Eklisiastis 11 - Nobonob Baibel

Danab nug uɗat okkai, heɗiag ele haaha, nug keeke aotte

¹ Na nug ehanittak henan daye! Aɗinu? Na anam heppe, butti, haen adekku amu, na ehanittak eɗun aokkut.

² Na nug ehanittak nahip am ib kuɗumppa hee! Aɗinu? Na wanppa aɗi uug naunab digdig bekkunu daatteb amu, na ii doottem.

³ Lombigppa gu huana daatte dayeb, gu wanppa nette; ad laa qiia ukka wanppa niitte amu, ad amu qiia ukka dayomppa aakku niitte. Am yau uɗitteppanu ad qiia ukka niitte amu, yawalti uɗitteppanu aakku niitte. Yawalti uɗitteppanu ad qiia ukka niitte amu, yau uɗitteppanu aakku niitte.

⁴ Danab nug ulahnu, o aam naknu keeke, nug amunu dabmak okkai aokku dayeb amu, nug keeke laa ii eppama; nug gu nekkunu dabmak okkai aokku dayeb amu, nug ukka, ee oɗuom ele ii aoma.

⁵ Na nid nug anig ooppa daye, nuhig bau dayaknu ouɗi attem ukka, nuhigppa daatte ii doottem; amubia na Kayak, keeke oh he bette ele amu, na nuhig uɗat buttinu amu anidkkutnu elele iitta.

⁶ Na nahip uɗat attem meu okku amu, na ii doottem; uɗat laa imu meu okkutai, o uɗat laa umu am meu okkutai, o aɗit oh meu okkulahtai, na ii doottem, amunu na buttua ahan, ee keeke eppan; tueb ele na uɗat henan daye!

Nid bau, danab kaino ele dilag nai

⁷ Amahlak am keeke ena; amu danab nug buttua aha, aam andatta, nug ena dootte.

⁸ Danab nug maɗ kuɗum wanppa dayaya oikkutai. Nug anam daakku dayeb amu; nug nuhig oiyak ohnu gamag ahak dookku am ena. Aɗinu? Gatatu manak haen am uɗikku; haen amuam elab daakku amunu, nug amu dabmettaɗ! Keeke oh bekkunu am gaɗappa, unuqagppa ele anttak laippu iitta.

⁹ O nid bau, na nid bau daattem, haen imuppa na oot gamag ahaɗ! Ao, na ootppa aɗi aɗi hena, gamag ahak dookkutnu anidttem ele amu, na amu hekkut. Na ootppa attem attem hekkutnu doottem, na amenppa attem attem hekkutnu anidttem amu, na amu dim lamidkkut; amge dabme! Kayak Nug na aɗi aɗi hekkut amu, Nug na amunu epeɗidkku.

¹⁰ Anam daatte amunu, na ootppa baɗak doyak, na beɗunppa guittak doyak ele agappe ukkeɗ! Aɗinu? Nid bau dayak, beɗuppa ena dayak ele am paha iitta mettep; aa am gaɗappa, unuqagppa ele anttak laippu iitta.