Duteronomi 33 - Nobonob Baibel

Moses danab ah itattak ena mattom

¹ Itittak imuam, Kayaknu danab Moses nug mauhkkunu haaha, Israel danab ah mattom.

² Nug aum. “Yawe Nug Sinai qaukoppanu neum. Nug danab ah nuhikkud ehanadkkunu Seir appa amahlak mattom. Yawe binag amahlak oppiaawak ele am Paran qaukoppan amahala dayom. Ban danab nuhikkud tausen tausen gane ag anam nug ele daaegeg, aab dittiak amu heqo naɗiap-ppa dayom.

³ Amu genabnab, Yawe Nug nuhikkud danab ah dilagnu oo mauhak dootte. Yo, nuhikkud tituanak daatteb oh ag Nug eppegppa aakku daatteb. Ag nuhig hak amu dim lamidnan, nuhig ib ippunittak nai ele dim lamidtteb.

⁴ Da, Moses, da Kayaknu ɗo, danab ah mattami. Ɗo amuam Israel danab ah, ahilagnab.

⁵ Israel danab ah dilag ikki danab ag qagmeppig. Ao, Israel dilag huu okkai danab ah oh ag ikki danab ele oh qagmeppig. Ag qagmeppig amu, haen amuppa Yawe Nug Israel dilag king beum,” awa aum.

⁶ Moses nug anam mattia, nug nai tuɗitta, nug Israel dilag huu okkai Rubennu inam aum. “Israel dilag huu okkai Ruben danab ah, ag daanna, ii iitta memananu ool daatte. Ruben huu am kuɗumnab iitta, amge ag iitta mekkulagnu ool ii daatte,” awa aum.

⁷ Moses nug amu awowa, nug imu Israel dilag huu okkai Judanu aum. “O Yawe, na Juda danab ah dilag unuqittak doon, ⌊ag kekeɗ ahilkad ele nug qeppeg amu,⌋ na eɗun diippe, ahilkad danab ah dilagppa uɗiglagnu oɗ medattem. Na ehanadna, ɠagattag madakkutnu oɗ medattem. Ge! Na ag ahilkad kekeɗ eppelagppa daamnanu ehanadkkutnu unuqidttem,” awa aum.

⁸ Aria, Moses nug amu awowa, nug Israel dilag huu okkai Lewinu imu aum. “O Yawe, Lewi ag nahipnu oo metta ii uuak kobol dim lamidnana hetteb, amu na Urim, Tumim ele ag mattame. Am na Masa appa Lewi buɗub dilagppa ma anttak mettak ahilagppa heme. Ao, Meriba leppa, appa na Lewi buɗub ele mehqak heppig.

⁹ Lewi buɗub ag nahipnu anuqak dooppig; baelkadppa dilagnu anuqak ii dooppig. Ao, ag nahip haknunab anak dim lamidppig; nahip nug tituana nai qakkak nai ele ii uuppig.

¹⁰ Lewi buɗub ag nahip oo yaak nai ɗo bia Jakop buɗub ippunadtteb. Yo, ag Israel ɗo nahip ippunadtteb. Ag am kalu danab ile muttuɗig enanag bette ele na noomppa ilatteb. Ao, ag manaknu ofa kunum nahip qaɗabppa manadna medatteb.

¹¹ O Yawe na Lewi buɗub amu itadna, ahilag uɗatnu ootppa ena dookkunu ool daatte. Ao, na kekeɗ ahilkad hadappe nauhkkulagnu oɗ medattem. Na ahilag kekeɗ ag eɗun ahan ɠagattag daamnanu, na aqappe nauhkkulagnu unuqidttem,” awa aum.

¹² Moses nug Lewi buɗubnu anam awowa, nug Israel dilag huu okkai Benyamin dilag imu aum. “Yawe, Nug Benyamin danab ah dilagnu oo mauhtte. Ag nuhigppa baɗak iittappa daatteb. Aɗinu? Nug deɗ oh amun tuqan ele ag taliliatta daatte. Ao, Nug ag guittak aomnanu, ag aɗualatta dayaya, tuɗid ele dabmadatte,” awa aum.

¹³ Moses nug amu awowa, nug Israel dilag huu okkai Josepnu imu aum. “Da Yawe Nug Josep buɗub inam itadkkunu ool daatte. Nug heeb, habppan le ahilag wanppa elele nekku. Nug heeb, le wan ooppanu qeppuɗia bekku.

¹⁴ Nug heeb, ee enanag laala, aamppa betteb ele beppeg aoglag. Nug heeb, ag kalam anen anenppa ee meu enaib oppeg aoglag.

¹⁵ Nug heeb, ag qauko anukkanabnu keh ena digdignu ele aoglag. Nug heeb, ag ee meu huanak haen ohnu qauko nakokppanu aoglag.

