Duteronomi 23 - Nobonob Baibel

Yawe noobppa dup noa binag mak kobol haknu nai

¹ Am danab laa nug hipab otaɗak, o hipab nauhak ele dayeb amu, nug Yawenu danab ah, Israel, nug ag ele laippunab ii daama.

² Ah ag ib baag nid menuadkkulag, ag amu buɗulkad menuak laippu bia 10 batak, ag Yawenu danab ah Israel, ag ag ele laippunab ii daamna.

³ Amon tedte, o Moap tedte, o nug buɗubppud laala menuak laippu bia 10 batak, ag Yawenu danab ah Israel, ag ag ele laippunab ii daamna.

⁴ Danab amu ag, ag haen ag Israel ag Isipnu ahan ukkaeg, ag ena hena, ee, le ele ii madappig. Iitta. Ag Beor bekka Balam, Peto ted Aram Naharaim uppanu amu, ag nug uɗia, ag eheɗ laa awaknu anak waappa daaglagnu akkunu, nug uɗat medappig.

⁵ Amge Yawe, ahilag Kayak, Nug ag Israel, ahilagnu oo mauhak dootte amunu, Nug Balam, ag Israel, ag eheɗ laa awaknu anak waappa daaglagnu nai akkunu uua, nug amu amananu ib keldoum. Nug Balam anam hekkunu uua he, ii beum, amge Yawe Nug he, Balam nug itittak ena ag mattom.

⁶ Ag maɗoɗ dayaknu Moap, Amon ele oolag laippu dayeb, nug tituanna nai qakkak nai laippu aib qagappig.

⁷ Ag Edom dilagnu, Isip dilagnu ele oolagppa uuaknab aib dooppig. Aɗinu? Edom ag ele amu, ag am eamag bia. Aria, Isipnu amu, ag appa wan laihnu danab ah ag oolagppa daappig.

⁸ Menuattak huu laippu bia ewam batak amu, menuattak amuppan Isip danab ah, Edom danab ah ele, ag Isipnu, o Edomnu ahan uɗippig ele, ag ag, Yawenu danab ah, Israel, ag ag ele laippunab daaglagnu elele.

Dim lamittaknu do nai naunau laala

⁹ Haen ag ahilkad kekeɗ banelag gona, haen tutu dayaknu aab kalakppa daanna amu, ag Kayak ele ouqa dayaknu elele iitta keeke, ag keeke amu oh dilagnu awaidna dayeg!

¹⁰ Aun laa nug tul niia, hipab leppu hamu gokkaɗom dayeb amu, nug Kayak ele ouqa dayaknu elele iitta amunu, nug haen tutu dayaknu aab kalak amu uua aha, deɗ laippu oh amu laih ukka daakkuoitte.

¹¹ Tueb meebeb nug le laakku. Anam le layeb, aam noobob, haen amuppanab amu, nug eɗua haen tutu dayaknu aab kalakppa gokkunu elele.

¹² Amu ag haen tutu dayaknu aab kalak giginppa appa gona hippuɗkkulagnu aben laa epeɗiglag.

¹³ Ag anen anen ad maha nakok laa, wan buuaknu aɗaglagoitte. Aria, haen ag hippuɗkkulagnu hena amu, ag ad amuppa moɗ aon biiona, eɗun moɗ keldokkulagoitte.

¹⁴ Haen tutu dayaknu aab kalak am Yawenu tituanak daakkuoitte. Amunu diig am, Yawe, ahilag Kayak, Nug haen tutu dayaknu aab kalakppa eɗua ona, eɗua doawa, atognoattatta, ahilkad kekeɗ ippulag oo nekkuoitte amunu, Nug keeke eheɗ antta, dimattamade, ag anam heig!

¹⁵ Am begbeg maɗi nid danab o ah nug nuhig okkaippan oola, nahip-ppa daakkunu uɗieb amu, na aib eɗua, nuhig okkai gumitta gokkunu wagai meme.

¹⁶ Uuppe, nug aab attennu oo hette, nug amuppa ag oolagppa daakku. Ag aib eheɗ hedappig.

¹⁷ Israel danab o ah laa, nug laa ag ib baag ah, o ib baag danab ag ahilag kayak hambuppuak laulkadppa daan, ahilag uɗat hetteb amu, ag Israel, ag oolagppan laa nug amubia aib dayom.

¹⁸ Yawe, ahilag Kayak, Nug ib baag ah, ib baag danab ele, Nug ahilagnu am ooppa uuaknab dootte amunu, danab o ah amunu laa ib baag kobol hakppa men doɗo awa medakku dayeb, na men doɗo amu aon, Yawe, ahilag Kayak, Nug laugppa gona, Yawe keeke genab medakkutnu nahip nai anan ɠagattag qettan ame ele, na amu Yawe men doɗo amuppa medakkutnu aib meme.

¹⁹ Na laipad Israel ag lon nahip-ppanu aoglag dayeb amu, na lonnu intres aib aome. Amuam men doɗote, o eete, o keeke laala ele eɗua daden mak haenppa tuɗittak ele awaknu aib heppig.

²⁰ Na wan laihnu danab, na amu dilagppanu lonnu intres aokkutnu elele, amge Yawe, ahilag Kayak, Nug ag wan, ag amuppa nona aon daaglagnu hetteb amu, amuppa Nug na aɗi aɗi hebeppe, Nug na ena itidkkunu, na lonnu intres Israel dilagppanu aokkutnu aib heme.

²¹ Am na genabnab haknu nai anan qakkak laa, Yawe, ahilag Kayak, na Nug amegppa anam ame dayeb, na ame bianab genab he! Aɗinu? Yawe, ahilag Kayak, Nug na genanabnab nai anan qakkak ame bia, na amu hekkutnunab dabmak aɗa daakku. Na anam ii hekkut dayeb amu, hipuninnu aab am na beɗunppa daakku.

²² Amge na genabnab haknu nai anan qakkak ii hekkut dayeb amu, hipuninnu aab am na beɗunppa ii daama.

²³ Na nakka na dabmak aona, na aɗi keekenu Yawe, ahilag Kayak, na Nug toppa genabnab haknu nai anan qagakkut amu, na genabnab haknu nai anan qakkak heme amu, na ame bia, na dabmena autna aona he! Amuam na aɗi keekenu dabmenan, doonna oɗenppa madittem amunu keeke.

²⁴ Na mudippan laipad dilag grep dadppa gonana, amu na grep meu gane aon lakkutnu oot hette amu, na aon lakkutnu elele, amge na aib laala kalegppa inadna aon gome.

²⁵ Na mudippan laipad dilag ee aeg dadppa nonana, keeke aelkad laala eppenppa aon lakkutnu elele, amge na qep-ppa ii okkuladna diimna.