Eklisiastis 1 - Nobonob Baibel

¹ Dawit bekka nug Dawit mauhom dimppa Juda dilag king ba, Jerusalem appa king dayom. Nug king dayaya, nug ippunittak danab ele dayom, amu nai imuam nuhig nai.

Wan imuppanu uug laa Dawit bekka anttom

² Amu Dawit bekka, nug ippunittak danab amu, nug nai imu mattiom. Wan imuppanabnu keeke oh, ge keeke amu oh, am gaɗappa, unuqagppa ele anttak laippu iitta! Ge, gaɗappa, unuqagppa ele anttak laippu iitta! Am genab, gaɗappa, unuqagppa ele anttak laippu iitta.

³ Danab nug wanppa aam waappa dayaya, ⌊beɗu ehanidkkunu⌋ uɗat okkai hette amu; amuppanu nug aɗi meunab aotte?

⁴ Menuak laippu ag dona daaeg ukke ukke mauheg, menuak laippu laa ag aakku doppig daaegeg ukke ukke mauhegeg amu, anamib baab gotte; amge wan nug anamib hanhan daatte.

⁵ Aam nug hanhan ba ukka noa; nug eɗua bekkunu abenppa paha gotte.

⁶ Deɗ laala ulah yawalti uɗitte. Deɗ laala am eɗue, ulah yau uɗitte. Ulah nug anamib haaha, deɗ laa heum bia eɗua hette.

⁷ Le okkai, lenag ele, amu oh ag ahilag le yuppa notte; amge yu am-ii-bette. Le yuppanu aha, hab attan te, gu ne, le ugakka, yuppa le amu dayomppa aakku eɗua gotte.

⁸ Keeke oh anamib; danab nug amu ohnu madikkunu elele iitta amunu, keeke oh am bahi yaak megatte. Danab ameg nug neekka, keeke anidkkunu uuak ii dootte. Ge, danab daug nug nai dookkunu uuak ii dootte.

⁹ Aɗi keeke wanppa dayom amu, keeke amuib eɗua baula daakku. Ao, aɗi hak wanppa beum amu, hak amuib am baula bekku. Ge, aam waappa amu, keeke bau laa ii daatte.

¹⁰ Amu danab nug keeke laanu, “Antte! Laa nug keeke imu deɗ laa ii anttom; am keeke bau!” akkunu elelete? Iitta! Keeke nug anttom amu, keeke amu anukka dayom. Ao, keeke amuam anukka ippa dayom.

¹¹ Danab anukkanab daadppig amu, laa nug ag ahilagnu dab-ii-mette. Laa ii doppig, butti aɗi dokkulag, laa ag dimulagppa dokkulag amu, amu ag ele ag ahilagnu daulag atikku.

Doyak dabmak ena ele okkai awaknu am ele gaɗappa, unuqagppa ele anttak laippu iitta

¹² Da, da ippunittak danab amu, da Jerusalem ippa Israel dilag king dayeye, gemu ele daattem.

¹³ Amu tatam da dakka, da danab doyak dabmak ena ele ag keeke dooglagnu henana, aɗi kobol oh dim lamidna henan keeke dootteb amu, da kobol amuppa keeke oh wan imuppa heeg bette ele dookkulnu dabmein, amu anam hekkulnunab digmemi. Da amu hein, da Kayak Nug uug okkainab ig danab ah mekkom anidmi.

¹⁴ Da keeke oh danab ah ag ⌊beɗu ehanittaknu⌋ aam waappa henan daatteb anatten malami, amu keeke amu ohnab am gaɗappa, unuqagppa ele anttak laippu iitta; amuam danab nug ulah aɗakkunu, ulah dim lamidtte, am amubia.

¹⁵ Keeke laa kaliak daatte amu, danab laa nug heeb, eɗua tutukku, daalobianab daakkunu elele iitta. Ao, keeke laa ii daatte dayeb, laa nug ebqekkunu elele iitta.

¹⁶ Da dakka, da dabmein, oolppa inam ami. “Antte! Da doyak dabmak ena okkai elenab aomi. Ao, da laa oh Jerusalem ippa king daan, doyak dabmak ena ele aoppig amu, da doyak dabmak ena ele ahilag am eɗatten malami. Ge, da keeke kuɗumnab doyeye anidmi; doyak dabmak ena ele, amu diignu doyak tutukku ele, aa da keeke kuɗumnab ippuniɗpiɗ,” awe ami.

¹⁷ Da amunu da oolppa awoya, da dakka, da doyak dabmak ena elenu diig dokkulnu, da Kayak dab-ii-maama hak okkai, da kobol amunu diig ele dookkulnu dabmein, da digmein amu hekkulnu hemi. Da anam hemi, amge amu ele am danab nug ulah aɗakkunu ulah dim lamidtte bia daatte anidmi.

¹⁸ Aɗinu? Danab nug doyak dabmak ena okkai ele, nug ele oo doyak okkai ele. Ge, danab nug doyak okkai ele, nug ele ooppan guittak okkai ele.