Duteronomi 7 - Nobonob Baibel

Oppiaawak ba, Kayaknu dayaknu nai

¹ Haen Yawe, ahilag Kayak, Nug ag wan nona aon daaglagnu daatte, Nug amuppa omalatta noa, Nug geha heeb, ag Israel, ag wanppan wan laalanu danab ah appa daatteb ele, ag ag lamadkkulag. Danab amu ag am; Hit danab, Girgas danab, Amo danab, Kanan danab, Peres danab, Hiwi danab, Jebus danab ele. Danab ameg eblaih aɗit ele amu, ag am danab ɠagattag ele, ag eɗattak daatteb.

² Yawe, ahilag Kayak, haen Nug danab amu diia, ag eppelagppa meeb, ag eɗadkkulag amu, ag heppeg, ag Yawenuib nuhig pelemppa daaglagoitte! Ag aib danab amu ele layam batan daaglagnu nug tituanna, ahilagnu oolag gai-iitta doon, oolag mattan ehanadppig.

³ Ag Israel, ag danab ah amu ele ewau matulak aib aoppig; ag aib heppeg bekkalkad, aɗelkad aab amuppan danab o ah ele ewau matulak aoppig.

⁴ Aɗinu? Ag anam heppeg amu, danab ah amu ag heppeg, ag bekkalkad aɗelkad ele ag geha kayak laala noolagppa dup noa binag mak kobol hekkulag. Ag anam heppeg, geha Yawe Nug ahilagnu oo nauhak huana doya, Nug heeb, ag paha padal mena iitta mekkulag.

⁵ Amunu, ag Israel, ag danab ah appa daatteb, ag amu dilagppa inam hekkulag. Ag danab amu dilag kayak hambuppuak dilag qaɗab amu, ag heppeg nauhatteg! Ag men gappi ahilkad aoɗadna heppeg, iitta meig! Amu ag kayak hambuppuak Aserah dabmekkulagnu biidodnu amu, ag amu okkuladppeg naɗ! Ag amu hena, ag ahilag kayak hambuppuak dottolag ele manadppeg eweg!

⁶ Aɗinu? Ag Israel, ag am danab ah, Yawe, ahilag Kayak, Nug ahilagnu, nuhignu tituanak daatteb anadtte. Wanppan danab ah oh oolagppa, Yawe, ahilag Kayak, Nug ag danab ah nuhignab daaglagnu tituanattom. Ag am keeke enanagnab laa bia nuhignu daatteb.

⁷ Yawe Nug ahilagnu oo mauhom, Nug ag tituanattom, amge ag danab ah kuɗumnab, huu laa oh eɗattak, diig amunu Nug amu ii heum. Iitta! Ag am wanppan wan laa oh oolagppa ebqak nakoknab daaegeg, ⌊Nug amu heum⌋.

⁸ Yawe Nug ahilagnu oo mauhtte, amu ahilagnu keeke hekkununab nuhig nai ɠagattag qetta, ag mamelkad aɗi amelagppa aum, diig aɗit amunu Nug ag uppa Isip dilag king Paro waappa begbeg maɗi nid daamnanu, Nug nuhig ɠagattagppa ag amunu qagaiettakppanu eɗua uhuqak haaha, Nug ag Isipnu diia, omalatte uɗippig. Yawe Nug amu hekkunu, nuhig ɠagattag okkaippa heum.

⁹ Yawe Nug anam aakku heum amunu, ag Yawe, ahilag Kayak, Nug am Kayak, ag anam doon autna aweg! Nug amu Kayak, Nug oo metta ii uuak kobol hette. Nug nuhig nug tituana nai qakkak nai ii okkultte. Nug danab ah ag oolag Nug mettan, nuhignu oolag mauhtte, nuhig ɗo ele dim lamittegeg, Nug he, ag Nug ele nug oo mauhaknab doyaknu nug tituana nai qakkak hetteb amu, Nug nug tituana nai qakkak amu dim lamitta ukkeb ukkeb, Nug ag buɗulkad menuattak huu laippu bia 1,000 dimppa bekkulag amu, Nug haen amu oh nug tituana nai qakkak amu dim lamidtte.

¹⁰ Amge laa ag nau ninig ele nuhignu dootteb amu, Nug pahanab ag bu madatte. Ao, Nug laa ag nau ninig ele nuhignu dootteb amu, Nug paha heeb, ag nauhkkulag.

¹¹ Amunu da ag ɗo iɗu iɗu imu, haknunab anak nai ele ag dim lamidkkulagnunab ainne, gemu madattem imu, ag amu dim lamitteg!

¹² Am ag ɗo imu doon dabmattan, tutukku dim lamidkkulag dayeb, Yawe, ahilag Kayak, Nug ag mamelkad aɗi dilagppa hekkunu nuhig nai ɠagattag qetta aum, amubia Nug he, Nug ag ele nug tituanna nai qagappig amu, Nug ahilagnu oo mauhaknab dookkunu nug tituana nai qakkak nuhig amu aɗa daakku.

