Duteronomi 28 - Nobonob Baibel

Oɗe dim lamitta, itittak ena awaknu nai

¹ Amu Moses nai tuɗitta mattiom. Ag genab Yawe, ahilag Kayak, ag Nug oɗe doon, ag haknunab anak nai gemu da ag madattem imu dabmettaglag dayeb amu, Yawe, ahilag Kayak, Nug heeb, ag wan laa oh eɗattak daan, ag binag okkai, amu onig okkai ele daaglag.

² Amu ag Yawe, ahilag Kayak, ag Nug oɗe dim lamidkkulag dayeb amu, diig amunu ag itittak ena imu aon daaglag.

³ Yawe Nug heeb, aab okkaippa, aab okkai dimittim ele ag itittak ena aoglag.

⁴ Yawe Nug itittak ena matteb, ag nid kuɗum ele daan, ahilkad dad ele, am ee okkai okkulag. Yawe Nug heeb, ahilkad makau huana menuadppeg, sipsip meeme ele am anamib ele daaglag.

⁵ Nug ag itatteb, ad meu keeke, kalegppa ambak daappeg, Nug ag itatteb, ag ee laa ele kuɗum ele daaglag.

⁶ Haen ag dimittim gokkulag, eɗun ele uɗiglag, Yawe Nug ukkak, uɗiak amu ohppa itadkku.

⁷ Kekeɗ ag banelag uɗin, aqaglagnu ban hekkulag me, Yawe Nug ehanatteb, ag eɗadkkulag. Kekeɗ ag ib laippuppa uɗin aqaknu ban hekkulag, amge ag ib kuɗumppa, noolagppan oolna gokkulag!

⁸ Yawe Nug ag aɗi keeke ag eppelagppa hekkulag, Nug amu ohppa itatta, bakkalen lakka ee ambak mekku. Yawe, ahilag Kayak, Nug wan ag madatte, amuppa itadkku.

⁹ Ag Yawe, ahilag Kayak, ag nuhig nai haknunab anak dim lamidna, ag nuhig kobolppa oiglag dayeb amu, Yawe Nug heeb, ag nuhignu, oppiaawak ele daan, ag danab ah nuhignab daaglag. Nug amu hekkunu nuhig nai ɠagattag qetta aum amu, Nug anam hekku.

¹⁰ Ag anam daappeg, wan atu ohppan danab ah ag anadkkulag amu, ag Yawe Nug ag nuhikkudnab daaglagnu diiom anadna, ag ahilagnu ebehilag oh bodoetta le mekku.

¹¹ Yawe Nug ag wan madakkunu ag mamelkad aɗi amelagppa anam hekkunu nuhig nai ɠagattag qetta aum, amuppa keeke ena ena ma madakku. Amuam nid naunau kuɗum, doɗ manan kuɗum, amu keh iɗu iɗu kuɗum ele madakku.

¹² ⌊Gu am Yawe eppegppa daatte, Nug aakku he nette.⌋ Ag Nug oɗe dim lamidppeg amu, Nug gu hanebppa heeb nekku. Keeke ena ena oh, am Yawe eppegppa daatte. Ag Nug oɗe dooglag amu, Nug geha ag uɗat oh ag eppelagppa hetteb amu, Nug amunu itadkku. Ag wan laappan danab lon mattaglag, amge ag ahilagppan lon ii aomna.

¹³ Ag haknunab anak nai Yawe, ahilag Kayak, ag nuhig nai imu dabmettan dim lamidkkulag amu, Yawe Nug ag humatteb, ag ikki bia, binalag okkai ele daaglag. Ag boob bia, danab ah laa oh waalagppa ii daamna.

¹⁴ Ag da haknunab anak nai attem imu aib ii dim lamidppig. Ag haknunab anak da attem imu tutukkunab henana, ag aib kayak laala waalagppa daan ag oɗelag dim lamidppig.

Yawenu nai ii dim lamittaknu eheɗ awaknu anak waappa dayak

¹⁵ Moses anam ana amu, nug nai tuɗitta mattiom. ⌊Amu ag Yawe, ag Nug dim lamidppeg amu, Nug ag ena itadkku,⌋ amge Yawe, ahilag Kayak, ag Nug oɗe doyaknu uuna, ag haknunab anak nai, amu ɗo nuhig ele gemu da ag madattem imu, ag amu dimettaglag amu, eheɗ laa awaknu anak waappa dayaknu nai imu oh ahilagppa uɗikku.

