Duteronomi 32 - Nobonob Baibel

¹ ⌊Danab ag laa nai mattiegeg dootteb bia,⌋ O hab, da nai madippippi, na doye! O wan, na da nai madittem imu doye!

² Da aɗi madikkul ele imu am, gu nette, amubia dayaɗ! Yo, nai dahil, amuam baito nette bia dayaɗ! Genab, amuam, gu digittig na, gikkiɗah hittu aɗatte, amubia dayaɗ! Yo, guttid na, dattan hittu yuɗ aɗatte, amubia dayaɗ!

³ Da Yawenu madikkul. Ihinig Kayak Nug onig, ɠagattag okkai ele. Ig Nug binag metu!

⁴ Nug am hanhan ɠagattag daatte; nuhig uɗat am qa oppiaawak ele. Keeke oh Nug hette amu, Nug nai doya mala hettoɗia epeɗia elele mettak kobol dim lamitta hette. Kayak Nug diig nuhignu oo metta ii uuak kobol dim lamittatta, Nug eheɗ laa ii hette. Nug tutukkuib daatte, Nug nai doya mala hettoɗia epeɗia elele mettak ibuppa hanhan daatte.

⁵ Amge Israel danab ah ag nuhignu amu, ag Nug dimettan, ii dim lamidna oitteb. Ge, ag anam hena oinna, ag genab nuhig nid daattebte? Iitta! Ag hambuppuak hak danab, ag kobol kaliak amu dim lamidtteb.

⁶ O Israel danab ah, Yawe Nug ahilagnu ena heum. Ag anamppate eɗun noob mekkulagte? Ag am danab ah dabmak tutukku iittappa keeke henan oitteb. Ag doyak dabmak ena ele iitta. Yawe, Nug am ag Mamelag iittate? Nug ag iite hattom? Nug iite ag laippu tamaniattom?

⁷ Anukka haennu daulagppa doaɗ! Ao, anukkan menuattak huu laippu bia anen anen dilagnu daulagppa do, ag dabmetteg! Ag mamelkad oɗ madappeg, Kayak Nug aɗi heumnu madippeg doyeg! Yo, ag ikki danab ahilkad oɗ madappeg, ag madippeg doyeg!

⁸ Laa Attannab Laa Oh Eɗattak, Nug wan anen anen danab mattom. Ao, Nug danab ah wan anen anen matte daappig. Nug amu haaha amu, Nug Israel ag wan elele daaglagnu laa dilag tom ag mattom. Ao, Nug Israel ag ebqak gane daaglagnu dabmaama, wan laa, ag aulag daakkunu, ahilagnu otiom.

⁹ Aɗinu? Israel danab ah, ag am Yawenu. Yo, Jakop buɗub, ag am nuhikkudnab daaglagnu epeɗiattom.

¹⁰ Nug ag atu taɗakppa mattialatta anattom. Yo, wan haɗaettak, amuppa ulah ɠagattag iwaltte amu, Nug appa mattialatta, anattom. Nug ag diia, ahilag guppiɗ dayaya atognoattom. Yo, Nug ag am nuhikkudnab amunu, Nug ha, ag dabmattom.

¹¹ Yawe Nug am ai igel laa, nag hagagaɗkkunu ippunidtte, amubia heum. Igal nug haen oh nag naqekkunu heebeb aɗa awa, haugppa mekkunu babaitta daatte bia, Yawe Nug Israel danab ah ehanatta, aakku ahilagnu anam heum.

¹² Yawe Nug nukka aakkuib ag omalattatta, dabmattom. Ao, danab laa dilag kayak laa ag oolagppa ii dayom.

¹³ Yawe he, ag qauko attan, wan oh ele aoppig. Ao, Yawe he, ag dattan keeke aon lappig. Nug he, ag uppuh leppu aben men eleppan aon lappig. Yo, Nug he, ag olip goɗen, ad wan men eleppa beppig amu, amuppanu aon lappig.

¹⁴ Nug he, makau, meeme ele ag lanaknu huh huanak ele daappig. Ao, Nug he, sipsip nakkud ittag ele, amu meeme ele ag ena meegeg, lanaknu teppulkad ena ele daappig. Yawe Nug Israel danab ah sipsip dawai enanagnab Basannu, Nug amu ele mattom. Ge, Nug ag wit ena ele mattom. Nug ag amu matte, Nug he, grep ahilkad meu ena oegeg, ag wain enanag lappig.

