Duteronomi 4 - Nobonob Baibel

Moses Israel ag Yawe oɗe dim lamittak hekkulagnu oolag maɗettom

¹ Aria, gemu amu, ag Israel, ag ɗo iɗu iɗu imu da ippunadkkulnu hettem amu, ag doon autnanab aweg! Ag bau daaglagnu, amu wan laa, Yawe, ag mamelkad aɗi dilag Kayak, Nug wan ag madakkunu hette, ag wan amuppa gona, aon daaglagnu, ag Kayaknu ɗo imu dim lamitteg!

² Haknunab anak da ag madattem amu, ag nai laa aon, nai da madittem imu ele aib tuɗidppig; ele amu, ag nai da madittem, ag nai amuppanu nai laa ele aib okkulppig. Iitta. Ag haknunab nai imu, da Yawe, ahilag Kayak, da nuhigppanu madattem amu, ag nai amu dim lamittak aakkuib hekkulag.

³ Ag Yawe Nug Balpeornu ahilagppa aɗi heum amu, ag anidppig. Yawe, ahilag Kayak, Nug laa ag kayak hambuppuak Bal, Peor appanu, ag appa nug noobppa dup nona binag meppig ele amu, Nug ag oh hatte nauhppig.

⁴ Amge ag laa oh, ag Yawe, ahilag Kayak, ag oolag Nug mettan, ena haknu ii uuak kobol hena, Nug dim lamidppig ele, ag amu, ag gemu bau daatteb.

⁵ Antteg! Ɗo iɗu iɗu imu amu, wan ag nona aon daaglagnu hetteb ele, ag amuppa nona daanna, ag ɗo imu dim lamidkkulagnu, Yawe, dahil Kayak, Nug da nai amu meɗa, ippunadkkulnunab da amelppa aum, amu da amubia aakku hemi.

⁶ Ag tutukku doon dim lamidkkulag! Aɗinu? Amuam ag am doyak dabmak ena ele, diignu doyak tutukku ele ahilagppa daatte amu, am wanppan wan laala amu ippunadkku. Laa ag ɗo amunu doona amu, ag inam akkulag, “Israel wanppan danab ah ag am huu okkainab, ɠagattag ele; ag doyak dabmak ena okkai ele. Ag diignu doyak tutukku ele,” akkulag.

⁷ Diig imunu ag anam mattiglag. Yawe, ihinig Kayak, haen ig Nug unuqittutut amu, Nug ig ele guguikkak daatte, amge wanppan wan laa, wan ɠagattag ele, wan amunu kayak anam ii hette.

⁸ Am wanppan wan laa, wan amuam ɠagattag, ag ɗo genab tutukku iɗu iɗu ele, da ag madattem imu bia elete? Iitta!

⁹ Amge ag dabmeig! Ag aibnab Yawe Nug ahilagnu he anidppig ele amelag atiom. Ag bau daatteb haen imuppa ag heppeg, dabmak ahilagppa iitta mema! Ag anidppig amu ohnu ag bekkalkad, alalkad ele mattin mattaglagnu heig!

¹⁰ Anukka, Horep qaukoppa appa Yawe, ahilag Kayak, Nug da amelppa inam aum. “Na danab ah qagmadappe, da nai appi, ag dahil nai dooglagnu, ag doon, ag wanppa bau daatteb, haen amu oh ag dahilnu ebehilag oh bodoetta le mekkunu, ag nid naunau ahilkad dahil ɗo ele ippunadkkulagnu da noolppa dayeg!” Nug da amelppa anam a, da hei, ag Horep qaukoppa Nug noobppa qagmeppig amu, ag deɗ amu aib daulag atiom. Iitta! Ag daulagppa dayaɗ!

¹¹ Aab dittiak naɗi qaukoppa dayeye, ag dona, qauko gukkuidna wana, diigppa hippaidna daappig. Aab dittiak nug attannab, habppa teum, amge lombig hinqak, gatatunab ele qaukoppa dayom.

¹² Aakku Yawe Nug aab dittiak ooppanu ag amelagppa nai mattiom. Ag nai mattiom dooppig, amge ag beɗu am ii anidppig; baag aakkuib dooppig.

¹³ Nug nug tituana nai qakkaknu nai nuhig ag ippuanattom. Amuam Yawenu ɗo 10. Nug ag amu dim lamidkkulagnunab aum. Ana, Nug men maha aɗitppa ya mattom.

