Duteronomi 5 - Nobonob Baibel

Yawenu ɗo

¹ Amu Moses Israel danab ah oh qagmaatta, nug ag amelagppa aum. Gemu da ag ɗo iɗu iɗu madattem imu amu, O Israel danab ah, ag nai amu daulag human doyeg! Ag aon oolagppa mena dim lamitteg!

² Ig Horep qaukoppa daatta, Yawe, ihinig Kayak, Nug he, ig nug tituana nai qakkak Nug ele hemut.

³ Yawe Nug, nug tituana nai qakkak amu anukka ig mamenkad aɗi ele ii heppig. Iitta! Nug ig gemu bau daattem, Nug ig ele hemut.

⁴ Yawe Nug qaukoppa aab dittiak ooppa mattieye, ig amenigppanab anidta doomut.

⁵ Ag aab dittiaknu baɗan, qauko ii teppig, amunu da ag, Yawe ele gamalagppa daami. Nug da amelppa mattie, amu da nuhig nai awe, ag amelagppa mattiyi dooppig. Nug inam aum.

⁶ “Da am Yawe, ahilag Kayak. Da ag Isip, ag appa begbeg maɗi nid daaegeg, da appanu diie, omalatti uɗippig.

⁷ Na da noolppa dup nona binal menana, kayak laa ele noobppa dup nona, aib binag meme; daib na da noolppa dup nona, da binal mekkut.

⁸ Na habppan keeke laa, o wanppan keeke laa, o le ooppan keeke laa anidna, na amu dottog laa da abenalppa mekkutnu aib hoime.

⁹ Na dottog hattak laa, na amu noolagppa aib dup nona binag meme. Aɗinu? Da am Yawe, nahip Kayak; da dahilad dilagnu dahil doya laa aomanu doyak aɗe daattem. Da danab ag dahilnu nau ninig ele doon, hipunin hetteb ele amu, da ag bu aqai ukke, ag buɗulkad menuattak huu laippu bia ewam, o waɗele batak, bu qak amunu uug ag ele aqadtte,

¹⁰ amge danab ah ag oolag da meɗan, dahilnu oolag mauhtte, dahil ɗo ele dim lamidtteb amu, da ahilagnu oo mauhaknab doyeye, da, ag buɗulkad menuattak huu laippu bia 1,000 dimppa bekkulag amu, dahil oo mauhak amu ahilagppa ele daakku.

¹¹ Da am Yawe, nahip Kayak. Na da onil hamu aib diime. Aɗinu? Da danab, o ah aun nug da onil hamu diitte ele, da nug bu medakkul.

¹² Na Sabat deɗnu amu, na deɗ hamu iitta, am deɗ da, Yawe, dahilnu tituanak daatte dabmettanna, da Yawe, ahilag Kayak, da ag hekkulagnunab ami amu, na amubia oiye!

¹³ Mettid ohppa na deɗ eblaih laippu ele uɗat henana, na nahip uɗat oh hekkut,

¹⁴ amge deɗ ebqak eblaih aɗit ele, amuam Sabat deɗ; deɗ amunu amu, da Yawe, ahilag Kayak, da ag hik aoglagnu deɗ amu mattami. Deɗ amuam Sabat; na deɗ amuppa uɗat aib heme. Ge, na, nahipad nid, nahipad maɗi nid maɗi ah ele, makau okkai ebehi ele nahipad, donki nahipad, nahipad doɗ laa, wan laihnu danab nug uɗia, ag oolagppa daatte, amu nahip maɗi nid maɗi ah ele ag na hik aon daattem bia, ag ele anamib daaglagnu, ag oh deɗ amuppa uɗat ii hemana.

¹⁵ Ag anukka Isip appa begbeg maɗi nid daaegeg, da Yawe, ahilag Kayak, da ag Isipnu diie, omalatti uɗippig, amu ag daulagppa dayaɗ! Da ag Isipnu diie uɗikkul hein, da dahil ɠagattag okkaippa, keeke okkai kuɗumnab hemi, diig amunu da Yawe, ahilag Kayak, da ag Sabat deɗ dabmettan autnanab aoglagnunab ami.

¹⁶ Na da Yawe, da haknunab nai mattami bia, na mamen, anin ele binalah mate! Ge! Na wan laappa, da Yawe, nahip Kayak, da na medakkulnu hettem amu, na appa haen elab daakkutnu, nahip-ppa ena elele ba daakkunu amu, na anam hekkut.