¹⁶ Nug heeb, ag wan keeke ena he bette ele amu, ag amu aoglag. Laa Nug ad nakok laa ewa dittieye, aab amu ooppa dayom amu, Nug heeb, kobol Nug laa dilagppa ii helo bia me, Nug hette, kobol amu Josep buɗub dilagnu daakku. Keeke ena amu oh Josep buɗub, ag ahilagppa daakkunu ool daatte. Ao, Josep nug awakkud, amakkud oolagppan okkai dayom, amu keeke imu oh nug buɗub dilagppa daakkunu ool daatte.

¹⁷ Josep buɗub ag makau dawai ɠagattagnab bia daatteb. Ahilag ɠagattag am makau okkai ebehi ele dakkuɗnu qeqeɗi bia. Makau qeqeɗippa danab yaatte, amubia nug buɗub ag wanppan wan laalappan danab, ukkeb ukkeb, wan batakppa, ag eɗadkkulag. Epraim buɗub 10,000 gane ag anam daatteb. Ge! Manase buɗub 1,000 gane, ag anam daatteb,” awa aum.

¹⁸ Aria, Moses nug anam ana mala, nug Israel dilag huu okkai Seblon, Isakar ele dilah inam aum. “Seblon danab ag uub attan tena gona, en okkai aoppeg, Isakar danab ag am ahilag wanppa daan, en qagmekkulagnu ool daatte.

¹⁹ Ag danab ah onilagppa eppeg gona, ahilag qaukoppa mana mettak genab tutukkuib appa hekkulag. Ag ee yuppanu aon, hobul okkai hena lakkulag. Ao, keeke yu ihippa lokkumak daatte, ag amu aon, hobul hena lakkulag,” awa aum.

²⁰ Moses nug amu awowa, nug Israel dilag huu okkai Gad dilag aum. “Laa nug Gad dilag wan heeb, naɗi daakku amu, nug itittak ena ele daakku. Gad danab ag am laion laa bia, nug laa eppeg, o ikki kattiɗeb nekkunu babaitta daatte.

²¹ Gad danab ag wan enanag ahilag daakkunu dabmeppig. Ao, amunu diig am, laa nug ikki danab dilag maha bia ag mattom. Israel dilag ikki danab ag qagmeeg, Gad buɗub ag Yawe oɗe tutukku dim lamidppig. Ao, ag nai doya mala hettoɗia epeɗia elele mettak kobol dim lamidppig,” awa aum.

²² Moses nug amu awowa, nug Israel dilag huu okkai Dannu aum. “Dan nug am laion nag laa pitikkala, doɗ aotte, amubia ag Basannu ahana, kekeɗ ahilkad eɗadkkulag,” awa aum.

²³ Moses nug amu awowa, nug Israel dilag huu okkai Naptalinu aum. “O Naptali, Yawe Nug ahilagnu ii helo bia me, Nug ehanatta auta aotte; Nug itittak ena huananab ag mattom. Ag wan qaban uɗitteppanu, amu yau uɗitteppanu ele gumadkkulag,” awa aum.

²⁴ Moses nug awowa, nug imu Israel dilag huu okkai Asanu aum. “Asa buɗub ag Jakop bekkod laala buɗulkad eɗattak itittak ena aoppig daatteb. Dahil oo hakppa Aser awakkud, amakkud ele buɗulkad ag Aser buɗub onig okkai madappeg, Aser buɗub ag olip goɗen huanak ele daaglagnu ool daatte.

²⁵ Dahil oo hakppa ag enanag, danab nug aabnu aɗ od ɠagattag qak daye, enanag daatte, ag amubia daaglag. Ao, ag ahilag dayak oh ag ena, ɠagattag ele anambia daaglagnu ool daatte,” awa aum.

²⁶ Moses nug anam awowa nug tuɗitta aum. “Auntai laa Israel dilag Kayak bia iitta. Nug ag ehanadkkunu habppa oitte. Yo, Nug ag ehanadkkunu, Nug lombig attan nuhig sia kingppa dayaya, oitte.

²⁷ Kayak bauklel Nug ahilag padal mak eɗitta ena dayaknu ehanittak daatte. Nug eppeg am alet anam, ag oɗakkiatte daatteb. Nug heeb, ag Israel ag kekeɗ ahilkad lamadkkulag. Nug aakkuib, ‘Ag kekeɗ ahilkad heppeg nauheg!’ atte.

²⁸ Kayak Nug anam hette amunu, Israel ag baɗak iittappa daaglag. Jakop buɗub ag enaib daaglag. Ag geha wan, wain bau, ee ele kuɗum, ag wan amuppa daaglag. Ag baito lomppan ele aoglag.

²⁹ O, Israel, ag itittak ena aon malappig! Auntai laa ag bia laa iitta. Yawe Nug nukka ag padal memananu ehanattom. Nug am ahilag guppiɗ, ahilag ehanittak, ahilag qep elab enanag ele. Ahilkad kekeɗ ag ag noolagppa ag beɗulkad aɗappeg neeb, ag Israel ag ahan, tappaladppeg nokkulag,” awa aum.