¹⁵ Amge Israel danab ah ag titiɗak huana hena, ag Kayak oɗe tappaeg neum. Yo, ag ee huana lanana, titiɗna daappig. Ag amu hena, ag laa ag hattom ele am uuppig. Ao, ag laa, Nug hanhan ɠagattag daatte, Nug ag ehanatte ag padal ii metteb ele amu, ag Nug guhuɗidppig.

¹⁶ Israel danab ah ag wan laala dilag kayak hambuppuak noolkadppa dup noa binag mak kobol hena, amuppa ag heeg, Kayak Nug ahilagnu dahil doya laa aomanu doyak aɗa dayom. Ao, ag kayak hambuppuak dottolkad, Kayak Nug amunu ooppa uuaknab dootte, ag amu noolagppa dup nona binalag meppig amunu, Nug oo nauhom.

¹⁷ Ag doɗ manadna, ouɗi nau madappig; ouɗi nau amu ag kayak iitta. Ag doɗ manadna, kayak ag ii doyadppig madappig. Kayak amu ag gemuib doyadppig, anukka ag kayak amu ii doyadppig. Kayak amuam ag mamelkad aɗi ii doyadppig.

¹⁸ Israel danab ah ag laa Nug hanhan ɠagattag daatte, Nug ag mamelag beum daatte ele amu, ag nuhignu dup noa binag mak kobol ii heppig. Ao, ah ag nid menuadtteb bia, Kayak Nug he, ag huu laippu beppig daatteb, amge ag nuhignu daulag atiom.

¹⁹ Israel danab ah, ag Yawe bekkod, aɗekkud ele amu, ag kobol nau heegeg, Nug amu antta, Nug oo nauhom. Nug oo nauhe, nug Israel danab ah guhuɗattom.

²⁰ Nug ag guhuɗatta, Nug aum. “Israel ag eheɗ hekkulagnu ag tiilagppa daatte. Ag oo metta ii uuak kobol hekkulagnu uutteb. Anam amunu, da ag ii ehanadpa. Da anam heppi, ag ahilag gog tak attem daakku amu, da anidkkul.

²¹ Ag kayak hambuppuak dottolkad noolagppa dup noa binag mak kobol heeg, da ahilagnu dahil doya laa aomanu doyak aɗe daami. Dottolkad amu ag kayak genab iitta. Ao, ag kayak hambuppuak dottolkad, keeke amuam ag ehanadkkunu elele iitta, ag amu noolagppa dup noa binag mak kobol heeg, da ool nauhom. Gemu amu, da danab ah ag dahilad iitta ehanadppi, Israel danab ah ag amu anidna, ag ehanittak amunu ittag aqeeb, ag ele aoglagnu dabmak aona, ag dahilppa eɗun uɗiglag. Ao, danab ah dahilad iitta, ag diignu doyak tutukku iitta, da ag ehanadppi, Israel danab ah ag amunu oolag nauhkku.

²² Aɗinu? Da oppoɗil bette, amu oppoɗi bak dahil amu aab aɗu bia keeke oh unuqagnu ewa, qaɗeppa tette, amubia bette. Ao, am wan etetuab ewadkku, qauko diig unuqag ukku ele ewadkku.

²³ Da heppi, uug naunab digdignu Israel danab ah qaɗelagppa uɗikku. Ao, da uug naunab, danab ag latppa lailkad aqatteb bia heppi, ahilagppa nekku.

²⁴ Da heppi, eenu tutunab meeb, enug haen okkai dayeb, ag ebehilkad tekku. Da heppi, beɗu gakkaɗak nau oɗe dayebeb, oɗe nau danab kuɗum aqe mauhtteb ele bekku. Da heppi, doɗ dakkuɗ ag aqaglag. Da heppi, mat nau wan gappudppa oitteb ele emaladkkulag.

²⁵ Dimittim amu, ahilkad kekeɗ ag qep elabppa aqaglag. Ag laulkadppa daanna, ag eheɗ nau baɗaglag. Danab bau, ah bau ele ag mauhkkulag. Ao, nid yuɗ, kaino ele oh ag mauhkkulag.

