Duteronomi 9 - Nobonob Baibel

Yawe aib daulag atiom

¹ O Israel danab ah, ag daulag human doyeg! Gemu ag Jodan le mataɗna wana, danab ag eɗattak, ɠagattag okkai ele, ag ag ahilkad wanppanu lamadna aoglagnu daatteb. Danab amu ag aab okkai aɗ attannab tak eleppa daatteb!

² Danab amu ag am danab tikkuak, elab elab ele. Ag am Anak buɗub. Am laa ag inam aegeg dooppig. “Aun nug Anak danab eɗadkkunu elele?” Danab amu, am danab aakku.

³ Amge ag imu tutukku doyeg! Yawe, ahilag Kayak, Nugib geha ag noolag awa, Jodan le mataɗa ukka, aab aɗu gakkaɗak naunab keeke he nauhtte, amubia Nug heeb, danab amu ag padal mekkulag. Nug geha heeb, danab amu ag, ag Israel noolagppa ahilag ɠagattag bodoetteb daaglag. Amunu Yawe Nug hekkununab nai anan qakkom bia, Nug heeb, ag Israel ag wana laippun kekeɗ lamadppeg, ag padal mekkulag.

⁴ Anam amu, Yawe, ahilag Kayak, Nug heeb, ag Israel ag danab ah amu lamadkkulag amu, dimppa ag akka ahilagnu aib, “Ig am genab tutukku aɗi amunu, Yawe Nug ig wan imu aognignu omaikka uɗia mekkom!” appig. Iitta. Wanppan wan anen anen imunu danab ah ag hak ahilag am nau amunu, Yawe Nug heeb, ag danab amu lamadkkulag.

⁵ Amu ag am genab tutukku hak danab, o ag am danab ag dabmak oiyak ahilag ele am tutukkuib amunu, ag wan amu aoppeg, ahilag daakkunu hetteb aib dabmeppig. Iitta. Danab amu ag ahilag hak nau amunu, Yawe, ahilag Kayak, Nug heeb, ag Israel ag ag lamadkkulagnu, Nug ag mamelkad aɗi, Abraham, Aisak, Jakop ele, ahilagnu Nug anam hekkunu nuhig nai ɠagattag qetta aum, amu meu okkunu, Nug anam hekku.

⁶ ⌊Da baula attem.⌋ Ag imu doyeg! Yawe, ahilag Kayak, Nug ag wan ena imu, ag am genab tutukku aɗi danab anamnu ii madatte. Iitta. Ag am genab tutukku hak danab ah iitta. Ag am oɗe dim lamidmananu dabmak ɠagattag eppak danab ah.

Makau gaiɗ golppa hak, amu dabmettak

⁷ Ag Yawe, ahilag Kayak, ag Nug atu taɗakppa heeg, Nug oppoɗi beum amu, ag amu oh ag daulagppa doaɗ! Haen ag Isipnu digmen ahappig uɗie, gemu ele, ag Nug oɗe tappaeg neene daatteb.

⁸ Horep qaukoppa ag heeg, Yawe oppoɗi beum. Haen amuppa Nug heeb, ag nauhkkulagnu oo nauhak nuhig elele dayom.

⁹ Haen amuam da qaukoppa men maha aɗit, Yawe Nug he, Nug ag ele nug tituana nai qakkak heppig, Nug nai amu men maha aɗit amuppa yom, amu da men maha aɗit amu diiatkkulnu temi. Da attan appa deɗ 40, tuqan 40 oh daami, da ee laa ii lami, le ele ii lami.

¹⁰ Yawe Nug men maha aɗitppa, nug tituana nai qakkak nai, Yawe Nug qaukoppa aab dittiakppa dayaya mattieye, ag qagmen dooppig ele, Nug nukka nai amu ya, da meɗom.

¹¹ Deɗ 40, tuqan 40 ele male amu, Yawe Nug men maha aɗit, amuppa nug tituana nai qakkak yaak dayom amu, Nug da amu meɗom.

¹² Yawe Nug meɗowa, Nug da amelppa aum. “Na pahanab no! Aɗinu? Danab ah na Isipnu omaladna uɗime ele, ag aakku kobol diig ena iitta uɗig wak ele digmen heppig. Ag paha nai haknunab anak da ag mattami ele tappaeg neum. Ag aakku golppa keeke dottog hena, ⌊amu noobppa dup nona binag metteb,⌋” awa aum.

¹³ Yawe Nug da amelppa anam ana, Nug tuɗitta aum. “Da danab ah imu anadttem, amu genab, ag aakku danab ah oɗe dim lamidmananu dabmak ahilag ɠagattag eppom daatte daatteb.

¹⁴ Ag anam daatteb amunu, da geha heppi, danab ah imu ag iitta mena autna aoppeg, hab waappa amu, danab laa nug baula imu dilagnu dab-ii-memanu, na uuppe, da hei! Da anam hein, da heppi, na buɗunppan danab kuɗum daan, ag ɠagattag okkai ele daaglag. Na buɗunad ag danab ah imu gemu daatteb dilag ebqak eɗadna, ɠagattagnab, gemu daatteb dilag ɠagattag eɗattak daaglag,” awa aum.

