Eklisiastis 2 - Nobonob Baibel

Beɗunu oo hak dim lamittaknu kobol am ena iitta

¹ Anam amu, da dakka, da oolppa inam ami. “Da ahen, da aɗi kobol am ena anidkkulnu, da beɗul nug aɗi kobol digdig hekkulnu eeɗiltte amu, da hekkul,” ami. Da anam ain, aakku hemi, amge amu ele am gaɗappa, unuqagppa ele anttak laippu iitta anidmi.

² Da anam antten, da ami. “Danab nug hamu hamu imatte amu, amuppa nug dabmak tutukku iittappa keeke hette. Nug beɗu aɗi kobol hekkunu eeɗe hette amu, amuppa nug aɗi keeke ena he bette?” awe ami.

³ Ig danab ig haen tutuib wan imuppa oittem. Anam amunu, da haen tutu amuppa danab nug aɗi kobol dim lamitta heeb, keeke ena, meu ele laa bekkunu ippu anidkkulnu ool he, doyak dabmak ena ele ulum meɗeɗe, da gamag ahak dookkulnu wain lain, Kayak dab-ii-maama hak kobol ele dim lamidmi ⌊amge da meu ena laa ib amuppa bekkunu ii anidmi⌋.

⁴ Da amu hewoya, da uɗat okkai okkai hekkulnu hemi. Da lag dahil hatten, da grep dad ele eppaladmi.

⁵ Da ad meu ottebnu dad, hik awa dayaknu aben enanag ele bappalatten, da appa ad digdig meulkad okkulagnu eppaladmi.

⁶ Da amu hein, da le gottu dayebeb, ad kuɗumnab le mattaknu wan moɗ anam ele buumi.

⁷ Da danab ah ele ag dahil begbeg maɗi nid maɗi ah ele daaglagnu daden maadmi. Amu laa ag dahil begbeg maɗi nid maɗi ah ele daan, ag nid menuattegeg, nid amu ele dahilad begbeg maɗi nid maɗi ah ele daadppig. Laa amu, da makau, sipsip, meeme huanaknab ele. Laa Jerusalem appa da ii daami haenppa, ag doɗ kuɗumnab, dahil bia iitta. Da am huanaknab.

⁸ Da silwa, gol ele dahilnu huanak awen, aria wan laappan king aɗi, prowins anen anen danab okkai ele, da ag eppelagppanu en naɗi aomi. Da danab ah ele ag ahi edattappig ele, ag da noolppa daan, ahi ettaglagnu diiatten, da ele ah kuɗum diiadmi. Keeke amu oh amu ag heeg, danab nug enanagnab dootte.

⁹ Da ii domi haenppa, laa oh Jerusalem daappignu amu, dahil onig, ɠagattag ele am ahilag onig, ɠagattag ele eɗitta autta auttanab awom. Ag oolagppan laa nug da ii eɗilom. Da keeke amu oh hemi, amge da doyak dabmak ena ele uuenne ii hemi. Iitta! Da doyak dabmak ena ele aɗeɗe aakku hemi.

¹⁰ Da aɗi keeke da amelppa antten, aokkulnu ool heum amu, da aomi. Ao, da oo haknu anuqak doyak kobol aɗi ippuniɗom amu, da dim lamidmi. Da aɗi keeke hemi, da amu heinne, da gamag ahak okkainab doyeye hemi; amuam dahil uɗatnu nob ena aakku.

¹¹ Da eppelppa uɗat amu okkai hein; da aɗi keeke bekkunu uɗat heinne daami. Da anam hemi, amge da hein malen, keeke amu oh am gaɗappa, unuqagppa ele anttak laippu iitta anidmi; keeke amu oh am danab nug ulah aɗakkunu, ulah dim lamidtte, am amubia. Aam waappa uɗat amu oh hemippa, am keeke meu ele ii beum.

Doyak dabmak ena ele am, Kayak dab-ii-maama hak kobol eɗidtte

¹² Da amu oh hein malen, da doyak dabmak ena elenu diig, Kayak dab-ii-maama hak okkai, da kobol amunu diig ele dabmekkulnu dabmemi. Aɗinu? Auntai laa nug da dimulppa uɗia, king daakku, nug keeke da kobol amunu ma anttak hekkulnu aɗattem bia ii aɗama; da amu haknu keeke oh aɗattem bia.

¹³ Da dabmei ukke ukke, amahlak am gatatu eɗidtte; amubia da doyak dabmak ena ele hak am Kayak dab-ii-maama hak eɗidtte anidmi.

