Duteronomi 27 - Nobonob Baibel

Ibal qaukoppa qaɗab qak

¹ Aria, Israel dilag ikki danab ag Moses ele hippaidna daanna, nug haknunab anak nai danab ah matta aum. “Ag haknunab anak nai gemu da ag madattem imu oh tutukku aɗeg!

² Amu deɗ ag Jodan le mataɗna, Yawe, ahilag Kayak, Nug wan madatte, ag amuppa nona amu, deɗ amuppa ag men okkai aon qappaladna, simen hakkab eleppa laaidna aɗeg!

³ Ag anam hewona, ag ɗo imu oh amuppa yeeg! Yawe, ahilag Kayak, Nug wan madatte, wan amuam wan enanag, wan ittag ele, amuppa ee meu huana otte. Yawe, ag mamelkad aɗi dilag Kayak, Nug wan amu ag madakkunu nai anan qakkom bia ag madakku. Amunu ag le imu mataɗna, wan amuppa nowona, haen amuppa ag nai imu yeeg!

⁴ Haen ag Jodan le mataɗna wana amu, ag Ebal qaukoppa men akkan qappaladna, simen hakkab eleppa laaitteg! Ag gemu, da ag haknunab anak nai attem imu bianab heig!

⁵ Anam hena, amuppa ag Yawe, ahilag Kayak, ag nuhig qaɗab qekkulag. Ag qaɗab amu menppa qekkulag. Ag aib aen mahappa men kuhappig.

⁶ Ag men ii kuhak ele aakkuib akkan, qaɗab amu qekkulag. Ag qena malona, ag amuppa manaknu ofa manadna, Yawe, ahilag Kayak, ag Nug mettaglag.

⁷ Ag amu hena, ag qaɗab amuppa laippu dayaknu ofa ele henana, ag doɗ manadna, Yawe, ahilag Kayak, ag Nug mettanna, ag Nug noobppa teppu amuppan ee hobul hena, gamag ahak ele ee laig!

⁸ Ag ɗo imu oh men, simen laidppig, amuppa miag atiak yaaglagoitte,” awa aum.

⁹ Aria, Moses nug anam ana male, mana mettak danab, ag ele Lewi buɗub amu, ag Moses ele hippaidna daanna, nug Israel danab ah amelagppa aum: “O Israel, ag toettan, daulag humeg! Gemu ag Yawe, ahilag Kayak, ag nuhig danab ah beppig daatteb

¹⁰ amunu, ag Yawe, ahilag Kayak, ag Nug oɗe doon, ag haknunab anak nai, amu ɗo ele, da gemu ag madattem imu aɗeg!” awa aum.

Qauko Ibal appa eheɗ awaknu anak

¹¹ Deɗ amuppaib Moses nug danab ah amelagppa haknunab nai imu mattom. Nug aum.

¹² Haen ag Jodan le mataɗna wana amu, Israel dilag huu okkai Simeon, Lewi, Juda, Isakar, Josep, amu Benyamin ele ag qauko Gerisim appa danab ah itadkkulagnu dayeg!

¹³ Aria, Israel dilag huu okkai Ruben, Gad, Aser, Seblon, Dan, amu Naptali ele, ag am qauko Ebal appa, eheɗ laa awaknu anak waappa dayaknu nai akkulagnu dayeg!

¹⁴ Aria, Lewi buɗub ag Israel danab ah oh dilagnu inam ekkulagoitte:

¹⁵ “Laa nug kayak hambuppuak dottog aɗi keekeppa ha, lokkumakppa qabatte amu, nug eheɗ laa awaknu anak waappa dayaɗ! Kayak hambuppuak dottolkad danab uɗat amu haknu doyak okkai ele amu, Yawe Nug dottog amunu ooppa uuaknab dootte,” aon akkulag. Ag anam aon appeg, danab ah oh ag, “Genab, anam dayaɗ!” akkulag.

¹⁶ Appeg, Lewi buɗub ag inam akkulag. “Aun laa nug mameg, o anig onig he nauhtte, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

¹⁷ Appeg, Lewi buɗub ag inam akkulag. “Aun laa nug layag mudippan laippu, nuhig tom maute wa, nuhig wan yab aotte amu, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

¹⁸ Appeg, Lewi buɗub ag inam akkulag. “Aun laa nug ameg gaɗuak ele laa omala he, ib apiɗidtte, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

¹⁹ Appeg, Lewi buɗub ag inam akkulag. “Aun laa nug nai doya mala hettoɗia epeɗia elele mettak kobol, wan laihnu danab ah, nid mamelkad mauhppig, amu ah qab dilagppa ele elele ii hette, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

²⁰ Appeg, Lewi buɗub ag inam akkulag. “Laa nug mameg wau ele gappai aoglah, nug eheɗ laa awaknu anak waappa dayaɗ! Aɗinu? Nug anam hekku dayeb amu, nug mameg hunu qette bia hette,” akkulag. Appeg, danab ah oh ag, “Genab, anam dayaɗ!” akkulag.

²¹ Appeg, Lewi buɗub ag inam akkulag. “Laa nug doɗ laa ele gappai aottep, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

²² Appeg, Lewi buɗub ag inam akkulag. “Nid aun laa nug appinag, nug nug ele anig mameg laippu, o iitta nug appinag am mameg, o anig aɗegte, nug nug ele gappai aottep, nug eheɗ laa awaknu anak waappa dayaɗ!,” akkulag. Appeg, danab ah oh ag, “Genab, anam dayaɗ!” akkulag.

²³ Appeg, Lewi buɗub ag inam akkulag. “Aun laa nug nome ele gappai aottep, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

²⁴ Appeg, Lewi buɗub ag inam akkulag. “Aun laa nug danab laa lokkumakppa qette, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab anam dayaɗ,” akkulag.

²⁵ Appeg, Lewi buɗub ag inam akkulag. “Aun laa nug danab beɗuppa aab iitta ele qaknu daden aotte, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

²⁶ Appeg, Lewi buɗub ag inam akkulag. “Laa nug ɗo imu dim ii lamidtte amu, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.