Duteronomi 24 - Nobonob Baibel

¹ Am danab laa nug ah laa wau daakkun awom, amge dimppa danab amu nug ah amu uɗa nak kobol laa heum dookku amunu, nug ah amunu oo ii hekku dayeb, nug uɗug laa ewau okkulaknu ya metta heeb, uuitteb gokkutai.

² Danab amu nug anam heeb, ah amu nug danab amu uuitta ukka, danab laa aokku dayeb,

³ danab gehanu awom ele, nug ele nuhignu ena ii doya, nug uɗug laa ewau okkulaknu ya metta, nug heeb uuidkkutai, o gamu gehanu nug mauhkkutai. Anam daakkutai amge, diig amunu

⁴ gamu tatamnu nug ah amu, Kayaknu neekkakppa nug ooppa dubuttid tak ele daatte, nug Kayak ele ouqa dayaknu elele iitta beum daye, eɗua ii aoma. Aɗinu? Yawe Nug amunu ooppa uuaknab dootte. Ag heppeg, Yawe, ahilag Kayak, Nug wan ag aulag daakkunu madakkunu hette ele amu, wan amu dubuttid ele daakkunu aib heppig.

⁵ Danab laa nug ah bau awom dayeb, ag nug aib ban danab bekkunu uɗat medappig; o nug aib tamaniak uɗat laa hekkunu appig. Nug aabppa maɗ laippu anam hamunab dayaya, ah bau awom amu gamag ahak medatta daakkuoitte.

⁶ Amu men aɗit, danab nug amuppa ee aeg ganuɗtte ele, o men aɗit amunu laa attannu amu, na men aɗit amu, o amunu men attannu, na amu keeke lonnu onig awak daakkunu aib aome. ⌊Amu awaknu am kobol eheɗ aakku.⌋ Men amu mameg nug amuppa ee aeg bret haknu ganuɗtte amunu, nug amuppa ha awa lanana, bau daatte. Anam amunu, men amu awaknu amu kobol nau.

⁷ Amu laa nug Israel ted laa aɗa awa, nug nuhig begbeg maɗi nid bia hedakku dayeb, o nug heeb, laa daden mekkulag dayeb amu, danab amu heum ele nug mauhkkuoitte. Kobol nau ag oolagppa daamanu, ag heppeg, aib dayom!

⁸ Ag gaɗalagppan oɗe nau ohnu amu, ag mana mettak danab, ag ele am Lewi buɗub amu, ag amu dilag nai oh dim lamitta haknu atteb amu dim lamitteg! Da haknunab anak nai mana mettak danab mattami amu, ag amu dim lamitteg!

⁹ Ag Isipnu uɗiegeg, Yawe, ahilag Kayak, Nug Miriam, nuhigppa attem heum ag amelagppa doaɗ!

¹⁰ Haen na laipad Israel oolagppan laa aɗi lon mettana, na dimppa keeke lonnu onig awak daatte aokkunu, na aib nug laug ooppa nona, keeke amu aome.

¹¹ Na dimittim daappe, keeke amu mameg nug awa, dimittim doa medakku.

¹² Am laipad Israel oolagppa laa nug daɗektai, nug layaknu lamen aakkuibtai keeke lonnu onig awak daakkunu elele aɗatte dayeb, na lamen amu aib tuqan aɗan daame.

¹³ Nahipad mudippan laippu nug lamen amuppa niikkude amunu, na lamen amu uu-ii-doobob, eɗun medakkut. Na amu hekkut dayeb, na laipad mudippan laa amu nug amunu, “Ena heme,” awa akku, amu Yawe, ahilag Kayak, Nug danab anam hette ele, Nug nuhig hak amunu genab tutukku hak kobol dookku.

¹⁴ Am laa nug uɗat nid daatte me, nug am daɗek, na danab anam am aib eheɗ hettame. Nug am Israel tedte, o nug am wan laihnu danab nug uɗia, ag oolagppa aab laappa daattetai, na aib eheɗ hettame.

¹⁵ Nug am daɗek, amunu nug ee, amu keeke laala ele daden mekkunu, nug men doɗonu oo daatte. Anam amunu na uɗat hak nob nuhig deɗ ohppa uu-ii-doobob medakkut. Na anam ii hekkut dayeb amu, danab amu nug hak amunu Yawenu gayeb, hipuninnu aab na beɗunppa daakku.

¹⁶ Ag nid dilag hipuninnu anig mameg ii aqappeg mauhkkulagoitte. Am anig mameg hipunin heppignu nid ii aqappeg mauhkkulagoitte. Aun laa nug eheɗ heum, am nukka nuhig eheɗnu qeppeg mauhkkuoitte; laa ii mauhma.

¹⁷ Ag wan laihnu danab ah dilagppan nai doya mala hettoɗia epeɗia elele mettak kobol dim lamidkkulagoitte. Ag nid naunau mamelkad mauhppig ele dilagppa ele anam hekkulagoitte. Ag ah qabnu lamen, keeke lonnu onig awak daakkunu ii aoglagoitte.

¹⁸ Isip appa, ag begbeg maɗi nid daaegeg, Yawe, ahilag Kayak, Nug ag begbeg maɗi nid dayak amunu qagaiettakppanu eɗua uhuqak dayaknu heum, gemu ag appa ii daatteb amu, dabmak amu hanhan ag daulagppa doaɗ! Diig amunu da ag haknunab anak nai imu madattem.

¹⁹ Na ee meu dad nahip-ppanu aonna, na ee gumu aɗa ehakkak awa uɗiaknu laippu daut atieb uɗion, na aib aokkutnu eɗun gome. Yawe, ahilag Kayak, Nug na aɗi hettem antta, Nug na itidkkunu, na uuppe, wan laihnu danab ah, nid ag mamelkad mauhppig, amu ah qab ele dilag dayaɗ!

²⁰ Na olip meu olip adppan aonna amu, na baen aɗu eɗun aib tuqame. Olip laala anidna ii aome ele amu, na uuppe, wan laihnu danab, aria nid naunau mamelkad mauhppig, ah qab ele dilag dayeg!

²¹ Na grep meu, grep muɗippan aonna amu, na baen aɗu eɗun aib tuqame. Grep laala anidna ii aome daatteb amu, na uuppe, wan laihnu danab, aria nid ag mamelkad mauhppig, amu ah qab ele dilag dayeg!

²² Ag anukka Isip wanppa begbeg maɗi nid daappig amu amelagppa doaɗ! Ag Isip dilag begbeg maɗi nid daappig, diig amunu da ag haknunab anak nai imu ag madattem.