Duteronomi 25 - Nobonob Baibel

¹ Danab aɗit laa aa mattiak ahilah aoya, hettoɗiakppa goya daaglah dayeb, epeɗiak danab nug laa amu tutukku atte, laa nug eheɗ heum akku.

² Amu epeɗiak danab nug laa eheɗ heum ele bu qaknu akku dayeb, epeɗiak danab nug anam haknunab aum amu, nug heeb, eheɗ hak danab nug noobppa niiebeb, nug mataɗak gane eheɗ heumnu aokkun daatte amu, nug anam mettaglagnu ab, ag anam hekkulag.

³ Ag nug gaɗa mataɗak 40 mettaglagnu elele, amge epeɗiak danab nug ag danab bu aotte, ag nuhignu eheɗ nau, doɗ bia anidmananu, nug amu eɗittak aib heum.

⁴ Na makau okkai ebehi ele ee aeg, dappunkkeg ele piɗe piɗe daaglagnu uɗat ha, ee laabob, na aib lanak uukkunu oɗe hautna qakkame.

⁵ Eamag aɗit laa aa wan laippuppa daayya, laa nug bekka laa iitta dayaya mauhkku dayeb, nug qappu nug danab laa ii aoma. Iitta. Laa mauhom, nug awagtai, amagtai nug ah amu awa, gamu daakku. Nug anam hekkunu daatte.

⁶ Anam amu, aa bekkalah tatamnu, amu gamu mauhom oela qettaglah. Anam dayeb, danab mauhom, nug onig Israel ippa ii qettoɗma, bekka tatamnu ah nug menutte amu, gamu danab mauhom ele, nug bekka aakku daatte.

⁷ Amge danab mauhom ele nug awagtai, amagtai nug qappu aokkunu uukku dayeb amu, ah nug ikki danab dilag qagmak aben, aab nuhig odppa daatte, nug appa ukka, gamu mauhomnu ikki danab amelagppa inam akku. “Da gamul layag huh laippu, nug nug layag, da gamul mauhom amu, nug nug onig Israel ooppa humakkunu uuom. Nug da awiɗak uuom,” awa akku.

⁸ Anam ab, ikki danab aab amuppan ag danab amu onigppa eppeg dob, ⌊ag nug aɗi diignu uuom doon anidna,⌋ ag nug aokkunu nug ele mattiglag. Ag anam heppeg, nug ah amu awaknu uua, ɠagattag dayeb amu,

⁹ ikki danab noolagppa ah qab nug ukka, danabnu baeg gaɗa baegppan uɗitta awa, danab amu iɗu hunu qekkuoitte. Ah nug anam hewowa, nug akku, “Danab nug awagtai, o amagte onig humak uukku amu, nuhignu inam iikku bekku,” awa akku.

¹⁰ Ah nug anam aakku heeb, danab amu baegppannu amu, Israel laa ag amu dilagnu, “Danab nug baegppan baeg gaɗa uɗidppignu bekkod,” akkulag.

¹¹ Israel danab aɗit laa aa nug qebepeɗ, laa wau nug gamu ehanitta, danab laa tata aɗa pagukkunu hekku dayeb amu,

¹² ag ah amu eppeg okkulna aoglagoitte. Ag ah amunu oo gai-iitta doya oo metta ehanittak kobol dim lamidna, aib heppig.

¹³ Ag keekenu uug anidkkulagnu amu, ag skel uug tutukku ippunadtte ele, ag amuppa hekkulagoitte.

¹⁴ Ag keekenu okkai anidkkulagnu, ag melemel okkai tutukku ippunadtte ele, ag amuppa hekkulagoitte.

¹⁵ Ag wan laa, Yawe, ahilag Kayak, Nug wan amu ag madakkunu hette, ag wan amuppa haen elab ena daaglagnu amu, ag uug doyaknu keeke, ag keeke okkai dooglagnu, ag skel tutukku, melemel tutukku ele aakkuib aɗan hekkulagoitte.

¹⁶ Aɗinu? Aun aɗi ag kobol hambuppuakppa keekenu okkai melemel eheɗppa, o keekenu uug skel nauppa anttaknu hetteb amu Yawe, ahilag Kayak, Nug amu dilagnu ooppa uuaknab dootte.

¹⁷ Haen ag Isipnu ahan uɗiegeg, Amalek danab ahilagppa heppig, hak ahilag amu ag daulagppa doaɗ!

¹⁸ Ag ebehilag bodoettak dayeye, ag gai-iitta mena daanna, ag oolagppanu laa ag qinonob dim uɗiegeg, Amelek danab amu ag banelag uɗin, ag laa dim uɗippig ele aqappig. Amelek danab amu ag Kayaknu baɗak iitta ele heppig.

¹⁹ Ag anam heppig amunu, haen Yawe, ahilag Kayak, haen Nug heeb, ag hik aon ena daaglagnu, wan Nug ag aulag daakkunu madatte, ag amuppa daanna amu, haen amuppa ag banelag gona, Amalek danab ah ag iitta mena autna aoppeg, hab waappa, danab laa nug baula ahilagnu dab-ii-memanu heig! Ag amu hekkulagnu aib daulag atiom.