Duteronomi 31 - Nobonob Baibel

Josua Israel dilag ikki danab daakkunu nai

¹ Moses nug nai amu oh Israel danab ah amelagppa mattia mala, nug tuɗitta, nai imu ele ag amelagppa aum.

² “Gemu da dahil maɗ 120 amunu, da anuqen, ag omalatte gokkulnu elele iitta. Yawe Nug da Jodan le mataɗe gopanu da amelppa aum.

³ Amge Yawe, ahilag Kayak, Nugnab geha le mataɗa, ag noolag awa, anuqa gokku. Nug geha heeb, ag Israel ag danab wan anen anenppa appa ana daatteb ele, ag lamadna heppeg nauhppeg, ahilkad wan ag aon gumaglag. Yawe Nug nai aum bia, Josua nug ahilag ikki danab dayebeb, ag ele gokkulag.

⁴ Yawe Nug Sihon, Og ele, aa Amo dilag king amu, Nug aa, amu danab ahilti ele hatte nauhppig bia, Nug danab wan amuppa daatteb amu, Nug heeb nauhkkulag.

⁵ Yawe Nug danab ah wan amuppa daatteb ag eppelagppa maatteb, amu ag da haknunab anak nai ahilagnu ami bia ahilagppa hekkulag.

⁶ Ag ɠagattag daan, ahilagnu aib ottaippig! Ahilagnu aib eheɗ nau baɗappig! Aɗinu? Yawe, ahilag Kayak, Nug ag noolag awa gokku. Nug ag ii uuadma, ag ii paɗualadma,” awa aum.

⁷ Moses anam mattiowa, nug Josua he do, Israel ag anttegeg, nug nug amegppa aum. “Na ɠagattag daan, ootppa ɠagattag qettak ele daye! Aɗinu? Na geha anuqna, danab ah imu omaladppe, wan Yawe Nug ag mamelkad aɗi madakkunu nuhig nai ɠagattag qetta amelagppa aum amu, ag amuppa nokkulag. Na aakku anuqna omaladna nona, wan ag aulag daakkunu daatte aon, ag eppelagppa mekkut.

⁸ Yawe Nug anuqa gokku amunu, na aib baɗak doome, o na aib ootppa, ‘Da elele iitta,’ doome. Nug na ele daaglah; Nug na ii uuidma, na ii paɗaidma,” Moses anam aakku Josua amegppa aum.

Ɗo tamaniak okkaippa ebqaknu nai

⁹ Moses nug ɗo imu ya, mana mettak danab ag Yawenu Tituanak Nainu Kunup kontrak inak ele maoppig, amu Israel dilag ikki danab ele mattom. Mana mettak danab ag Lewi buɗub.

¹⁰ Amu Moses nug haknunab anak nai imu mattom. “Maɗ eblaih aɗit ele awebeb, amuam lonnu hippalakppanu uhuqaknu maɗ amu, maɗ amu malatte haenppa, haen amuppa ag Pehppa Dayaknu Hobul hekkulag; amu haen amuppa,

¹¹ haen Israel oh ag Yawe, ahilag Kayak, ag Nug noobppa aben Nug epeɗikku, amuppa ag qagmena daappeg amu, ag ɗo imu Israel danab ah amelagppa ebqeppeg dooglagoitte.

¹² Ag danab, ah, nid naunau, wan laihnu danab ag uɗin, ag oolagppa ahilkad aab ooppa daatteb amu, ag danab ah amu oh ag Yawenu nai doon dim lamidkkulagnu, ag Yawe, ahilag Kayak, ag nuhignu ebehilag oh bodoetta le mekkunu, ag danab onilagppa eppeg uɗin qagmeig!

¹³ Nid ahilkad ag ɗo imu ii dooppig ele amu, ag Yawenu ɗo doon, ag Yawe, ahilag Kayak, ag nuhignu ebehilag oh bodoetta le mekkunu amu, ag anam heig! Ag Jodan mataɗna, wan aon daaglagnu daatte, ag wan amuppa daanna, anamib hanhan hekkulag,” awa aum.

Israel ag oɗe dim lamittak ii hemananu mattiak

¹⁴ Aakku Yawe Nug Moses amegppa aum. “Na mauhkkutnu haen aakku doum. Na Josua appe uɗieb, na nug ele oh dahil mettid haknu peh lag danab ah appa qagmetteb ele, aa appa gumiɗya doya daapeɗ, da nug ehah medakkul,” awa aum. Yawe Nug anam aum amunu, Moses, Josua ele aa goya, mettid haknu peh lag, danab ah appa Nug noobppa qagmetteb ele, aa peh amu odppa, Yawe gumiɗya doya daapiɗ.

¹⁵ Aa appa daaeheh, Yawe Nug lombig teppu ele attan tak, mettid haknu peh lag od attan dayom amu, Nug amuppa tula doum.

¹⁶ Yawe Nug anam doa, Nug Moses amegppa aum. “Na mauhkkutnu haen miag doum daatte. Na mauhppe amu, danab ah imu ag digmena, danab laa dilag kayak, wan ag amuppa nona daaglag ele dilag kayak amu, ag amu dilagnu dup noa binag mak kobol hekkulag. Ag geha da uuiɗna, nug tituana nai qakkak da ag ele hemut amu tippalkkulag.

