Eklisiastis 4 - Nobonob Baibel

Danab ag uug digdig laa eppelagppanu aon, uɗat okkai okkai hena daattebnu nai

¹ Amu da baula neekki ukke, aam waappa, kobol laa, amuam danab okkai ag danab laa eheɗ hadatteb, da kobol amu anidmi. Danab uug aotteb amu, ag gaaegeg, da ag amelag leb neene anadmi. Ag uug aqeeqe daaegeg, laa nug ag oo mak madakkunu laa ii daatte. Danab ag laa uug madatteb, ag ɠagattag ele amunu, ag amu hetteb, amge uug aotteb ele, laa ag oo mak madakkunu laa ii daatte.

² Da amu antten, da, “Laa mauhna, moɗppa niitteb ele, ag gamag ahak ele; laa wanppa bau daan, uug maotteb ele amu, ag am gamag ahak iitta,” ami.

³ Da anam ain, da tuɗitten, “Anam, amge laa nug wanppa ii doum ele, nug am enanag daatte. Nug eheɗ hak oh danab ag aam waappa daan hetteb ele, nug amu oh ii anttom,” ami.

⁴ Da amu oh dabmein, da inam ele anidmi. Danab ag uɗat okkai, enanag ele hettebnu diig am, ag mudippan laippu dilagnu amelag qe oolag elele ii daatte. Anam, amge amu ele am gaɗappa, unuqagppa ele anttak laippu iitta; amu ele am danab nug ulah aɗakkunu, ulah dim lamidtte, am amubia.

⁵ Danab nug Kayak dab-ii-maama ii dim lamidtte ele nug nukka, nug ebekuɗ aɗa dayaya, padal mette.

⁶ Danab nug ee nakokib maɗoɗ ele latte amu, amuam ena; danab nug uɗat bodok iitta, hamu hamu ulah aɗakkunu, ulah dim lamittak bia haaha, ee okkainab latte, amuam ena iitta.

⁷ Amu da baula aam waappan keeke gaɗappa, unuqagppa ele anttak laippu iitta aakku anidmi.

⁸ Amuam danab nug tiig laippu laa iitta. Ao, nug nid iitta, awag, amag laa ele iitta. Anam amu, nug am uɗatib hette, nug hamu ii daatte; Nug anam daya haaha, en okkai aotte, amge nug ena ii dootte. Iitta. Nug baubau aokkunu hette. Nug nukka, nug oɗ inam ii medatte. “Da aun nug en imu aokkunu uɗat hettem? Ao, da aunnu uɗatib heinne, gamag ahak nakok aolom, amge da ii aottem?” Nug amu oɗ ii medatte. Kobol amu daatte, amge amu ele am gaɗappa, unuqagppa ele anttak laippu iitta; am kobol guittak ele.

Danab nug layag ele, amuam ena

⁹ Danab aɗit aa oh qagmeya, uɗat hettep am ena; amunu diig am, aa uɗat okkai heya, meu ena aoglahnu elele.

¹⁰ Laa amu, danab aɗit daattep dayeb, laa na qeeb amu, layag ehanitteb, eɗua ahakkunu elele; amge laippu nukka daya, laa ehanitteb eɗua ahakkunu iitta amu, nuhignu am gadon.

¹¹ Oug haenppa laippu laa nukka niieb, ulah qekku; amge aɗit daattep dayeb amu, gakkaɗak elele daaglah.

¹² Danab laippuib dayeb, kekeɗ nug eɗidkkunu eleletai; amge danab aɗit daattep dayeb, aa ɠagattag daaglahnu elele. Ao, muɗi ewam akkak daatteb dayeb, muɗi amuam paha ii pakkuma.

Wanppan binag mak am keeke gaɗappa, unuqagppa ele anttak laippu iitta

¹³ Nid bau laa keeke iitta ele, amge nug doyak dabmak ena ele amu, nuhignu am ena. King laa nug kaino meum daatte, amge nug dabmak tutukku iittappa keeke hette, nug nau aomanu nai laanu awaknu uutte amu, nuhignu am ena iitta.

¹⁴ Aɗinu? Nid bau amu nug maniguittakppanu uɗia, wan amuppan king ba daakkutai, o laa king tiigppan doa, king daatte amu, nug daɗek mekkutai.

¹⁵ Amge da anidmi amu, nid bau king kaino dimugppa king ba daakku amu, danab ah oh aam waappa daatteb ele, ag nug dim lamidkkulag.

¹⁶ Nug dim lamidkkulag ele amu, laa ag ebqekkulagnu elele iitta, kuɗumnab. Anam, amge laa dim dokkulag amu, ag king amunu oolag ii daama. Anam amunu, amu ele am gaɗappa, unuqagppa ele anttak laippu iitta; amu ele ⌊diig doyaknu⌋ am danab nug ulah aɗakkunu, ulah dim lamidtte, am amubia daatte.