Duteronomi 30 - Nobonob Baibel

Yawe toppa eɗua wanaknu ewak

¹ Amu ag Yawe oɗe dim lamidna oinna, ena anidkkulag. Amge ag Yawe oɗe dimettan oinna, eheɗ laa awaknu anak waappa dayak anidkkulag. Anam amu, Yawe, ahilag Kayak, Nug heeb, ag matatun gona, wan laalappa, diia ukka laih me dayak danab ah, danab laa oolagppa daaglag, amge haen amuppa ag itittak enanu, amu eheɗ laa awaknu anak waappa dayak ele da yaami epeɗin dabmekkulag dayeb amu,

² haen amu ag, amu nid ahilkad ele ag eɗun, Yawe, ahilag Kayak, ag Nug waappa daan, ag meulag ohppa, oolag ohppa ele haknunab anak nai oh da gemu mattami ele, ag amu tutukku dim lamidppeg amu,

³ Yawe, ahilag Kayak, Nug ag diia, ahilag wanppanab eɗua maadkku. Nug ahilagnu oo gai-iitta doya oo metta ehanittak ha, Nug ag matatuatta, wan laalappa mattom, Nug amuppan eɗua diia, qagmaadkku.

⁴ Am ag laih uma umanab diia ukka laih me dayak danab ah daaglagtai, me Yawe, ahilag Kayak, Nug ag qagmatta, eɗua diia uɗikku.

⁵ Nug ag diia, ag mamelkad aɗi dilag wanppa diia uɗieb, ag geha wan amu baula aon aɗan daaglag. Nug heeb, ag ee keekenu elelenab, mamelkad aɗi eɗattak daaglag; abatak ahilag amu mamelkad aɗi eɗattak daakku.

⁶ Ag Yawe, ahilag Kayak, Nug ag meulag ohppa, oolag ohppa ele nuhignu oo mauhak doona, ag bau daaglagnu, Yawe Nug heeb, ag, ag buɗulkad ele ag oolag oppiaawak ele daaglag.

⁷ Ag anamppa oolag eɗukku, amu Yawe, ahilag Kayak, Nug eheɗ laa awaknu anak waappa dayak imu oh amu heeb, eheɗ laa awaknu anaknu waappa dayak amuam kekeɗ ahilag, ag eheɗ hadatteb ele, am ag qaɗelagppa gokku.

⁸ Anam heeb, ag eɗun, Yawe dim lamidna, ag haknunab anak nai gemu da ag madattem imu aɗaglag.

⁹ Ag anam heppeg, Yawe, ahilag Kayak, Nug enanagnab doya heeb, ag aɗi uɗat digdig hekkulag am enaib bekku. Ag appatppeg, ahilkad nid naunau kuɗumnab daaglag. Ahilkad makau ele appatkkulag. Datta ee ebatteb, amu ele meu huanak okku. Aɗinu? Nug ag mamelkad aɗi dilagnu oo enanagnab doyom, amubia Nug baula ahilagnu enanagnab doya heeb, ag ee keeke, elelenab daaglag.

¹⁰ Amge ehanittak ena anam bekkunu am, ag Yawe, ahilag Kayak, ag nuhig haknunab anak, nuhig ɗo ele oh, Ɗo Nai Buk imuppa yaak niitte ele, ag oolag eɗueb, nai amu dim lamidnana, ag Yawe, ahilag Kayak, ag Nug meulag ohppa, oolag ohppa ele Nug dim lamidkkulag, amuam bekku.

Bau dayakte, iitta mauhakte epeɗikkut

¹¹ Gemu da ag aɗi hekkulagnunab attem amu, ag hekkulagnu uugnab iitta, ag hekkulagnu elele.

¹² Ɗo nai imu hab aabppa dayebte, laa nug akku, “Aun laa nug hab aabppa ta, ɗo nai ig dim lamidkkunignu awa uɗia mehuqkku?” awa akku.

¹³ O ɗo nai imu wan laa yu daug laihppa uppa dayebte, laa nug inam akku. “Aun laa nug wan yu daug laihppa ukka, ɗo nai ig dim lamidkkunignu awa uɗia mehuqkku?” awa akku.

¹⁴ Iitta! Nai amu na dim lamidkkutnu na qata nidatte, na oɗenppa, na ootppa ele daatte.

¹⁵ Antte! Gemu amu, da ib aɗit ippuanatti, ag ib laa tituankkulagnu daatteb. Ag ib laa dim lamidkkulag dayeb amu, ag bau daanna, ag keeke ena aoglag, amge ag ib laa dim lamidkkulag dayeb, ag mauhna, padal mekkulag.

¹⁶ Da gemu ag Yawe, ahilag Kayak, ag nuhignu oo mauhak doon, ag Nug oɗe, nuhig haknunab anak, nuhig ɗo oh ele dim lamidkkulagnunab ag amelagppa attem. Ag amu hekkulag dayeb amu, ag bau daanna, appatnana, ena daaglag. Laa amu, ag amu hekkulag dayeb, Yawe, ahilag Kayak, Nug wan ag aoglagnu daatteb amu, Nug wan amuppa ag itadkku.

¹⁷ Amge ag nuhig ɗo tabappeg nekku dayeb, ag nuhig nai ii dooglag dayeb, ag laa dilag dabmak nau doon, ag kayak hambuppuak noolagppa dup nona binalag mekkulag dayeb amu,

¹⁸ da genabnab genab ag amelagppa attem; Kayak Nug heeb, ag padal mekkulag. Yo, ag haen elab wan amuppa, ag geha Jodan le mataɗna gona, wan amu aoglagnu daatteb amu, ag haen elab wan amuppa iinab daamna.

¹⁹ Anam amu, gemu da ib aɗit ippuanatti, ag laa tituankkulagnu daatteb. Ag laa tituankkulag dayeb amu, ag bau daanna, Kayaknu itittak ena aoglag. Ag ib laa tituankkulag dayeb amu, ag eheɗ laa awaknu anak waappa daan mauhkkulag. Anam daatte amunu, da geha da hab, wan ele aa da nai amu Israel, ag amelagppa matti dooppig, aa amu dooya malapiɗ, dimppa aa da genab ag Israel danab ah, da ag amelagppa ami akkulahnu babaittak daaglahnu oɗ matattem. Amge ag Israel amu, ag bekkalkad, aɗelkad aɗi ele, ag bau daaglagnu amu, ag bau dayak tituaneg!

²⁰ Ag Yawe, ahilag Kayak, ag nuhignu oo mauhak doon, ag Nug oɗe dim lamidna, Nug hanhan guguittak daaglagnu tituaneg! Aɗinu? Nug am ahilag bau dayaknu diig. Ag anam hekkulag dayeb amu, ag haen elabnab ahilag wanppa daaglag. Yawe Nug wan amu ag mamelkad aɗi, Abraham, Aisak amu Jakop ele, Nug ag wan amu madakkunu nai ɠagattag qetta aum.