¹⁴ Danab nug doyak dabmak ena ele nug danab ameg ena ele oitte bia daatte; danab Kayak dab-ii-maama ii dim lamidtte ele nug danab ameg gaɗuak, gatatuppa oitte bia daatte. Anam, amge da keeke laa ele aakku dabmemi. Amuam danab Kayak dab-ii-maama ii dim lamidtte ele nug mauhtte; aria danab doyak dabmak ena ele amu, nug ele mauhtte.

¹⁵ Da amu oh dabmei ukke, da oolppa dabmemi. “Danab Kayak dab-ii-maama ii dim lamidtte ele, nuhigppa aɗi bekku am dahilppa ele bekku. Anam bekku amunu, da doyak dabmak ena ele aɗe daakkul dayeb, da meu ena attem laa aokkul? Am laa iitta.” Da amu dabmemi amunu, da amunu ele oolppa, “Amu ele am gaɗappa, unuqagppa ele anttak laippu iitta,” ami.

¹⁶ Aɗinu? Danab nug doyak dabmak ena ele, nug danab Kayak dab-ii-maama ii dim lamitta mauhtte bia mauhkku. Ao, aa oh mauhpeɗ, danab laa ag ahilahnu daulag atikku. Ag danab doyak dabmak ena elenu anam henana, ag danab Kayak dab-ii-maama ii dim lamidtte elenu anamib hekkulag. Ag aa oh ahilahnu daulag atikku.

¹⁷ Anam amunu, da bau dayaknu nau ninig ele doomi. Aɗinu? Diig laa am danab ag uɗat aɗi aɗi aam waappa hetteb ele, da amu ohnu uugib doomi. Diig laa am keeke oh am gaɗappa, unuqagppa ele anttak laippu iitta; am danab nug ulah aɗakkunu, ulah dim lamidtte, amubia.

¹⁸ Da uɗat huan heinne, keeke aomi amu, da amu oh antten, dabmei ukke, danab laa da abenal aokku ele, nug keeke amu oh aokku amunu, keeke oh aam waappa da uɗat hein aokkulnu hettem, da amu ohnu nau ninig ele doomi.

¹⁹ Keeke oh da doyak dabmak ena ele dim lamitten bappaidkkulnu uɗat huan heine daami amu, keeke amu oh danab laa da abenal awa daakku ele, nug eppegppa daakku. Nug am danab doyak dabmak ena ele, o iitta, nug danab Kayak dab-ii-maama ii dim lamidtte ele, da ii doottem, amge keeke amu oh nug eppegppa aakku daakku. Kobol amu ele am gaɗappa, unuqagppa ele anttak laippu iitta.

²⁰ Da amu antten, da wanppa dayeye, uɗat ɠagattag oh hemi amu, da amunu dabmei ukke, oolppa uugnab doomi.

²¹ Uug da doominu diig am, danab laa nug uɗat nuhig hekkunu doyak dabmak ena okkai ele, uɗat amu haknu diignu doyak tutukku ele, eppeg uɗat amu haknu dootte amunu, nug ha autanab aotte, amge dimppa nuhig uɗatnu meu am laa nug uɗat ii heum ele, nug eppegppa gokku. Kobol amu ele am gaɗappa, unuqagppa ele anttak laippu iitta; kobol amuam uug naunab ele.

²² Aɗinu? Danab nug wanppa dayaya, keeke qagmekkunu uɗat tuɗid ele haaha, nug uɗat ebehi guittette hette amu, nug uɗat amu ohnu aɗi meu ena laa ii aotte.

²³ Aɗinu? Danab amu hekkulagnu ag wanppa bau daan, uɗat henana, guittak doonna, oolag uug ele doon, tuqan ele ag dabmak aonnaib daatteb. Kobol amu ele am gaɗappa, unuqagppa ele anttak laippu iitta.

²⁴ Da amu oh anitti ukke, keeke laa ele anidmi. Amuam danab nug ee, le ele lanana, nug aɗi uɗat Kayak nug mettom am haaha, uɗat amunu nug oo hak dookkunu am ena; kobol laa oh eɗittak. Kobol amuam Kayak eppegppanu ihinigppa uɗitte, da anam anidttem. Am kobol ena.

²⁵ Aɗinu? Kayak Nug ehanittak ii mekkeb amu, auntai laa ee, o dayaknu ena doyak dookkunu elele iitta.

²⁶ Amunu diig am, Kayak Nug doyak dabmak ena ele, doyak ena, amu oo gamag ahak ele danab ag Nug waappa daanna, dim lamidtteb ele, ag madatte, amge Nug he, hipunin danab ag en ahilag danab ena amu mattaglagnu uɗat ge iitta henana, keeke aon qagmekkulagnu hetteb. Amu oh gaɗappa, unuqagppa ele anttak laippu iitta; amu ele am danab nug ulah aɗakkunu, ulah dim lamidtte, am amubia aakku daatte.