¹⁴ Am haen amuppa Yawe Nug da ag ɗo iɗu iɗu, ag Jodan le mataɗna wana, wan ag aon daaglagnu hetteb, amuppa nona daanna, dim lamidkkulagnu da ag ippunadkkulnunab a, da anam hemi.

Kayak hambuppuak dottolkad hoin dim lamadna, nau aomnanu dabmettak nai

¹⁵ Yawe Nug Horep qaukoppa, aab dittiak ooppa dayaya, ag nai mattom am, ag beɗu ii anidppig amunu, ag dabmeig!

¹⁶ Amunu diig am, ag dottog laa hattana, noolagppa dup nona binalag mak kobol hekkulag dayeb amu, ag kobol diig ena iitta uɗig wak ele hekkulag. Ag noolagppa dup nona binalag mekkulagnu amu, ag dottog laa aib heppig. Amuam danab beɗu biatai, o ah beɗu biatai,

¹⁷ o doɗ laa wanppa oitte biatai, o ai laa hagagaɗtte biatai,

¹⁸ o doɗ naunau ag oolag wan qeeqe oitteb oolagppan laa biatai, o kakai leppa daatte biatai; ag amu oh noolagppa dup nona binalag mekkulagnu, dottolag amubia aib hadappig.

¹⁹ Aria ag neegppeppeg, lomppa teeb, ag aam, kalam, hoɗoppai ele, ag keeke amu oh anadna amu, ag aib amuam kayak daatteb anana, noolagppa dup nona binalag mak heppig. Yawe, ahilag Kayak, Nug keeke oh hab waappa daatteb amu, Nug am wanppan danab ah oh ehanadkkunu hattom.

²⁰ Ahilagnu amu, Yawe Nug ag ehanatte, ag Isip wanppa ii daatteb! Isip amu aab dittiak naɗi bia he, ag guittak okkainab ele doonna daaeg, Yawe Nug ag Isipnu diia, omalatte uɗippig. Ag nuhig danab ah daaglagnu, Yawe Nug ehanatta diie, ag gemu nuhignab aakku daatteb.

²¹ Amge ag beɗulagppa, Yawe Nug dahilnu oo nauhom. Nug da Jodan le mataɗe, wan ena Yawe, ahilag Kayak, Nug ag aulag daakkunu madakkunu hette ele, amuppa ii nopanu nuhig nai ɠagattag qetta aum.

²² Da ii nopanu aum amunu, da wan imuppa mauhkkul. Da Jodan le ii mataɗpa. Amge ag am wan aoppeg, ahilag daakkunu Jodan mataɗna wakkulag.

²³ Yawe, ahilag Kayak, Nug he, ag Nug ele nug tituanna nai qagappig, amu ag dottog laa, iɗu attenppa, Yawe, ahilag Kayak, Nug ag amu haknu aib aum amu, ag amu laa hemananu ag nug tituana nai qakkak nai amu aib daulag atiom. Iitta! Ag daulagppa dayaɗ!

²⁴ Ag amu hekkulagnu diig am, Yawe, ahilag Kayak, Nug am aab dittiak naɗi, keeke oh ewatte iitta metteb, Nug amubia daatte. Nug nuhikkud dilagnu dahil doya laa aomanu doyak aɗa daatte, ⌊Nug danab ah ag dup nona, kayak laa binalag mekkulag ele hatteb nauhkkulag.⌋

²⁵ ⌊Amge⌋ ag appa daanna, ag nid menuadkkulag, nid ahilkad ele am ag alalkad menuadkkulag. Anam amu, ag wan amuppa kaino mekkulag. Ag kaino mewona, ag kobol diig ena iitta uɗig wak ele digmen dim lamidkkulag dayeb, ag dottolkad aɗi keeke laa iɗu bia, ag amu laa hattaglag dayeb amu, amuppa ag Yawe, ahilag Kayak, ag Nug noobppa nau hekkulag. Ag anam heppeg, Nug amunu oo nauhkku

²⁶ amunu, gemu da hab, wan ele aa dopeɗ, da nai imu Israel, ag amelagppa madippi, aa dooyya, dimppa aa da genab ag Israel danab ah, da ag amelagppa ami akkulahnu elele daaglah. Ag Israel, ag Jodan mataɗna wana, wan aon daaglagnu daatte, amuppa daaglagnu hetteb, amge diig amunuib ag haen elab appa, wan amuppa ii daamna. Iitta! Aɗinu? ⌊Ag digmen, kayak hambuppuak dim lamidkkulag dayeb,⌋ Yawe Nug genab heeb, ag padal mena autna aoglag.

