Duteronomi 6 - Nobonob Baibel

Moses danab ah ag meulag ohppa ele Kayak dim lamidkkulagnu aum

¹ Moses nug amu oh mattia mala, nug nai tuɗitta mattiom. Haknunab anak, ɗo iɗu iɗu ele da ag ippunadkkulnu hettem amu, Yawe, ahilag Kayak, Nug ag Jodan le mataɗna gona, wan appa daatte, ag aon daaglagnu hetteb ele, ag wan amu aon, appa daanna, ag ɗo imu oh dim lamidkkulagnu appi dooglagnu amelppa aum.

² Ag, nid ahilkad, amu ag alalkad ele, ag oh ag Yawe, ahilag Kayak, ag nuhignu ebehilag oh bodoetta le mekkunu, ag bau daanna, ag nuhig haknunab anak, nuhig ɗo oh ele, ag amu oh dim lamitteg! Ag anam dim lamidna oinna, ag haen elab wanppa daaglag.

³ O Israel danab ah, ag wan laa, wan amuam enanag, wan ittag ele, amuppa ee meu huana otte, ag amuppa nokkulagnu daatteb, amu appa ahilagppa ena, elele ba daakkunu, wan amuppa, ag nid kuɗum ele daaglagnu, Yawe, ag mamelkad aɗi dilag Kayak, Nug ag anam daaglagnu nai anan qakkom, amubia bekkunu, ag da keeke ohnu attem imu ag daulag human doon, tutukku dim lamitteg! Aria, haknunab anak, ɗo ele da ag ippunadppi, ag dim lamidkkulagnu daatteb am inam.

⁴ O Israel danab ah, ag daulag human doyeg! Yawe Nug ihinig Kayak daatte; Nug nukka Kayak daatte.

⁵ Ag Yawe, ahilag Kayak, ag nuhignu ag meulag ohppa, oolag ohppa, ahilag ɠagattag ohppa ele oolag mauhaɗ!

⁶ Am ag gemu da ag haknunab anak, da ag madattem imu amu, ag amunu anuqak doon oiglagoitte.

⁷ Ag nid naunau ahilkad dilagppa amunu eɗunna madippeg dooglag. Haen ag laulkadppa daanna, adeppa adeppa gonana, niiglag henana, niion eɗun ahatteb, haen amu ohppa ag mattiak hebeppeg dooglag.

⁸ Am ag dabmenan oiglagnu amu, ag pepa qattippa yaan, ag eppelagppa at dayaknu qakkaglag, amu ag uɗalkadppa ele qata-aqadkkulag.

⁹ Ag laulkad odnu ad ukku aɗit laih laih daattep-ppa yaan, amu aɗnu odppa ele yaaglag.

¹⁰ Am inam bekku. Yawe, ahilag Kayak, Nug ag omalatta, Nug hekkunu nuhig nai ɠagattag qetta, ag mamelkad aɗi, Abraham, Aisak amu Jakop ele wan madakkunu aum, Nug amuppa nokku. Wan amu aab okkai ena ena, ag ii buuppig ele amuppa daatteb.

¹¹ Lag ele, amuppa ee okkai daatte. Ag ee amu eppan, atognona heeg, meu ii oum. Iitta. Laa ag uɗat amu heppig. Ag le, le moɗ ag ii aoppig, ag amuppan le itanna, ag grep dad ii ebappig, ag appanu wain aon lanana, olip ad ag ii ebappig, amuppan meu aoglag. Am ag wan amuppan keeke amu oh aon labeppeg, ag oolag aɗakku, amge ag amu hewona, haen amuppa

¹² ag Yawe daulag atimanu dabmeig! Nug ag Isip, ag appa begbeg maɗi nid daaegeg, Nug appanu diia, omalatte uɗippig.

¹³ Ag Yawe, ahilag Kayak, ag nuhignu ebehi oh bodoetta le mak doonna, Nugib waappa daanna Nug oɗe dim lamidkkulagoitte. Ag ahilag nai ɠagattag qettan akkulagnu henana amu, ag Nug onigppa ahilag nai ɠagattag qettaglagoitte.

¹⁴ Am ag danab ah, ag ag taliliattak daatteb amu, ag amu dilag kayak noolagppa aib dup nona binalag meppig.

¹⁵ Ag kayak laa noolagppa dup noa binag mak kobol ii hemananu diig am, Yawe, ahilag Kayak, ag oolagppa daatte, amu Nug nuhikkud dilagnu dahil doya laa aomanu doyak aɗa daatte. Ag kayak laa dilagnu dup noa binag mak kobol hekkulag dayeb amu, Nug ahilagnu oo nauhak huana doya heeb, ag mauhna, iittanab mekkulag.

¹⁶ Ag Masa appa, ag Yawe, ahilag Kayak naittuɗ mena, ma anttak medappig bia aib heppig.

¹⁷ Ag Yawe, ahilag Kayak, ag ebehilag qaietteb dabmena autnanab aonna, nuhig haknunab anak nai dim lamidkkulagoitte. Amuam ɗo iɗu iɗu oh Nug ag mattom.

¹⁸ Am ahilagppa ena, elele ba daakkunu amu, ag Yawe noobppa kobol tutukku, kobol ena ele hena, amu ag Yawe Nug wan ena, ag mamelkad aɗi madakkunu nuhig nai ɠagattag qetta aum eleppa nona aon daaglag.

¹⁹ Ag geha Yawe Nug ag anamnab hekkulagnu aum bia, Nug heeb, ag Israel ag danab amu, ahilag kekeɗ amu, ag ag lamadkkulag.

²⁰ Amu haen laa dimppa nid naunau ahilkad ag oɗ mattan akkulag. “Ɗo iɗu iɗu imu, Yawe, ihinig Kayak, Nug ⌊na madikkutnunab ana, na oɗenppa aakku⌋ ig mekkom ele imu diig am aɗi?” oɗ mattan akkulag.

²¹ Ag anam oɗ mekkulag amunu, ag inam appeg dooglagoitte. “Ig am Isip uppa Paronu begbeg maɗi nid daamut, amge Yawe Nug nuhig ɠagattag okkaippa Isipnu awikka, omaikka uɗiom.

²² Ig amenigppanab, Yawe aɗi heum amu anidmut. Nug nuhignu dabmettaknu kobol danab haknu elele iitta, uɗat okkai ɠagattag ele digdig he, Paro, nug baekkudppa, amu danab ah Isipnu oh ele ag diig amunu uug nau waappa daan, huananab baɗappig.

²³ Nug ig Isipnu awikka, omaikka wan ig mamenkad aɗi madakkunu nuhig nai ɠagattag qetta aum amu, amuppa meigkkunu uɗiom.

²⁴ Anam daye, Yawe, ihinig Kayak, Nug ig nuhig ɗo imu oh dim lamidkkunignu, ig nuhignu ebehinig oh bodoetta le mekkunu, Nug ig ɗo mekkom. Ig amu hekkunig dayeb amu, Nug heeb, ig bau daat, ig gemu ena daattem bia haen oh ena daagnig.

²⁵ Amu ig Yawe, ihinig Kayak, ig Nug haknunab anak oh ig mekkom, Nug noobppa pehettak dim lamidkkunig dayeb amu, amuam genab tutukku hak kobol ihinig daakku.” Nai amuam ag nid naunau ahilkad tutukku appeg dooglag.