Eklisiastis 3 - Nobonob Baibel

Keeke oh am nuhig haen ele

¹ Keeke oh, am ahilag haen ele; amu uɗat oh danab ag wanppa hetteb ele, hak amu ele am haen ele.

² Danab nug dokkunu haen daatte; nug eɗua mauhkkunu haen ele daatte. Danab nug keeke ebakkunu haen daatte; danab nug keeke hiɗakkunu haen ele daatte.

³ Danab aqeb mauhkkulagnu haen daatte; danab ehanatteb, eɗun ena daaglagnu haen ele daatte. Danab keeke loppaɗkkulagnu haen daatte; danab ag keeke buuglagnu haen ele daatte.

⁴ Danab ag gaanna daaglagnu haen daatte; danab ag imanna daaglagnu haen ele daatte. Danab ag mahiglagnu haen daatte; danab ag ahi goɗaglagnu haen ele daatte.

⁵ Danab ag men aon, buɗiadppeg gokkulagnu haen daatte; danab nug men awa, qagmekkunu haen ele daatte. Danab lailkad humadna, ootuqadkkulagnu haen daatte; ag amu ii hemananu haen ele daatte.

⁶ Danab keeke anidkkulagnu mattiglagnu haen daatte; danab mattiak uɗat uuna, baula ii mattimnanu haen ele daatte. Danab keeke qagmena aɗaglagnu haen daatte; danab keeke kinipan abenppa buɗippeg gokkunu haen ele daatte.

⁷ Danab lamen pattikkulagnu haen daatte; danab lamen eɗun koitkkulagnu haen ele daatte. Danab oɗelag qamutkkulagnu haen daatte; danab ag nai mattiglagnu haen ele daatte.

⁸ Danab oo mauhak dooglagnu haen daatte; danab ag nau ninig ele dooglagnu haen ele daatte. Danab ag ban hekkulagnu haen daatte; danab ag maɗoɗ daaglagnu haen ele daatte.

⁹ Uɗat nid nug uɗat okkai haaha, nug aɗi keeke hanhannu aotte?

¹⁰ Uɗat laala Kayak danab ah mattom amu, da anidmi.

¹¹ Nug he, keeke haenppanab ag betteb, amu keeke amuam anttaknu enanag aakkuib. Nug ele danab ah oolagppa ag hanhannu keeke dooglagnu dabmak mattom daatte, amge ag Kayak Nug digmakppa aɗi heum, batakppa aɗi hekku amu, ag keeke amu oh dooglagnu elele iitta.

¹² Amunu da doottem, danab nug wanppa dayaya, kobol ena haaha, gamag ahak dookkunu am ena. Keeke laa amu eɗittak laal ii daatte.

¹³ Baula anak am, danab ah oh ag ee, le ele lanana, ag aɗi uɗat Kayak ag mattom am henana, uɗat amunu ag oo hak dooglagnu am ena. Amuam Kayak danab oh, ahilag daakkunu hamu mette, Nug eppegppanu uɗitte.

¹⁴ Da doottem, keeke oh Kayak heum am hanhan daakku, iitta ii mema. Danab laa nug Kayaknu hakppa keeke laa buuidkkunu elele iitta; laa nug nuhig hakppanu keeke laa hiɗa aokkunu ele elele iitta. Kayak Nug ig nuhignu ebehinig oh bodoetta le mekkunu anam babaittom.

¹⁵ Aɗi keeke ig gemu anidttem amu, anukka ele amu dayom; aɗi keeke butti aɗi bekku amu, haen amu ii nakppa keeke amu aakku dayom. Kayak Nug he, keeke matu beum am, eɗua haenppa bette.

¹⁶ Amu da keeke laa ele aam waappa bette anidmi. Amuam hettoɗiak abenppa kobol nau dayom. Ao, aben danab ag nai doya mala hettoɗia epeɗia elele mettak kobol dim lamidlob, kobol nau dayom.

¹⁷ Da amu antten, da oolppa inam dabmemi. “Kayak Nug aɗi hekkunu haen tituanom daatte. Ao, Nug aɗi hette am haen ele amunu, Nug genab tutukku hak danab, nau hak danab ele hettoɗiak abenppa maadkku.”

¹⁸ Da amu dabmein, da inam ele dabmemi. “Danab dilagnu amu, ag doɗ bia, ⌊ag mauhtteb⌋, ag amu dooglagnu Kayak ag ippunadtte.

¹⁹ Doɗ bia danab ah ag mauhtteb. Danab ah, doɗ ele oh am ib laippuib dim lamidtteb. Laa mauhtteb, amubia laa ele mauhtteb. Ag oh bau dayaknu ouɗi am laippu. Kobol amunu danab ag doɗ ii eɗadtteb. Diig amunu keeke oh am gaɗappa, unuqagppa ele anttak laippu iitta.

²⁰ Keeke oh bau daatteb ele amu, ag moɗppa gotteb. Ag oh gappudppa beppig; ag eɗun gappudppa gokkulag.

²¹ Amge doyak imu daatte; danab dilag ouɗi attan tette, doɗ dilag ouɗi honap, wanppa notte.” Da anam dabmemi.

²² Amu da anidmi, danab nug nuhig uɗat hekkunu gamag ahak doyaya hekku, am ena. Keeke laa amu eɗittak laal ii daatte. Aɗinu? Kayak Nug anam babaittom daatte. Laa amu, danab auntai laa nug laa butti aɗi kobol aɗi bekkunu daatte, nug amu ippunitteb dookku?