²⁷ Yawe Nug lamatteb, ag matatun gona, wanppan wan laala oolagppa daan mauhkkulag; laib laib aakkuib ag bau daaglag.

²⁸ Wan laappa ag geha appa kayak hambuppuak, adppa, menppa keeke hattak, kayak amu ag ii neegtteb, ii dootteb, ag keeke ii uɗiqtteb, ii latteb ele amu, ag amu noolagppa dup nona binalag mak kobol hekkulag.

²⁹ Ag geha wanppan wan laalappa anam appa daanna, ag Yawe, ahilag Kayak, ag Nug anidna dim lamidkkulagnu Nug mattiglag. Amu ag meulag ohppa, oolag ohppa ele Nug anidna dim lamidkkulagnu Nug mattiglag dayeb, haen amuppa ag Nug anidkkulag.

³⁰ Amu butti aɗi haen ag wanppan wan laalappa appa daappeg, uug nau imu oh ahilagppa beeb, ag Yawenu bu mettaknu uug amu waappa daan oippeg, ag geha eɗun, Yawe, ahilag Kayak, ag Nug waappa daappeg, ⌊Nug ag ehanadkku⌋.

³¹ Yawe, ahilag Kayak, Nug ag ehanadkku diig am, Nug am danab ah dilagnu oo gai-iitta doya oo matta ehanadtte. Nug ag ii uuadma; Nug ag ii hatteb nauhmana; Nug he, Nug ag mamelkad aɗi ele nug tituana nai qakkak heppig, Nug nug tituana nai qakkak amunu nai genab bekkunu nai ɠagattag qetta aum amu, Nug amu daug ii atima.

Yawe nukkaib Kayak daatte

³² Ag anukkanabnu uɗiak, gemu batak dabmena antteg! Ge! Kayak Nug danab ah hattom haenppa uɗia, gemu batak, ag haen amu oh dabmenan antteg! Ag anam hewona, ag gona, keeke oh hab waappanu, amu wanppanu ele antteg! Ag amu henana, ag kobol naɗi okkai, Kayak Nug ihinignu heum ele amu, kobol amubia laa haen laappa, o aben laappa beumte, o iittate, ag amu antteg!

³³ Danab ah wan laalappanu ag Kayak aab dittiak ooppa dayaya, nai mattieye doon, ag bau daappig laal elete? Iitta! Ag, Israel, agib anam heppig.

³⁴ Am kayak atten laa nug danab ah ameg laa, wanppan wan okkai laappan diia he, nuhig danabnab bena, ag wanppan wan laappa daaglagnu daappigte? Iitta! Amge Yawe, ahilag Kayak, Nug ahilagnu Isip appa anam heum. Nug nuhig ɠagattag okkaippa ag ehanatta, ahilagnu heewo, ag amelagppanab anidppig. Nug oɗe nau Isip dilagppa he be anidppig. Nug Isip ele ban heppig. Nug nuhignu dabmettaknu kobol danab haknu elele iitta he, Isip danab ah ag eheɗ nau baɗappig.

³⁵ Ag Yawe, Nugib am Kayak, kayak laa ii daatte, ag amu dooglagnu Nug keeke amu ippuanatta he anidppig.

³⁶ Nug ag toliadkkunu, Nug he, ag Nug baag hab aabppanu dooppig. Nug ag nai madakkunu, Nug wanppa aab dittiak naɗippa dayaya, nai mattieye, nuhig ɠagattag okkai ag anidppig.

³⁷ Nug ag mamelkad aɗi dilagnu oo mauhom amunu, Nug ag buɗulkad tituanatta, Nug nukka nuhig ɠagattag okkai eleppa Nug ag Isipnu diia, omalatte uɗippig.

³⁸ Nug ag diia uɗia heeb, wan ag aoppeg, ag aulag dayebeb daaglagnu, Nug wanppan wan laalanu danab wan amuppa daatteb, ag ag Israel eɗattak, ag ahilag ɠagattag okkai ele, Nug heeb, ag Israel, ag danab amu lamadkkulagnu omalatte uɗin, gemu iguppa iikku daatteb.

