Duteronomi 3 - Nobonob Baibel

Israel ag Og, Basan dilag king eɗidppig

¹ Amu dimppa amu, ig eɗut, aot Basannu ib ukkak, amu gomut. Ig ukkautut amu, Basan dilag king Og, nug nuhikkud ban daup oh ele ag Edrei appa ig banenig uɗippig.

² Ag ban hekkulagnu uɗieg amu, Yawe Nug da amelppa aum. “Genabnab da ag ehanadppi, ag danab amu eɗadkkulag amunu, ag aib ahilagnu baɗappig. Geha da ag ehanadppi, ag nuhig ban daup oh eɗadppeg, da geha ahilag wan ag madakkul. Ag Amo dilag king Sihon, Hesbon dayaya gumak heum ele, ag nuhigppa heppig bia hetteg!” awa aum.

³ Yawe, ihinig Kayak, Nug Og, Basan dilag king, nuhikkud danab ah oh ele diia, ig eppenigppa me, ig ag ohnab aqaut mauhppig. Ig laippu laa ii uuittut dayom.

⁴ Am ig nuhig aab okkai oh aomut; ahilag ebqak am 60. Og nug Basan wanppa, wan atu gumom amu, wan amuam Argob. Nug wan amu gumom, amge ig wan amu oh nug eppegppanu aomut.

⁵ Aab okkai amu oh ig nuhigppanu aomut ele amu, aab okkai amu oh am aab ɠagattag aɗ ele, ahilag aɗ am attannab, amu aɗppan od oɗeppa amu, od manak qaknu keeke ele daappig. Amu ig aab naunau kuɗum aɗ ii hattak ele, amu ele haen amuppaib diimut.

⁶ Am ig Hesbon dilag king Sihon, ig nuhigppa hemut bia ig heut, aab okkai amu oh am Yawenuib nuhig pelemppa daappig. Ig danab ah, nid naunau ele oh heut, anam daappig.

⁷ Amge ig aab okkai amuppanu doɗ, amu keeke laala oh ele ihinignu aɗamut.

⁸ Gemu amu, ig wan oh, Amo dilag king aɗit amu dilah, Jodan leppanu kaɗag uɗitteppanu dayom amu, ig aakku aot malamut. Wan amuam oolnu noak onig Arnon, appa digme ukke ukke, qauko Hermon batom.

⁹ Hermon qaukonu amu, Saidon danab ah ag Sirion adappig; Amo ag am Senir adappig.

¹⁰ Gemu amu, ig aab oh, uɗem okkai nakok attan daatte, amu wan aɗit onilah Gileat, Basan ele, ahilah wana ukkak, aab nakok Saleka, Edrei ele batakppa amu, ig appan aab oh aomut. Aab amu oh, wan amu ele am Basan appa Og waappa daappig.

¹¹ Keeke laa amu, Og, Basan dilag king, nug am Repaim danab okkai okkai dimnunab aakku amunu, nuhig niiak balal aenppa hak, elab nuhig amu 4 mita eɗittak, emaitak am 2 mita bia. Keeke amu ⌊nai imu yaak haenppa⌋ Amon dilag aab Raba appa dayeye anidtteb.

Jodannu kaɗag uɗitteppanu wan obatak

¹² Ig wan amu ihinig daakkunu aot, da wan maha Aroernu ukkak, Arnon oolnu noak eleleppa daatte, amu Gileatnu wan qauko qauko ele, amunu maha laa ele, nuhig aab oh ele, da wan amu Israel dilag huu okkai Ruben, amu Israel dilag huu okkai Gad ele mattami.

¹³ Anam hewoya, da Gileat wan laa oh, amu Basan wan ele, anukka Og gumom, da Manase huu mahaib, ag mattami. Basan appa wan atu onig Argob oh, anukka ag wan amunu am Repaim dilag adappig.

¹⁴ Jair, nug Manase buɗub, nug wagai ma, Argob wan atu oh Basan appanu awe ukka, Gesur danab, Maka danab ele tomppa waum. Jair nug wan amu onig, am nug nukka nug onig awa, wan amunu Jairnu aab aum. Danab ag wan amunu gemu ⌊nai imu yaak haenppa⌋ ele Jairnu Aab atteb.