¹⁷ Na danab aib qeppe mauhom.

¹⁸ Na ewau aib pakkuna gappai heme.

¹⁹ Na yabhok aib heme.

²⁰ Na hettoɗiakppa, aben laa oh eleppa, na layapnu nai hambuppuak aib mattime.

²¹ Na layap wau aib amen qeeb aolomnab dabmak eheɗ aome. Laa amu, na layap laug, o wan nuhig, o maɗi nid nuhig, o nuhig maɗi ah, o nuhig makau okkai ebehi ele, o nuhig donki, o nuhig keeke laala ele, na amu ohnu na aib amen qeeb aolomnab dabmak eheɗ aome.” Yawe Nug nai amu oh Israel danab ah amelagppa aum.

²² Yawe Nug baag okkaippa nai amu ag amelagppa mattiom. Aab dittiak, lombig, amu gatatunab ele qaukoppa dayeye, Nug amuppa dayaya mattiom. Nug nai amu aakkuib haen amuppa mattiom. Nug nai nuhig men maha otalappa ele ya, ag mattom.

²³ Amge aab dittiak qauko amahalitte dayeye, gatatunab ele dayeye, gatatu amuppa, ag baag doona, haen amuppa ag ahilkad ikki danab, Israel dilag huu okkai anen anennu, ag da gumiɗna uɗippig.

²⁴ Ag uɗina appig. “Antte! Yawe, ihinig Kayak, Nug binag amahlak oppiaawak nuhig, Nug dagom onig ɠagattag ele, Nug amu ele ig ippunikkom; ig Nug baag aab dittiak ooppanabnu doomut. Gemu ig anidmut, Kayak Nug danab amelagppa nai mattiom me, ig ina bau daattem.

²⁵ Amge gemu amu, ig aɗinu mauhkkunig? Ig amu madittemnu diig am Yawe, ihinig Kayak, Nug ig amenigppa nai baula mattilo amu, ig genab mauhlom; aab dittiak naɗinab umu ewikkeb, iitta mekkunig.

²⁶ Aɗinu? Ig danab ig mauhttem ele, amu ig oonigppanu danab auntai laa nug, ig hemut bia, nug Kayak, hanhan bau daatte, Nug aab ewak laa ooppanu nai mattieye doya, bau dayom? Laal iitta.

²⁷ Na Yawe, ihinig Kayak, na Nug gumidna gona, Nug aɗi nai oh atte amu doyona, na eɗun uɗina, ig amenigppa aɗi mattiom amu appe doota, ig Nug oɗe dim lamidkkunig,” aon appig.

²⁸ Ag anam da amelppa aeg, Yawe Nug ahilag nai doya, da amelppa aum. “Danab ah ag na amenppa aɗi appig amu, da doomi; ag elelenab appig.

²⁹ O gadon, Israel danab ah ag haen oh inamib henan daalobnu ool daatte. Da ag dahilnu ebehilag oh bodoetta le meeb, ag dahil ɗo oh dim lamidlobnu ool daatte. Ag anam hekkulag dayeb amu, ag, am ag buɗulkad ele haen oh eleleib henan daalob.

³⁰ Gona appe, ag eɗun ahilkad pehppa ugatteg!

³¹ Amge haknunab anak dahil, ɗo iɗu iɗu dahil ele, na medakkulnu amu, na da ele ippa daagnih. Danab ah ag wan laa, wan amu ag aulag daakkunu madakkulnu hettem amu, ag wan amuppa haknunab anak dahil, ɗo iɗu iɗu dahil ele oh dim lamidkkulagnu amu, na danab ah ippunadkkut,” awa aum.

³² ⌊Yawe Nug Moses amegppa anam aum amunu, Moses nug Israel amelagppa aum.⌋ Anam amunu, ag Yawe, ahilag Kayak, ag nuhig haknunab nai oh tutukku dim lamitteg; ag aib dabmak laa aon baolippig!

³³ Ag wan ag nona aon daaglagnu hetteb amu, ag amuppa nona bau daaglagnu, ahilagppa ena, elele ba daakkunu, ag haen elab wan amuppa daaglagnu, ag Yawe, ahilag Kayak, Nug ag ib adekkuppa daaglagnu haknunab aum amu dim lamitteg!