Eklisiastis 10 - Nobonob Baibel

¹ Qabuttid ag leppu muttuɗig enanag eleppa mauhna beɗaegeg, uɗig otte; amubia danab nug kobol doyak dabmak ena ele, kobol binag ele dim lamat-tte, me deɗ laa nug Kayak dab-ii-maama hak kobol laa he, nuhig kobol aɗit laa aa honap nettep.

² Danab nug doyak dabmak ena ele, nug ib ena awa oikkunu daatte; danab nug Kayak dab-ii-maama ii dim lamidtte ele, nug ib eheɗ awa oikkunu daatte.

³ Danab nug Kayak dab-ii-maama ii dim lamidtte ele, nug ibppa oiyaya, kobol dabmak iitta ele haaha; nug aakku danab ah oh nug kaaka amu ippunadtte.

⁴ Nahip okkai nug nahipnu oo nauhkku dayeb, na uɗat hekkutnu daattem, na uɗat amu aib uume; na ootppa maɗoɗ doon daye! Aɗinu? Kobol amuam kaliak okkai heeb, elele daakkunu elele.

⁵ Aam waappa eheɗ hak laa daatte anidmi; eheɗ hak amuam danab okkai, ag beɗulagppa.

⁶ Eheɗ danab okkai hetteb amu, am danab ag Kayak dab-ii-menan ii dim lamidtteb ele tituanadna, danab ah gumadkkulagnu gumak abenppa maadtteb; amge ag danab ag uɗat amu hekkulagnu ehah ele, ag danab amu tituanadna, aben amuppa ii maadtteb. Iitta. Ag uɗat laa hamu, aben amuppa maadtteb.

⁷ Da ⌊kobol amunu⌋ imu anidmi. Begbeg maɗi nid ag hos attan oiyegeg; anuqak danab, ag begbeg maɗi nid bia, ag baelagppa oitteb.

⁸ Danab laa nug moɗ buutte amu, nug amuppa na qekkutai; laa nug men aɗ loppaɗtte amu, mat nug emalkkutai.

⁹ Danab nug men okkultte amu, men naɗi na qa, tonakkutai; danab nug ad imuag oppat-tte amu, ad buɗibɗib ukka, nug tonakkutai.

¹⁰ Na hebeb ii uɗigppe, aeg iitta daakku dayeb amu, na wagai mena, keeke okulkkut; amge na doyak dabmak ena ele aɗan, keeke hekkut dayeb amu, uɗat amuam pehettak gokku.

¹¹ Danab nug makkai heeb, nuhig nai dim lamidkkunu kobol dootte, amge danab amu nug kobol amu digma haaha, kobol amu oh ii ha maleb, makkai nug tatam danab amu emaleb, danab nug kobol amu doyom, amuppa nug ehanittak laa aokkute?

¹² Danab doyak dabmak ena ele nai maditte amu, nug oo bodoette enanag maɗoɗ ele hak kobol dim lamitta maditte amunu, nuhig nai ele am anam, am doyaknu enanag; amge danab nug Kayak dab-ii-maama ii dim lamidtte ele, nug nai mauhnoak mattiaya uug aotte.

¹³ Danab nug Kayak dab-ii-maama ii dim lamidtte ele, nug digmakppa Kayak dab-ii-maama haknu nai maditte; gog tak amu, nug Kayak dab-ii-maama haknu nai aakkuib ii maditte. Iitta. Nug nai nau, kaaka ele maditte.

¹⁴ Danab nug Kayak dab-ii-maama ii dim lamidtte ele nug nai huan huan maditte, nug nai mattiaknu ii uutte. Laa nug butti aɗi, haen amuppa aɗi kobol bekkulagnu daatteb amu, laa nug amu ii dootte; amu laa aun nug oiyaya mauheb, amu dimppa nug aɗi bekkun daatte laa amegppa ab dokkute?

¹⁵ Danab nug Kayak dab-ii-maama ii dim lamidtte ele nug nuhig uɗat haaha, maidadaɗak huana dootte; nug eɗua, appag diigppa gokkunu ib ii dootte.

¹⁶ Wan laappan king nuhig dabmak am nid dilag dabmak bia daatte dayeb; nuhikkud ehanittak, ag anuqak danab amu, ag buttuanab ahan, ee, le ele huana latteb dayeb amu, wan amunu amu, gadonnab gadon.

¹⁷ Wan laappan king nug danab kalu mettak, nug danabnab daatte dayeb; nuhikkud ehanittak, ag anuqak danab amu, ag haenppa ɠagattag aoglagnu ee, le ele latteb, ag kaaka aqaknu le ii latteb dayeb amu, wan amuam itittak ena awom daatte.

¹⁸ Danab nug bahi iitta, nug laug am babaittak iitta ele daatte. Ao, danab nug uɗat pehettak ii hette ele amu, gu nug laug ooppa notte.

¹⁹ Hobulppa amu, imak daatte; wain he, laa latte amu, nug nuhig dayaknu am enanag dootte, amge laa nug men doɗo ele, nug amu hekku.

²⁰ Na oɗenppa aib king aon aon qettame, amge amuib iitta! Dabmakppa ele na anam aib heme! Ge, na danab okkai dilagnu na laut ooppa, niittem abenppa daanna, ag eheɗ laa awaknu anak waappa daaglagnu aib ame. Aɗinu? Ai laa nug doya, nahip dabmak, o nahip nai amu ag amelagppa akkutai. Ge, ai laa hagagaɗa oiyaya doya, ukka mattieb dooglagtai.