Duteronomi 29 - Nobonob Baibel

¹ Yawe Nug Israel ele Horep appa nug tituanna nai qagappig. Aria, Moap appa Yawe, ag ele baula nug tituanna nai qagappig. Amuam nug tituanna nai qakkak bau, qauko Horep appa heppig am tuɗittak. Amu Yawe Nug Moses, Israel amelagppa, ag nai amu dim lamidkkulagnu, ag attem attem hekkulagnu amelagppa ab dooglagnunab aum am, amuam aakku.

Moses Yawe aɗi aɗi heumnu nai, nug tituana nai qakkaknu nai dim lamidkkulagnu nai ele mattiom

² Moses nug Israel oh diia, qagmaatta, ag amelagppa inam aum. Yawe Nug Isip appa Paro, nuhikkud ehanittak danab, amu danab ah oh ele dilagppa kobol heum amu, ag amelagppa anidppig.

³ Guittak okkainab Isip danab aqom, Kayak dabmettaknu kobol danab haknu elele iitta, aria uɗat ɠagattagnab ele amu, ag amu oh ag amelagppanab Yawe he anidppig.

⁴ Amge anukka, gemu ele ⌊ag kobol amu ohnu diignu doyak tutukku aoglagnu oolagppa guittak ii dootteb⌋ amunu, Yawe Nug ag anidkkulagnu, o ag daulagppa dooglagnu amu, Nug heeb, ag diignu doyak tutukku aoglagnu ii heum.

⁵ Amu Yawe Nug atte. “Maɗ 40 oh da, Yawe, da ag omalatti, atu taɗakppa oimut. Ag oiyegeg, ag ahilkad lamen, baelkad gaɗa ele ii nauhppig.

⁶ Ag bret iitta, o wain iitta, o le ɠagattag laa ele iitta, amge da, Yawe, da am ahilag Kayak, ag amu dooglagnu, da ag ee mattami,” awa atte.

⁷ Aria, ig uɗiut, Hesbonnu King Sihon amu Basannu King Og ele, aa ig banenig uɗipiɗ, amge ig aa eɗatmut.

⁸ Ig ahilah wan aot, Israel dilag huu okkai Ruben, Gad amu Israel dilag huu okkai Manase mahaib ele, ag aulag daakkunu mattamut.

⁹ Amunu ag nug tituana nai qakkak daatte amu aɗan, dim lamitteg! Ag anam hena amu, ag keeke ohppa ag eleleib hekkulag.

¹⁰ Gemu amu, ag Israel danab oh, ag laa ag huu okkai dilag okkai danab, ag laa ag epeɗiak danab, ag laa ag ikki danab, amu ag laa ag aabppan danab, ag oh amu, ag gemu Yawe, ahilag Kayak, ag Nug noobppa aakku hippaidppig daatteb.

¹¹ Ag, amu nid naunau ahilkad, ag waalkad, amu wan laihnu danab, ag oolagppa daan, ag aab ahilag aonna, le ele itatteb amu, ag oh iikku daatteb.

¹² Gemu amu, ag Yawe, ahilag Kayak, ag Nug ele nug tituana, nai qakkaglagnu daatteb. Yawe Nug he, Nug ag ele nug tituana nai qakkak amu hekkulagnu daatteb, amu nai imu Nug hekkunu, Nug nuhig nai amu ɠagattag qetta atte.

¹³ Nug gemu ag nuhikkud danab ah daatteb, Nug am ahilag Kayak daatte, Nug ag amu dooglagnu hette. Nug amu genab hekkunu nai nuhig ag amelagppa ana qakkom. Ele amu, Nug ag mamelkad aɗi, Abraham, Aisak, Jakop ele amelagppa amu hekkunu nuhig nai ɠagattag qetta aum.

¹⁴ Amge Yawe Nug, nug tituana nai qakkak imu anana, ɠagattag qedatte ele amu, Nug ag ele aakkuib ii hette.

¹⁵ Iitta! Yawe, ihinig Kayak, Nug, nug tituana nai qakkak imu aun aɗi ag Nug noobppa gemu daatteb, amu Israel danab ah dimppa bekkulag dilag ele hette.

¹⁶ Am ig Isip wanppa attem daamut, amu ig danab laala wanelagppa ele attemnab oitta uɗimut amu, ag keeke amu daulagppa daye dootteb bia doottem.

¹⁷ Danab amu oolagppa ag uuaknab doyaknu keeke, amuam kayak hambuppuak dottolkad adppa hattak, menppa, silwappa amu golppa ele hattak amu, ag amu anadppig.