¹⁶ Ag aab okkaippa, aab okkai dimittim ele eheɗ laa awaknu anak waappa daaglag.

¹⁷ Ag ad meulkad keeke, iitta ele daaglagnu, ee laa ele iitta ele daaglagnu, ag eheɗ laa awaknu anak amu waappa daaglag.

¹⁸ Ag nid kuɗum iitta, amu ahilkad dad ele nauhak daaglagnu, ag eheɗ laa awaknu anak amu waappa daaglag. Ahilag makau, sipsip ele ii menuglagnu, ag eheɗ laa awaknu anak amu waappa daaglag.

¹⁹ Haen ag dimittim gokkulag, eɗun uɗiglag amu, ukkak, uɗiak amu ohppa ag eheɗ laa awaknu anak waappa daaglag.

²⁰ Yawe Nug heeb, eheɗ laa awaknu anak waappa dayak, dabmak kaboliak, bu qak ele ahilagppa uɗikku. Ag aɗi hekkulagnu hekkulag amu, Nug anam aakku hekku. Nug anamib heeb ukkeb, ag nauhna autna aon, pahanab mauhkkulag. Yawe Nug aɗi diignu anam hekku? Amunu diig am, ag kobol nau henana, Nug dimettaglag, amunu Nug anam hekku.

²¹ Yawe Nug oɗe nau digdig ahilagppa heeb beeb, laippu laa nug wan ag gemu nona aon daaglagnu daatteb, laippu laa amuppa bau ii daama.

²² Yawe Nug geha heeb, beɗulag ebehitaknu oɗe, beɗu gakkaɗak, aria leele agittak oɗe ele ahilagppa uɗikku. Nug heeb aam huana neeb, keeke oh qaɗaiettaglag. Datta ee oɗe heeb bekku. Nug geha keeke nau amu oh tuɗid ele heeb bebeppeg ukkeb ukkeb ag mauhkkulag.

²³ Gu nakok laa iinab neeb, wan am men bia ɠagattag ebakku.

²⁴ Yawe Nug heeb, gu nelo, amge iitta, Nug heeb, ulah huana uɗia, gappud, ihi ele iwaleb gokku. Anam heebeb ukkeb, ag padal mena autnanab aoglag.

²⁵ Yawe Nug heeb, ahilkad kekeɗ ag eɗadkkulag. Am ag kekeɗ ahilkad, ag ib laippu amuppaib banelag gona, aqaknu ban hekkulag, amge ag ib kuɗumppa ahilag kekeɗ noolagppanu oolna gokkulag! Ahilagnu amu, wan atu ohppan danab ah ag, ag anadna, amelag iɗuak dooglag.

²⁶ Ag gaɗalkad am ai, doɗ dakkuɗ ele dilag ee daappeg, ladappeppeg, auntai laa ag lamadkkulagnu ii daama.

²⁷ Yawe Nug geha Isip dilagppa mamattin he aqom bia ahilagppa heeb bekku. Nug heeb, ag beɗulagppa mamattin beppeg, beɗulagppa ihuanhuan, yu qak ele kuɗum ele daappeg, nahig huana aqakku. Ag heppeg, oɗe digdig amu iitta ii memana.

²⁸ Yawe Nug heeb, ag kaaka aqeb, amelag gaɗueb, dabmak kaboliak ele daaglag.

²⁹ Ag geha amun haenppa gabotin oiglag, laa nug ameg gaɗuak ele gatatuppa gabotia gotte, ag amubia oinna, ag aɗi keeke laa hekkulag, amuppa aɗitai ena laa ii hemana. Danab laa ag hanhan eheɗ hattana, ahilkad keeke ele yab aoglag. Laa nug uɗia ehanatteb, ena daaglagnu laal iitta.

³⁰ Ag ah ele layam bataglag, amge danab laa geha wagai ma, ah amu duttuna heeb, nug ele gappai aoglah. Ag lag hekkulag, amge laa ag uɗin amuppa daaglag. Ag grep dad eppaglag, amge laa ag uɗin, grep meu amu aon lakkulag.

