Duteronomi 8 - Nobonob Baibel

Yawe dabmetta, dim lamittaknu ewak

¹ Ag bau daan, abatak kuɗum bena, ag geha wan, Yawe Nug ag mamelkad aɗi madakkunu nuhig nai ɠagattag qetta aum, ag amuppa nona, aon daaglagnu amu, ag haknunab anak nai, gemu da ag madattem imu, ag dabmettan autnanab aon, dim lamitteg!

² Yawe, ahilag Kayak, Nug maɗ 40 oh anuqa omalattette, atu taɗakppa oippig amu daulagppa dayaɗ! Nug ag onilag qeeb nekkunu, ag ma anttak mettak ele aoglagnu, Nug amu heum. Nug ma anttak mettak digdig ag diilag miag atikkunu matta, nug ag genabte haknunab anak nuhig am tutukku dim lamidkkulagtai, o iittatai amu anidkkunu heum.

³ Nug he, ag enug daaeg, amu Nug ag maana matte lappig. Ee maana amu, ag anukka amunu ii dooppig, mamelkad aɗi ele ag amunu ii dooppig. Nug ahilagnu anam ha, amuppa Nug ag onilag qe neum. Nug amu heumnu diig am, Nug anam heeb, danab ah eeppaib bau daanna ii oitteb. Iitta. Danab ah ag Yawenu nai ohppa bau daan oitteb ippunadkkunu heum.

⁴ Am maɗ 40 amu ohppa, lamen ahilkad alag ma ii pattiɗattom, ag baelkad ele ii titiɗom.

⁵ Amunu ag nid mamelkad, anilkad ele ag nid naunau ahilkad toliadna bu madatteb, amubia Yawe, ahilag Kayak, Nug ag toliatta, bu madatte doyeg!

⁶ Ag Yawe, ahilalag Kayak, ag haknunab anak nai nuhig dim lamitteg! Ag ib oiglagnu aum, ag amuppa oinna, ag nuhignu ebehilag oh bodoetta le maɗ!

⁷ Ag anam hekkulagnu diig am, Yawe, ahilag Kayak, Nug ag diia, wan ena, lenag naunau ele, le ameg ena ele, oolnu noakppa, qaukoppa ele le wan ooppan qeppuɗin bettebppa diia gotte.

⁸ Wan amuppa wit, bali, grep muɗi, ad fig, pomigranet, olip ad, amu uppuh leppu kuɗum ele daatteb.

⁹ Wan amuppa ee huanaknab daatteb, tutu maknu laa iitta. Wan amuppa aen ele menppa daatte, kapa ele qauko nakokppa daatte.

¹⁰ Ag wana, wan amu aon, ee elele lappeg, oolag aɗakku amu, ag Yawe, ahilag Kayak, Nug ag wan ena mattomnu binag meig!

¹¹ Haen ag keeke ena amu oh ele daan amu, ag Yawe, ahilag Kayak, ag Nug daulag atieb, ag aakku nuhig haknunab anak, nuhig ɗo ele dimettan, ii dim lamidmananu dabmeig! Da gemu ag ɗo amu oh madattem.

¹² Ag Yawe ii dabmettanna oiglag dayeb amu, dimppa, haen ag ee elele lanan daanna, ag daaglagnu laulkad elele buun aguppa daanna,

¹³ ag ahilkad makau sipsip keeke ag kuɗum appatppeg aɗan daanna, silwa, gol ele ahilkad kuɗumnab beeb oinna, amu keeke laala ele kuɗum aɗualadna daanna amu,

¹⁴ geha, haen ag keeke amu oh ele, ag oolagppa dada danab bena, Yawe, ahilag Kayak, ag Nug daulag atimanu dabmeig! Nug ag Isipnu diia, omalatte uɗippig. Ao, ag wan laappa begbeg maɗi nid daaegeg, Nug amuppanu diiom.

¹⁵ Nug ag atu taɗak naɗi, danab antta baɗatte ele, Nug amuppa omalatte uɗippig, amu aib amelag atiom. Atu taɗak amuppa am mat nau, apiap ele, aam gakkaɗak huananab, le ele iitta, amge Nug menppan le he ne mattom.

¹⁶ Atu taɗak amuppa Nug ag maana lakkulagnu mattom. Ee amu, ag mamelkad aɗi ag ii lappig ele. Nug ag onilag qeeb nekkunu, Nug ag ma anttak madakkunu Nug anam heum. Nug anam heeb, ag ena bena daaglagnu heum.

¹⁷ Am ag inam akkulagtai. “Ig ikka ebehinigppa, ihinig ɠagattagppa ele ig enunig ele daattem,” aon akkulagtai.

¹⁸ Amge ag Yawe, ahilag Kayak, ag Nug dabmetteg! Aɗinu? Nugib ag ɠagattag matte, ag enulag ele daatteb. Nug ag mamelkad aɗi amelagppa nuhig nai ɠagattag qetta ana, Nug ag ele nug tituanna nai qagappig amu, nai amu elele medakkunu hette.

¹⁹ Amge am inam daakku. Ag Yawe, ahilag Kayak, ag Nug daulag atieb, ag kayak laa dim lamadna, ag noolagppa dup noa binag mak kobol hekkulag dayeb amu, da genab ag amelagppa attem, geha ag padal mena, iitta mekkulag.

²⁰ Ag Yawe, ahilag Kayak, Nug ii dim lamidkkulag dayeb amu, Yawe Nug danab ah wan ag madakkunu hedeppa daatteb, Nug ag heeb nauhkkulag bia heeb, ag Israel, ag padal mena, iitta mekkulag.