³⁹ Amunu ag imu dabmettanna, ahilag dabmakppa ɠagattag aɗeg! Yawe Nug am wanppan, habppan ele Kayak daatte, kayak laal iitta.

⁴⁰ Ahilagppa, ahilkad nid naunau, amu ag dimulkadppanu ele, ahilagppa ena, elele ba daakkunu, ag wan amu, Yawe, ahilag Kayak, Nug ag wan ahilag haen oh daakkunu madakkunu hette amu, ag amuppa haen elab daaglagnu, ag ɗo nai, amu aɗi haknunab anak imu ele, gemu da ag madattem imu, ag dim lamitteg! Amuam nai laa Moses mattiom aakku.

Kaɗag uɗitteppan, ii doyaya laa qe mauhomnu ehanittak aab

⁴¹ Amu Moses nug Jodan lenu kaɗag uɗitteppanu, ii doyaya laa qe mauhomnu ehanittak aab okkai ewam he beppig.

⁴² Aun laa nug ii doyaya laa qe mauhom, nug matu danab amunu nau ninig ele ii doyom amu, nug ukka, appa bau daakkunu elele. ⌊Laa nug layag qe mauhom ele, nug layag matu kekeɗ mettom dayeb, dimppa nug qe mauhom, danab amu nug aab okkai amuppa ehanittak aokkunu gokkunu elele iitta.⌋

⁴³ Aab amuam iikku: Beser, Ramot, Golan ele. Aab Beser am atu taɗakppan uɗem okkai, nakok attan daatte, appa dayom. Beser amu Israel dilag huu okkai Ruben, amuppan danab laa nug ii doyaya, laa qeeb mauhkku dayeb amu, nug appa ukka ehanittak awa daakkunu otiak. Ramot amu wan onig Gileat appa dayom. Aab amuam Israel dilag huu okkai Gad, amuppan laa nug layag ii doyaya qe mauhom amu, nug ukka appa ehanittak aokkunu otiak. Aab Golan amu Basan wanppa dayom. Aab amuam Israel dilag huu okkai Manase, amuppan laa nug laa ii doyaya qe mauhom, nug ukka, appa ehanittak aokkunu dayom.

Ɗo nainu anuqak nai

⁴⁴ Ɗo imu Moses nug Israel danab ah ippuanattom.

⁴⁵ Amu Israel danab ah ag Isip uun ukkaeg, Moses nug ɗo iɗu iɗu, haknunab anak ele mattom am imu.

⁴⁶ Ag haen tutu dayaknu aab Betpeor guguittak appa oolnu noakppa kalan daaegeg, haen amuppa nug mattom. Betpeor am Jodan lenu kaɗag uɗitteppanu, appa daatte. Sihon, Amo dilag king, nug Hesbon dayaya, nuhikkud danab ah gumattom, ag appa, nuhig wanppa daappig. Moses, Israel ele ag Isip uun, Kanan gokkulagnu gonana, ag Sihon, nuhikkud danab ele eɗadna, heeg nauheg, appa haen tutu dayaknu aab kalan daaegeg, Moses nug ɗo imu oh ag mattom.

⁴⁷ Am Israel ag King Sihon, King Og ele dilah wan amu eɗatna aoppig. King Og, King Sihon ele aa Amo dilag king aɗit, Jodan leppanu kaɗag uɗitteppanu daadpiɗ. King Og nug Amo danab Basan wanppa daappig dilag king dayom.

⁴⁸ Israel ag danab ag aab Aroer, Arnon oolnu noak daug aiɗa daatte, aben appanu danab eɗadna, ahilag wan aoeg ukke, Sirion qaukoppa batak ele eɗadna, wan amu oh aoppig. Sirion qaukonu, ag Hermon qauko ele adappig.

⁴⁹ Ag danab ag Jodan leppanu kaɗag uɗitteppanu, atu Araba, amu oh amuppa daatte, ag danab amuppanu, ag ag eɗadna, aben amu aoeg ukke, yau uɗitteppanu ukka, Mauhak Le gottuppa noum. Qauko Pisga am wan amunu kaɗag uɗitteppanu tom aakku.