²⁶ Da ag matatuadppi, ag tamtam gona daalob. Ao, da heppi, ag iitta mena autna aoppeg, hab waappa amu, danab laa nug ahilagnu baula dab-ii-melo.

²⁷ Amge da anam heppi, ahilkad kekeɗ ag da kalemlem iuglag amu da doomi. Ao, da amu heppi amu, ahilkad kekeɗ ag inam akkulag. ‘Ig ag eɗadmut. Yawe Nug ii heum!’ ” Yawe Nug anam aum.

²⁸ Israel danab ah ag am dabmak tutu ele. Ag diignu doyak tutukku ahilagppa ii daatte.

²⁹ O gadon. Ag am danab ah doyak dabmak ena ele daanna, ag imu dooppeg, oolag maidlo am ena! O gadon. Ag aɗi kobol ahilagppa bekku oolag maidlo am ena!

³⁰ Gadonnab! Laa Nug hanhan ɠagattag daatte, Nug ag uuattom. Ge! Yawe Nug ag kekeɗ eppelagppa mattom. Anam iitta dayeblob amu, kekeɗ laippu nug Israel danab 1,000 ii lamadlo. Ao, kekeɗ aɗit aa Israel danab 10,000 ii lamadlop.

³¹ Nai amu genab daattenu diig am, ig Israel, ihinig Kayak, Nug hanhan ɠagattag daatte. Anam amge, ihinkad kekeɗ dilag kayak, ag am ɠagattag iitta. Ahilag kayak am ihinig Kayak bia iitta. Anam amu, ihinkad kekeɗ ag amu doon maditteb.

³² Israel dilag kekeɗ ag diɗilkad am Sodom appa daatte. Ao, ag diɗilkad amu Gomora dadppa daatte. Muɗi grep laala ag meu ninig nau ele otteb, amubia Israel dilag kekeɗ ag Israel dilagppa eheɗ hetteb. Ao, ag grep meu mua ele, nau daatte, ag amubia daan hetteb.

³³ Ahilag hak am wain bia, amu wain amuam mat naunu ouɗi nau, am amubia daatte. Ao, ahilag hak am mat nau, danab emale mauhtte, amubia daatte.

³⁴ Amu Yawe Nug atte. “Ag anam hetteb, amge da ahilag nau hak amu doyen, noob madakkulnu iite bappaidmi daatte? Ao, da nob mak amu keeke danab kunup ɠagattagppa ina qe daatte, amubia da iite bappaidmi daatte?

³⁵ Eheɗ haknu nob tutukku eɗua mettak uɗat am dahil. Ao, da geha aun aɗi ag eheɗ hetteb amu, da nob nau madakkul. Ag hanebppa nena qekkulag. Ahilag haen nau geha paha uɗikku. Ag geha hetteb amu, hak amunu ag bu paha aoglag,” awa atte.

³⁶ Aɗinu ⌊Israel dilag kekeɗ ag anam aoglag⌋? Yawe Nug nuhikkud danab ah gumadkku. Ao, Nug ahilagnu oo gai-iitta doya oo matta ehanadkku. Nug amu hekkunu diig am, Nug ɠagattag ahilag iitta meeb, anidkku. Ao, Nug laippu laa, nug begbeg maɗi nidte, o begbeg maɗi nid iittatai, nug ena iinab dayebeb anidkku.

³⁷ Amu Yawe Nug ⌊Israel ag dabmak pehettak aoglagnu⌋ Nug inam ag amelagppa akku. “Ag ahilag kayak, ag amu dilagnu, ‘Ihinig ɠagattag hanhan daatte,’ dabmena, ag amu dilagppa ehanittak aoglagnu dabmeppig; amge kayak amu ag adeppa daatteb?

³⁸ Ag doɗ maha enanag main, kayak amu madappig. Ao, ag wain ele ahilagnu gokkaɗppig amu, kayak amu ag adeppa daatteb? Ag ahan ehanatteg! Ge, ag ahan, ahilag guppiɗ dayeg!