¹⁸ Ag anam anadppig amunu, ag oolagppan laa, am danab laate, o ah laate, o aab ikki laate, o Israel dilag huu okkai laate, amunu laa nug Yawe, ihinig Kayak, nug Nug dimetta, laihnu danab amu dilag kayak hambuppuak noolagppa dup noa binag mak kobol hemanu dabmeig! Ge, diɗi laa keeke nau aɗit he bettep, laa am uud tiig mua nau ele, laa am uud ad tiig mua ele, diɗi amu keeke amu he beya, keeke heeh nauhtteb, amubia kobol nau ahilagppa bemanu ag dabmeig!

¹⁹ Amu danab laa nug ig Israel, ig Yawenu danab ah daattem, Nug am ihinig Kayak daatte, nug nug tituana nai qakkak nai amu dabmaama, diig amunu nug inam aib dabma aum. “Da eheɗ tuɗitten, heinneib daakkul, me da ena daakkul.” Nug anam aib heum. Danab ag amu hetteb, ag ahilag wan oh heppeg nauhkku; wan le daatteppa, wan laa le ii daatteppa ele oh nauhkkulag.

²⁰ Yawe Nug danab ah anamnu amu ena ii doyatta, ahilag hipunin iinab uhuqa mattama. Nug ahilagnu oppoɗi bak, oo aeg bak ele bekku. Eheɗ laa awaknu anak waappa dayaknu nai oh buk imuppa yaak daatteb amu, amu oh ahilagppa neeb, Yawe Nug geha heeb, danab ah amu ag iitta mena autna aoppeg, hab waappa amu, danab laa nug danab ah amu dilagnu baula dab-ii-mema.

²¹ Yawe Nug geha danab amunu Israel dilag huu okkai ooppan amu, Nug eheɗ laa awaknu anak waappa dayaknu nai Ɗo Nai Bukppa yaak daatte amu qaɗelagppa gokkaɗkkunu epeɗiadkku. Buk amuppa nug tituana nai qakkak nai imu aakku daatte.

²² Anam dayeb, ahilkad menuattak bau dokkulag, ag buɗulkad ele, amu wan laihnu danab, wan umanabnu uɗitteb, ag ele, ag oh wanppa nauhattak okkai amu, oɗe digdig ele, Yawe Nug wanppa heeb nekku amu, ag anidkkulag.

²³ Wan ittag ele imu, am geha naunab daakku. Danab ah ag aɗitai laa amuppa iinab eppamna; keeke ele appa ii bemana; gikkiɗah ele amuppa ii bemana. Geha Sodom Gomora ele, Atma Seboim ele bia daakku. Yawe Nug danab ah aab okkai amuppan ⌊ag kobol nau heppig amunu,⌋ oo nauhak huanaknab doya, Nug he, ag padal mena, iitta meppig. Am wan imu ele anambia daakku.

²⁴ Anam beeb, wanppan wan laala taliliak daattebnu danab ag oɗ mekkulag. “Yawe Nug aɗi diignu wan imu anam heum? Aɗi diignu Nug oo nauhak huanaknab anam doyom?”

²⁵ Ag anam oɗ meppeg, laa ag akkulag. “Imu beumnu diig am, Kayak he, wan amuppan danab ah ag Nug ele nug tituana nai qakkak hewona, ag nai qakkak amu tippalppig. Yawe, ag mamelkad aɗi dilag Kayak amu, haen Nug ag Isipnu diia, omalatte uɗippig, haen amuppa ag nai qakkak amu heppig.

²⁶ Ag doonna, ib tutukku apiɗidna, kayak laala, laa dilag kayak, Yawe Nug ag ii mattom, ag amu noolagppa dup noa binag mak kobol heppig.

²⁷ Anam akkunu Yawe Nug oo nauhak huana doya he, eheɗ laa awaknu anak waappa dayaknu oh, buk imuppa yaak daatte amu, ag qaɗelagppa neum.

²⁸ Yawe Nug oo nauhak huanaknab doya, oppoɗi ele be, Nug danab ah nuhikkud, ahilag wanppanu lamatte gona, wan laa dilagppa daappig; gemu ele ag amuppaib daatteb,” aon akkulag.

²⁹ Yawe, ihinig Kayak, Nug haen gemunu keeke, o butti aɗinu keeke amu, Nug amunu diignu doyak tutukku oh ig ii mekkom, amge ig, amu ig buɗunkad ele ɗo mekkom, Nug ig amu dim lamittaknu haknunab anak nai ihinignu aum.