¹⁷ Ag anam heppeg, da ahilagnu ool nauhkku. Da ag uuatte, dimadappi, ahilkad kekeɗ geha hadappeg nauhkkulag; uug naunab, uug digdig laa ele ahilagppa bekku amunu, ag akkulag, ‘Kayak ihinig, Nug ig ele ii daattem amunu, keeke naunab imu ihinigppa beum,’ akkulag.

¹⁸ Da ag uuatte, dimadakkul. Aɗinu? Ag nau henana, kayak laala noolagppa dup nona binalag mekkulag.

¹⁹ ⌊Israel danab ah ag da uuiɗna, ag kayak laala noolagppa dup nona binalag mekkulag.⌋ Amu Moses, Josua ele, da kobol amunu ahi laa aa matattem. Ahi imuam danab nug laa aɗi heehe antta maditte, am dahil danab amubia dayaya, Israel danab ah ag nau heppig miag atiak daakkunu, aa ahi imunu nai yaaya, Israel danab ah ag ettaglagnu ippuanatteɗ.

²⁰ ⌊Aa ahi amu yaaya ippunadkkulahnu diig am inam.⌋ Da Kayak, da geha Israel danab ah diie, wan ag mamelkad aɗi madakkulnu dahil nai ɠagattag qette ami, amuppa nokkul. Wan amuam enanag, wan ittag ele, amuppa ee meu huana otte. Appa ag ee ohnu elele lanana, ag beɗulag ena ele daaglag. Haen ag anam daan amu, geha ag da guhuɗilna, digmen kayak laala noolagppa dup nona binalag mekkulag; ag dahilnu ena iinab doonna, ag da ele nug tituanak nai qakkak hemut, ag amu tippalkkulag.

²¹ Anam heppeg amu, geha uug naunab, amu uug digdig laa ele bekkulag. Ahi da ippunadkkul ele, ahi amuam laa aɗi heehe anttomnu mattiak danab, am danab amubia dayaya, Israel danab ah ag nau heppignu ippunadkku. Aɗinu? Ag buɗulkad ag ahi amu daulag ii atima. Danab ah imu ag diilag attemunab amu da doyadttem, amu wan da ag mamelkad aɗi madakkulnu dahil nai ɠagattag qetta anak ii hemi dayeye, da ag iikku doyadttem. Ge, gemu ele, da ag aɗi hekkulag, da doottem.” Yawe Nug anam Moses amegppa aum.

²² Kayak Nug anam a, deɗ amuppaib Moses nug ahi amunu nai ya, Israel danab ah ippuanattom.

²³ Aria, Yawe ⌊aum bia, Moses, Josua ele aa mettid haknu peh lag odppa daaeheh, Yawe amu mattia mala,⌋ Nug Nan Bekka Josua, ehah nai imu mettom: “Na ɠagattag daan, ootppa ɠagattag ele doye! Aɗinu? Da Israel danab ah wan madakkulnu, dahil nai ɠagattag qette ami amu, na ag amuppa omaladna nokkutoitte. Da ag ele daagnig,” awa aum.

²⁴ Moses nug ɗo ohnab ye bukppa no amu,

²⁵ nug Lewi buɗub ag Yawenu Tituanak Nainu Kunup kontrak inak ele maotteb amu, nug haknunab anak imu ag mattom.

²⁶ Nug aum. “Butti, haen adekku ag Israel danab ah ag eheɗ hekkulag amu, ag genab eheɗ heppig ippunadkkunu, ag Ɗo Nai Buk imu aon, ag Yawe, ahilag Kayak, ag nuhig Tituanak Nainu Kunup kontrak inak ele heqo laih meppeg, anam dayaɗ!

²⁷ Aɗinu? Ag Israel ag am nai tappe nak danab, amu ag oɗe dim lamidmananu, ag ahilag dabmak ɠagattag eppak ele daatte amu, da doottem. Gemu da ag ele daattem, amu haen imuppa, da daaiyi, ag Yawenu nai tappaeg ne oitteb amunu, da mauhppi amu, ag henana, nai tappe nak danab huanaknab daaglag.

²⁸ Aria, gemu amu, da keeke imu oh ag amelagppa appi dooglagnu, hab, wan ele aa dopeɗ, da nai imu Israel dilag ikki danab, da ag amelagppa matti dooppig, aa ele dooyya, dimppa aa da genab, da ag amelagppa ami akkulahnu elele daaglahnu amu, ag appeg, Israel dilag huu okkai ohppan ikki danab, amu anuqak danab ele uɗippeg, ⌊da appi dooglag⌋.

²⁹ Aɗinu da anam hekkul. Da doottem, da mauhppi amu, ag kobol diig ena iitta, uɗig uuak ele hena, ib da ag amelagppa hekkulagnunab ami amu apiɗna gokkulag. Ag butti aɗi nau anam hebeppeg, diig amunu Yawe Nug oppoɗi beeb, uug naunab ahilagppa nekku.” Moses nug Israel amelagppa anam aum.

Mosesnu ahi

³⁰ Moses nug Israel dilag tamaniak amelagppa ahi imu ohnab mattie dooppig.