³⁹ Antteg! Da dakka, da Kayak laippu daattem; kayak laa ⌊ag ehanadkkunu⌋ da heqolppa ii daatte. Da dakka Kayak daattem. Da danab bau dayak madattem, amu da bau dayak amu eɗue aɗattem. Da danab eheɗ hedattem, amu da danab ehanatti, ena daatteb. Auntai laa, dahil hak nuhigppa hekkulnu hettem, nug amu qe-eɗitta, oola gokkunu elelete? Iitta!

⁴⁰ Aɗinu? Gemu amu, da eppel humai, habppa te, da attem. ‘Da genab bau hanhan daattem, genab amubia, nai imu am genab.

⁴¹ Da qep elab dahil, qep amuam amemɗi laippun yaatte bia danab ah aqadtte amu, da qep amunu aeg hoikkul dayeb, amu da qep amuppa danab ah bu madakkul dayeb, da inam hekkul. Da dahil kekeɗ dilag eheɗ haknu nob tutukku qep amuppa madakkul. Ao, da laa ag dahilnu nau ninig ele dootteb amu, da ahilag eheɗ haknu nob elele madakkul.

⁴² Da lat doɗo dahil kuɗum ewadppi, danab ah kuɗumnab tiilag layadkku; laa mauhkkulag, laa ii mauhppeg, da aɗualadppi, da eppelppa daaglag. Ao, da heppi, qep elab dahil am danab ah aqadkku; laa aqadkku am ahilkad ikki danab.’ ” Yawe Nug anam akku.

⁴³ Ag wanppan wan anen anennu danab ah oh, ag Yawenu danab ah ele maɗoɗppan gamag ahak doyeg! Aɗinu? Nug laa ag nuhig maɗi nid guittak madappig ele, Nug amunu nob tutukku madakku. Nug kekeɗ nuhikkud dilag eheɗ haknu nob tutukku madakku; amu Nug ele danab ah nuhikkud dilag eheɗ haknu nob nau tiigppa iitta mekkunu heeb elele metteb, Nug heeb, nuhig wan ele eɗua, nuhig neekkakppa oppiaawak daakkunu hekku.

⁴⁴ Amu Moses nug Nan bekka Josua ele uɗiya, Moses nug ahi amunu nai oh danab ah amelagppa mattia, ewa aawo dooppig.

⁴⁵ Haen Moses nug ahi nai amu Israel dilagppa mattia mala amu,

⁴⁶ nug tuɗitta aum. “Ag nid ahilkad Kayak toppan ɗo imu oh, ag amu doon dim lamidkkulagnu, ag amelagppa hekkulagnunab akkulagnu, ag nai oh gemu da ag mattami imu aon oolagppanab meig!

⁴⁷ Aɗinu? Dim lamitta haknu nai imuam hamu iitta. Laa amu, nai amu ag bauklel madakku. Ag dim lamidkkulag dayeb amu, ag wan Jodan le mataɗna nona aon daaglagnu hetteb ele, ag haen elab wan amuppa daaglag,” awa aum.

Moses mauhomnu mattiak

⁴⁸ Deɗ amuppaib Yawe Moses amegppa aum.

⁴⁹ “Na Nebo qauko te! Nebo qauko imuam iikku Abarim qauko ukkakppa, aab Jeriko am Jodan le laih ukkakppa, Moap wanppa ippa ina daatte. Na tena amu, neegppe, Kanan wanppa ukkaɗ. Wan amu da Israel danab, ag aulagnab daakkunu madakkulnu hettem.

⁵⁰ Qauko na tekkut amu, na appa, na amap Aron nug Hor qaukoppa mauhom, amubia na qauko imuppa mauhkkut.

⁵¹ Na Aron ele aa oh da ippunatminu oo metta ii uuak kobol ii dim lamidya, aa hipunin heeh, Israel danab ah aa anatppig. Aa kobol amu Meribanu leppa, Kades appa, Sin atu taɗakppa, aa appa hepiɗ. Aa da oppiaawak daattem amu, aa Israel danab ah ii ippunadpiɗ, ag da dim lamidkkulagnunab daatteb am ii hepiɗ,

⁵² amunu na piɗe daanna, wan anidkkut, amge na wan, da Israel danab ah madattem, na amuppa ii nomana.” Yawe Nug anam Moses amegppa aum.