Duteronomi 34 - Nobonob Baibel

Moses mauhom

¹ Moses nug amu mattia mala nug Moap wan uɗem amu uua aha ukka, Nebo qauko ta ukka, qauko igippa, ag Pisga Igippa atteb, appa teum. Aab Jeriko am, Jodan le laih daatte. Nug te, Yawe Nug Kanan wan oh ippunittom. Amuam Gileat wanppa ukka Dan batak ippunitta,

² Nug wan laala, Naptali, Epraim, Manase, amu Juda ele ⌊aoglag⌋ ippunittom. Wan amuam ukka, Mediterenia yuppa noak daatte.

³ Nug Negeb, amu Jodan oolnu noak ele ippunittom. Jeriko amu Jodan oolnu noakppa daatte. Aab amunu amu, ag Pamnu Aab atteb. Nug wan amu oh ukka, Soar batak ippunittom.

⁴ Yawe Nug Moses amu ippunittowa, nug amegppa aum. “Wan iikku, da Abraham, Aisak amu Jakop ele, ag buɗulkad madakkulnu amelagppa nai ɠagattag qette ami. Gemu da hei, na anidme, amge na wan amuppa ii nomana,” awa aum.

⁵ Yawe anam aum amunu, Moses, Yawenu maɗi nid, nug Moap wanppa Yawe aum bia, appa mauhom.

⁶ Yawe Nug Moap appa, oolnu noak laa Betpeor guguittak, nug appa boumom, amge haen amuppa, gemu ⌊nai imu yaak haenppa⌋ ele, auntai laa boumak aben amu ii dootte.

⁷ Moses nug maɗ 120 dayaya, nug mauhom, amge ameg ii nauhom, nug ɠagattag ele dayom.

⁸ Israel danab ah ag deɗ 30 oh Moap atu uɗemppa, appa Moses mahidnana daappig. Ag ahilag kobol dim lamidna, nuhig mahittak heeg ukke, amu haen malakkunu te, ag malappig.

⁹ Moses nug matu eppeg Josua qaɗeppa meum amunu, Nan bekka Josua nug doyak dabmak ena okkai ele. Nug doyak dabmak ele okkai amunu, Israel danab ah ag nug oɗe dim lamidna, keeke ohnu Yawe Nug Moses amegppa haknunab anak aum amu, ag heppig.

¹⁰ Mosesnu haen dimppa propet laa Israel oolagppa Moses bia am iitta. Am Yawe, Moses ele, aa nug amegppanab nai madipiɗ

¹¹ Yawe Nug Moses, Kayak dabmettaknu kobol danab haknu elele iitta, amu uɗat ɠagattagnab ele, Isip wanppa Paro, amu nuhikkud ikki danab ele, amu danab ah wan amuppan ele dilagppa heeb bekkunu me ukkom amu, Moses nug heum.

¹² Auntai laa, Moses heumbia kobol laala he, Israel danab ah anttegeg, uɗat laala danab antta, ebehi oh bodoetta le mette ele kuɗum danab ah amelagppa iinab heum. Moses nukka, nugib anam heum.