³¹ Ag laa neekkadna daappeg, ahilkad makau okkai ebehi ele qena tuqaglag, amge ag teppu nakok laa iinab lamana. Laa ag wagai mena, ahilkad donki aon gokkulag, amu ag eɗun aon ii uɗimna. Kekeɗ ahilkad geha sipsip ahilkad diippeg, amu auntai laa ag iinab ehanadma.

³² Ag neegna daappeg, kekeɗ ag, ag bekkalkad, aɗelkad ele maɗi nid maɗi ah ele daaglagnu diin gokkulag. Ag ahilagnu oolag doyeb, ag eɗun uɗin daappeg anadlobnu kobol digdig hekkulag, amge ag amu hekkulag, amuppa ehanittak laa iinab aomna.

³³ Wan laappan danab ag ii doyadtteb ele, ag geha, ag Israel ag uɗat naɗi hena, keh ebatteb amu, wan laappan danab, ag ag ii doyadttem ele, ag lakkulag. Ag Israel, ag geha danab amu waalagppa daappeg, ag eheɗ nau hadappeppeg, ag bau dayak haen ahilag ohppa anamib daaglag.

³⁴ Ag geha uug amu oh anadppeppeg heppeg, kaaka aqakku.

³⁵ Yawe Nug geha mamattin nau heeb, digmak ag gatelagppa, baelagppa ele digma ba ukka ikkilagppan noak baelagppa batakku. Ag mamattin amu qeppeg iitta mekkunu elele iitta daakku.

³⁶ Yawe Nug heeb, ahilkad kekeɗ ag eɗadna heppeg, king ag nug gumadkkunu meppig ele nug, ag ele, ag oh wan ag ii dootteb ele amuppa gokkulag. Am ag mamelkad aɗi ag wan amu, ag ele ii dooppig ele. Anam daanna, ag am diia ukka laih me dayak danab ah daan, ag kayak adppa, menppa ele hattak, ag amu noolagppa dup noa binag mak kobol hekkulag.

³⁷ Anam beeb amu, wanppan wan laalappanu danab ah, Yawe Nug lamatte, ag goppig, ag oolagppa daatteb ele amu, laa amu ag kobol ahilagppa bekku amu anidppeg, ag ameg iɗuak doon, ahilagnu, “Keeke hamunab,” ele doon, imadkkulag.

³⁸ ⌊Amu haen ag Israel, ag ippa, ahilag wanppa daanna,⌋ ag dad okkai eppaglag, amge ag meu huana ii aomna. Amunu diig am, tap-lokus dad ahilkad lakkulag.

³⁹ Ag grep dad hena atognoadkkulag, amge ag grep meu ii aomna, amunu ag wain laa hena ii lamana. Amunu diig am, gawat ag grep ebatteb, ag amu heppeg nauhkku.

⁴⁰ Ag olip ad ahilag wanppa eppaladkkulag, amge ag olip goɗen ii aomna. Amunu diig am, olip meu lep ii mak mumuɗna, nena gokkulag.

⁴¹ Ag nid naunau menuadkkulag, amge ag ele ii daamna. Amu bekkunu diig am, kekeɗ ag banppa diin goppeg, ag appa ag eppelagppa daaglag.

⁴² Tap-lokus huanaknab geha ahilag ad, amu keh ele hadappeg nauhkkulag.

⁴³ Wan laihnu danab, ag uɗin, ag oolagppa daatteb, ag geha tuɗidib ɠagattag bebeppeg, ag amu geha tuɗidib bodoettaglag.

⁴⁴ Danab laihnu uɗiak, ag oolagppa daatteb, ag geha lon mattaglag, amge ag amu, ag ag lon mattaglagnu elele iitta daaglag. Danab amu ag ikki bia daaglag; ag amu, ag am boob bia daaglag.

⁴⁵ Am ag Yawe, ahilag Kayak, ag haknunab anak, amu ɗo ele Nug ag mattom, ag amu dim lamittak uuglag dayeb amu, diig amunu eheɗ laa awaknu anak waappa dayak imu oh ahilagppa bekku. Ba dayebeb, ag padal mekkulag.