¹⁵ Gileat amu aab ikki Makir, ag mattami.

¹⁶ Aria, Israel dilag huu okkai Ruben, Israel dilag huu okkai Gad ele amu, da wan laih Gileatnu ukka, Arnonnu oolnu noak gamagppa wana ukkak, amu Jabok leppa wanak, da wan amu ag mattami. Le Arnon, le amuam Amon tomppa daatte.

¹⁷ Ruben, Gad ele dilah wannu tom qaqan uɗitteppanu am Jodan le aakku. Jodan le am atu Araba, atu amuppa daatte. Tom amuam Galili Le amegppanu ukka, Mauhak Le aguppa batak, amu ahilag wannu tom kaɗag uɗitteppanu, amuam qauko Pisga aakku.

¹⁸ Haen amuppa da haknunab nai imu Israel dilag huu okkai, ag Jodannu kaɗag uɗitteppanu daaglag amu, da ag amelagppa ami. “Yawe, ahilag Kayak, Nug ag wan imu aon, ahilag keeke daakkunu mattom, amge ag ahilkad ban danab ɠagattag amu maadppeg, ag Jodan mataɗna wana, ag lailkad Israel laa appa daaglag amu, ag ag ehanadkkulagnu ban haknu bappaidna anuqna gokkulagoitte.

¹⁹ Amge da doottem, ag doɗ kuɗumnab ele amunu, ag ahilkad doɗ, ag waalkad, amu ahilkad nid naunau ele, ag amu oh uuadppeg, aab da ag mattamippa daappeppeg,

²⁰ haen Yawe Nug ag maɗoɗ mattom bia Israel laala, ag Yawe, ahilag Kayak, Nug wan Jodan le mataɗa ukkak madatte, Nug ag matteb aoglag, ag lailkad appa ag maɗoɗ daatteb bia daappeg, ag eɗun, da ag wan madattem ele imuppa uɗiglagnu elele,” awe ami.

Moses nug wan amuppa nokkunu aib daatte

²¹ Haen amu da Josua amegppa haknunab nai imu ami. “Na keeke oh Yawe, nahip Kayak, Nug king aɗit imu dilahppa heum amu, na anidme. Nug heum biaib, king ag wan laih Jodannu qaban uɗitteppanu daatte gumatteb ele, Nug amu dilagppa ele anamib hekku.

²² Ag aib danab appa daatteb dilagnu baɗappig! Aɗinu? Yawe, ahilag Kayak, Nug ag Israel, Nug ag ehanatta, ban hekku,” awe ami.

²³ Haen amuppa da oo doyak ele Yawe unuqitten ami.

²⁴ “O Naɗi Yawe, da nahip maɗi nid. Am na digmena, na onin ɠagattag ele, na ebehin ele ippuniɗme. Am kayak laa habnute, o wannute nug keeke na hettem, nug anam laa hekkunu elelete? Iitta!

²⁵ Na oot meɗan heppe, da Jodan mataɗe, laih wain, wan enanag appa daatte, da amu anidkkulnu oɗ medattem. Da wan enanag amu, am qauko qauko ele, aria, Lebanon wan ele anidlom,” awe ami.

²⁶ Amge ag beɗulagppa Yawe Nug dahilnu oo nauhe, Nug dahil unuqittak dookkunu uuom. Nug aum. “Aakku elele! Baula amunu aib mattime.

²⁷ Na amu Jodan le ii mataɗmana, amge na neegna, wan anttakib hekkut amunu, na Pisga qauko igippa tena daanna, laih laih ohppa neegppe ukkeb, na wan atu amu oh anidkkut.

²⁸ Amge na Josua, nug geha danab ah imu anuqa omalatteb, ag Jodan le mataɗna, nug geha wan na gemu amenppa anidkkut ele, nug danab ah ehanatteb, ag wan amu aoglag amunu, na aakkude nug amegppa nug, amu genabnab genab hekkunu anana, ɠagattag mette!” Yawe da amelppa anam aum.

²⁹ ⌊Yawe Nug da Jodan le ii mataɗaknu aum⌋ amunu, ig wan oolnu noak Betpeor guguittak appa daamut.