkutnu nai anan ii qagakkut dayeb, amuam ena. Na hekkutnu genabnab hekkutnu nai anan qakkona, ii hekkut dayeb, amuam eheɗ.

⁶ Na oɗenppa nai laa mattiona, hipunin aib heme. Na keeke laa hekkutnu genabnab hekkutnu nai anan qagakkut dayeb, dimppa na Kayaknu mettid lakka gona, appan mana mettak danab amegppa, “Da kakitten, nai amu mattimi,” aib ame. Na anam heppe, Kayak Nug oo nauhkku, amu Nug heeb, keeke oh na eppenppa uɗat heme ele nauhkkutai.

⁷ Dabmak hamu hamu awakppanu nai mattiak okkai bette, amu diig amunu na Kayaknu ebehin oh bodoetta le maɗ!

En okkai am gaɗappa, unuqagppa ele anttak laippu iitta

⁸ Na daɗek laa ag okkai laa waappa, eheɗ hattak maonna, hettoɗiak abenppa maatteg daaegeg, appan danab ag nai doya mala hettoɗia epeɗia elele mettak kobol ii dim lamidna hetteb anidkkut dayeb, na ⌊ena aib doome, amge na ele⌋ aib ottaime. ⌊Am kobol nau, amge danab okkai kuɗum ag amu hetteb.⌋ Aɗinu? Epeɗiak danab nakok okkainu ehanittak anuqak danab, ag epeɗiak danab okkainu ehanittak anuqak danab oɗelag dim lamidkkulagoitte; amu okkai amunu ag laa okkainab oɗelag dim lamidkkulagoitte amunu, kobol amu bette.

⁹ Danab okkai amu oh, amge agib iitta, king ele, ag oh daɗek ag dattanu keeke aotteb, ag amunu takis anan heeg, daɗek ag madatteb.

¹⁰ Danab nug men doɗonu oo mauhtte, nug deɗ laa men doɗo awa, “Da aakku elele aomi,” ii atte. Iitta! Nug baubau aokkunu hette. Ao, aun nug ennu oo mauhtte amu, nug men doɗo uɗatppan aotte ele amu, nug amunu elele ii dootte. Amu ele am gaɗappa, unuqagppa ele anttak laippu iitta.

¹¹ En tuɗitta, okkai mette amu, laa ag en amu latteb, ag ele tuɗid, kuɗum ele daatteb. Anam amunu, en mameg nug en kuɗum amuppa aɗi ehanittak aotte? Nug amegppa aakkuib anidtte.

¹² Uɗat hak danab nug ee okkai latte dayeb, o nug ee nakokib latte dayeb, nug ena niitte; amge enub danab nug niikkunu elele iitta.

¹³ Da eheɗ nau laa aam waappa daye anidmi. Amuam, danab nug enub okkai aotte, amge nug en amu eppegppa ɠagattag aɗaɗa daye, amuppa guittak nuhigppa bette;

¹⁴ o iitta, nug enub okkai awe, uug atten ba he, enub okkai amu iitta mette amunu, danab amu nug bekka keeke nakok laa medakkunu elele iitta.

¹⁵ Danab nug anig ooppanu hamu, beɗu miagib ele dotte; nug anam doa, mauhak haenppa nug ele anamib mauhak abenppa eɗua gotte. Nug wanppa uɗat atten atten haaha, keeke awom amu, nug keeke amuppanu aɗitai keeke laa eppegppa awa ii gotte. Hamu gotte.

¹⁶ Amu ele, am eheɗ nau laa ele. Ge, danab nug wanppa dotte, anamib nug eɗua, wan uua, mauhak abenppa gotte. Nug wanppa uɗat heɗiag ele heumppanu aɗi keeke ena aotte? Laa iitta. Nug uɗat heɗiag ele heum, amge nug danab ulah aɗakkunu dim lamidtte bia haaha daatte.

¹⁷ Nug keeke aɗi ena laa ii aotte. Nug oo doyak, oɗe qak, oo nauhak ele aakkuib doyaya andatta oitte.

¹⁸ Da amu oh antten amu, da aakku dabmak aomi. Dabmak amuam inam. Danab nug wanppa dayaya, nug ee, le ele lanana, nug uɗat aɗi heɗiag ele aam waappa haaha, amuppa oo hak dookku am ena. Nug haen tutu Kayak Nug wanppa bau daakkunu mettom amu, nug amu hekku. Kayak anam mettom amunu, nug anam hekku.

¹⁹ Laa ele amu, haen Kayak Nug danab laa en keeke metta, Nug he, danab amu nug keeke amuppa gamag ahak aokkunu elele daatte, Nug he, danab amu nug nuhig wanppan oiyaknu elele dootte, Nug he, danab amu nug nuhig uɗat hekkunu ele gamag ahak dootte amu, amu oh am Kayak eppegppanu, danab amu, nuhig daakkunu keeke laa aakku.

²⁰ Aɗinu? Danab amubia amu, Kayak he, nug gamag ahak dootte amunu, nug wanppan dayak nuhignu dabmak okkai ii aotte.