⁴⁶ Ag Yawe dimedappeg, Nug heeb, eheɗ laa awaknu anak waappa dayak amu beppeg, amuam uɗat naɗi, Kayak heumnu at daatte ippunattatta, uɗat ɠagattag Kayak heum ele ippunadkku. Am anam daakku, am ahilagnu, ag buɗulkad dilag ele hanhan anamib daaglag.

⁴⁷ Yawe, ahilag Kayak, Nug ag keeke kuɗumnab matteb, ag haen amuppa Nug waappa daanna nuhig maɗi nid daaglagnu gamag ahak, yag bak ele ii dooglag dayeb amu,

⁴⁸ aakku Yawe Nug kekeɗ maatteb, ahilagppa uɗippeg, ag ahilag maɗi nid daan, uɗat naunab henan daaglag. Ag geha enug aqakku, le baalag diikku, bam iitta daaglag, keeke ohnu tutu mak daaglag. Kekeɗ ag eheɗ nau hadappeppeg ukkeb ukkeb, ag nauhna autnanab aoglag. Amu bekku diig am, ag oolag ena, gamag ahak ele Yawe waappa daanna nuhig maɗi nid ii daappig.

⁴⁹ Yawe Nug wanppan wan laanu danab, ag am atu umanabnu amu, Nug ag diia uɗikku. Danab amu ag ai igel, doɗ nakok laa aokkunu notte amubia hekkulag. Am ag danab amu nailag madippeg doon, oolag ii maidkku.

⁵⁰ Am wan amuppan ban danab, ag iɗulkad am danab ag anadna baɗatteb. Ag am danab kaino dilagnu ena elele ii dootteb, ag am oo gai-iitta doya oo metta ehanittak kobol ele danab ah bau dilagppa ii hetteb.

⁵¹ Wan amuppan ban danab ag doɗ manan nalkad, ee ele oh lappeg, ag Israel, ag geha enug aqeb mauhkkulag. Ag ee aeg, wain bau, olip goɗen, makau nag laa, sipsip nag laa ele iinab uuppeg daakku amunu, ag nauhkkulag.

⁵² Danab amu ag aab ahilkad amu oo mattan aqaknu maadna daanna, ban hena, ag aabnu aɗ attan, ɠagattag ele oh loppaɗadkkulag. Aɗ amu ag ehanadppeg, kekeɗ ahilkad ag ii aqamna anam dabmekkulag, amge amuam genab iitta. Am genab, danab amu ag Yawe, ahilag Kayak, ag Nug wan madatte ele amuppan aab ohnab banelag gona, oo mattan aqadkkulagnu maadna daaglag.

⁵³ Danab amu ag aab ahilkad oo mattan aqadkkulagnu maadna daan heppeg, ag ee aoglagnu elele iitta daan, enugnu uug naunab anidna, ag geha nid naunau, ag bekkalkad, aɗelkad ele, Yawe, ahilag Kayak, Nug ag mattom amu, ag ag aqan laadkkulag.

⁵⁴ Am danab laa ag oolagppan, nug hanhan laa dilagnu oo doyak okkai dootte ele, haen nau amu beeb, nug nug awagnu, amagnu, nug wau gamagnabnu, nid nuhikkud ii mauhppignu ele amu, nug amu oh dilagnu oo ii bodoetta, le mekku.

⁵⁵ Nug geha teppu lakku ele amu, nug ag maha nakok laa mattaknu uukku. Teppu amuam nug nid nuhignab laa teppu. Kekeɗ ag aab oo mattan aqadkkulagnu maadna daaglag amunu, nug aɗitai laa awa lakku iittanu, nug anam aakku hekku.

⁵⁶ Am ah laa ag oolagppan, nug hanhan laa dilagnu oo doyak okkai dootte ele, nug kakah laa keeke, nug keeke amu nauhmanu dabmak okkainab aotte ele, haen nau amu beeb, haen amuppa nug gamu nuhignunab, nug nuhignu oo mauhtte ele, nug nuhignu, o bekkanu, o aɗegnu ena ii doya, ee keeke madakkunu uua doyaya,

⁵⁷ nug nid yuɗ bau menua amu, nug nid amunu lo, nid amu ele ahilagppanu lokkumkku. Aɗinu? Kekeɗ ag aab amu oo mattan aqadkkulagnu maadna daaglag, nug aɗitai laa awa lakkunu iitta amunu, uug nau amuppa nug nukka nug lokkumakppa lakku.

