Duteronomi 26 - Nobonob Baibel

Ee tatam oɗutte awa, mana mettaknu, amu keeke obatak eblaih tanig ele ooppanu, laippu Kayak mettak ele

¹ Haen ag wan, Yawe, ahilag Kayak, Nug ag aulag daakkunu madatteppa nona, aon daanna, amu dimppa,

² na aun, na ee tatam oɗuttenu laala, ee amuam wan Yawe, ahilag Kayak, madakkunu hette, amuppan awak amu, na ee amu aon, kalegppa inan aon, Yawe, ahilag Kayak, Nug aben Nug onig aguppa daakkunu epeɗikku amu, na amuppa ukke!

³ Na gona, mana mettak danab aun nug haen amuppa uɗat amu hekku ele, na nug amegppa inam a! “Da gemu nai imu Yawe, nahip Kayak, Nug amegppa miagib madittem. Da wan laa, Yawe Nug ig mamenkad aɗi amelagppa, ig megakkunu nuhig nai ɠagattag qetta aum amu, da wan amuppa uɗimi daattem,” aon akkut.

⁴ Na anam appe, mana mettak danab nug battam ee ele amu eppenppanu awa, qaɗabppa Yawe, ahilag Kayak, Nug noobppa mekku.

⁵ Anam heeb, na Yawe, ahilag Kayak, Nug noobppa inam akkut. “Da mamelad aɗi ag am Aram danab, appalag diig iitta ele oinna, ag hubhub Isip wanppa nona daanna, ag appatna, huu okkainab bena, ɠagattag daappig.

⁶ Amge Isip ag ig eheɗ heikkegeg, guittak dootta, uɗat ɠagattag hetata daamut.

⁷ Isip ag anam eheɗ heikkeg, ig Yawe, ig mamenkad aɗi dilag Kayak, ig Nug unuqittut, Yawe Nug baanig doya, ig oonigppa naunab nau dootta, uɗat uug ele hetat, ig gai-iitta daautut, danab laa eheɗ heigppig anttom.

⁸ Yawe Nug anam antta, Nug nuhig ɠagattagppa, Nug ebehippa, Nug he, baɗak eheɗ nau dayom, amuppa, Nug nuhignu dabmettaknu kobol danab haknu elele iitta, amu uɗat ɠagattagnab ele heumppa, keeke amu ohppa Nug ig Isipnu awikka, omaikka uɗiom.

⁹ Nug anam haaha omaikke, aben imuppa uɗiut, amu wan imu, am wan enanag, wan ittag ele, imuppa ee meu huan otte, Nug wan imu mekkom.

¹⁰ Amunu, O Yawe, gemu da ee tatam oɗutte wan na da meɗameppanu aomi amu, da na medakkulnu uɗimi.” Na anam Kayak noobppa daanna akkut. Na amu oh awona, na kaleg amu, keeke ele Yawe, nahip Kayak, na Nug noobppa uuppe dayebeb, na Yawe noobppa dup nona binag mekkut.

¹¹ Na anam hewona, na Yawe, nahip Kayak, Nug keeke ena na mettomnu oo gamag ahak ele ee naɗi bappaidna lakkut. Lewi buɗub, amu wan laihnu danab ah, ag uɗin, ag oolagppa daatteb, ag ele ee lanak amuppa daaglagnu aib daut atiom.

¹² Maɗ ohppa na nahip keh ohnu obatak eblaih tanig ele ooppanu obatak laippu Yawe medakkutoitte, amge maɗ ewam awebeb amu, na amu hewona, na keeke obatak eblaih tanig ele ooppanu obatak laippu amu Lewi buɗubppan mana mettak danab iitta, wan laihnu danab ah, nid mamelkad mauhppig, amu ah qab ele madappeg, ag ee elele aab amuppa daanna lakkulagnu elele daaglagoitte.

¹³ Na anam henana, na Yawe, nahip Kayak, na Nug amegppa inam akkutoitte. “Da keeke obatak eblaih tanig ele ooppanu obatak laippu awen, Lewi buɗub, wan laihnu danab ah, nid mamelkad mauhppig, ah qab ele dilagnu, haknunab anak ihinignu ame bia hemi. Da nahip nai haknunab anak laa amu ii tippalmi; daul ele ii atiom.

¹⁴ Da mahiakppa dayeye amu, da obatak 10 ooppanu, obatak laippunu ee laa ii lami; da Kayak ele ouqa dayaknu elele iitta haenppa keeke laa ii lauɗidmi; mauhakppa iinab mei waum. Da na, Yawe, ihinig Kayak, da na oɗen dim lamitte, na keeke ohnu, haknunab anak nai ig mekkame amu, da hemi.

¹⁵ O Yawe, na hab aabppanu, amuam nahip dayak aben, oppiaawak ele, na appanu neegppe neeb, na danab ah nahipad Israel, na ig itigna, wan na mekkame ele itidkkutnu oɗ medattem. Na ig mamenkad aɗi dilagppa madakkutnu anana, nahip nai ɠagattag qettan ame, na aakku amubianab hena, ig mekkame. Wan imuam wan enanag, wan ittag ele, imuppa ee meu huana otte.” Na anam akkut.

Yawenu haknunab anak nai dim lamittaknu anak

¹⁶ Gemu amu Yawe, ahilag Kayak, Nug ɗo digdig imu dim lamidkkulagnu atte. Ag meulag ohppa, oolag ohppa ele dim lamidkkulagoitte.

¹⁷ Gemu ag Yawe Nug ahilag Kayak daatte anan malappig. Ag nuhig kobolppa oinna, ag nuhig ɗo iɗu iɗu, nuhig haknunab anak, nuhig ɗo laa ele dim lamidna, ag Nug keeke ohnu atte amu, ag anam hekkulagnu ele appig.

¹⁸ Yawe Nug gemu, ag am nuhig danab ah, ag nuhikkudnab danab ah daattebnu atte. Nug anam hekkununab nai anan qakkom, amu Nug ag nuhig haknunab anak nai oh dim lamidkkulagoittenu ag amelagppa aum.

¹⁹ Ag anam hekkulag dayeb amu, Nug heeb, ag wan laa oh eɗattak daan, ag binag okkai, amu onig okkai ele aoglag. Ag geha Yawenu oppiaawak ele daaglag. Ag am Yawe, ahilag Kayak, ag nuhignu daaglag. Nug heeb, ag anam daaglagnu nai anan qakkom amu, Nug amubianab hekku. Moses nug anam mattiom.