¹³ Nug ag ahilagnu oo mauheb, ag itatta heeb, ag appatna, kuɗum bekkulag. Nug geha heeb, ag nid naunau kuɗum ele daappeg, Nug heeb, wan ahilag ittag ele dayebeb, doɗ ele ag mattoi ii daamna. Haen ag wan Nug ag mamelkad aɗi madakkununab nuhig nai ɠagattag qetta aum ele, amuppa nona amu, ag en kuɗum ele daaglag: amuam ee aeg, wain bau, olip goɗen, amu makau, sipsip, meeme ele, ag amu kuɗum ele daaglag.

¹⁴ Ag itittak enanag, laa oh dilag eɗittak ele wanppa daaglag. Danab, o ah laippu laa nid iitta laa ii daama, ahilkad doɗ oh geha nalkad menuadkkulag.

¹⁵ Geha Yawe Nug ag oɗe digdig aomnanu atognoadkku. Nug geha ag uuatteb, ag Isip uppa oɗe naunab anidppig bia ii aomna. Nug geha heeb, oɗe amuam laa, ag ahilagnu nau ninig ele dootteb amu, ag anidkkulag.

¹⁶ Yawe, ahilag Kayak, Nug danab ah huu laalappanu diia, ag eppelagppa mekku amu, ag hadappeg nauheg! Ag aib ahilagnu oolag gai-iitta doon, oolag mattan, ehanadppeg, ag oolagppa daappig. Ag ahilkad kayak ele noolagppa dup nona binalag aib meppig. Aɗinu? Ag amu hekkulag dayeb amu, ag doɗ pelemppa teum daatte bia daaglag.

¹⁷ Am ag inam dabmekkulagtai. “Wan anen anen umun danab, ag ahilag ɠagattag ig eɗikkak daatteb amunu, ig attem heta lamadkkunignu elele daagnig?” Ag anam dabmekkulagtai.

¹⁸ Amge ag ahilagnu aib baɗappig! Yawe, ahilag Kayak, Nug Paro, amu Isip wan ohppa ele dilagppa heum amu, hak amu ag daulagppa doaɗ!

¹⁹ Keeke Yawe, ahilag Kayak, Nug heum amu, ag amelagppanab anidppig. Nug Isip ag guittak okkainab aoppig ele amu he beum. Nug nuhignu dabmettaknu kobol danab haknu elele iitta, uɗat ɠagattag ele kuɗum heum. Nug nuhig ɠagattag okkainabppa keeke digdig amu oh haaha, ag Isipnu diia, omalatte uɗippig. Yawe, ahilag Kayak, Nug ɠagattag amuppaib, ag ehanatta heeb, ag danab baɗadtteb ele amu eɗadkkulag.

²⁰ Yawe, ahilag Kayak, Nug anam haaha, Nug uun nau heeb gona, danab laib laib tatam ii aqappig, ag oolna lokkumna daaglag amu lamadppeg ahappeg, ag aqadppeg mauhkkulag!

²¹ Yawe, ahilag Kayak, Nug am ɠagattag okkai ele, danab Nug antta, ebehi oh bodoetta le mette elenu Kayak amunu, ag danab amu dilagnu baɗak eheɗ nau aib dooppig.

²² Yawe, ahilag Kayak, Nug geha heeb, ag Israel, ag wan anen anennu dilag danab ah hubhub lamadkkulag. Ag haen laippuppaib heppeg, ii iitta memana. Ag anam hekkulag dayeb amu, geha doɗ dakkuɗ ag laippun appatna, kuɗum bekkulag.

²³ Amge Yawe, ahilag Kayak, Nug ⌊hanebppa⌋ danab amu diia, ag eppelagppa maatta heeb, ootot okkainab doon daappeg amu, ag geha hadappeg nauhkkulag.

²⁴ Nug geha danab amu, Nug king ahilkad diia, ag eppelagppa meeb, ag hadappeg nauhkkulag. Ag heppeg, king amu ag nauhna autnanab aon, ag wanppa deɗ laa ii daalob, am anambia daakku. Auntai laa ag, ag Israel eɗadkkulagnu elele iitta. Geha ag hadappeg, nauhna iitta mekkulag.

²⁵ Ag kayak hambuppuak dottolkad adppa hoyattak aab aɗuppa manadppeg eoppeg, silwate, iitta golte amuppa tonadppig dayeb amu, ag gol, o silwa amu amelag qeeb aolobnab dabmak eheɗ aona, aib aoppig. Aɗinu? Yawe, ahilag Kayak, Nug keeke amunu ooppa uuaknab dootte. Ag aib aoppig. Ag aoglag amu, ag pelemppa tena, padal mekkulag.

²⁶ Ag aib kayak hambuppuak dottog laa, o amunu keeke laa aon, ag laulagppa noppig. Yawe Nug keeke amunu ooppa uuaknab dootte. Keeke amuam Yawenuib nuhig pelemppa daatteb amunu, ag laulkadppa akkan nokkulag dayeb amu, ag ele am geha Yawenuib nuhig pelemppa daaglag. Keeke amuam Yawenuib nuhig pelemppa daatteb amunu, ag keeke amu aɗaglagnu oolagppa uuaknab doyeg!