¹⁵ Yawe Nug da amelppa anam aum amunu, da eppelppa men maha aɗit nug tituana nai qakkak amuppa yaak dayom amu aɗalate, da eɗuen, qauko aab ewomppanu nemi.

¹⁶ Da qaukoppanu nein, honap appa haen da neegmi amu, da golppa makau gaiɗ dottog heppig am anidmi. Ag hipunin nau Yawe, ahilag Kayak, ag nuhigppa heppig anidmi. Ag pahanab, ib, Yawe Nug ag dim lamidkkulagnu haknunab aum amu dimedappig!

¹⁷ Ag heppig amu, da anidmi akkunu, da men maha aɗit eppelppanu buɗiati, wanppa noya aoɗya nauhpiɗ. Am ag noolagppanab da men maha aɗit amu aoɗatmi.

¹⁸ Aria, ⌊dimppa da eɗue qaukoppa tein,⌋ da Yawe noobppa laippun gatel qaun o, gomelen, iɗul wanppa memi. ⌊Da anam hei, da deɗ 40, tuqan 40 oh da Yawe noobppa dagom dayeye, da Nug unuqidmi.⌋ Da ee laa ii lami, le ele ii lami. Ag hipunin qeppig akkunu da anam hemi. Ag kobol laa, kobol amuam Yawenu neekkakppa eheɗ daatte, ag eheɗ amu heppig amunu, Nug oo huanak nauhom.

¹⁹ Yawe Nug ag heppig, Nug amunu oo huana nauhe, oppoɗi ele okkai be, da baɗak eheɗ nau ele doomi. Nug oo huana nauhe, heeb ag padal mekkulagnu babaitta dayom. Amge baula Nug dahil nai doyom.

²⁰ Yawe Nug Aronnu oo huana nauhe, Nug heeb nauhkkunu heum, amge da Aronnu unuqitti, Yawe Nug nuhignu oo bodoettom.

²¹ Am ag golppa makau gaiɗ dottog hena, nug noobppa dup nona binag mak kobol heppig amunu, ag aakku hipunin qeppig. Da ag makau gaiɗ dottog heppig amu awe, aab aɗuppa manen awen, aoɗe maduduɗi, kalu ne, da kalu amu awe, le qaukoppan nette, da amuppa gokkaɗi noum.

²² Ag Tabera, Masa, Kibrot Hatawa ele, appa ele heeg, Yawe oo nauhom.

²³ Kades Barnea appa amu, Yawe Nug ag nai haknunab anak imu matta aum. “Ag gona, wan da ag madattem amu aweg!” awa aum. Nug anam aum, amge ag Yawe, ahilag Kayak, nuhig nai haknunab aum, oɗe amu tappaeg ne, ag nuhignu oolagppa genab dooglagnu uun, ag Nug oɗe dim ii lamidppig.

²⁴ Ag hanhan Yawe oɗe tappaeg nette anidttem. Ag kobol amu ii uutteb, hakib hetteb. Haen oh da ag doyadttem ele amu, ag anamib aakku hetteb.

²⁵ Nug heeb, ag padal mekkulagnu ana malom, amu diig amunu da dagom dayeye, Yawenu deɗ 40, tuqan 40 ele unuqidmi.

²⁶ Da Yawe unuqitte ami. “O Naɗi Yawe, na danab ah nahip imu heppe, padal memananu oɗ medattem. Ag am nahipadnab daatteb. Israel danab ah amu, ag Isip appa begbeg maɗi nid daaegeg, na ag amunu qagaiettakppanu eɗua uhuqak nahip ɠagattag okkaippa heme. Ao, na ebehinppa ehanadna, na Isipnu diin uɗime.

²⁷ Danab ah imu ag na oɗen dim lamidmananu dabmak ahilag ɠagattag eppom dayeye, hipunin, nau hak ele hetteb, amge na amu dab-ii-memananu oɗ medattem. Na dabmak baolin, nahip maɗi nid Abraham, Aisak, Jakop ele, na hee, na ag ele nug tituanna nai qagappig amu, na nai amu dabmekkutnu oɗ medattem.

²⁸ Na heppe, danab ah imu padal mekkulag dayeb amu, Isip ag akkulag. ‘Yawe he, padal meppig diig am, Nug wan ag madakkununab nuhig nai ɠagattag qetta aum amu, Nug amu hekkunu elele iitta.’ O iitta, ag akkulag. ‘Nug he, ag nauhppig diig am, Nug ahilagnu nau ninig ele doyom; Nug atu taɗakppa ag aqakkunu Nug Isipnu diia, omalatte uɗippig,’ akkulag.

²⁹ Amge danab ah amu, Israel danab ah amu, ag am nahipadnab daatteb. Na ag ehanatte, ag Isip uppa maɗi nid maɗi ah ele ii daatteb. Na nahip ɠagattag huanak, na ebehinppa na diin uɗieye, ag Isip uuppig.” Da anam unuqidmi.