⁵⁸ Yawe, ahilag Kayak, Nug binag amahlak oppiaawak ele, danab ag nuhignu dabmenana, ag ebehilag oh bodoetta le mette ele amu, ag nuhignu anam ii dooglag dayeb, ag nuhig ɗo nai buk imuppa yaak daatteb, ag amu tutukku ii dim lamidkkulag dayeb amu,

⁵⁹ Yawe Nug ahilagppa, amu ag buɗulkadppa ele, Nug ahilagppa oɗe naunab nau digdig danab ah huanak aqe mauhtteb, uug naunab digdig, haen elab daatteb, amu aria, oɗe laala ele, laa heeb, iitta maknu elele iitta, Nug amu ahilagppa meeb nekku.

⁶⁰ Nug heeb, oɗe nau ag Isip appa daaegeg, Isip aqaeg anidna baɗappig ele amu, oɗe amu ahilagppa beebeb, ag eɗun, ena ii daamna.

⁶¹ Ele amu, Yawe Nug geha ahilagppa oɗe oh, uug naunab ele oh, Ɗo Nainu Bukppa ii yaak ele, amu oh ahilagppa meeb beebeb ukkeb, ag oh nauhna iitta mekkulag.

⁶² Am ag kuɗumnab habppa hoɗoppai daatteb bia daaglag, me laib laib aakkuib daaglag. Ag Yawe, ahilag Kayak, ag Nug oɗe ii doon oiglag, amunu anam bekku.

⁶³ ⌊Ag Nug dim lamittegeg,⌋ Yawe Nug ena doya ehanatte, ag ena daan, kuɗum appatppig, amubia ag Nug dim ii lamidkkulag, ag ena daamnanu, Yawe Nug ag hatteb, padal mena, iitta mekkulagnu ena dookku. Nug heeb, ag auhppeppeg ukkeb, wan ag nona aon daaglagnu daatte ele, ag amuppa ii daamna.

⁶⁴ Yawe Nug ag wan imuppanu maatteb gona, tamtam wanppan wan ohppa daaglag amunu, ag baula wan imuppa ii daamna. Appa ag danab laihnu dilag kayak menppa, adppa ele hadappig amu; ag amu, ag mamelkad aɗi ele ii dooppig ele amu, ag amu noolagppa dup noa binag mak kobol hekkulag.

⁶⁵ Wanppan wan anen anenppa amu, appa ag oolagppa ag aben ena, maɗoɗppa dayaknu laa ii anidmana. Yawe Nug heeb, ag eheɗ naunab baɗaglag. Ag eɗun aabppa uɗiglagnu oolag huannab hekku, me ag uɗiglagnu elele iitta daaglag. Ag, “Ig am eɗut ena ii daamta,” aakkuib dabmekkulag.

⁶⁶ Ahilkad kekeɗ ag haen oh alet, ag aqaglagnu bappaidna daatteb amu, ag amu dooglag. Ag haen oh baɗak okkai dooglag. Ag abenppa niiglag amu, ag buttua bau ahaglagte, ag amunppa uɗat hekkulag amu, ag tueb bau daaglagte, ag amu ii doomna.

⁶⁷ Buttua amu, ag akkulag. “Paha uudokku am ena!” Tueb amu, ag akkulag. “Paha wakkaɗkku am ena!” Ag anam akkulag diig am, ag keeke nau digdig ahilagppa bekkulag amu anadna, eheɗ nau baɗan, anam akkulag.

⁶⁸ Anam dayeb, Yawe Nug ag maatteb, ag uubppa eɗun Isip gokkulag. Amuam oiyak okkainab, ag baula ii hemananu da ag amelagppa ami. Ag appa gokkulag amu, ag aakku akka ahilkad kekeɗ eppelagppa begbeg maɗi nid maɗi ah ele daaglagnu hekkulag, amge auntai laa ag daden maadkkunu oo ii daakku. Moses nug anam Yawe oɗeppanu nai Israel danab ah mattom.