Eklisiastis 12 - Nobonob Baibel

¹ Na kaino mena, uug digdig anidkkut. Ao, na kaino mena, na, “Da gemu dahil oiyaknu ool ittag ii qette,” akkut, amunu gemu, haen amu ii uɗiom daatte, na gemu na nid bau daanna; na laa Nug na heittom ele amu, na Nug dabmette!

² Qinob na kaino mena, aamnu amahlak, kalamnu amahlak, hoɗoppai dilag amahlak ele am qinonob amahaltteb bia anidkkut; gu na maleb, aam nekku, amge na amahlaknab ii anidmana.

³ Haen amuppa na eppen, baen ele oh am gai-iitta daaglag; na aen ele nauhna, kaumna laippu laippu daaglag amunu, ag damqak uɗat ii hemana, na amen ele ena ii daaglah.

⁴ Na daut oh nauhak daapeɗ; laa ag uɗat hebeppeg, na oqotti ii doomna. Ai ag ahan gaatteb haenppa, na ele haen anamppa buttuanab ahakkut; amge na ai dilag gayak pehettak ii doomna.

⁵ Na keeke laa attan tekkutnu baɗan; ibppa oikkutnu ele baɗakkut. Na ikkin uɗug am hakkab eppeb; na oikkut, amge qinonob, tap mauhkkun qinonob oitte bia oikkut; na ee, le ele, o beɗun keeke laanu ele dab-ii-memana. Na kaino mena anambia daan, na mauhkkut; na mauhppe, diig amunu mahiak danab ah ag mahiak uɗat henan oiglag.

^6-7 Danab ah ag anam kaino mena mauhtteb amunu, na bau daan, Kayak dabmette! Danab mauhtteb, amuam keeke muɗi silwappa aihak daye, laa muɗi otaɗe na qette, am amubia; o iitta, tappiɗ golppa hak na qa aoɗtte, amubia. Danab mauhtteb, amuam hinai laa, ah le itakkunu awa, leppa ukke, na qa aoɗtte, amubia; o iitta, le itaknu keeke laa aoɗa nauhak daatte, am amubia. Mauhak dimppa amu, danab gaɗa am eɗua, gappud mette; nug ouɗi am eɗua, Kayak me uɗiom ele, nuhigppa gotte, ⌊amunu na gemu, na bau daattem haenppa, na Kayak dabmette!⌋

⁸ Da ippunittak danab, da attem. “Gaɗappa, unuqagppa ele anttak laippu iitta! Gaɗappa, unuqagppa ele anttak laippu iitta! Keeke ohnab am gaɗappa, unuqagppa ele anttak laippu iitta!”

Nai imunu gogppa tak

⁹ Ippunittak danab nug nai imu yom amu, nug am doyak dabmak okkai ele, amge nug nukka amu aɗa, nugib ehanidkkunu ii heum. Iitta. Nug doyak amu danab ah dooglagnu ele ippuanattom. Nug dabmak okkainab awawa, nug oiyak ehanittaknu nai tutu elenu meu pehettak anidkkunu haaha, nug awa babaitta, listappa pehettak yom.

¹⁰ Ippunittak danab amu nug nai onig attennab uɗat mattebeb, nainu meu am pehettak bekkunu uɗat okkai haaha, nug aɗi yom am tutukku, genab ele.

¹¹ Danab ag doyak dabmak ena ele, ahilag nai am ad laa aeg hawaɗ hoiyak ele danab ag amuppa makau okkai ebehi ele yaalatteg uɗat hetteb bia. Ao, ahilag nai am ad laa noobppa tutui ɠagattag ye nak ele doɗ guittak mettette gotteb bia. Ahilag nai am Kayak, Nug ig gumigtte, nuhigppanu uɗitte.

¹² Amu ippunittak danab nug inam atte. “Anam amunu, o da bekkal, na nau aomnanu dabmettak nai dahil imu doon autna awe! Na nai laala, danab doyak dabmak ena iitta ele oɗelagppa uɗitte amu, na nai amu aib dabmeme! Danab ag buk huanaknab yaatteb, amu buk amu ge iitta ebqak am beɗu he, bahi yaatte.

¹³ Keeke oh amu, ig aakku doomut; amu keeke amu ohnu gogppa tak am inam. Na Kayaknu ebehin oh bodoetta le maɗ! Ao, na nuhig haknunab anak dim lamitte! Aɗinu? Amuam keeke anuqak, Kayak Nug danab hekkulagnu mattom. Keeke laa iitta.

¹⁴ Diig laa na anam hekkutnu am, Kayak Nug keeke oh ig danab, ig hettem ele epeɗiadkku. Nug keeke ig miag atiak hemut epeɗiadkku, amge amu aakkuib iitta. Iitta. Nug keeke ig lokkumakppa hemut ele epeɗiadkku. Nug ig keeke ena hemut epeɗiadkku, amu Nug keeke eheɗ ig hemut ele epeɗiadkku,” awa atte.